Monday, June 24, 2024
- ማስታወቂያ -
- ማስታወቂያ -

በ2.8 ቢሊዮን ብር አራት መንገዶችን ለመገንባት ኮንትራት ተፈረመ

spot_img

ተዛማጅ ፅሁፎች

– የሦስት መንገዶች ግንባታ ለአገር ውስጥ ተቋራጮች ተሰጥቷል

የኢትዮጵያ መንገዶች ባለሥልጣን አራት የመንገድ ፕሮጀክቶችን ከ2.8 ቢሊዮን ብር በላይ ለማስገንባት ከተቋራጮች ጋር ተፈራረመ፡፡ ባለሥልጣኑ በተቋራጮች እንዲገነቡለት ውል የፈጸመባቸው መንገዶች የሻምቦ ባኮ፣ የዳባት አጅሬ፣ የመልካጀብዱ – ድሬዳዋና የወራቤ – ቦጆበር መገዶች ናቸው፡፡

ባለፈው ዓርብ በባለሥልጣኑ ዋና መሥሪያ ቤት በተካሄደው ስምምነት ወቅት እንደተገለጸው፣ ከአራቱ የመንገድ ፕሮጀክቶች ውስጥ ሦስቱን የአገር ውስጥ ኮንትራክተሮች የተረከቡ ሲሆን፣ የአንዱን ግንባታ የቻይና ኩባንያ ወስዶታል፡፡

የኢትዮጵያ መንገዶች ባለሥልጣን እንደገለጸው፣ በኦሮሚያ ክልል የሚገኘውን 60.2 ኪሎ ሜትር ርዝመት ያለውን የሻምቡ-ባኮ መንገድን በ993.28 ሚሊዮን ብር ዋጋ ለመገንባት አሸናፊ በመሆን የግንባታ ስምምነት የተፈራረመው የቻይናው ሲጂሲ ኦቨርሲስ ኢትዮጵያ ኮንስትራክሽን ኩባንያ ነው፡፡

በአማራ ክልል ከዳባት – አጅሬ ድረስ 43.2 ኪሎ ሜትር የሚዘረጋውን መንገድ ለመገንባት 931.3 ሚሊዮን ብር ዋጋ በማቅረብ አሸናፊ የሆነው ደግሞ ፓወርኮን ኮንስትራክሽን የተባለ ኩባንያ ነው፡፡ ፓወርኮን ከኢትዮጵያ መንገዶች ባለሥልጣን የግንባታ ሥራ ሲረከብ የመጀመርያው ነው፡፡ ባለሥልጣኑ እንዲሠራለት ውል የፈጸመበት ሦስተኛው ፕሮጀክት 38.5 ኪሎ ሜትር ርዝማኔ ያለው የወራቤ – ቦጆበር መንገድ ነው፡፡ በደቡብ ክልል የሚገኘውን የዚህን መንገድ ግንባታ ለማካሄድ አሸናፊ የሆነው የማነ ግርማይ ጠቅላላ የሥራ ተቋራጭ ሲሆን፣ አሸናፊ የሆነበት ዋጋም 458.4 ሚሊዮን ብር ነው፡፡

አራተኛው የውል ስምምነት የተደረገው በድሬዳዋ አስተዳደር ሥር የሚገኘውን የመልካ ጀብዱ – ድሬዳዋ የመንገድ ፕሮጀክት (ለ) የተባለውን ለማከናወን ነው፡፡ 7.14 ኪሎ ሜትር ርዝማኔ ያለው የድሬዳዋ መልካ ጀብዱ መንገድን ለመገንባት በጨረታ ያሸነፈው ሜልኮን ኮንስትራክሽን ሲሆን፣ አሸናፊ የሆነበት ዋጋም 470 ሚሊዮን ብር ነው፡፡ ይህም ኮንትራክተር በቀጥታ የመንገድ ግንባታ ሲረከብ የመጀመርያው መሆኑን ለማወቅ ተችሏል፡፡ ሦስቱ የአገር ውስጥ ተቋራጮች በጥቅል የ1.8 ቢሊዮን ብር ሥራ ወስደዋል፡፡

አራቱም የመንገድ ግንባታዎች የተለያዩ ድልድዮችና አካፋዮችን ግንባታ የሚያጠቃልሉ ናቸው፡፡ የሻምቡ – ባኮ መንገድ፣ የወራቤ – ቦጆበርና የዳባት አጅሬ መንገድ ፕሮጀክቶች በሦስት ዓመት ጊዜ ውስጥ ይጠናቀቃል ተብሏል፡፡ የመልካ ጀብዱ – ድሬዳዋ መንገድ ደግሞ በ15 ወራት ውስጥ ይጠናቀቃል ተብሎ ይጠበቃል፡፡

  ለአራቱም ፕሮጀክቶች ከሚያስፈልገው የግንባታ ወጪ ውስጥ በቻይናው ኩባንያ የሚገነባውና 993.2 ቢሊዮን ብር የሚፈጀው የሻምቡ – ባኮ መንገድ ከዓረብ ባንክ፣ ከኦፔክና ከኢትዮጵያ መንግሥት በሚገኝ ገንዘብ የሚካሄድ ሲሆን፣ የቀሪዎቹ ሦስት ፕሮጀክቶች ወጪ በኢትዮጵያ መንግሥት በጀት እንደሚሸፈኑ ተገልጿል፡፡

ግንባታዎቹን የመቆጣጠርና የማማከር ሥራ እንዲሠራ አማካሪ ድርጅት የተመረጠው ለሻምቡ – ባኮ መንገድ ብቻ ነው፡፡ ቀሪዎቹን ሦስት ፕሮጀክቶች ለማማከርና ለመቆጣጣር የተመረጠ አማካሪ ድርጅት የለም፡፡ እንደ ባለሥልጣኑ ገለጻ ለሦስቱ ፕሮጀክቶች አማካሪዎችን ለመቅጠር በጨረታ ሒደት ላይ ነው፡፡

የሻምቡ ባኮን መንገድ ለማማከር የተመረጠው የሊባኖሱ ካህቲብና ዒላሚን ኮንሰልቲንግ ኢንጂሪነርስ ኤስኤኤል የተባለ ድርጅት ሲሆን፣ ሥራውን ከአገር በቀሉ አማካሪ ድርጅት ጋር አብሮ ይሠራል፡፡

የአራቱን የግንባታ መንገዶች ውል የኢትዮጵያ መንገዶች ባለሥልጣን በመወከል የፈረሙት ዋና ዳይሬክተሩ አቶ አርዓያ ግርማይ ናቸው፡፡ ኮንትራክተሮቹን በመወከል ደግሞ የሲጂሲ ኦቨርሲስ ኢትዮጵያ ተወካይ ሚስተር ጋዎሊ፣ የፓወርኮን ኮንስትራክሽን ሥራ አስኪያጅ አቶ ተከስተ ሃጎስ፣ የማነ ግርማይ ጠቅላላ ተቋራጭ ሥራ አስኪያጅ አቶ ወንድወሰን ግርማና የሜልኮን ኮንስትራክሽን ሥራ አስኪያጅ አቶ ኤልያስ ተካ ተገኝተው ስምምነቱን ፈርመዋል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች