Wednesday, October 5, 2022
ሌሎች ዓምዶች
    - Advertisement -
    - Advertisement -
    ዜናጦላይ ታስረው የከረሙት የአዲስ አበባ ወጣቶች በሁለት ቀናት ውስጥ ይፈታሉ

    ጦላይ ታስረው የከረሙት የአዲስ አበባ ወጣቶች በሁለት ቀናት ውስጥ ይፈታሉ

    ቀን:

    ከአንድ ወር በላይ በጦላይ ወታደራዊ ማሠልጠኛ የከረሙት 1,174 የአዲስ አበባ ከተማ ወጣቶች፣ በሁለት ቀናት ውስጥ እንደሚፈቱ ተገለጸ፡፡

    ከአዲስ አበባ ፖሊስ ኮሚሽን የተገኘው መረጃ እንደሚያመለክተው፣ ወጣቶቹ ሐሙስ ወይም ዓርብ እንደሚፈቱ ነው፡፡

    ወጣቶቹ የታሰሩት ከየቤታቸው ታፍሰው ሳይሆን በጎዳና ላይ ነውጥ በማድረግ፣ ንብረት በማውደም፣ አካል በማጉደልና በፀጥታ ኃይሎች ላይ ድንጋይ በመወርወር ጉዳት በማድረሳቸው መሆኑን፣ የአዲስ አበባ ፖሊስ ኮሚሽን ወጣቶቹ ከታሰሩ ቀናት በኋላ መግለጹ ይታወሳል፡፡

    የወጣቶቹን እስራት ጉዳይ በተመለከተ ሪፖርተር ያነጋገራቸው የአዲስ አበባ ፖሊስ ኮሚሽነር ሜጀር ጄኔራል ደግፌ በዲ፣ ወጣቶቹ በቁጥጥር ሥር የዋሉት በጎዳና ላይ ነውጥ ሲያካሂዱ ነው ብለዋል፡፡ በወቅቱ የተያዙት በርካታ ቢሆኑም የተወሰኑት ተመክረው እንዲለቀቁ መደረጋቸውን፣ ከፍተኛ ጥፋት ማድረሳቸው የታወቀው ደግሞ ተለይተው በሕግ መጠየቃቸውን አክለዋል፡፡ የተቀሩት 1,174 ወጣቶች ግን ወደ ጦላይ ተወስደው የተለያዩ ሥልጠና ተሰጥቷቸው ጥፋተኛ መሆናቸውን ስላመኑ፣ የሥልጠናው ጊዜያቸው አጥሮ በዚህ ሳምንት መጨረሻ ላይ እንደሚለቀቁ አስታውቀዋል፡፡

    ወጣቶቹ ቢያጠፉም በቁጥጥር ሥር ከዋሉ በኋላ ፍርድ ቤት በማቅረብና ለፍርድ ቤት በማስረዳት ተጨማሪ ምርመራ መጠየቅ እየተቻለ፣ ከሕግ ውጪ ባልተሰጠ ሥልጣን ወደ ማሠልጠኛ መውሰድ ተገቢ አለመሆኑን በሚመለከት ለተነሳላቸው ጥያቄ ኮሚሽነሩ ሲመልሱ፣ ‹‹ወጣቶቹን ፍርድ ቤት አቅርቦ በመክሰስ ፍርድ መሰጠት ተገቢ ቢሆንም፣ በቁጥጥር ሥር የዋሉ የጎዳና ላይ አመፅ እያካሄዱ ስለነበር፣ መጀመርያ በቁጥጥር ሥር አውሎ መለየት አስፈላጊ በመሆኑ ያንን አድርገናል፤›› ብለዋል፡፡

    ወጣቶችን የመቆጣጠርና ሥርዓት ይዘው እንዲኖሩ ማድረግ የመጀመርያው ኃላፊነት የቤተሰብ፣ ሲቀጥል ደግሞ የኅብረተሰቡ፣ ከእነሱ ሲያልፍ ደግሞ መንግሥት መሆኑን የጠቆሙት ሜጀር ጄኔራል ደግፌ፣ ሁለቱን አልፈው በመገኘታቸው መንግሥት የማስተካከል ኃላፊነቱን እንደተወጣ አስረድተዋል፡፡

    እያንዳንዳቸው በተደራጀ የምርመራ ፋይል በመርማሪዎች የተዘገበ የድርጊት መገለጫ እንዳላቸው የጠቆሙ ኮሚሽነሩ፣ ጥፋታቸውን አምነውና የሚሰጣቸውን ትምህርት ተግባራዊ በማድረግ በቀላሉ መለወጥ የሚችሉት ከማሠልጠን ባለፈ፣ ለወደፊት በሥራ ላይ ተሰማርተው አምራች ዜጎች እንዲሆኑ ከየክፍላተ ከተሞቹ ጋር ተነጋግረው የሚቋቋሙበትና ወደ ሥራ የሚገቡበት ሁኔታ መዘጋጀቱን ጠቁመዋል፡፡

    የፖሊስ ኮሚሽነሩ ጦላይ ስለሚገኙት የአዲስ አበባ ወጣቶች ከላይ የተገለጸውን ቢናገሩም፣ በርካታ የሕግ ባለሙያዎች ግን በእሳቸው ሐሳብ አይስማሙም፡፡ ኮሚሽኑ የሕገ መንግሥቱን ድንጋጌ፣ የወንጀለኛ መቅጫ ሥነ ሥርዓት ሕግና ሌሎች ዓለም አቀፍ ድንጋጌዎችን ጭምር የጣሰ ድርጊት መፈጸሙ ያስረዳሉ፡፡ በተለይ የአዲስ አበባ ነዋሪዎች በተለያዩ ማኅበራዊ ድረ ገጾች ላይ ተቃውሟቸውን በቡድንና በተናጠል በማሰማት ላይ ሰንብተዋል፡፡

    ‹‹ለዓብይ አህመድ የጠቅላይ ሚኒስትሩ ድጋፉን የሰጠው ወጣት በጅምላ ታፍሶ ሕግ ባለበት አገር እንደ ከብት መታጎር የለበትም፤››፣ ‹‹ባለፉት አመራሮች ሲፈጸም የነበረው ድርጊት መደገም አይኖርበትም፤››፣ ‹‹የፈጸመው ወንጀል ሳይጣራና ማስረጃ ሳይገኝ አንድም ሰው አይታሰርም የተባለው የጠቅላይ ሚኒስትሩ ቃል መጠበቅ አለበት፤›› እና መሰል መልዕክቶች በተለያዩ ማኅበራዊ ድረ ገጾች ላይ ሠፍረው ታይተዋል፡፡

    - Advertisement -

    ይመዝገቡ

    spot_img
    spot_img