Monday, June 24, 2024
- ማስታወቂያ -
- ማስታወቂያ -

የቀላል ባቡር ፕሮጀክትን ለመጠገን 70 ሚሊዮን ብር ይጠይቃል ተባለ

spot_img

ተዛማጅ ፅሁፎች

ከሜቴክ የተገዙ የሲግናልና የግንኙነት ኬብሎች ብልሽት በማስከተላቸው ይቀየራሉ

ሥራ በጀመረባቸው ሦስት ዓመታት ውስጥ ተደጋጋሚ ብልሽቶች እያጋጠሙት በየመንገዱ ባቡሮቹ የሚቆሙት የአዲስ አበባ ቀላል ባቡር ትራንዚት መስመር፣ በተለይም የኤሌክትሪክ ኬብሎቹ ላይ ባጋጠሙት ብልሽቶች ሳቢያና በሌሎችም ጥገናዎች ምክንያት እስከ 70 ሚሊዮን ብር የሚገመት ወጪ ሊያወጣ እንደሚችል ተገለጸ፡፡

ለቀላል ባቡር ፕሮጀክቱ የሲግናልና የኮሙዩኒኬሽን ኬብሎች የተገጠሙት ከብረታ ብረትና ኢንጂነሪንግ ኮርፖሬሽን (ሜቴክ) እና ከቱርክ ቢሜት ኩባንያ የተገዙ የኤሌክትሪክ ኬብሎች ሲሆኑ፣ ከፍተኛ የጥራት ችግር የታየባቸውና የባቡሩን እንቅስቃሴ ያወኩት ከሜቴክ የተገዙት እንደሆኑ የአዲስ አበባ ኤሌክትሪክ አገልግሎት አስታውቋል፡፡

የአዲስ አበባ ኤሌክትሪክ አገልግሎት ዋና ሥራ አስፈጻሚ አቶ ብዙወርቅ ደምሴ ለሪፖርተር እንዳብራሩት ከሆነ፣ ባለፉት ሦስት ዓመታት ከቱርክ ኩባንያ በተገዙት ኬብሎች ላይ አንድ ጊዜ ብቻ ችግር አጋጥሟል፡፡ በአንፃሩ ከሜቴክ ተገዝተው ከቃሊቲ እስከ ለጋር ጉምሩክ፣ እንዲሁም ከአያት እስከ መገናኛ ባሉት መስመሮች ምድር ለምድር የተዘረጉት ኬብሎች ላይ ተደጋጋሚ ብልሽት አጋጥሟል ብለዋል፡፡

 ‹‹የሜቴክ ኬብሎች ላይ የጥራት ችግር አለ ብለን ለመናገር ያበቃን የቱርክ ኩባንያ ቢሜት የዘረጋቸው ኬብሎች ይህ ነው የሚባል ችግር ስላልታየባቸው ነው፤›› ያሉት ዋና ሥራ አስፈጻሚው፣ የአገልግሎት መቋረጥ ሲያስከትሉ የቆዩትንና እስከ 15 ኪሎ ሜትር የሚዘረጉ ኬብሎችን በአዲስ ለመተካት ጨረታ መውጣቱን አስታውቀዋል፡፡ የቢሜት ኬብሎች ባሳዩት ጥራት ሳቢያም ኩባንያው የሚቀየሩትን ኬብሎች የመዘርጋት ዕድሉን ሊያገኝ እንደሚችል ገልጸዋል፡፡

በትንሹ እስከ 15 ኪሎ ሜትር የሚረዝመውን የተበላሸ ኬብል በአዲስ ለመተካት ብቻ ከ15 ሚሊዮን ብር በላይ እንደሚጠይቅ የጠቆሙት አቶ ብዙወርቅ፣ የጥገና ሥራው የመለዋወጫዎችና የኦፕሬሽን ሥራዎችን ጨምሮ ሌሎች አስፈላጊ ሥራዎች ሲካተቱበት ወጪው ከ60 እስከ 70 ሚሊዮን ብር ሊደርስ እንደሚችል አስረድተዋል፡፡

ከቻይና መንግሥት በተገኘ የ475 ሚሊዮን ዶላር ብድር ተገንብቶ ከሦስት ዓመታት በፊት ሥራ የጀመረው የአዲስ አበባ ቀላል ባቡር ፕሮጀክት የታሰበውን አገልግሎት በመስጠት፣ ተሳፋሪዎችን እንደሚፈለገው ማጓጓዝ ሲሳነው ቆይቷል፡፡ ባቡሩ 41 ተጎታቾች ቢኖሩትም በጥገናና በመለዋወጫ ችግር ሳቢያ በአሁኑ ወቅት አገልግሎት እየሰጡ የሚገኙት ከ20 የማይበልጡ መሆናቸውም ሲገለጽ ቆይቷል፡፡ እነዚህም ቢሆኑ በአብዛኛው በሚያጋጥማቸው የኤሌክትሪክ ኃይል መቋረጥ ሳቢያ በየመንገዱ የሚቆዩበት አጋጣሚ በመበራከቱ፣ ተሳፋሪዎች ለረጅም ጊዜ ሲጉላሉ ማየት የተለመደ ሆኗል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች