Sunday, June 16, 2024
- Advertisement -
- Advertisement -

ልናገርለውጡን ለማስቀጠል የባለድርሻ አካላት ሚናና ኃላፊነት

ለውጡን ለማስቀጠል የባለድርሻ አካላት ሚናና ኃላፊነት

ቀን:

በዳግም መርሻ

ከቅርብ ጊዜ ወዲህ በተለያዩ የአገሪቱ ክልሎች እየታዩ ያሉ ችግሮችን አስታኮ የብዙ ዜጎችና ሚዲያዎች የመነጋገሪያ አጀንዳ ሆነው ከሰነበቱትና አሁንም በዚያው መልክ ከቀጠሉት ግንባር ቀደም ጉዳዮች መካከል፣ የሕግ የበላይነትን በማክበርና በማስከበር ረገድ የሚታዩ ችግሮች ዙሪያ የሚሽከረከሩ ነበሩ። በተለይ መንግሥት «ጥልቅ ተሃድሶ» ብሎ የሰየመውን ንቅናቄ ካወጀበት ጊዜ አንስቶ እስካሁን፣ በአብዛኛዎቹ የአገሪቱ ክልሎች ከተነሱት ግጭቶች ጋር ተያይዞ የሰዎች ሕይወት መጥፋቱ፣ ንብረት መውደሙና በርካታ ሰዎች መፈናቀላቸው በዜጎች ላይ የሚደርሰው ዘርፈ ብዙ ጉዳት እንዳለ ሆኖ፣ የተጀመረውን ለውጥ በተረጋጋና በሰላማዊ አግባብ ለማስቀጠል ከእያንዳንዱ ዜጋ ጀምሮ በየደረጃው እስከ ፌዴራልና የክልል የፀጥታ አካላት ድረስ ያሉ ልዩ ልዩ ባለድርሻ አካላት ድርሻቸውን በሚፈለገው መንገድ እየተወጡና ሒደቱን እያገዙ ነው ወይ? የሚለው ጉዳይ አነጋጋሪ ከሆነ ሰነባብቷል። ይህ የሆነበት ዋነኛ ምክንያት በብዙዎቹ ክልሎች የሕዝቡን ሰላምና ደኅንነት ሥጋት ውስጥ የከተቱና በፀጥታ አካላትም በፍጥነት መፍትሔ ሊበጅላቸው ያልቻሉ ግጭቶችና ብጥብጦች በተደጋጋሚ መታየታቸው ነው። ከዚህ አኳያ ከላይ የተጠቀሱት ጉዳዩች የሕዝቡ፣ የፖለቲከኞችና የሚዲያዎች መነጋገሪያ ቢሆኑ አያስገርምም።

እንደሚታወቀው በአሁኑ ወቅት የኢትዮጵያ የፖለቲካ ሁኔታ አዲስ ምዕራፍ ላይ ይገኛል። ባለፉት አራትና አምስት ዓመታት አገሪቱን ሊያፈራርሱና ሕዝቡን ሊበትኑ የነበሩ ሁኔታዎች የመብት ረገጣ፣ የመልካም አስተዳደር ችግር፣ የሕግ የበላይነት መሸርሸር፣ ሥራ አጥነት፣  ኢፍትሐዊ የኢኮኖሚ ተጠቃሚነት. . . ወዘተ. ችግሮች ጫፍ እየደረሱ በመሄዳቸው፣ በውስጥና በውጭ የሚገኙ የለውጥ ኃይሎች ያደረጉት መጠነ ሰፊ ትግልና ግፊት ፍሬ አፍርቶ አሁን ብዙ ለውጦችን ለማየት ችለናል። በዚህም ለውጡ ገና ከጅምሩ ተስፋ ተጥሎበት የሚሊዮኖችን ድጋፍ አግኝቷል።            ይሁን እንጂ አሁንም ቢሆን በዚህ መሀል አላስፈላጊ ድርጊቶች እየተፈጸሙ በርካቶች ንፁኃን ዜጎች ውድ ሕይወታቸውን አጥተዋል። የአካል ጉዳት ደርሷል። ሀብትና ንብረት ወድሟል። ከዚህም በላይ ዜጎች ቤተሰብ መሥርተው ለረጅም ዓመታት ከቆዩበት አካባቢ በማንነታቸው ብቻ በማፈናቀል፣ ማኅበራዊና ኢኮኖሚያዊ ሕይወታቸው እንዲመሰቃቀል ሆኗል። ምንም እንኳን በመልሶ ማቋቋም፣ በአገር ሽማግሌዎችና በሕዝቡ ጥረት ብዙ በመቶ ሺዎች የሚቆጠሩ ወደ ቀድሞ መኖሪያ ቀዬአቸው እየተመለሱ ቢሆንም፣ በውስጥ መፈናቀል ደረጃ አገራችን ከአፍሪካ ከቀዳሚው ተርታ ላይ መሠለፏን አንዳንድ ሪፖርቶች ይፋ አድርገዋል። ይህ ሁሉ የሥርዓት አልበኝነትና የሕገወጥነት ውጤት ነው።

- Advertisement -

ከዚህ በፊት የሚፈጠሩ ግጭቶች መንስዔ በአመዛኙ ከግጦሽ ሳርና ከውኃ አጠቃቀም ጋር በተያያዘ ይከሰት የነበረ ሲሆን፣ ችግሮቹም እንዳሁኑ ሳይባባሱ በፌዴራል መንግሥት ጣልቃ ገብነትና በአገር ሽማግሌዎች በውይይት የሚፈቱበት ሁኔታ እንደነበረ አይዘነጋም። ሆኖም በአሁኑ ወቅት የሚታዩት ግጭቶች በመነሾዋቸው ምክንያት፣ በስፋታቸውና በሚያደርሱት የጉዳት ልክ አሁን ከሚታዩት የግጭት ዓይነቶች የተለየ መልክና ባህሪ ያላቸው መሆኑ የሁሉንም ትኩረትና ቀልብ እንዲስብ አድርጓል። በእርግጥ ባለፉት 27 ዓመታት ቋንቋና ብሔርን መሠረት በማድረግ ሲሠራበት የነበረው የፌዴራል ሥርዓት ከአንድነት ይልቅ ክልላዊነት ላይ፣ ከእኛነት ይልቅ እኔነት ላይ፣ ከሚያስተሳስሩን ጉዳዮች ይልቅ ልዩነቶቻችን ላይ ትኩረት በማድረግ የጋራ እልውናችንን የሚያኮስሱ ሥራዎችን እያጎላ በመምጣቱ የይገባኛል ጥያቄዎች አቆጥቁጠው መሠረት እንዲይዙ ማድረጉን መንግሥትም ጭምር ይስማማበታል። እናም የፌዴራል ሥርዓቱ በሒደት የተከተለው የአፈጻጸም አቅጣጫ ሕዝቡ እርስ በርሱ እንዲጠራጠር፣ እንዲፋጠጥና ልክ በአሁኑ ወቅት እንደሚታየው በሆነ ባልሆነው በግጭትና በጥላቻ እንዲዘፈቅ ያደረገው አንዱ ገፊ ምክንያት መሆኑ ብዙ አያጠራጥርም።

በእኔ ዕይታ ሌላው የወቅታዊ ችግሮቻችን አባባሽ ምክንያት በቅጡ ያልዳበረው የዴሞክራሲ ባህላችንና እንደ አጠቃላይም ፖለቲካችን ነው ማለት ይቻላል። እውነቱን እንነጋገር ከተባለ እኛ ኢትዮጵያውያን ለዴሞክራሲና ለዘመናዊ ፖለቲካ እንደ ጥሩ መደላደል ተደርገው ሊወሰዱ የሚችሉ የሕጎች እጥረት አለብን ብዬ አላስብም። ይነስም ይብዛ በዚህ በኩል ብዙ የምንታማ አይደለንም። ለምሳሌ የኢፌዴሪ ሕገ መንግሥት አንድ ሦስተኛውን ክፍል የሚሸፍነው ስለሰብዓዊና የዴሞክራሲ መብቶች የሚያወሳ መሆኑ፣ የሰብዓዊና ዴሞክራሲያዊ መብቶች ምን ያህል ትኩረት እንደተሰጣቸው አንድ ጥሩ ማሳያ ነው። በተጨማሪም ምን ያህሉ በእነዚህ መብቶች ይጠቀማል የሚለው ጉዳይ እንዳለ ሆኖ የመረጃ ነፃነት፣ የመጻፍ ነፃነት፣ የሚዲያ ነፃነት. . . ወዘተ. ሕጎች አሉን። በሌላ በኩል ያሉባቸው የማስፈጸም ክፍተቶችን ሳንዘነጋ የሰብዓዊና የዴሞክራሲ መብቶችን የሚያስከብሩና ስለመከበራቸውም የሚከታተሉ የዴሞክራሲ፣ የመልካም አስተዳደርና የሕግ አስከባሪ ተቋማትም ተዋቅረው መገኘታቸው ሌላው በጠንካራ ጎኑ የሚወሰድ ጉዳይ ነው።

በአንድ አገር ውስጥ የዴሞክራሲ እሴቶችን የሚያጎሉ ሕጎች መኖርና የዴሞክራሲ ተቋማት መዘርጋት እንደ አንድ ትልቅ ዕርምጃ የሚታይ ቢሆንም፣ ብቻውን ግን እንደ መጨረሻ ግብ ተደርጎ ሊወሰድ አይችልም። የብዙ አሮች ልምድ እንደሚያሳየው ተግባራቸው ሲገመገም የዴሞክራሲ ባህሪ የሌላቸውና አምባገነን መንግሥታትም ጭምር ጥሩ ጥሩ የሚባሉ የሰብዓዊ መብትና የዴሞክራሲ እሴቶችን አጉልተው የሚያንፀባርቁ ሕጎች፣ ከዚህ ጎንም የዴሞክራሲ ተቋማት ሊኖራቸው ይችላል። ቁም ነገሩ አብዛኞቹ ዜጎች በሕግ የላይነትና በዴሞክራሲ እሴቶች ዙሪያ ግንዛቤያቸው በሚገባ ሰፍቶና የማመዛዘን ብቃታቸውም ማደጉን ተከትሎ፣ የያዙትን ዕውቀትና ግንዛቤ በማኅበራዊ ግኑኝነታቸውና አኗኗራቸው ውስጥ በተጨባጭ ይተገብሩታል ወይ የሚለው ጉዳይ ነው።

ይሁን እንጂ ባለፉት ዓመታት በአገራችን በተለይም ከዋና ዋና ከተሞች ወጣ ባሉ አካባቢዎች ጠንካራና ተከታታይ የሆነ ሥነ ዜጋ ትምህርት ሕዝብ ውስጥ ተገብቶ ያለመሠራቱ፣ ከዚህ በተጓዳኝም ጠንካራና በሕዝቡ ዘንድ ተቀባይነት ያላቸው የዴሞክራሲ፣ የፍትሕና የፀጥታ ተቋማትን በሚፈለገው ደረጃ መገንባት ያለመቻላችን ተደማምረው፣ አሁን እያጋጠሙን ላሉት ችግሮች ተጨማሪ መንስዔዎች ሆነዋል የሚል እምነት አለኝ። በእኛ አገር ሁኔታ ጥቂት የማይባሉ ግለሰቦች ግዴታቸውን እንደ መብታቸው ያውቃሉ ማለት አይቻልም። በተጨማሪም ነፃነት ሲባል የፈለጉትን የማድረግና ግዴታ እንደሌለው አድርገው የሚያስቡ ብዙዎች ናቸው።

ለዚህም ነው በአሁኑ ወቅት አምባገነንነትን ከጫንቃው ላይ አሽቀንጥሮ የጣለ ትውልድ በጥቃቅን ምክንያቶች እየተጋጨና ቢያንስ ቢያንስ ለብዙ ዘመናት በታሪክ ተገንብቶ የቆየው የኢትዮጵያውያን የመቻቻል፣ የመረዳዳት፣ የአብሮነት አኩሪ እሴቶቻችንን ወደ ጎን በመግፋት ሕገ መንግሥቱ ለዜጎች ያረጋገጠውን መብቶች (በዋናነትም በሕይወት የመኖር መብት፣ የአካል ደኅንነት መብትና በፈለጉበት አካባቢ ተዘዋውሮ የመሥራትና ሀብት የማፍራት መብት) በአስከፊ ሁኔታ እስከመጣስ የተደረሰውና የዜጎች የመኖር ዋስትና ለከፋ አደጋ እየተጋለጠ የሚገኘው።                                                                                                                                                                                                                                                                                                 ከላይ የተነሱት ሐሳቦች እንዳሉ ሆነው ለውጡ ያላስደሰታቸው ወይም ጥቅማቸው የተነካባቸው ረ ለውጥ ቡድኖች የሉም ማለት አይቻልም። እንዲያውም አሁን እየተከሰቱ ከሚገኙት ቀውሶች በስተጀርባ እነዚህ ቡድኖች አንዱ ብሔር ከሌላው ብሔር ጋር እንዲጋጭ ከማድረግ ጀምሮ፣ የተለያዩ መልክና ገጽታ ያላቸውን አሻጥሮች ሥራ ላይ በማዋል ለውጡን ለማጨናገፍ ብርቱ ጥረት በማድረግ ላይ እንዳሉ መንግሥትም ጭምር ያመነው ጉዳይ ነው።

ይህ የፀረ ለውጥ ቡድን በስሜት የሚነዳ፣ ስለዴሞክራሲና የሕግ የበላይነት እሴቶች በቂ ግንዛቤ የሌለው፣ አዕምሮው በሐሰት ፕሮፓጋንዳ የተሞላ፣ እውነተኛና ሐሰተኛ መረጃዎችን በቅጡ መርምሮ ሀቁ ላይ መድረስ የሚሳነው (ለመመርመር ግድ የማይሰጠው)፣ ግለሰቦችን በተለይም ደግሞ ወጣቱን እንደ ጥሩ መሣሪያ አድርገው ሲወስድ ይታያል። በዚህም ወጣቶች በማኅበራዊ ሚዲያ ውስጥ በሴረኞች በሚፈበረኩ ሐሰተኛ መረጃዎችና ስሜት ኮርኳሪ ቅስቀሳዎች እየተጋለጡ፣ የብሔር ግጭት ውስጥ በመሳተፍ ጉዳት አድርሰዋል። እነርሱም ተጎጂ ሲሆኑ ተመልክተናል። የፖለቲካ ፓርቲዎች ሐሳቦቻቸውን ለሕዝብ መሸጥ የሚችሉት ሰላማዊው የፖለቲካ ትግል ሕጋዊና ዴሞክራሲያዊ ሲሆን ብቻ ነው። የሚያነሱት ሐሳብና አጀንዳ በሕዝቡ ዘንድ ተቀባይነት የሚያገኘው ሐሳቡ ተዓማኒና ጠቃሚ ሲሆን ብቻ እንደሆነ ግልጽ ነው። ከዚህ አንፃር በፖለቲካ ፓርቲዎችና አክቲቪስቶች (የመብት ተሟጋቾች) ዘንድ የተጀመረውን የዴሞክራሲ ለውጥ ከመደገፍና የበኩልን ድርሻ ከመወጣት አኳያ፣ እስካሁን የታየው እንቅስቃሴም የሚያመረቃ ነው የሚባል እንዳልሆነ ብዙዎች ይስማማሉ። እንዲያውም ከዚህ ይልቅ እነዚህ ቡድኖች ሰላማዊ የፖለቲካ ሒደት የሚጠይቀውን ጨዋነትና ሥነ ምግባር መያዝ አቅቷቸው በተለያዩ ሚዲያዎችና በፌስቡክ የእርስ በርስ ክስና መወነጃጀል ላይ ተጠምደው ሰላም፣ መረጋጋትና የሰከነ አካሄድ የሚፈልገውን የለውጥ ሒደት አውቀውም ይሁን ሳያውቁት ለመረበሽ ሲሞክሩ ለመታዘብ የቻልንበት ሁኔታ ጥቂት የሚባል አይደለም። ይባስ ብሎም ጊዜውን የማይመጥኑና ከተጨባጭ አገራዊ ሁኔታዎች ጋር የማይሄዱ አጀንዳዎችን እያራገቡ፣ ኅብረተሰቡን በተለይም ወጣቱን ለብና ለብጥበጥ ሲጋብዙት ተስተውለዋል።

በአጠቃላይ አሁን ያለው አገራዊ ሁኔታ ሲታይ ተስፋዎችም ሥጋቶችም የተደበላለቁበት ነው ማለት ይቻላል። በአንድ በኩል የተስፋና የለውጥ ሒደቱ በብዙ ወገኖች ድጋፍ ያገኘ ከመሆኑ፣ ጎን ለጎን በአጭር ጊዜ ውስጥ ቀላል ግምት የማይሰጣቸውን ውጤቶች የመመዝገባቸውን ያህል በሌላ ጎኑ ለውጡን ተንተርሶ እየታዩ ያሉት አላስፈላጊ ድርጊቶች ለውጡን በማደናቀፍ ወደሚፈለገው ግብ እንዳይደርስ ሊያደርጉ ይችሉ ይሆን ወይ? የሚለው ሥጋትና ጥያቄም አብሮ ይነሳል። ያሁኑ ለውጥ እንዲመጣ ባለፉት ዓመታት በውስጥም በውጭም የሚገኙ ዜጎች ከፍተኛ ትግል አድርገዋል። ውድ ሕይወታቸውንም አሳልፈው ሰጥተዋል። በዚህ ሁኔታ የመጣውን ለውጥ ሕዝቡ ተንከባክቦና የሚፈለገውን መስዋዕትነት ከፍሎ ዳር ከማድረስ ውጪ፣ ሌላ የተለየ ሐሳብ ይኖረዋል ተብሎ አይታሰብም። ሕዝቡ በየአጋጣሚው ከሚቀነቀነው የመደመር፣ የፍቅርና የይቅር ባይነት እሳቤ ብዙ የተለየ አቋም እንደሌለው በተለያዩ አጋጣሚዎች ባሳየው አስደናቂ ድጋፍ አስመስክሯል። ይሁን እንጂ እስካሁን ባለው ሁኔታ ከለውጡ ኃይሎች ከሐሳብና ከቃል ባለፈ በተግባር ላይ የተመሠረተ በቂ አስተዋጽኦና ተሳትፎ ታይቷል ወይ? ተብሎ ቢጠየቅ የእኔ አቋም አልታይም ወደሚል የሚያመዝን ይሆናል።

ይህ ከግምት ውስጥ ሲገባ የሕዝብ ድጋፍና የለውጥ ፍላጎት በነቃ ተሳትፎና ተግባራዊ አንቅስቃሴ ማስደገፍ እጅግ ወሳኝ ነገር መሆኑ አያጠያይቅም። እናም የሕግ አስከባሪ የመንግሥት አካላት፣ ተፎካካሪ ፓርቲዎች፣ አክቲቪስቶች፣ የመብት ተሟጋቾች፣ ምሁራን፣ ሲቪል ማኅበራት፣ ወጣቶች፣ ሚዲያዎች፣ የኪነ ጥበብ ባለሙያዎች፣ የአገር ሽማግሌዎች. . . ወዘተ. የቤት ሥራቸውን በመውሰድ በተጨባጭ የሚገለጽ ድጋፍ መስጠት አለባቸው። ይህ ድጋፍ እንደ ሁኔታው ፖለቲካዊ፣ ማኅበራዊና ኢኮኖሚያዊ. . . ቅርፅና ይዘት ሊኖረው ይችላል። በዚህ ረገድ የመንግሥት የፀጥታ ኃይሎች የዜጎችን ደኅንነት በማረጋገጥ ብሎም የሕግ የበላይነት እንዲረጋገጥ ከማድረግ አኳያ፣ ቀዳሚና ከምን ጊዜውም የበለጠ ትልቅ ኃላፊነት አለባቸው። የማንኛውም መንግሥት ዋነኛ ተግባር የሕዝብ ደኅንነትና ሰላም ማስጠበቅ ነው። መንግሥት ይኼንን ተግባሩን በአግባቡ የማይወጣ ከሆነ፣ የመንግሥት መኖር ዋጋና ትርጉም አይኖረውም። በመሆኑም መንግሥት ከጥታ ማስከበር ሥራው በተጓዳኝ የሕዝብን ሰላምና ደኅንነት የመንሳት ሒደት ለመግታት የመጫወቻ ሜዳው እስከምን ድረስ እንደሆነ ቀይ መስመሩን አስምሮ ማሳየት፣ ይኼንንም ለሕዝብ በግልጽ ማሳወቅ ያስፈልጋል።

በመሠረቱ ግጭቶችና ብጥብጦች በእኛ አገር ብቻ ሳይሆን በሌሎችም አገሮች ሲከሰቱ ይታያል። ሌላው ቀርቶ በዴሞክራሲ ባደጉት ምዕራባውያን አገሮችም ከምርጫ ጋርም ሆነ ከሌሎች ሁኔታዎች ጋር ተያይዞ የተለያዩ ግጭቶችና ውዝግቦች ሊፈጠሩ ይችላሉ። ይሁንና በእኛ አገር ሁኔታ እንደሚታየው እነርሱ ችግሮቹ የከፋ ጥፋት ሳያደርሱ የመቆጣጠር አቅምና ችሎታ ስላላቸው፣ የዕለት ተዕለት ኑሯቸው አደጋ ላይ አይወድቅም። በንድፈ ሐሳብም ሆነ የእነዚህ አገሮች ተሞክሮ እንደሚያሳየው በማንኛውም ሁኔታ ውስጥ አንድን አገር እንደ አገር መቀጠል ከሚያስችሉት ነገሮች መካከል፣ የፀጥታ ኃይሉና ሲቪል ሰርቪሱ በዋናነት ተጠቃሾች ናቸው። እነዚህ ተቋማት መንግሥታት ቢወጡም ሆነ ቢወርዱ፣ አንዱ ሄዶ ሌላው ቢመጣም ሆነ ሌላ አደጋ ቢከሰት ከወቅታዊ ፖለቲካ ሁኔታዎቸ ጋር የማይቀያየሩ ስለሚሆኑ ሕይወት አደጋ ላይ ሲወድቅ አይታይም።

በሌላ በኩል የፀጥታ ኃይሎች አደጋ ሲፈጠር በቸልተኝነት ቆመው የሚያዩ ከሆነ፣ የዜጎች ሰላምና ደኅንነት በእጅጉ አደጋ ላይ ነው ማለት ይቻላል። በነገራችን ላይ ግጭትን ከሚያባብሱት ነገሮች አንዱ ይህ የጥታ አካላት ወንጀል ሲፈጸም ዝም ብለው ማየታቸው፣ ወይም ደግሞ ችግሩን ለማብረድ ፈጣን ዕርምጃ ለመውሰድ ያለመቻላቸው ሁኔታ ወይም ደግሞ የቁርጠኝነት ማነስ ነው። ይህ እንደ አገር ትልቅ ውድቀት ነው። መንግሥትና የሚመለከታቸው አካላት ይኼን መለየትና መቆጣጠር አለባቸው። ከዚህ ጎን ለጎንም የሕዝቡን ደኅንነትና ሰላም ማስጠበቅ ያልፈለጉ፣ ያልቻሉና ዝምታን የመረጡ የፖሊስና የፀጥታ አካላትም በጥንቃቄ እየተለዩ ወደ ሕግ የማቅረብ ሥራ በትኩረት መከናወን ይኖርበታል። በመካከለኛና በረጅም ጊዜ መሠራት ያለበት ነገር ግን ከጊዜው የፖለቲካ አየር ጋር የማይወዛወዙ ፕሮፌሽናል የፀጥታና የፖሊስ አካላትን መገንባትና ከዚህ በትይዩም ተከታታይ ሥልጠናዎችን በመስጠት አቅማቸውን ማሳደግ ነው። ሌላው ሊሰመርበት የሚገባው መሠረታዊ ጉዳይ የግጭቶቹ ምንጭ ምንድነው? አሁን ለምን ተባባሱ? ግጭችን ለመከላከልና ለመፍታት የተቋቋሙት የፌዴራል ተቋማትና በየክልሉ የተደራጁት የሰላም ኮሚቴዎች ለምን ውጤታማ መሆን አልቻሉም? መፍትሔው ምንድነው?. . . ለሚሉት ጥያቄዎች ጥልቅ የሆነ ጥናትና ፍተሻ ማካሄድ “አሳውን ለማጥፋት ኩሬውን ማድረቅ” እንደሚባለው፣ ዋናውን ችግር ለይቶ ለማውጣትና ወደ መፍትሔው ለመድረስ ወሳኝና ጠቃሚ ነገር መሆኑን ነው።   በሌላ በኩል የፖለቲካ ፓርቲዎችና አክቲቪስቶች (የመብት ተሟጋቾች) በአሁኑ ጊዜ ትኩረት ማድረግ ያለባቸው ልዩነቶችን ማራገብ፣ አሻጥርና የሴራ ፖለቲካ  ላይ መሆን የለበትም። ይህ የአገርና የሕዝብ ህልውና ላይ እንደ መቆመር ይቆጠራል። ከዚህ ይልቅ በትልቁ የሚጠበቅባቸው ነገር ቢኖር አገርና ሕዝብን ማረጋጋትና ሒደቱን መደገፍ ነው። ምክንያቱም ሁሉም ነገር የሚኖረው መጀመሪያ አገር ሲኖር ነውና። ሌሎች አጀንዳዎችና ጥያቄዎች አገር ከተረጋጋ በኋላ ቀጥለው ሊመጡ ይችላሉ። ደግሞም ለእነርሱም የሚሻለው ነገር የተጀመረውን የለውጥ ሒደት መደገፍና ወደፊት እንዲራመድ የማድረግ ሥራ ማከናወን ነው። ከእዚህ ውጪ ያለው አማራጭ መጠፋፋትን የሚጋብዝ መንገድ ነው። አሁን እዚያ ቋፍ ላይ ነው ያለነው ማለት ይቻላል። ይህ ደግሞ ለሕዝብም ሆነ ለአገር ጠብ የሚል ፋይዳ የለውም። የሚበጀው ነገር ሕዝብን (ደጋፊዎቻቸውን) ማረጋጋት፣ ማስተማር፣ የሕግ የበላይነት እንዲከበር ጠለቅ ያለ ምክር መስጠትና ራሳቸውን አደራጅተው እንዲንቀሳቀሱ ድጋፍ ማድረግ ነው። ይህ የእገዛ ተግባር ከላይ የተጠቀሱትን አካላት ብቻ የሚመለከት ሳይሆን ከእነርሱም አልፎ ወላጆችን፣ የአገር ሽማግሌዎችን፣ የሕዝብ አደረጃጀቶችን፣ የሲቪል ማኅበራትንም ጭምር ያሳተፈ ሊሆን ይገባል። በእርግጥ ባለፉት ዓመታት በሰብዓዊ መብትና በሥነ ዜጋ ትምህርት ሲንቀሳቀሱ የነበሩ ሲቪል ማኅበራት በመንቀሳቀሻ ምኅዳሩ መጥበብ የተነሳ ዜጎችን በማነና በማስተማር ሥራ የሚጠበቅባቸውን ያህል ሠርተዋል ማለት አይቻልም። ያም ሆኖ አሁን ባለው ሁኔታ በየገበሬ ማኅበሩና በየቀዬው ወጣቶች፣ የአገር ሽማግሌዎች፣ የሕዝብ አደረጃጀት ውስጥ የሚገኙ የኅብረተሰብ ክፍሎች. . . ወዘተ. የጥላቻ ንግግሮችና ቅስቀሳዎች እንዳይደረጉ ቀድመው በመከላከል፣ ድርጊቶቹ ሲፈጸሙም አጥፊዎችን ነጥሎ በማውጣት ለሕግ እንዲያቀርቡ በማድረግና በችግሮች ላይ በመወያየት ትልቅ ሚና ሊጫወቱ ይችላሉ።

የማስተማር፣ የመምከርና አቅጣጫን የማመላከት ሥራ በተለይ እንደ እኛ የወጣቶች ሥራ አጥነት በስፋት በሚስተዋልበት አገር ትኩረት ሊያደረግ የሚገባው ወጣቱ ላይ ነው። ወጣቱ የኅብረተሰብ ክፍል በእኛ አገር ብቻ ሳይሆን፣ በሌሎችም አገሮች ግጭቶችን እንደ ማቀጣጠያ መሣሪያ ተደርጎ ይወሰዳል። በእኛም አገር ፖለቲከኞችና አክቲቪስቶች ድብቅ ዓላማቸውን ለማሳካት ሲሉ ወጣቱን በስሜት በመቀስቀስ ወደ ኃይል ድርጊት እንዲያመራ በማድረግ እንደ መሸጋገሪያ ድልድይ ይጠቀሙበታል። ይህ አሁንም ለሚታዩት አንዳንድ ግጭቶች ምክንያት ተደርጎ ይወሰዳል። ይህን ሁኔታ ለማረም ከላይ ከተጠቀሱት አካላት በተጨማሪ ሚዲያዎችም ሊፈጠር የሚችለውን ችግር የማሳየት፣ የማስተማርና የማወያየት እንዲሁም በአጠቃላይ ሕዝቡ በተጀመረው ለውጥ ላይ ሰፊ ግንዛቤ እንዲጨብጥ ትልቅ ኃላፊነት መውሰድ ይኖርባቸዋል። ምሁራንም ቢሆኑ የተጀመረውን ለውጥ ከመደገፍ አኳያ ያላቸው አስተዋጽኦ ቀላል ግምት የሚሰጠው ባይሆንም፣ አብዛኞቹ ምሁራን ለውጡን በሚፈለገው ደረጃ እየደገፉት ነው ማለት አይቻልም። ከዚህ አኳያ ምሁራን የሕዝብ አጀንዳ ያልሆኑትን ጉዳዮች ከማራገብ፣ ተግባር ላይ መዋል የማይችሉ ንድፈ ሐሳባዊ ትንተናዎችን ብቻ ከማቅረብና በርቀት ሆኖ ከማማት ወይም ደግሞ አሉታዊ ትችቶች ላይ ከማተኮር ራሳቸውን ማውጣት አለባቸው። ሐሜት የትም አያደርስም። አሁን ጊዜው ከሩቅ ሆኖ የሚተችበት ጊዜ አይደለም። በመሆኑም ምሁራኖቻችን ከዚህ ሁኔታ ውስጥ በመውጣት ሕዝቡ በለውጡ ዙሪያ ተመሳሳይ ግንዛቤ፣ እምነትና ተሳትፎ እንዲኖረው የማድረግ ሥራ ይጠበቅባቸዋል። ለዚህም እውነቱን በማሳየትና አቅጣጫ በማመላከት አቅማቸው የፈቀደውን ያህል አስተዋጽኦ ማድረግ አለባቸው።

በጥቅሉ መላው የአገሪቱ ሕዝብ በለውጡና እየተከሰቱ ባሉት ችግሮች ዙሪያ ግልጽ ሆኖ የሚወያይበትና የሚነጋገርበት ጊዜው አሁን ነው። ጠቅላይ ሚኒስትር ዓብይ አህመድ (ዶ/ር) በአሥራ አንደኛው የኢሕአዴግ ድርጅታዊ ጉባዔ ላይ ባሰሙት ንግግር ለውጡን በርቀት ሆኖ ከማድነቅ፣ ወደ ንቁ ተሳታፊነት መሸጋገር እንደሚያስፈልግ ያሰመሩበት ጉዳይ መሆኑን ልብ ማለት ያስፈልጋል። ይህ አነጋገር ቃልና አድናቆት ለብቻው ትርጉም እንደሌለውና በተግባር ላይ የተመሠረተ ድጋፍ አስፈላጊና መሠረታዊ ነገር እንደሆነ ያስገነዝባል። በመሆኑም ሕዝቡ ከታች ከቀበሌ ጀምሮ በየደረጃው ባሉ መዋቅሮች አማካኝነት ሲነጋገርና ሲመክር ወደ መፍትሔው እንቀርባለን። በዚህ መንገድ ስንሳተፍና የበኩላችንን ስናዋጣ ደግሞ የተጀመረው ለውጥ ዳር መድረሱና የሚፈለገውን ውጤት ማምጣቱ አያጠራጥርም።

ከአዘጋጁ፡- ጽሑፉ የጸሐፊውን አመለካከት ብቻ የሚያንፀባርቅ መሆኑን እየገለጽን፣ በኢሜይል  [email protected] አድራሻቸው ማግኘት ይቻላል፡፡

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

የምግብ ዋጋ ንረት አጣዳፊ ዕርምጃ ያስፈልገዋል!

መንግሥት የሚቀጥለውን ዓመት በጀት ይዞ ሲቀርብ በአንገብጋቢነት ከሚነሱ ጉዳዮች...

ከባለአንድ ዋልታ ወደ ባለብዙ ዋልታ የዓለም ሥርዓት የመሸጋገራችን እውነታ

በአብዱ ሻሎ አንገት ማስገቢያ እ.ኤ.አ. በፌብሩዋሪ 2022 የሩሲያ መንግሥት በዩክሬን ‹‹ልዩ...

የኢትዮጵያ ኦርቶዶክስ ተዋሕዶ ቤተ ክርስቲያን የውጭ ግንኙነት የሺሕ ዘመናት ታሪኳና እሴቶቿን የሚመጥን መሆን ይኖርበታል

(ክፍል አንድ) በተረፈ ወርቁ (ዲ/ን) እንደ መንደርደሪያ ለዛሬው የግል ትዝብቴንና ታሪክን ላዛነቀው...

ከአገር ግንባታ ጋር የተያያዙ ወሳኝ የቅርብ ታሪካችን አንጓዎች

በታደሰ ሻንቆ በአያሌው የተመረጡና ልጥ የሌላቸው ነጥቦች የተደራጁበት ይህ ታሪክ...