Thursday, December 1, 2022
ሌሎች ዓምዶች
    - Advertisement -
    - Advertisement -
    ልናገርከተሸነፈ ጋር ማን ይታገላል?

    ከተሸነፈ ጋር ማን ይታገላል?

    ቀን:

    በአዲስ ዓመት ማግሥት የተሳፈርንባት ታክሲ አሮጌ ናት፡፡ እርጅና ቢጫጫናትም አገልግሎት እንድታቆም የፈቀደላት ማንም የለም፡፡ ምክንያቱም በእሷ የሚገኘው ገቢ ከቆመ የወያላው፣ የሾፌሩና የታክሲዋ ባለቤት ቤተሰብ ጨምሮ ትንፋሻቸው አብሮ ሊቆም ይችላል፡፡ ይህች የተወቀጠች የምትመስል ታክሲ የስንቱን የተከፈተ ጉሮሮ ደፍና እንደምታሳድር የሚያውቅ ቢኖር ኖሮ ባልናቃት ነበር፡፡ በዚያ ላይ በውስጥ በኩል ‹‹አንደኛ ደረጃ›› ተብሎ የተለጠፈባት ማስታወቂያ ሳይወዱ በግድ ያስቃል፡፡ መቼም ስንትና ስንት ኪሎ ሜትር እንደተጓዘች እግዜር ይወቀው፡፡ በአዲስ አበባ ጉራንጉሮች ያልገባችበት ጉድጓድና ያልወጣችበት ኮረብታ እንደሌለ ግን ከገጽታዋ መገንዘብ ይቻላል፡፡ ጉስቁልናዋ ያለፈ ታሪኳን ፍንትው አድርጎ ያሳያል፡፡ ሲያልቅ አያምር እንዲሉ፡፡ ዘመናችን እኮ ብዙ እያሳየን ነው፡፡

    እንደ ሌሎች ታክሲ ጓደኞቿ ሮጣ፣ ተሯሩጣ፣ ቀድማና ተሽቀዳድማ የምትሠራበት ዘመን ከዓመታት በፊት እንዳለፈ ሁኔታዋ ያሳብቃል፡፡ እንደ ዱሮው እሮጣለሁ እሯሯጣለሁ ብትል በጉዞ ላይ ጎማዋ ተስፈንጥሮ ሊበር ይችላል፡፡ ወንበሮቿ በሙሉ ቦታቸውን ስተው ውልቅልቃቸው መውጣቱ አይቀርም፡፡ ስለዚህ ያላት ብቸኛ አማራጭ ተራ ውስጥ መግባት ነው፡፡ በጧት የተያዘው ተራ ይፍጠንም፣ ይዘግይም ከተራ ውጪ ሌላ አማራጭ የላትም፡፡ ይህቺን አሮጌ ታክሲ የሚሳፈሩ በሙሉ መሳቀቃቸው ግን አይቀርም፡፡ ሌላው ቢቀር መቀመጫዎቹ ልብስ ይቀዳሉና፡፡ ቆይ ግን ይህች ታክሲና ያረጀ ሐሳብ አንድ አይደሉም?

    መገናኛ ታክሲ መሳፈሪያ ተራ ላይ ከአሮጌዋ ታክሲ ውስጥ ታድመናል፡፡ በበዓል ማግሥት ተሳፋሪ ስለሌለ ነው መሰል ወያላው፣ ‹‹ቦሌ የቸኮለ. . .›› እያለ ችላ ብሎ ይጣራል፡፡ አንድ አምስት የሚሆኑ ሰዎች ታክሲዋ ውስጥ አሉ፡፡ አንድ በጣም የቸኮለ ሰው ሰዓቱን በተደጋጋሚ እያየ የተሳፋሪዎችን መግባት በከፍተኛ ጉጉት ይጠባበቃል፡፡ ከዚያም አልፎ እንደ ወያላው ወርዶ ለመጥራት ምንም የቀረው አይመስልም፡፡ ተሳፋሪ ሲመጣ፣ ‹‹ግቡ ቦሌ ነው. . .›› እያለ ሲጋብዝ አንዳንዶች ወያላው እሱ ሳይሆን አይቀርም በማለት አትኩረው ያዩታል፡፡ ወያላው ረዳት ያገኘ መስሎት መጣራቱን አቁሟል፡፡ በምትኩ ሰውዬው አሁንም ‹‹ቦሌ ነው. . .›› ይላል፡፡ ምን ያድርግ ታዲያ?

    ታክሲዋ በሰውዬው ትጋት እንደ ምንም ከሞላች በኋላ ወያላው ሾፌሩን ለመጥራት እዚያው አጠገብ የሚገኝ የአስፋልት ዳርቻ ሻይ፣ አምባሻ፣ ብስኩትና መኮሮኒ ወዘተ. የሚሸጥበት ሄደ፡፡ እዚያ ሄዶ የመገልገልን ዘርፈ ብዙ ጥቅም አንዳንድ ወያላዎች ሲያስረዱ፣ ‹‹ተጨማሪ እሴት ታክስ የለው፣ ምን የለው ዝም ብሎ በቅናሽ መጨፍጨፍ ነው፤›› ይላሉ፡፡ አንዳንድ ቀብራራ ወያላዎች ደግሞ በእነዚህ የመንገድ ዳር ካፌዎች ውስጥ መጠቀም ጊዜ በማባከን የገቢ መቀነስ ቀውስ ያስከትላል ሲሉ ያስረዳሉ፡፡ ግራ የገባ ነገር፡፡

    ሾፌሩ እንደ ምንም መጣልንና ከአሁን አሁን ተነስቶ ሄድን ስንል ሁለት ጎረምሶችን ታክሲዋን ገፋ እንዲያደርጉለት ወያላው አቤቱታ አቀረበ፡፡ ይኼኔ የቸኮለ የሚመስለው ሰውዬ ወዲያው ወርዶ ከወያላው ጋር መግፋት ጀመረ፡፡ ብዙ ተገፍታም አልነሳ በማለቷ አንዳንዶች ምናልባት ሞተሯ ሌላ ቦታ ቀርቶ እንዳይሆን በማለት ቀለድን፡፡ ያ የፈረደበት ሰውዬ ላቡ ጠብ እስኪል ድረስ ታክሲዋን ቢገፋም የተረፈው ከንቱ ድካም ነበር፡፡ ‹‹ልፋ ያለው ገለባ ይወቃል›› ተብሎ የለ?

    በውጪው ዓለም አንድ ተሽከርካሪ ያገለገለበት ዘመንና የሄደበት ርቀት ታይቶ በሰውና በንብረት ላይ ሊያስከትል የሚችለውን ጉዳት ታሳቢ በማድረግ ከአገልግሎት እንዲወጣ ይደረጋል፡፡ በዚሁ አጋጣሚ የአገልግሎት ጊዜያቸው ያለፈባቸውን ተሽከርካሪዎች ጉዳይ ምላሽ የሚሰጥ ካለ እነሆ፡፡ የኢትዮጵያን ነባራዊ ሁኔታ ባገናዘበ መንገድ አንድ ተሽከርካሪ ምን ያህል ዘመን ካገለገለ በኋላ ነው ከመንገድ የሚወጣው? ምን ያህል ኪሎ ሜትር ከተጓዘ በኋላ ነው ጎዳናውን የሚለቀው? የቱንም ያህል ዘመናዊ መንገዶች ቢሠሩ እነዚህ የአሮጌነት ካባን የደረቡ ዘመን ያለፈባቸው ተሽከርካሪዎች ባሉበት ሁኔታ አደጋን መቀነስ ዘበት ነው፡፡ እነዚህን ያረጁና ያፈጁ ተሽከርካሪዎች ከመንገድ ላይ የማውጣቱ ተግባር አደጋን የመቀነሱ አንደኛው አካል ተደርጎ ሊወሰድ ይገባዋል፡፡ እየሰጡት ካለው ጥቅም ይልቅ እያስከተሉት ያለው ጉዳት ያመዝናልና፡፡ አንድ የአገልግሎት ዘመኑ ያበቃ ተሽከርካሪ በመንገድ ላይ ሊያመጣ የሚችለው አደጋ ዘግናኝ ከመሆኑም በላይ፣ የመንገድ ደኅንነት ሥጋታችንን እያባባሰው ይሄዳል፡፡ በአሮጌ ተሽከርካሪዎች የተነሳ ደኅንነታችን ሊቃወስ አይገባውም፡፡ ስለዚህ አደራ ብንል ያምርብናል፡፡ አይደለም እንዴ? ‹‹አዲሱ ትውልድ በአሮጌ አስተሳሰብ አይመራም›› ያለው ማን ነበር? ፈልጋችሁ ድረሱበት፡፡

    ከየትኛውም ዓይነት ተሽከርካሪ የሚወጣው ጭስ ለአየር ንብረትም ሆነ ለሰው ልጅ ጤና ተስማሚ ባይሆንም፣ በተለይ ከእነዚህ ከመጠን በላይ ካረጁ ተሽከርካሪዎች የሚወጣው ጭስ ግን አየር ንብረቱን፣ ሰውን፣ እንስሳትንና ተክሎችን ሳይቀር ይበክላል እየተባለ ሲነገር ይደመጣል፡፡ አንዳንዶች እንዲያውም አሥር ችግኝ ከመትከል አንድ ከመጠን በላይ ያረጀን ተሽከርካሪ ከመንገድ ማውጣት ይሻላል ይላሉ፡፡ ጤና አጥተው ጤና የሚነሱን ተሽከርካሪዎች የሚፈጥሩት የድምፅ ብክለት አዕምሮንም ያናውጣል፡፡ በየጎዳናው ላይ እንደ ድንጋይ ወፍጮ እየጮኹ ሰላም የሚነሱን ተሽከርካሪዎች አንድ ሊባሉ ይገባል፡፡ ለአደጋም ይዳርጉናል፡፡ ጠንቀኛ የሆኑ ሰዎች ጭምር ማለት ነው፡፡

    እኛ ተሳፋሪዎች እዚያች ታክሲ ውስጥ መግባታችን አጉል ደፋር ናቸው ያሰኘናል፡፡ ሆኖም ግን ሌላ አማራጭ የለንም፡፡ ተራ አስከባሪዎች ደግሞ ተረኛው ካልሞላ በሌላ ታክሲ እንድንጫን አይፈቅዱም፡፡ ስለዚህ በጣም ለአደጋ ሊያጋልጡ የሚችሉ ታክከሲዎች ውስጥ ያውም ተጋፍቶና ተናንቆ መግባት የግድ ነው፡፡ አማራጭ የለማ? የአዲስ አበባን የትራንስፖርት ጉዳይ የሚመለከተው አካል ችግሩን እፈታዋለሁ እያለ ሲናገር መቆየቱን ሰምተናል፡፡ በየጊዜው የመግለጫው ዓይነት ይቀያየራል እንጂ፣ በትራንስፖርቱ ላይ ጠብ ያለ ነገር የለም እያሉ በርካቶች ይማረራሉ፡፡ ማለዳና ምሽት ላይ በየአቅጣጫው የሚታየው የታክሲ ጥበቃና ግፊያ እየባሰበት ነው፡፡ ኧረ አንገፋፋ፡፡

    ታክሲያችን አንበሳ ጋራዥ ስትደርስ ተሳፋሪ ልታወርድ ቆመችና ካልገፋችሁኝ አልነሳም በማለት እንደገና አሻፈረኝ አለች፡፡ ወያላውና የመጀመርያው ሰውዬ ቁልቁለቱ እያገዛቸው ገፏትና ጉዞው ተጀመረ፡፡ አንድ ወጣት ተሳፋሪ በታክሲዋ ሁኔታ በጣም ተገርሞ፣ ‹‹ለምን አታሠራትም?›› አለው ሾፌሩን፡፡ ሾፌሩም፣ ‹‹አልተበላሸችም እኮ! ትንሽ መቆም ብቻ ነው የማትወደው፣ ከዚያ በተረፈ እንደምታያት አዲስ ነች፤›› ሲል በአነጋገሩ ተገረምን፡፡ በሾፌሩ አነጋገር ግራ የገባው ሌላ ሰው፣ ‹‹እኔን አዲስ ያድርገኝ፤›› አለ የለበጣ ሳቅ እየሳቀ፡፡ ሾፌሩ የሰውዬው ንግግር ገብቶት በመስተዋቱ አጨንቁሮ እያየ መናገር ጀመረ፡፡ ‹‹ለራስህ ደህና ጫማ የለህ የሰው መኪና ትንቃለህ!›› አለው፡፡ ሰውዬው ከሾፌሩ ጋር አፍ መካፈት የፈለገ አይመስልም፡፡ ጎኑ ከተቀመጠው ሰው ጋር በለሆሳስ መነጋገር ጀመረ፡፡ ቢያንስ ጨዋነት አሳየው፡፡ አንዳንዱ ሰው ትዕግሥቱ ያስገርማል፡፡ ካልታገሱ እኮ የአንዳንዱ ሰው ድርጊት ደመ ነውጠኛ ያደርጋል፡፡

    አንዳንዶች ከእነዚህ ያረጁ ተሽከርካሪዎች ተጠቃሚዎች ጋራዦች ብቻ ናቸው ይላሉ፡፡ ምክንያቱም በታመሙ ቁጥር ውሎዋቸውና አዳራቸው ወይም የመታከሚያ ሆስፒታላቸው ጋራዥ ነው፡፡ መካኒኮቹማ ምናገባችው ነካ ነካ በማድረግ እየጠጋገኑ ገንዘባቸውን ይፈሱ በማለት የሚያሙ አልጠፉም፡፡ ይህች ታክሲ ግን ካሁን በኋላ እንኳን ልትጠገን ቀርቶ የመጨረሻዋን እስትንፋስ እያሟጠጠች ትውተረተራለች፡፡ ያ ሰውዬ በመጨረሻ ሲታክተው፣ ‹‹ይብላኝ ለእናንተ ካሁን በኋላ በእግሬ ብኳትን ይሻለኛል፡፡ አንድ ሐሙስ በቀራት ታክሲ የትም መድረስ አልችልም፤›› ብሎ ጥሎን ወረደ፡፡ አንዳንዴ እኮ ያሰኛል፡፡

    የታክሲዋ ሾፌር እየተበሳጨ፣ ‹‹ሰው ለምን ትዕግሥት አይኖረውም? አሁን በደቂቃ ውስጥ አንቀሳቅሳታለሁ፤›› ብሎ ቢሞክራት ያቺ አሮጌ ታክሲ ፀጥ አለች፡፡ ቢላት ቢሠራት ለአንዴና ለመጨረሻ ጊዜ ሳይሆን አይቀርም ድምጿ ጠፋ፡፡ ከግማሽ ሰዓት በላይ ብንጠብቅም ወይ ፍንክች አለች፡፡ በትዕግሥት ሲጠባበቁ የነበሩ አንዲት እናት፣ ‹‹አይ በቃህ ተወው፤›› አሉት ሾፌሩን፡፡ ሾፌሩ ተናዶ፣ ‹‹ለምን ይበቃል?›› አላቸው፡፡ ‹‹አይ ልጄ በድን መቀስቀስ ስለማይቻል ቢበቃህ ይሻላል፤›› ሲሉት፣ የወያላው ሳቅ ከሁላችንም በላይ ጎልቶ ተሰማ፡፡ እንደ ምንም ጠጋ ብዬ፣ ‹‹እማማ ይህ አባባል ከየት መጣልዎት?›› አልኳቸው፡፡ ‹‹የሞተን ለመቀስቀስ ከመሞከር ይልቅ የታመመን ለማዳን መትጋት ይሻላል፤›› ብለው ጉዟቸውን ቀጠሉ፡፡ እውነት እኮ ነው፣ ካበቃለት ነገር ጋር ከመታገል አዲስ ነገር መፍጠር ይሻላል፡፡ ታክሲዋን እንደ ሐውልት ገትረን እኛም በእግራችን ቀጠልን፡፡ ከተሸነፈ ጋር ማን ይታገላል ታዲያ? መልካም ጉዞ!

    spot_img
    - Advertisement -

    ይመዝገቡ

    spot_img

    ተዛማጅ ጽሑፎች
    ተዛማጅ

    [በተቋሙ ሠራተኞች የተወከሉ አንድ ባልደረባ ሚኒስትሩን ለማነጋገር ቀጠሮ ይዘው ወደ ቢሯቸው ገቡ]

    ጤና ይስጥልኝ ክቡር ሚኒስትር? ሰላም ሰላም ... ተቀመጥ! አመሠግናለሁ ክቡር ሚኒስትር!...

    የጉራጌ ዞን ጥያቄና የክላስተር አደረጃጀት የገጠመው ተቃውሞ

    መንግሥት የደቡብ ብሔር ብሔረሰቦችና ሕዝቦች ክልል አካል የነበሩ ዞኖችንና...

    አዋሽ ባንክ ካፒታሉን ወደ 55 ቢሊዮን ብር ለማሳደግ ያስገደደው ምክንያት ምንድን ነው?

    ባለፈው ቅዳሜ ጠቅላላ ጉባዔውን ያካሄደው አዋሽ ባንክ የ43 ቢሊዮን...

    አቢሲኒያ ባንክ ካለፈው ዓመት የ127 በመቶ ብልጫ ያለው ትርፍ በማግኘት አዲስ ታሪክ አስመዘገበ

    አቢሲኒያ ባንክ ከቀደሚ የሒሳብ ዓመት የ127 በመቶ ብልጫ ያለው...