Friday, December 2, 2022
ሌሎች ዓምዶች
    - Advertisment -
    - Advertisment -

    ዘመኑን ከማይመጥን ድርጊት ውስጥ በፍጥነት መውጣት ይገባል!

    ያለንበት 21ኛው ክፍለ ዘመን ለማመን የሚያዳግቱ አስገራሚ ክስተቶች በደቂቃዎች ልዩነት የሚስተዋሉበት ነው፡፡ የሰው ልጅ ምጡቅ አዕምሮ ውጤት የሆኑ የቴክኖሎጂ ገፀ በረከቶች ሕይወትን ቀለልና ዘና እያደረጉበት ነው፡፡ የዘመኑ ዕውቀት በበለፀጉ የሳይንስ ንድፈ ሐሳቦችና የተግባር ልምምዶች የተጠናከረ ሲሆን፣ እዚህ ደረጃ ላይ ለመድረስ የሰው ልጅ አዕምሮ ከመቼውም ጊዜ በላይ ዳብሯል፡፡ አስቸጋሪውን የኑሮ ውጣ ውረድ በማቅለል ላይ ያሉት የቴክኖሎጂ ውጤቶች፣ የሰው ልጅ ፍላጎትን በመጨመር አስተሳሰቡን በማዘመን ላይ ናቸው፡፡ ይህ ዘመን ለኋላቀርነትና ለስንፍና ሥፍራ ስለማይሰጥ፣ የሰው ልጅ የበለጠ ለማግኘት ከፍተኛ ውድድር ውስጥ ገብቷል፡፡ ይህ ውድድር በጥራትና በፍጥነት ላይ የተመሠረተ በመሆኑም፣ የጭንቅላት ጨዋታው ከመቼውም ጊዜ በላይ ጨምሯል፡፡ በ21ኛው ክፍለ ዘመን ውስጥ በአረጀ አስተሳሰብና በኋላቀር ልማድ ለመኖር መሞከር ከተፎካካሪነት መውጣት ብቻ ሳይሆን፣ ለብዙ ነገሮች ባዕድ ያደርጋል፡፡ በዚህ ዘመን አንድ ግለሰብ አዕምሮውን በሚገባ ከተጠቀመበት፣ ከራሱ አልፎ ለአገር ብሎም ለዓለም ይተርፋል፡፡ ይህ ዘመን የሚያንቀላፉ ሳይሆኑ ለአፍታ የማያሸልቡ ብርቱዎች ተዓምር የሚሠሩበት ነው፡፡ የምጡቅ አዕምሮ ባለቤቶች የሚከብሩበትና የሚከበሩበት ነው፡፡ ከዚህ ዘመን ጋር መዘመን አለመቻል እንዳለመኖር ይቆጠራል፡፡

    በፖለቲካው መስክም ተመሳሳይ ነው፡፡ አገር የሚመሩ፣ በዲፕሎማሲ ውስጥ የተሰማሩ፣ የፖለቲካ ፓርቲ የሚያደራጁም ሆኑ ሌሎች መገንዘብ ያለባቸው ድርጊቶቻቸው በሙሉ ለሕዝብ ጠቃሚ እንዲሆኑ መሥራት እንጂ፣ ዘመኑን የማይመጥን ተግባር አለመፈጸም ነው፡፡ በዚህ ዘመን በአርቲፊሻል ኢንተለጀንስ አማካይነት አስደማሚ ነገሮች እየተከናወኑ ነው፡፡ በአርቲፊሻል ኢንተለጀንስ ማሽኖች እንደ ሰው እያሰቡ ችግሮችን መፍታት ብቻ ሳይሆን፣ መረጃ ሳይቀር በመለዋወጥ ተገቢውን ዕርምጃ ይወስዳሉ፡፡ በአሁኑ ጊዜ አንድ ሰው ሥራ ቦታ ሆኖ በተንቀሳቃሽ ስልኩ አማካይነት፣ መኖሪያ ቤቱ ውስጥ የሚደረገውን ማናቸውም እንቅስቃሴ መከታተል ጀምሯል፡፡ ቻይና በቅርቡ በጀመረችው ምርምር ሰው ሠራሽ ጨረቃ በመፍጠር ከተሞቿን በሌሊት ብርሃን ለማጥለቅለቅ ሥራ ጀምራለች፡፡ ብዙ ጉዳዮችን ማንሳት ይቻላል፡፡ የዚህን ዘመን ዕውቀትና የቴክኖሎጂ ግስጋሴ ከመጋራት ይልቅ፣ ፋይዳ በሌላቸው ጉዳዮች ውስጥ ተዘፍቆ አገርን መበደልና ሕዝብን ማወክ ያሳዝናል፡፡ የተዛቡ መረጃዎችን እየለቀቁ ጃርዲያና መሰል ተውሳኮችን ለማስወገድ የሚረዳ ምርምር የሚያደርጉ ባለሙያዎችን፣ በአደባባይ አስቀጥቅጦ መግደል ይህንን ዘመን አይመጥንም፡፡ መያዣ መጨበጫ የሌላቸው ሐሰተኛ መረጃዎች በማሠራጨት የወጣቶችን አዕምሮ መበከል፣ ለዚህ ዘመን የማይመጥን ኋላቀርነት ነው፡፡ ለአገር ዕድገትና ብልፅግና የሚያግዝ ለጋ አዕምሮን በሐሰተኛ ወሬ ማበላሸት አሳፋሪ ነው፡፡  

    ፖለቲከኞች ኅብረተሰብን የማነፅ ትልቅ ኃላፊነት አለባቸው፡፡ ይህንን ኃላፊነት መወጣት የሚችሉት ግን በአርቆ አሳቢ ምሁራንና በአገር ወዳዶች ሲመሩና ከማንም በበለጠ ለሰው ልጅ መብትና ክብር ሲኖራቸው ነው፡፡ የገዛ ወገኑን እየተፀየፈ በጥላቻና በቂም በቀል የተለከፈ የፖለቲካ አመራር፣ ለዴሞክራሲያዊ ሥርዓት ግንባታ ዝግጁ አይደለም፡፡ ፖለቲካ ለውይይትና ለድርድር ክፍት ካልሆነ ደግሞ ሰላማዊ ሊሆን አይችልም፡፡ ሰላማዊ ካልሆነ ደግሞ ጦረኝነት ተፀናውቶታል ማለት ነው፡፡ በአንዳንድ የአገሪቱ የፖለቲካ ኃይሎች ላይ የሚታየው የጦረኝነት አባዜ ዋናው መስንዔ፣ ለዘመኑ የሚመጥን አስተሳሰብ ካለመታጠቅ የመነጨ ነው፡፡ ችግሮች ሲያጋጥሙ በውይይትና በድርድር ከመፍታት ይልቅ ያዙኝ ልቀቁኝ ማለት፣ የዴሞክራቶች ሳይሆን የአምባገነኖች መለያ ነው፡፡ ወይም ደግሞ ከበስተጀርባ የሚገፋ ሥውር ኃይል ተላላኪነት ነው፡፡ በ21ኛው ክፍለ ዘመን የራሱን አጀንዳ ቀርፆ የሚንቀሳቀስ የፖለቲካ ድርጅት፣ ከምንም ነገር በላይ ማስቀደም ያለበት ሕዝብን ነው፡፡ ሕዝብ የሥልጣን ሉዓላዊ ባለቤት እንደመሆኑ መጠን፣ ወደ ግጭትና ጦርነት የሚከተው ሳይሆን የዳበረ ቴክኖሎጂ የሚያጎናፅፈውና ወደ ዕድገት የሚያሸጋግረው ነው የሚፈልገው፡፡ ለዘመኑ የማይመጥን ጨቅላ አስተሳሰብ እንኳን አገር ለመምራት ለመንደርም አይታሰብም፡፡

    ይህ ዘመን የቴክኖሎጂ ግስጋሴ ከመቼውም ጊዜ በላይ የሚታይበት በመሆኑ፣ መረጃ ከአንዱ ወደ ሌላው በብርሃን ፍጥነት ይተላለፋል፡፡ መረጃው የሚደርሰው የኅብረተሰብ ክፍል ያለው ንቃተ ህሊና ዝቅተኛ ከሆነ ደግሞ፣ የሚወስደው ዕርምጃ ዘግናኝ ስለሚሆን ጥንቃቄ ያስፈልጋል፡፡ በተለያዩ ጊዜያት በተለያዩ ሥፍራዎች በሰዎች ላይ ግድያዎች የተፈጸሙትና ጥቃቶች የተሰነዘሩት፣ በሐሰተኛ መረጃዎች ሳቢያ ነው፡፡ በአደባባይ ሰውን የሚያህል ሰብዓዊ ፍጡር ቀጥቅጦ ገድሎ ዘቅዝቆ መስቀል ደረጃ የተደረሰው በደቦ ፍርድ ነው፡፡ የደቦ ፍርድ የሚከናወነው የንቃተ ህሊና ደረጃቸው ዝቅተኛ በሆኑ ሰዎች አማካይነት ነው፡፡ እነዚህን ወገኖች አስተምሮ ማብቃት? ወይስ ለሌላ ዙር ጥፋት አንቀሳቅሶ ሕዝብና አገር ማተራመስ ይበጃል? በዚህ ጉዳይ ዋነኞቹ ተጠያቂዎች ተምረናል የሚሉ የኅብረተሰብ ክፍሎች ናቸው፡፡ ይህንን ትውልድ በማይጠየቅበት ጥፋት መቀጣጫ የሚያደርጉና ላልተገባ ድርጊት የሚጠቀሙበት ተምረናል የሚሉ፣ ነገር ግን ለ21ኛው ክፍለ ዘመን የሚመጥን አስተሳሰብ የሌላቸው ናቸው፡፡ ሕፃናትና ታዳጊዎችን ሳይቀር በጥላቻና በበቀለኝነት እየኮተኮቱ ነውጠኛ ማድረግ ያሳፍራል፡፡ በተለይ በማኅበራዊ ሚዲያዎች ውስጥ መሽገው አገር ለማተራመስና ሕዝብን ደም ለማቃባት ታጥቀው የተነሱ ኃይሎች፣ ይህ የአመፃ ድርጊታቸው ለዚህ ዘመን ስለማይመጥን በሕግ የበላይነት አርፈው እንዲቀመጡ መደረግ አለበት፡፡

    ዴሞክራሲያዊ ሥርዓት የሚገነባው በሠለጠነ መንገድ ነው፡፡ ይህ ሥልጡን መንገድ የሚከናወነው በሰላማዊ የፖለቲካ ትግል ብቻ ነው፡፡ ሰላማዊ የፖለቲካ ትግል በሳይንሳዊ አስተሳሰብ የሚመራ በመሆኑ ለውይይትና ለድርድር ክፍት ነው፡፡ ለሕግ የበላይነት መስፈን ትልቅ ግምት ይሰጣል፡፡ ሐሳብን በነፃነት የመግለጽ መብትን ስለሚያስከብር፣ የተለያዩ ሐሳቦች እንዲናኙ ዕድሉን ያመቻቻል፡፡ ከአሳዳጅነትና ከተሳዳጅነት የተላቀቀ የእኩልነት ምኅዳር እንዲኖር ተግቶ ይሠራል፡፡ ጥያቄዎች በሥርዓት ቀርበው በአግባቡ ምላሽ እንዲያገኙ ያደርጋል፡፡ ከመጠላለፍ ይልቅ ተባብሮ መሥራትን ያስቀድማል፡፡ ለግላዊና ለቡድናዊ ጥቅም ሳይሆን ለብሔራዊ ጥቅም ቅድሚያ ይሰጣል፡፡ ጠበብ ካለ ከባቢያዊ አስተሳሰብ በመውጣት፣ ለአገር ብሎም ለዓለም የሚጠቅም ተሞክሮ ያስተላልፋል፡፡ አሁን በአገሪቱ ተጨባጭ ሁኔታ እንደሚታየው በዚህ ቁመና ላይ ለመገኘት በጣም ብዙ ርቀት ይቀራል፡፡ በምግብ ራሱን ያልቻለ፣ የታረዘ፣ ለእግሩ መጫሚያ የሌለው፣ ሕክምና ለማግኘት ፈተና የሚያይ፣ በአጠቃላይ ከድህነት ወለል በታች የሚኖር በሚሊዮኖች የሚቆጠር ሕዝብ ይዞ በነገር መቋሰል ጤነኝነት አይደለም፡፡ ብሔርን፣ ሃይማኖትን፣ ፆታን፣ ወይም ሌላ መሰል ልዩነቶችን በማራገብ ትንንሽ አጀንዳዎች ላይ ተጥዶ ውሎ ማደር ከዘመኑ አስተሳሰብ ጋር ይጣላል፡፡ የሀብትና የሥልጣን ክፍፍልን በብቃት ከማድረግ ይልቅ በብሔር ወይም በእምነት መነጽር ማደላደል ተለምዷል፡፡ ብቃትንና ጥረትን ሳይሆን ማንነትን ማጉላት የዘመኑ ፋሽን ሆኗል፡፡ ከ21ኛው ክፍለ ዘመን አስተሳሰብ ጋር መጣረስ አይበጅም፡፡

    ሰው በሰብዓዊ ፍጡርነቱ ብቻ ከማናቸውም ጥቃት መጠበቅ ሲገባው፣ በማንነቱ እየተለየ የሚጠቃ ወይም ከለላ የሚያገኝ ከሆነ ያሳፍራል፡፡ በብሔር፣ በሃይማኖት፣ በፆታ፣ በፖለቲካ አቋምና በመሳሰሉት ብቻ በመቧደን አገር መገንባት አይቻልም፡፡ በማይክሮሶፍት፣ በአፕል፣ በፌስቡክ፣ ወይም በመሳሰሉት የዓለም ታላላቅ ኩባንያዎች ውስጥ የሚሠሩ ባለሙያዎች ከዓለም ዙሪያ የተገኙ የምጡቅ አዕምሮ ባለቤቶች ናቸው፡፡ አፍሪካን ጨምሮ ከተለያዩ ሥፍራዎች ተሰደው በሰሜን አሜሪካና በአውሮፓ ታላላቅ ዩኒቨርሲቲዎች የተማሩ ምሁራን፣ አንቱ ተብለው ተከብረው የሚኖሩት በዕውቀታቸው ነው፡፡ ዘመኑን የሚመጥን ሥራ ሳያከናውኑ መከበር አይኖርም፡፡ በተለይ በኢትዮጵያ ፖለቲካ ውስጥ ተሳታፊ የሆኑ ኃይሎች አበክረው ማሰብ ያለባቸው፣ ለዚህ ዘመን ከማይመጥን ኋላቀር ድርጊት ውስጥ በቶሎ እንዴት እንደሚወጡ ነው፡፡ ሌላው ቀርቶ አፍሪካውያን አቻዎቻቸው ግጭትን እየተፀየፉ ወደ ዴሞክራሲያዊ ሥርዓት ግንባታ በስፋት እየገቡ ባለበት በዚህ ወቅት፣ ሕዝብን ከሕዝብ ጋር ለማፋጀት የተሠለፉ ኃይሎች ድርጊታቸውን ቢያስቡበት ጥሩ ነው፡፡ ሕዝብንና አገርን የማይወጡት አረንቋ ውስጥ ከትቶ ነገር ከተበላሸ በኋላ መፀፀት ፋይዳ ቢስ ነው፡፡ ዘመኑን ከማይመጥን ድርጊት ውስጥ በፍጥነት መውጣት ይገባል!

    በብዛት የተነበቡ ፅሁፎች

    አሜሪካ ሕወሓትን በማሳመንና በመጫን በሰላም ሒደቱ ትልቅ ሚና መጫወቷን የኢትዮጵያ ዋና ተደራዳሪ አስታወቁ

    የተመድና የአውሮፓ ኅብረት አበርክቶ አሉታዊ እንደነበር ጠቁመዋል በመንግሥትና በሕወሓት መካከል...

    የተጨማሪ እሴት ታክስ አዋጅን የሚተካ ረቂቅ ተዘጋጀ

    ከቫት ነፃ የነበረው የኤሌክትሪክ ኃይል ገደብ ተቀመጠለት የገንዘብ ሚኒስቴር ከሃያ...

    አዋሽ ባንክ ለሁሉም ኅብረተሰብ የብድር አገልግሎት የሚያስገኙ ሁለት ክሬዲት ካርዶች ይፋ አደረገ

    አዋሽ ባንክ ለሁሉም የኅብረተሰብ ክፍሎች በዘመናዊ መንገድ ብድር ማስገኘት...

    በፍላጎት ላይ የተመሠረተ ብሔራዊ አገልግሎት የተካተተበት አዋጅ ለፓርላማ ቀረበ

    የከፍተኛ ሁለተኛ ደረጃ ወይም የዩኒቨርሲቲ ትምህርታቸውን ያጠናቀቁ ወጣቶች በፈቃደኝነት...
    - Advertisment -

    ትኩስ ፅሁፎች

    [በተቋሙ ሠራተኞች የተወከሉ አንድ ባልደረባ ሚኒስትሩን ለማነጋገር ቀጠሮ ይዘው ወደ ቢሯቸው ገቡ]

    ጤና ይስጥልኝ ክቡር ሚኒስትር? ሰላም ሰላም ... ተቀመጥ! አመሠግናለሁ ክቡር ሚኒስትር!...

    የጉራጌ ዞን ጥያቄና የክላስተር አደረጃጀት የገጠመው ተቃውሞ

    መንግሥት የደቡብ ብሔር ብሔረሰቦችና ሕዝቦች ክልል አካል የነበሩ ዞኖችንና...

    አዋሽ ባንክ ካፒታሉን ወደ 55 ቢሊዮን ብር ለማሳደግ ያስገደደው ምክንያት ምንድን ነው?

    ባለፈው ቅዳሜ ጠቅላላ ጉባዔውን ያካሄደው አዋሽ ባንክ የ43 ቢሊዮን...

    አቢሲኒያ ባንክ ካለፈው ዓመት የ127 በመቶ ብልጫ ያለው ትርፍ በማግኘት አዲስ ታሪክ አስመዘገበ

    አቢሲኒያ ባንክ ከቀደሚ የሒሳብ ዓመት የ127 በመቶ ብልጫ ያለው...

    የጉድለታችን ብዛቱ!

    ከፒያሳ ወደ ሜክሲኮ ልንጓዝ ነው። ጎዳናውን ትውስታ እየናጠው ሁለትና...
    spot_img

    ተዛማጅ ፅሁፎች

    ለዘመኑ የማይመጥን አስተሳሰብ ዋጋ ያስከፍላል!

    በኳታር እየተከናወነ ያለው የዓለም ዋንጫ በእግር ኳስ ጨዋታ ውስጥ ያልተጠበቁ ማራኪ ቴክኒኮችንና ታክቲኮችን ከአስገራሚ ውጤቶች ጋር እያስኮመኮመ፣ ከዚህ ቀደም በነበረ ችሎታና ዝና ላይ ተመሥርቶ...

    መንግሥት ለአገር የሚጠቅሙ ምክረ ሐሳቦችን ያዳምጥ!

    በሕዝብ ድምፅ የተመረጠ መንግሥት ለሕዝብ የሚጠቅሙ ሐሳቦችን የማዳመጥ ኃላፊነት አለበት፡፡ ሥራውን ሲያከናውንም በግልጽነት፣ በተጠያቂነትና በኃላፊነት መርህ መመራት ይኖርበታል፡፡ እያንዳንዱ ዕርምጃው በሕግ ከተሰጠው ኃላፊነት አኳያ...

    የሰላም ስምምነቱ ተግባራዊ ይደረግ!

    የሰላም ስምምነቱ ‹‹ታጥቦ ጭቃ›› ሊሆን የሚችልባቸው ምልክቶች እየተስተዋሉ ነው፡፡ ሚሊዮኖችን ለዕልቂት፣ ለመፈናቀል፣ ለከፍተኛ ሰብዓዊ መብት ጥሰትና መሰል ሰቆቃዎች የዳረገው አውዳሚ ጦርነት በፕሪቶሪያው ስምምነት መሠረት...