Friday, December 2, 2022
ሌሎች ዓምዶች
    - ማስታወቂያ -
    - ማስታወቂያ -

    አቶ ኤርሚያስ አመልጋ ከ127 ቀናት እስር በኋላ ተፈቱ

    - ማስታወቂያ -

    ተዛማጅ ፅሁፎች

    አቶ ኤርሚያስ አመልጋ ከ127 ቀናት እስር በኋላ ተፈቱ

    • 1.1 ሚሊዮን ብር ዋስትና አስይዘዋል

    የአክሰስ ሪል ስቴት መሥራችና የቦርድ አባል አቶ ኤርሚያስ አመልጋ፣ በተጠረጠሩባቸው ሁለት ክሶችና በተመሠረተባቸው አንድ ክስ የተጠበቀላቸውን 1.1 ሚሊዮን ብር ዋስትና በማስያዝ፣ ከ127 ቀናት እስር በኋላ ግንቦት 8 ቀን 2008 ዓ.ም. ምሽት ላይ ተፈቱ፡፡

    አቶ ኤርሚያስ ጥር 2 ቀን 2008 ዓ.ም. ከአክሰስ ሪል ስቴት ቤት ገዥዎች ጋር፣ 22 ማዞሪያ ቅዱስ ገብርኤል ሆስፒታል አካባቢ በሚገኘው የቦሌ ክፍለ ከተማ ሸማቾች ማኅበር መሰብሰቢያ አዳራሽ ተገኝተው ውይይት በማድረግ ላይ እያሉ በተነሳ ውዝግብ፣ በቁጥጥር ሥር ውለው መታሰራቸው ይታወሳል፡፡

    በተጠረጠሩበት የወንጀል ድርጊት ለሰባት ጊዜያት የጊዜ ቀጠሮ ተጠይቆባቸው በስምንተኛው በ500 ሺሕ ብር ዋስትና እንዲለቀቁ ፍርድ ቤቱ ብይን ሰጥቶ ነበር፡፡ ነገር ግን መርማሪ ቡድኑ ዋስትናውን በመቃወም ጉዳዩን ወደ ፌዴራል ከፍተኛ ፍርድ ቤት አራዳ ምድብ ሁለተኛ ወንጀል ችሎት በመውሰድ፣ ያቀረበው ይግባኝ ተቀባይነት አግኝቶ ዋስትናው ታግዷል፡፡

    የአቶ ኤርሚያስ የዋስትና ጉዳይ በከፍተኛው ፍርድ ቤት እየተመረመረ ባለበት ወቅት፣ የፌዴራል ዓቃቤ ሕግ አቶ ኤርሚያስ ሒሳብ በከፈቱበት ዘመን ባንክ ውስጥ፣ የሚያዙበት በቂ ስንቅ (ገንዘብ) ሳይኖራቸው ለስድስት ግለሰቦች ደረቅ ቼክ በመጻፍ ወንጀል ክስ ተመሠረተባቸው፡፡

    ክሱን የተመለከተው የፌዴራል ከፍተኛ ፍርድ ቤት አራዳ ምድብ አንደኛ ወንጀል ችሎት፣ ክሱን አንብቦ ግራና ቀኝ ካከራከረና መዝገቡን ከመረመረ በኋላ የተመሠረተባቸው ክስ ዋስትና የማያስከለክል መሆኑን በመጥቀስ፣ በ600 ሺሕ ብር ዋስ እንዲፈቱ ትዕዛዝ ሰጥቶ ነበር፡፡ የፍርድ ቤቱን ዋስትና መፍቀድ የተቃወመው የፌዴራል ዓቃቤ ሕግ ጉዳዩን ለጠቅላይ ፍርድ ቤት የወሰደው ቢሆንም፣ ይግባኝ ሰሚው ችሎት ጉዳዩ ዋስትና የማያስከለክል መሆኑን በመጠቆምና የሥር ፍርድ ቤት ውሳኔ የሚነቀፍበት ምክንያት እንደሌለ በመግለጽ አፅንቶታል፡፡

    ነገር ግን አቶ ኤርሚያስ ሳይፈቱ በፌዴራል ፖሊስ ወንጀል ምርመራ (ማዕከላዊ) እንዳሉ ሐሰተኛ ሰነድ (ሊብሬ) በመጠቀም ወንጀል ተጠርጥረውና ጉዳዩ ወደ ከፍተኛ ፍርድ ቤት ልደታ ምድብ ሁለተኛ ወንጀል ችሎት ተወስዶ፣ የሰባት ቀናት ተጨማሪ የምርመራ ጊዜ ቀጠሮ ተጠይቆባቸው ተፈቅዷል፡፡

    ፍርድ ቤቱ የሰጠው የምርመራ ሰባት ቀናት አልቆ ፍርድ ቤት ሲቀርቡ፣ ከተጠረጠሩበት ሐሰተኛ ሊብሬ መጠቀም ወንጀል በ10 ሺሕ ብር ዋስትና እንዲፈቱ ብይን ሰጥቶ፣ የሚፈቱት ግን ትዕዛዙን ከሰጠ ከአምስት ቀናት በኋላ መሆኑን ገልጾ ነበር፡፡ አቶ ኤርሚያስ በተለያዩ ምክንያቶች በተባለው ቀን ሳይፈቱ ቆይተው ግንቦት 8 ቀን 2008 ዓ.ም. ምሽት ላይ ከ127 ቀናት እስር በኋላ መለቀቃቸው ታውቋል፡፡ በተከሰሱበት ደረቅ ቼክ መጻፍ ወንጀል ዓቃቤ ሕግ ምስክሮቹን ማሰማት መጀመሩን መዘገባችን ይታወሳል፡፡

    spot_img
    - Advertisement -spot_img

    የ ጋዜጠኛው ሌሎች ፅሁፎች

    - ማስታወቂያ -

    በብዛት ከተነበቡ ፅሁፎች