Tuesday, December 6, 2022
ሌሎች ዓምዶች
    - Advertisement -
    - Advertisement -
    ዜናበኢሕአዴግ ጉባዔ የሚመሠረተው አዲስ ምክር ቤት የግንባሩን ሊቀመንበር ይመርጣል ተባለ

    በኢሕአዴግ ጉባዔ የሚመሠረተው አዲስ ምክር ቤት የግንባሩን ሊቀመንበር ይመርጣል ተባለ

    ቀን:

    መስከረም 23 ቀን 2010 ዓ.ም. የሚጀመረው የኢሕአዴግ ጉባዔ አዲስ የኢሕአዴግ ምክር ቤት እንደሚመሠርትና፣ ምክር ቤቱም በመተዳደሪያ ደንቡ መሠረት የኢሕአዴግን ሊቀመንበርና ምክትል ሊቀመንበር እንደሚመርጥ ተገለጸ፡፡

    የኢሕአዴግ ጽሕፈት ቤት ኃላፊ ወ/ሮ ፈትለወርቅ ገብረ እግዚአብሔር ሰኞ መስከረም 7 ቀን 2010 ዓ.ም. በሰጡት መግለጫ እንዳስታወቁት፣ የኢሕአዴግ ጉባዔ ከሚወያይባቸው አጀንዳዎች በተጨማሪ የኢሕአዴግ ምክር ቤት ምርጫ በማካሄድ እስከ 12ኛው የኢሕአዴግ ጉባዔ የሚያገለግል ምክር ቤት ይመሠርታል፡፡

    ይህ ምክር ቤት ከእያንዳንዱ የኢሕአዴግ አባል ድርጅት ማዕከላዊ ኮሚቴ በእኩል የሚውጣጣ እንደሚሆን የተናገሩት ኃላፊዋ፣ በግንባሩ መተዳደርያ ደንብ መሠረትም የኢሕአዴግ ሊቀመንበርና ምክትል ሊቀመንበር ምክር ቤቱ እንደሚመርጥ ጠቁመዋል፡፡

    ወ/ሮ ፈትለወርቅ ምክር ቤቱ በሚያካሂደው ምርጫ በሥራ ላይ የሚገኙት የኢሕአዴግ ሊቀመንበር ዓብይ አህመድ (ዶ/ር) እና ምክትል ሊቀመንበሩ አቶ ደመቀ መኰንን ምትክ ሌላ ይመርጣል? ወይስ ሁለቱ ሊቃነ መናብርት ይቀጥላሉ የሚለውን ግን አላብራሩም፡፡

    ሪፖርተር ያነጋገራቸው የኢሕአዴግ ከፍተኛ ኃላፊዎች ግን አሁን በሥራ ላይ ያለው የኢሕአዴግ ምክር ቤት ጊዜውን በመጨረሱ፣ አዲስ የምክር ቤት ምርጫ እንደሚካሄድ ገልጸዋል፡፡

    በግንባሩ መተዳደሪያ ደንብ መሠረት የኢሕአዴግ ምክር ቤት ከአንድ ጉባዔ እስከሚቀጥለው ጉባዔ ድረስ ግንባሩን በበላይነት እንደሚመራ፣ አሁን በሥራ ላይ ያለው ምክር ቤት የሥልጣን ዘመን በዚህ ጉባዔ እንደሚያበቃ አስረድተዋል፡፡

    ይህ ማለት ግን በሥራ ላይ ያሉት የኢሕአዴግ ምክር ቤት አባላት በድጋሚ አይመረጡም ማለት እንዳልሆነ የገለጹት ኃላፊዎቹ፣ በድጋሚ የሚመረጡና አዳዲስ አባላት ግንባሩን እስከ ቀጣዩ ጉባዔ ድረስ የመምራት ኃላፊነት በጉባዔው እንደሚወሰንላቸው ተናግረዋል፡፡

    በዚህ አግባብ የሚመሠረተው አዲሱ የኢሕአዴግ ምክር ቤት የግንባሩን ሊቀመንበርና ምክትል ሊቀመንበር እንደሚመርጥ፣ አሁን ባለው ሁኔታ ግን የሚደረገው የሊቀመንበርና ምክትል ሊቀመንበር ምርጫ የተለመደ ሥርዓት (Procedure) ከመሆኑ ውጪ ነባሮቹን ሊቃነመናብርት በድጋሚ እንደሚመርጥ ጠቁመዋል፡፡

    ወ/ሮ ፈትለወርቅ ተጨማሪ ማብራርያ እንዲሰጡ በግል ስልካቸው ላይ በተደጋጋሚ ቢደውልም ጥሪውን ባለመመለሳቸው ማግኘት አልተቻለም፡፡

    የኢሕአዴግ ጉባዔ ከሚያወያይባቸው አጀንዳዎች መካከል ያለፉት አምስት ወራት የሥራ አፈጻጸም ግምገማ ሪፖርት፣ ያለፉት ሦስት ዓመታት የሥራ አፈጻጸም ግምገማና ቀጣይ አቅጣጫን መወሰን ይገኙበታል፡፡ በተጨማሪም አጋር ድርጅቶች የኢሕአዴግ አባል መሆን በሚችሉበት ሁኔታና ኢሕአዴግን ማዋሀድ በሚመለከት የሚቀርብ ሰነድ ላይ መምከርና ቀጣይ አቅጣጫ ማስቀመጥ የሚሉም አሉበት፡፡ በዚህ ጉባዔ አንድ ሺሕ አባላት በድምፅ የሚሳተፉ መሆኑ ታውቋል፡፡ የኢሕአዴግ መሥራች አባላት በታዛቢነት ያለ ድምፅ በጉባዔው ተሳታፊ እንደሚሆኑ፣ ሌሎች 900 የአገር ውስጥና የውጭ እንግዶች ደግሞ የጉባዔውን መክፈቻ እንዲከታተሉ ተጋብዘዋል፡፡

    spot_img
    - Advertisement -

    ይመዝገቡ

    spot_img

    ተዛማጅ ጽሑፎች
    ተዛማጅ

    ዳግም ነፍስ የዘራው የተማሪዎች ማርች ባንድ

    የሙያው ፍቅር ያደረባቸው ገና በልጅነታቸው ነው፡፡ በ1970ዎቹ መጀመርያ፣ ለቀለም...

    በስንደዶና ሰበዝ የተቃኘው ጥበብ

    በአንዋር አባቢ ተወልዳ ያደገችው መሀል አዲስ አበባ አራት ኪሎ ነው፡፡...

    አዲስ ጥረት የሚጠይቀው  ኤችአይቪ  ኤድስን  የመግታት  ንቅናቄ

    ‹‹ኤችአይቪ በመላው ዓለም  በሚሊዮን የሚቆጠሩ ሰዎችን የሚያጠቃ ዋነኛ የሕዝብ...

    የኅትመት ብርሃን ያየው ‹‹የቃቄ ወርድዎት›› ቴአትር

    ከአራት ዓመታት በፊት በኢትዮጵያ ብሔራዊ ቴአትር መድረክ ላይ ይታይ...