Thursday, May 30, 2024
- Advertisement -
- Advertisement -

የሳምንቱ ገጠመኝየሳምንቱ ገጠመኝ

የሳምንቱ ገጠመኝ

ቀን:

የዛሬ አምስት ዓመት አካባቢ የገጠመኝን ከትውስታዬ ማህደር እንዲህ አቀረብኩላችሁ፡፡ ያኔ በአንደኛው እሑድ ማለዳ ራስ ሆቴል በረንዳ ላይ ሆኜ ቡና እየጠጣሁ ጋዜጣ እያነበብኩ ነበር፡፡ እዚህ አካባቢ ከመጣሁ ስለቆየሁ ነው መሰል፣ በረንዳው በሰው ተሞልቶ ሁሉም ከቢጤው ጋር ሲያወጋ ለእኔ አዲስ ክስተት ነበር፡፡ ከዓመታት በፊት ይኼን የመሰለ ድባብ ቢኖርም፣ ያየሁት ግን በጣም ደስ ይል ነበር፡፡ ይኼን እያሰብኩ ሳለ ከበስተጀርባዬ ያለው ጠረጴዛ ላይ የተቀመጠች አንዲት ውብ ሴት፣ ዘመናዊውን አይፎን ስልክ ጆሮዋ ላይ ለጥፋ ዝግ ባለ ድምፅ እያወራች ነበር፡፡ ውበቷ ማርኮኝ ነው መሰል ወንበሬን 45 ዲግሪ አዙሬው በስላች ከፊት ለፊቷ ገጭ አልኩ፡፡ በውበቷ ላይዋ ላይ ኢንቨስት የተደረጉት ጌጣጌጥ፣ አልባሳት፣ መጫሚያ፣ ቦርሳና ስልኳ ልዩ ሞገሥ ሰጥቷታል፡፡ ጠረጴዛው ላይ ያስቀመጠችው የቢኤም ደብልዩው ቁልፍ ደግሞ ዓይን ያጥበረብራል፡፡

ሁለመናዬን ስቼ ፈዝዤ እያየኋት ሳለሁ ሁለት አካላቸው በስፖርት የፈረጠመ የሚመስሉ ጎልማሶች፣ በአንገታቸው ሰላምታ እየሰጧት ሲቀመጡ አንገቴን ሰበር አደረግኩ፡፡ የስልክ ንግግሯን እስከምትጨርስ የሚጠባበቁት ጎልማሶች አይፎን ስልኮቻቸውንና የዘመናዊ መኪና ቁልፎቻቸውን ጠረጴዛው ላይ ሲመድቡ ሳይ፣ ይህችን ውብ ሴት እንደማልመጥናት ወዲያው ገባኝ፡፡ የእኔ ሐሳብ የስልክ ንግግሯን ስትጨርስ በተለመደው የአራዳ ልጅ አቀራረብና ባለኝ የመቀላጠፍ ተሰጥኦዬ ልቀርባት ነበር፡፡ አሁን የተረዳሁት ነገር ቢኖር ከከባድ ሚዛን ጋር መወዳደር አለመቻሌን ነው፡፡ በአንድ ፕሮጀክት ውስጥ ወር ሙሉ ለፍቼ ከሃያ ሺሕ ብር በላይ የማላገኝ ሰው አቅሜን ማወቅ ይኖርብኛል፡፡ ለማንኛውም ወደ ገጠመኜ ልመልሳችሁ፡፡

ያቺ ውብ ወይዘሮ የስልክ ወሬዋን ጨርሳ ጠረጴዛ ከተጋሩዋት ሰዎች ጋር ከልብ በመነጨ ፈገግታ እየተሳሳመች ሰላምታ ከተለዋወጠች በኋላ፣ አስተናጋጅዋ ቀርባ ትዕዛዝ ተቀብላቸው ሄደች፡፡ ሴትየዋ ውኃ፣ ሁለቱ ጎልማሶች ደግሞ ማኪያቶ ይዘው ሦስቱም ሲጋራቸውን ማጨስ ጀመሩ፡፡ በዚህ መሀል ዝግ ባለ ድምፅ የተገናኙበትን ጉዳይ ማውራት ሲጀምሩ ድንገት አንድ አባባል ጆሮዬ ውስጥ ጥልቅ አለ፡፡ ሴትየዋ፣ ‹‹ይኼ ፈጽሞ ሊያሳስባችሁ አይገባም፡፡ ስልሳዎቹ ኮንቴይነሮች ያለምንም ሥጋት ሐሙስ ምሽት ላይ ይደርሳሉ፡፡ ለዚህም ከአስተማማኝ ሰው መተማመኛ አግኝቻለሁ፤›› ስትል ሰማኋት፡፡ ከውጭ የሚገቡ ዕቃዎች ተገቢውን ታክስ ከፍለው በሕጋዊ ሰነዶች አማካይነት በሕጋዊ መንገድ የሚገቡ ከሆነ፣ ‹‹ሥጋት አይግባችሁ›› የሚለው አባባል ግራ አጋባኝ፡፡

- Advertisement -

አንገቴን የያዝኩት ጋዜጣ ላይ ደፍቼ የሚነጋገሩትን በጥንቃቄ ማዳመጤን ቀጥያለሁ፡፡ ይህች ቆንጆ ሴት ለእኔ እንደማትሆን የበለጠ እያረጋገጥኩኝ ወሬያቸውን እየሰማሁ ነው፡፡ አንደኛው ግራና ቀኝ ገልመጥ ብሎ፣ ‹‹ግን እኔን የሚያሠጋኝ የዚያ የቀልቃላ ሰው ወከባ ነው፡፡ እሱ እዚያም እዚህም እየረገጠ እንዳያስበላን ነው የምፈራው፤›› ሲል፣ ውቢት ጀነን ብላ፣ ‹‹አትሥጋ እሱም አደብ ገዝቷል፣ እነዚያ የሚያስፈሩትም በገንዘብ ተይዘዋል . . . ›› እያለች ማብራሪያ ስትሰጥ ሁለቱ ጎልማሶች ፈገግ አሉ፡፡ በዚህ መሀል የሴትየዋ ስልክ ጮሆ መነጋገር ስትጀምር፣ ሁለቱ ጎልማሶች ስለሚያገኙት ጥቅም በዝቅተኛ ድምፅ እየተነጋገሩ በጠረጴዛው ሥር ተጨባበጡ፡፡ ሴትየዋ የስልክ ንግግሯን ጨርሳ በመጠኑ በሚሰማ ድምፅ፣ ‹‹አብሽር ሁሉም ነገር አልጋ በአልጋ ሆኗል የቀረን ሚሊዮኖችን መቁጠር ብቻ ነው፤›› ብላ የመኪናዋን ቁልፍ ከጠረጴዛው ላይ አንስታ ተሰናብታቸው በፍጥነት ሄደች፡፡ በዚያ ቁመቷ ላይ የሚያረገርገው ዳሌዋ የሆቴሉ በረንዳ ላይ የነበሩትን ሰዎች በሙሉ ማለት ይቻላል እንደ ማግኔት ስቦ ነበር፡፡

ሁለቱ ስፖርተኛ መሳይ ጎልማሶች ቢል አስመጥተው ክፍያቸውን ከፈጸሙ በኋላ አንደኛው፣ ‹‹ግን ይህችን ሴት ታምናታለህ? ማለቴ አንተ በጣም ስለምታውቃት አስተማማኝ ናት?›› ሲለው ሌላኛው ደግሞ፣ ‹‹ከማስተማመን በላይ ሌላ ቃል ቢኖር ኖሮ እሷን ነው የሚገልጸው፡፡ እሷ እኮ ከፈለገች ከሰይጣን ጋርም ቢሆን ከመደራደር ወደ ኋላ አትልም፡፡ ከቢሮ ጸሐፊነት ተነስታ የተተኮሰችው እኮ ቀልጣፋ በመሆኗዋ ነው፡፡ በዚያ ላይ የማትገባበትና የማታውቀው የለም፤›› እያለ ዝናዋን ካበው፡፡ ከዚህ በኋላ ሲጋራ አውጥተው ለኮሱና አጭሰው ሲያበቁ በመጡበት ሁኔታ ሄዱ፡፡

እኔም ጉዳዩ ውስብስብ ሆኖብኝ ስለምን እንደሚያወሩ በግልጽ ባይገባኝም፣ ከሰዎቹ አነጋገር የተረዳሁት ከሕገወጥ ነገር ጋር የተያያዘ ሥራ ውስጥ መሰማራታቸውን ነው፡፡ ግን ምን ይሆን እያልኩ ባስብም ሊገለጽልኝ አልቻለም፡፡ ከሁለት ወራት በኋላ ግን በቴሌቪዥን የቀረበው የፀረ ሙስና ኮሚሽን መግለጫና የተጠርጣሪዎች እስራት አባነነኝ፡፡ የእኛ ነገር እንዲህ አይደል? ያኔ የገቢዎችና ጉምሩክ ኃላፊዎችና ነጋዴዎች ሲያዙ ነገሩ ግልጽልጽ አለልኝ፡፡ አገር በጥቂት ወንበዴዎች ኔትወርክ መተብተቧም ገባኝ፡፡ ምንም እንኳን ንፁኃን አብረው ቢወቀጡም፡፡

እንደ ዘበት ስለሚሊዮን ብሮች ቢዝነስ ሲያወሩ የነበሩት እነዚያ ሰዎች የዚህ ርኩስ ዘረፋ የሚባል ልማድ ካዳሚዎች ናቸው? አገሪቱን ሽባ አድርገው ዜጎችን እሳት የሆነ ኑሮ ውስጥ የሚማግዱት አጅሬዎች ናቸው? በእኛ ሚሊዮኖች ጉስቁልና የደለቡት እነዚህ የቀን ጅቦች ናቸው? መጥኔ ለራሴ አልኩ፡፡ ትናንትናና ከትናንት በስቲያ ምንም ያልነበራቸው ምስኪኖች ዛሬ መሬት መርገጥ እስኪፀየፉ ድረስ የሚንቀባረሩት ለካ እንዲህ ኖሯል? ይብላኝ ለአገራችን ብዬ በጣም መናደዴ አይረሳኝም፡፡ የሆነስ ሆነና ያቺ ሴት በዚህ ጊዜ የት ትሆን? እሷዋም ይኼኔ ተደምሬያለሁ ብላ ተፍ ተፍ ትል ይሆናል እኮ ማን ያውቃል? ስንቱን ሞጭላፋ አሁንም ዓይኑን በጥሬ ጨው አጥቦ ሲንጎማለል እየታዘብን ነው፡፡

(መርዕድ አለነ፣ ከአዲሱ ገበያ)

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

[የክቡር ሚኒስትሩ ባለቤት የኬንያው ፕሬዚዳንት ያስተላለፉትን መልዕክት ተመልክተው ባለቤታቸውን በነገር ይዘዋቸዋል]

የኬንያው ፕሬዚዳንት ከሕዝባቸው ለቀረበባቸው ቅሬታ የሰጡትን ምላሽ ሰማህ? እንኳን ምላሻቸውን...

የኢትዮ ኤርትራ ሰሞነኛ ሁኔታና ቀጣናዊ ሥጋቱ

“ግንቡን እናፍርስ ድልድዩን እንገንባ” የሚል ፖለቲካዊ መፈክር ጎልቶ በሚሰማበት፣...

ኦሮሚያ ባንክ ከተበዳሪ ደንበኞቼ ውስጥ 92 በመቶ የሚሆኑት አነስተኛና መካከለኛ ኢንተርፕራይዞች ናቸው አለ

ኦሮሚያ ባንክ ለደንበኞቹ ከሰጠው ብድር ውስጥ ለአነስተኛና ለመካከለኛ ኢንተርፕራይዞች...

ሽቅብና ቁልቁል!

ጉዞ ከመገናኛ ወደ ሲኤምሲ ጀምረናል። ተሳፋሪዎች የዕለት ጉርሳቸውን መሸፈን...