Sunday, June 23, 2024
- Advertisement -
- Advertisement -
የሳምንቱ ገጠመኝየሳምንቱ ገጠመኝ

የሳምንቱ ገጠመኝ

ቀን:

በአንድ ሳምንት ውስጥ አንድ ሰው ስንት ዓይነት ነገሮች ያጋጥሙታል? እኔ ግን በአንድ ሳምንት ውስጥ ከሦስት አስገራሚ ጉዳዮች ጋር ተገጣጥሜያለሁ፡፡ ሁሉም ጉዳዮች እኔን በቀጥታ ባይመለከቱኝም፣ በቅርብ የማውቃቸው ሰዎችን ያጋጠሙ በመሆናቸው ችላ ብዬ ማለፍ አልፈለግኩም፡፡ ለማንኛውም ለጥንቃቄ ይረዳን ዘንድ ለአንባቢያን እንዲህ በየተራ አቅርቤያቸዋለሁ፡፡

የመጀመሪያው ባለ ገጠመኝ የሥራ ባልደረባዬ ናት፡፡ ከጓደኛዋ ጋር ለምሳ ተቀጣጥረው ስለነበር እሷ ቀድማ ትደርሳለች፡፡ የሬስቶራንቱ ደንበኞች በርካታ ስለሆኑ፣ ሦስት ወንበሮች ያሉት ጠረጴዛ ትመርጥና የሚበሉትን በማዘዝ በመድረስ ላይ ያለችዋን ጓደኛዋን ስትጠባበቅ ዓይኗ አንድ ነገር ላይ ያርፋል፡፡ ሦስት ሴቶች ጨዋታቸው ደርቶ ምሳቸውን ሲመገቡ አንድ ባዶ መቀመጫ ላይ ቦርሳዎቻቸውን አስቀምጠዋል፡፡ ሴቶቹ ምግባቸውና ወሬያቸው ላይ ስላተኮሩ፣ አጠገባቸው ሌላ ጠረጴዛ ከበው የተቀመጡ ሁለት ወጣት ሴቶች በያዙት ጋዜጣ እጃቸውን ሸፍነው የሴቶቹን ቦርሳዎች ሲቦጠብጡ ጓደኛዬ በሰያፍ ታያለች፡፡

ዓይኗን በመጠራጠር ተንጠራርታ እንደገና ስታይ ሦስቱም ቦርሳዎች አፋቸው ተከፍቶ በፈጣን እጆች ሞባይሎች፣ የገንዘብ መያዣ ቦርሳዎችና ሌሎች ጠቃሚ ነገሮች እየተመዘበሩ ሌላ ቦርሳ ውስጥ ይከተታሉ፡፡ በዚህ መሀል የጓደኛዬ ጓደኛ ትደርሳለች፡፡ እነዚያ ሁለት ሌቦች ቀስ እያሉ ቦርሳዎቹን ዘጋግተው ከጨረሱ በኋላ በቦርሳቸው ውስጥ የጠቀጠቁትን የሴቶቹን ንብረትና ገንዘብ ይዘው ከመሰወራቸው በፊት፣ ለጓደኛዋ ነግራት ተንደርድረው ሄደው ሴቶቹን አንቀው ይይዛሉ፡፡ ጂም አዘውታሪ የሆነችው የሥራ ባልደረባዬ ጠንከር ያለች በመሆኗ ሌቦቹን አንቃ ስትይዝ፣ ጓደኛዋ ቦርሳውን በቁጥጥር ሥር ታውላለች፡፡ የተዘረፉት ሴቶች ጉዳዩ ተነግሯቸው እየተርበተበቱ ቦርሳዎቻቸውን ሲፈትሹ ኦና መቅረታቸውን ያያሉ፡፡ የሌቦቹ ቦርሳ ውስጥ የተጠቀጠቀው ንብረትና ገንዘብ ጠረጴዛ ላይ ሲዘረገፍ በአካባቢው የነበሩ ሰዎች ጉድ ይላሉ፡፡ ፖሊስ እስኪመጣ ድረስም ሌቦቹን የሬስቶራንቱ ጥበቃዎች ይረከቧቸዋል፡፡ ሊዘረፉ የነበሩት ሴቶች ለሥራ ባልደረባዬና ለጓደኛዋ ምሥጋና ሲያዥጎደጉዱና ምሳ ካልጋበዝን ብለው ሲያስቸግሩ፣ የሥራ ባልደረባዬን የገረማት ሁለት በአርባዎቹ የዕድሜ ክልል ውስጥ የሚገኙ ሌሎች ሴቶች ግን፣ “ድንቄም! ሀብታም ለተሰረቀ የሌላው አጎብጓቢ መሆን ነው የሚገርመው . . .” እያሉ ሲሳለቁ በጣም እንዳሳዘናት ነገረችኝ፡፡ ሌብነትን ማበረታታት ምን የሚሉት በሽታ ይሆን?

ሁለተኛው አጋጣሚ የተፈጠረበት ጎረቤቴ ነው፡፡ ጎረቤቴ ታክሲ ቢጠብቅ ቢጠብቅ ማግኘት ባለመቻሉ የሞላ የከተማ አውቶቡስ ውስጥ ይገባል፡፡ በተሳፋሪዎች ከአፍ እስከ ገደፉ የሞላው አውቶቡስ ውስጥ ኪስ አውላቂዎችም ተሰማርተው ኖሮ ከመቅጽበት የኪስ ቦርሳው ተመንትፏል፡፡ ቦርሳው ውስጥ ደግሞ ሦስት ሺሕ ብር አለ፡፡ ለትኬት ቆሯጩዋ መሰረቁን አስታውቆ በር እንዳትከፍት ይነግራታል፡፡ ትኬት ቆሯጩዋ ለሾፌሬ አስታውቃ ጉዞው ሲገታ፣ አንድ ልጅ እግር ጎረቤቴን በዓይኑ ጠቀስ ያደርገዋል፡፡ ጎረቤቴ መልሶ በምልክት ሲጠይቀው ልጁ ወንበሩ ሥር ይጠቁመዋል፡፡ ዓይኑን ወደዚያ ሲያዞር አስቤዛ የተሞላበት ዘንቢል ያያል፡፡ ጎረቤቴ ዝቅ ብሎ ገለጥ ገለጥ ሲያደርግ ቦርሳውን ተወሽቆ ያገኘዋል፡፡ ቦርሳውን ከፍቶ ገንዘቡን ከቆጠረ በኋላ ለሾፌሩ መገኘቱ ተነግሮት ጉዞው ይቀጥላል፡፡

ጎረቤቴ መውረጃው ደርሶ ልጅ እግሩን በምልክት አመሥግኖ ሲወርድ ሌሎች ሦስት ሰዎችም አብረውት ይወርዳሉ፡፡ አንደኛው ያለምንም ኃፍረት፣ “ኪስህ ውስጥ ገብቶ ሲሰርቅህ ዓይቼ ነበር፡፡ ነገር ግን ፈርቼ ዝም አልኩ . . .” እያለ ሲያወራ የተቀሩት ሁለቱም ማየታቸውን አረጋገጡለት፡፡ ምክንያታቸው ደግሞ ሌቦቹ ብዛት ስለነበራቸው ፈርተው ነው፡፡ አንድ አውቶቡስ ሙሉ ተሳፋሪ እፍኝ የማይሞሉ ሌቦችን ፈርቶ ሲዘረፍ ይውላል፡፡ ያ ታዳጊ ባይኖር ኖሮ ያንን ገንዘብ ከዘንቢል ውስጥ ማን ጠርጥሮ ያወጣ ነበር? ሌቦቹ የሰረቁት ገንዘብ በአጋጣሚ ቢገኝ ኖሮ የዘንቢሉ ባለቤት የሆኑት አቅመ ደካማ ሴት ሌባ ሊባሉ ነበር? “አይጥ በበላ ዳዋ ተመታ” የሚባለው እንዲህ ዓይነቱ ሲያጋጥም ነው፡፡

ሦስተኛው ገጠመኝ የሚመለከተው ዘመዴን ነው፡፡ ይህ ዘመዴ ሕመምተኛ እህቱን ሊያሳክም ሆስፒታል ይሄዳል፡፡ በስንት መከራ ወረፋ ደርሶት ሐኪሙ ዘንድ ይዟት ገብቶ ምርመራ ይደረግላታል፡፡ የላቦራቶሪ ምርመራ ታዞላት አስፈላጊውን ሁሉ አከናውና መልሱን ይዘው ሐኪሙ ዘንድ ይቀርባሉ፡፡ ሐኪሙ በምርመራ ውጤቱ መሠረት ለታካሚዋ የተለያዩ መድኃኒቶች ያዛል፡፡ እህቱን በድጋፍ ይዞ ወዲያ ወዲህ ያለበት የደከመው ዘመዴ ሆስፒታሉ ውስጥ የሚገኝ ፋርማሲ ሄዶ ለመግዛት ቢፈልግ አልተቻለውም፡፡ ወይ እሱ እሷን ደግፎ መቀመጥ አለበት፡፡ አሊያም ሌላ ሰው ደግፎለት እሱ መድኃኒቱን መግዛት አለበት፡፡ ግራ ገብቶት እያለ አንዲት ወጣት ቀረብ ብላ፣ “ምን ልርዳህ?” ትለዋለች፡፡ ችግሩን ይነግራታል፡፡

ወጣቷ በፍፁም ትህትና መድኃኒቱን እንደምትገዛለት ትነግረዋለች፡፡ የሐኪሙን ማዘዣ ሲሰጣት፣ “መጀመሪያ ዋጋውን ጠይቄ ልምጣና ትሰጠኛለህ፤” ብላ በፍጥነት ወደ ፋርማሲ ትሄዳለች፡፡ አሥር ደቂቃዎች ካለፉ በኋላ ትመጣና በአጠቃላይ 1,400 ብር እንደሚያስፈልግ ትነግረዋለች፡፡ ብዛት ያለው መርፌ፣ የተለያዩ እንክብሎችና ፈሳሽ መድኃኒቶች በመታዘዛቸው ሳያቅማማ ገንዘቡን ይሰጣታል፡፡ ቢጠብቅ ቢጠብቅ ወጣቷ የውኃ ሽታ ሆነች፡፡ ካሁን ካሁን ትመጣለች እያለ ከአንድ ሰዓት በላይ ቢጠብቅ እሷ የለችም፡፡ አንዲት የፅዳት ሠራተኛ እህቱን እንዲጠብቁለት ለምኖ ፋርማሲ ሲሄድ በሩ ዝግ ነው፡፡ አሁን በትክክል ገባው፡፡ ያቺ ትህትና የተላበሰች ውብ ወጣት ሕይወት አድን የሆነውን የመድኃኒት መግዣ ገንዘብ ይዛ ጠፍታለች፡፡ ሰብዓዊነት በአረመኔነት ተተክቶ ሲያገኘው እንደዚያን ቀን አዝኖ እንደማያውቅ ነገረኝ፡፡

በአሁኑ ጊዜ ወጣቶች በበጎ ፈቃድ አገልግሎት በርካታ ተግባራትን ሲያከናውኑ በስፋት እያየን ነው፡፡ እንዲህ ዓይነቱ ሰብዓዊ ተግባር ተጠናክሮ ሲቀጥል ምግባረ ብልሹነትና የሞራል ዝቀጠት ሥፍራ ያጣሉ፡፡ በተለያዩ ሱሶች የተጠመዱ ወገኖቻችንም ሌብነትን በመፀየፍ ምግባረ ሰናይ ይሆናሉ፡፡ በገዛ ወገናቸው ላይ የጭካኔ በትር ለማሳረፍ እንቅልፍ አጥተው የሚያድሩም ከእኩይ ተግባራቸው ይታቀባሉ፡፡ በአንድ ወቅት በሌብነትና በማጅራት መቺነት የተሰማሩ ወጣቶች በምሥጉን ሰዎች አማካይነት ወደ ሰላማዊ ሕይወት ተመልሰው የዩኒቨርሲቲ ትምህርት መከታተል መጀመራቸውን፣ ከዓመታት በፊት በቴሌቪዥን መመልከቴን አስታውሳለሁ፡፡ እንካንስ በፈጣሪ አምሳያ የተፈጠረ ሰብዓዊ ፍጡር ቀርቶ የዱር እንስሳት ተገርተው አስገራሚ ተግባራትን ሲያከናውኑ እያየን ነው፡፡ ስለዚህ ከሌብነት፣ ከአሉባልታ፣ ከጭካኔና ከመሳሰሉት ዝቅጠቶች ውስጥ ወጥተን ሰው እንሁን፡፡ ያለበለዚያ ሰው ነኝ ማለት ይከብዳል፡፡ ፈጣሪም እኮ ሰው አደርጎ በአምሳሉ የፈጠረን እሱን እንድንመስል ነበረ፡፡ አይደለም እንዴ?

 (ሳራ አጥናፉ፣ ከጎተራ)

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

አስጨናቂው የኑሮ ውድነት ወዴት እያመራ ነው?

ከቅርብ ጊዜያት ወዲህ የኑሮ ውድነት እንደ አገር ከባድ ፈተና...

‹‹ወላድ ላማቸውን አርደው ከደኸዩት ወንድማማቾች›› ሁሉም ይማር

በንጉሥ ወዳጅነው   የዕለቱን ጽሑፍ በአንድ አንጋፋ አባት ወግ ልጀምር፡፡ ‹‹የአንድ...

የመጋቢቱ ለውጥና ፈተናዎቹ

በታደሰ ሻንቆ ሀ) ችኩሎችና ገታሮች፣ መፈናቀልና ሞትን ያነገሡበት ጊዜ እላይ ...

ጥራት ያለው አገልግሎት መስጠት የሚያስችል ሥርዓት ሳይዘረጉ አገልግሎት ለመስጠት መነሳት ስህተት ነው!

በተለያዩ የመንግሥትና የግል ተቋማት ውስጥ ተገልጋዮች በከፈሉት ልክ የሚፈልጉትን...