Wednesday, June 19, 2024
- Advertisement -
- Advertisement -

ልናገርይድረስ ለፖለቲከኞችና ለአክቲቪስቶች

ይድረስ ለፖለቲከኞችና ለአክቲቪስቶች

ቀን:

በያሬድ በላይ

አገራችን ኢትዮጵያ ከምድር በላይና ከምድር በታች ባሉ የተፈጥሮ ሀብቶች/ፀጋዎች የታደለች ሆና ሳለች፣ በሰው ሠራሽ ችግሮች ስትጎዳ በመቆየቷ ልትበለፅግ አልቻለችም፡፡ የሰው ሠራሽ ችግሮቹ ዋነኛው ምክንያት የፖለቲካና የአስተዳደር መሪዎች፣ በተለያዩ ጊዜያት ማከናወን የማይገባቸውን ስለሠሩና መሥራት የሚገባቸውን ደግሞ ሳይሠሩ ስለቀሩ ነው ብዬ አስባለሁ፡፡ እኔ ሁለቱንም ስህተት እንደ ሰው ሠራሽ ችግር አየዋለሁ፡፡ ይህን ካልኩ በኋላ ምሁራን፣ ልሂቃን፣ የሚዲያ ሰዎች፣ አርቲስቶች፣ ጸሐፊዎች፣ የሃይማኖት መሪዎች፣ ባለሀብቶችና ዜጎች በሙሉ መሥራት የሚገባንን ሁሉ ሠርተናል ብዬ አላምንም፡፡ ስለሆነም ለሰው ሠራሹ ችግር በመጠኑም ቢሆን አስተዋጽኦ አድርገናል ብዬ አስባለሁ፡፡ ይህን ስል ሁሉንም ማለቴ እንዳልሆነ ይታወቅልኝ፡፡ መልካም የሠሩ፣ ከፍርኃትና ከአድርባይነት ነፃ ሆነው መስዋዕትነት የከፈሉ ጀግኖች ፈጽሞ አልነበሩም ማለቴ አይደለም፡፡

እነሆ በአሁኑ ወቅት ድግሞ አገራችን ኢትዮጵያ ትልቅ ተስፋንና ከባድ ተግዳሮቶችን አጣምሮ በያዘ የፖለቲካዊና የአስተዳደራዊ ለውጥ ሒደት ውስጥ ትገኛለች፡፡ ስለሆነም በዚህ ወሳኝ ወቅት የፖለቲካ መሪዎች፣ አክቲቪስቶችና ተከታዮቻቸው በሙሉ ልባችሁን ከጥላቻ፣ ከእልህ፣ ከቂም በቀልና ከዘረኝነት አፅድታችሁ በሰከነ መንፈስ አርቃችሁና አስፍታችሁ ልታስቡ ይገባል፡፡ ምክንያቱም የእናንተ የፖለቲካ አስተሳሰብና አካሄድ የኢትዮጵያንና የሕዝቧን መፃኢ ዕድልና ህልውና ይወስናልና፡፡ በአገራችን ውስጥ ከሚገኙ የፖለቲካ ፓርቲዎች ወይም ድርጅቶች (መሪውን ጨምሮ) ሁለት በጣም የተለያዩ አስተሳሰቦችንና አካሄዶችን እመለከታለሁ፡፡

- Advertisement -

አንደኛው ፍቅርን፣ ይቅርታን፣ ሰላምንና አንድነትን/ኢትዮጵያዊነትን መሠረት ያደረገ ሲሆን፣ ሁለተኛው ደግሞ ጥላቻን፣ ዘረኝነትን/ብሔርተኝነትንና መለያየትን መሠረት ያደረገ ነው ማለት ይቻላል፡፡ ሁለተኛው አስተሳሰብና አካሄድ ለማንም የማይበጅ ከመሆኑም በላይ፣ የኢትዮጵያን ሕዝብ ሁሉ ከአሁን በፊት በአገራችን ታይቶ ወደማይታወቅ አስከፊ የመከራ አዘቅት ውስጥ ሊያስገባ የሚችል ሲሆን፣ ውጤቱም የእርስ በርስ ግጭት፣ ጦርነት፣ ድህነት፣ ረሃብና አገር አልባነት ሊሆን ይችላል፡፡ አለመታደል ሆኖ በዓለም ላይ ብሔርን/ጎሳን መሠረት ባደረገ ፌዴራሊዝም የተከፋፈለች ብቸኛዋ አገር ኢትዮጵያ ናት፡፡

ይህ ሕዝብን የሚያራርቅና የሚያለያይ የጎሳ ፌዴራሊዝም ከ27 ዓመታት ወዲህ በአገራችን ፖለቲከኞች የተፈጠረና በጻፉት ሕገ መንግሥት የተደገፈ ሲሆን፣ እነሆ በአሁኑ ወቅት አስከፊ ውጤቱ እየታየ ነው፡፡ ለብዙዎች ሕይወት መጥፋት ምክንያት ሆኗል፡፡ ሚሊዮኖችን ተወልደው ካደጉበትና ለዓመታት ኖረው ሀብትና ንብረት ካፈሩበት ሥፍራ በጭካኔ ተጨፍጭፈው እንዲባረሩና በገዛ አገራቸው ስደተኞች እንዲሆኑ አድርጓል፣ በአገር ሰላምና ኢኮኖሚ ላይም አሉታዊ ተፅዕኖ እያሳደረ ይገኛል፡፡ ስለሆነም አገራችን ኢትዮጵያ በአስቸኳይ ከዚህ የጎሳ ፌዴራሊዝም ‹‹በሽታ›› መታከምና መዳን ያስፈልጋታል፡፡

በአንድ አገር ውስጥ የሚኖሩ የተለያዩ ብሔሮች/ብሔረሰቦች የየራሳቸውን ቋንቋ መናገር፣ ታሪካቸውንና ቅርሳቸውን መጠበቅ፣ ባህላቸውን መኖርና ማዳበር ማንም ሊነፍጋቸው የማይችል ተፈጥሯዊና ሰብዓዊ መብታቸውና ኃላፊነታቸው ሲሆን፣ ከዚህ በተጨማሪ ከሁሉም የአገሪቱ ብሔረሰቦች ጋር መግባባት እንዲችሉና በየትኛውም የአገሪቱ አካባቢ እንደ ፍላጎታቸው መማር፣ መሥራትና መኖር እንዲችሉ የጋራ ቋንቋ/ቋንቋዎች ሊኖራቸው ይገባል፡፡ ለዚህ ጥሩ ምሳሌ ደቡብ ኢትዮጵያ ነው፡፡ የአንድ አገር ዜጎች የጋራ ቋንቋ እስካልተናገሩ ድረስ፣ በጋራ ተግባብተው መኖርና አገራቸውን በጋራ ማሳደግ ያስቸግራቸዋል፡፡ በመሆኑም ቀስ በቀስ ወደ መራራቅና መለያየት ይሄዳሉ፡፡ ተለያዩ ማለት ደግሞ አገር ተከፋፈለች ወይም ተበታተነች ማለት ነው፡፡ ይህ አደጋ ‹‹የአማራ ክልል፣ የኦሮሞ ክልል፣ የሶማሌ ክልልና የትግራይ ክልል ወዘተ.›› ብሎ አገሪቱን በዘር በከፋፈለው የፌዴራሊዝም ሥርዓት ምክንያት መከሰት የጀመረ ሲሆን፣ ሥር ሰዶ ለማስተካከል የማይቻልበት ደረጃ ላይ ከመድረሱ በፊት በአስቸኳይ ሊታሰብበትና መፍትሔ ሊሰጠው ይገባል፡፡

ሁለተኛውን የፖለቲካ አቋም የምታራምዱ ብሔርተኛ ፖለቲከኞች እስኪ ቆም ብላችሁ በሰክነ መንፈስ አርቃችሁ አስቡ፤ ለምን ብላችሁ ራሳችሁን ጠይቁ፣ ምናልባት  ‹‹የእኔ ብሔር/ብሔረሰብ ባለፉት ሥርዓቶች ተበድሏል፣ ሰለዚህ አሁን እንዲህ መደረግ አለበት፣ ይህ ክልል የኛ ብቻ ነው በአንድነት መኖር አያስፈልገንም፣ ወዘተ.›› ብላችሁ በአጭሩና በጠባቡ የምታስቡ ከሆነ፣ ይህ በጣም የተሳሳተ አክሳሪ አስተሳሰብና አካሄድ እንወክለዋለን ለምትሉት ብሔረሰብም ሆነ ለመላው የኢትዮጵያ ሕዝብ ፈጽሞ የማይበጅ ነው፡፡ ምናልባት በስሜታዊነት ተገፋፍቶ ስብከታችሁን በቀላሉ የሚቀበለውን የኅብረተሰብ ክፍል ለጊዜው ሊያነሳሳና ተከታያችሁ ሊያደርገው ይችል ይሆናል፡፡ ነገር ግን ይህ የተሳሳተ ተከታያችሁ ከስሜታዊነት ወጥቶ አስተሳሰቡን በሚለውጥና በሚያስተካክል ጊዜ ያዝንባችኋል፣ ያወግዛችሁማል፡፡

ስለሆነም እኔ እንደ አንድ ዜጋ ለመላው የኢትዮጵያ ሕዝብና ለአገራችን ይበጃል ብዬ የማቀርበው የመፍትሔ ሐሳብ የፖለቲካ መሪዎችና ተከታዮቻቸው ቂም በቀልን ሳይሆን ይቅርታን፣ ጥላቻን ሳይሆን ፍቅርን፣ መጠላለፍን ሳይሆን መተባበርን፣ መለያየትን ሳይሆን አንድነትንና ኢትዮጵያዊነትን እንድትመርጡና የማንዴላን መንገድ እንድትከተሉ ነው፡፡ አንዳንድ ጊዜ ‹‹አንድነት›› የሚለው ቃል ሆን ተብሎም ሆነ ባለማወቅ የተሳሳተ ትርጉም ሲሰጠው ይስተዋላል፡፡ ‹‹አንድነት ወይም በአንድነት መኖር›› ማለት በአንድ አገር ውስጥ ሁሉም ዜጋ እኩል ሁለንተናዊ መብት ኖሮት፣ ተባብሮ አገሩን በጋራ እያለማ ተዋዶና ተከባብሮ መኖር ወይም በሌላ አነጋገር ‹‹አንድነት በብዝኃነት (Unity in Diversity)›› ማለት እንጂ፣ ተጨፍልቆ አንድ ዓይነት መሆን ማለት አይደለም፡፡ ‹‹አንድ ዓይነት›› መሆን ተግባራዊ ሊሆን የሚችል ጽንሰ ሐሳብም አይደለም፡፡ ማንም ብሔር/ብሔረሰብ የራሱን ቋንቋ መናገር ባህሉን መኖርና መንከባከብ ሁልጊዜም የራሱ ሰብዓዊ መብት እንጂ፣ ማንም ሊቸረው ወይም ሊነፍገው የሚችል ሥጦታ አይደለም፡፡

ከቅርብ ጊዜ ወዲህ ደግሞ ጥቂት ብሔርተኛ የፖለቲካ መሪዎች፣ ‹የእኔ ብሔር የተበደለ ነው፣ የሰውነት መለኪያ ነው፣ ኢትዮጵያን የፈጠረ ነው፣ ወዘተ.››  የሚል እጅግ ደካማና አፍራሽ አስተሳሰብ ሲያስተጋቡ ሰምተናል፡፡ በእውነቱ በዚህ በ21ኛው ክፍለ ዘመን እንደዚህ ያለ አስተሳሰብ መስማት በጣም ያሳዝናል፣ ያሳፍራል፡፡ ለዓመታት ስናወግዘው የቆየነውንና ለዚህ አሁን ለሚፈታተነን አደጋ የዳረገንን በዓለም ብቸኛ የሆነውን የሚለያይ የብሔር ፖለቲካ መልሰው በማቀንቀን፣ በስሜታዊነት ተነሳስቶ በቀላሉ ስብከታቸውን የሚቀበለውን የኅብረተሰብ ክፍል እያሳሳቱ መሆናቸው ትልቅ ስህተትና በደል ነው፡፡ ይህ አስተሳሰባቸውና አካሄዳቸው ከማንም በላይ እንወክለዋለን የሚሉትን ኅብረተሰብ የሚጎዳና የሕዝብንና የአገርን አንድነት የሚያጠፋ ነው፡፡

ሌሎች ጥቂት ዘረኛ ፖለቲከኞች ደግሞ ኢትዮጵያ ውስጥ ከአሁን በፊት አንዱ ብሔር/ዘር ሌላውን እንደ በደለ አስመስለው ከእውነት የራቀ ወሬ በማውራት፣ በሕዝብ መካከል ጥላቻንና ግጭትን ለመፍጠር ሲሞክሩ ይታያሉ፡፡ እውነቱን ለመናገር ከ45 ዓመታት ወዲህ የኢትዮጵያ ሕዝብ ከአምባገነን አመራሮች ጋር ተጋጭቷል እንጂ፣ መቼም ቢሆን ሕዝብ በሕዝብ ላይ ተነስቶ አያውቅም፡፡ እነዚህ ፖለቲከኞች ከዚህም አልፎ ተከታዮቻቸው የኢትዮጵያዊነት ስሜት እንዳይኖራቸውና ብሔር ላይ ብቻ እንዲያተኩሩ ለማድረግ ሲጥሩ ይስተዋላል፡፡ በሚያደርጓቸው ስብሰባዎች የኢትዮጵያ ሰንደቅ ዓላማ እንዲታይም አይፈልጉም፡፡ አባቶቻቸውና አያቶቻቸው ዳር ድንበሯን አስከብረው ነፃነቷን ጠብቀው ያስረከቧቸው ታላቅ አገር ሰንደቅ ዓላማ መሆኑን አለማስተዋላቸው፣ ወይም አለመውደዳቸው ትዝብት ውስጥ ይጥላቸዋል፡፡ የታላቋ አገር ኢትዮጵያ የጋራ ባለቤቶች መሆናቸውን ባለማስተዋል ወይም ባለመፈለግ ለማይጠቅም የፖለቲካ ትርፍ ብለው በስሜት የተገፋፋ ጊዜያዊ ተከታይ ለማፍራት እንዲያስችላቸው ብቻ ለማንም የማይበጅ፣ ከማንም በላይ እንወክለዋለን የሚሉትን ኅብረተሰብ ሊጎዳ የሚችል ከንቱ የጥፋት ፖለቲካ እያካሄዱ መሆናቸው በአገርና በሕዝብ ለይ የሚፈጸም ትልቅ ጥፋትና ስህተት መሆኑን ሊገነዘቡ ይገባል፡፡

የኢትዮጵያ ሕዝብ ዘረኛ አይደለም፡፡ አንዱ ዘር ከሌላው ተጋብቶና ተዋልዶ በደምና በሥጋ ተዋህዶ ነው የኖረው፣ አሁንም የሚኖረው፡፡ የዚህ ጽሑፍ አቅራቢ ስለራሴ ማንነት ሳስብ የእግዜር ፍጡር የአዳምና ሔዋን ዝርያ መሆኔንና የዜግነት መለያዬ ደግሞ ኢትዮጵያዊነት መሆኑን እንጂ፣ ከኦሮሞ አባትና ከአማራ እናት መወለዴን አላስበውም፡፡ ምክንያቱም በ21ኛው ክፍለ ዘመን እንዲህ ያለ ጠባብ አስተሳሰብ ከንቱና አክሳሪ መሆኑን እገነዘባለሁና፡፡ እንደ እኔ ከሁለት የተለያዩ የኢትዮጵያ ብሔሮች/ብሔረሰቦች የተወለዱ በሚሊዮኖች የሚቆጠሩ ኢትዮጵያውያን በመላው የአገራችን ክፍሎች እንደሚገኙ ግልጽ ነው፡፡

በዘረኝነትና በጥላቻ ላይ የተመሠረተ እኩይ ፖለቲካ ከሚያካሂዱ ጥቂት ፖለቲከኞችና በስሜታዊነት እየቀሰቀሱ ለጊዜውም ቢሆን ከሚያሳስቷቸው ተከታዮቻቸው በስተቀር የኢትዮጵያ ሕዝብ የሚፈልገው አንድነትን፣ ኢትዮጵዊነትን፣ ፍቅርን፣ እኩልነትን፣ ዴሞክራሲን፣ ይቅርታንና ሰላምን ነው፡፡ ለዚህም ነው ‹‹ስንኖር ኢትየጵያዊ ስንሞት ኢትዮጵያ እንሆናለን፣ ኢትዮጵያዊነት ሱስ ነው. . .›› ብለው ዘረኝነትን፣ ሌብነትንና ግፍን አውግዘው፣ የተቀደሰ ሐሳብ ይዘው የተነሱትን የለውጥ መሪዎች በአገራችንና በመላው ዓለም የሚኖሩ ኢትዮጵያውያን ዘርና ሃይማኖት ሳይለዩ፣ በላቀ ፍቅር የተቀበሏቸውና ከጎናቸው ሆነው ድጋፋቸውን ለመስጠት ብሎም አገራቸውን በጋራ ለማልማት በቁርጠኝነት የተነሱት፡፡ እኔ ሁልጊዜ ሳየው ልቤን የሚነካኝ ቪዲዮ አለ፡፡ እሱም በዋሽንግተን አርቲስት ታማኝ በየነ ጠቅላይ ሚኒስትር ዓብይ አህመድ (ዶ/ር) ጫማ ላይ ሲወድቅና የደስታ ሲቃ ይዞት፣ እሳቸውንና ክቡር አቶ ለማን የሚያመሠግንበትና የሚያወድስበት ቃላት አጥቶ ሲቸገር ያየሁት ነው፡፡ እንደምናውቀው አርቲስቱና መሪዎቹ ከተለያዩ የአገራችን ብሔረሰቦችና አካባቢዎች የመጡ ናቸው፡፡ ነገር ግን ለእነሱ ይህ ምንም ማለት አይደለም፡፡ እነሱን አንድ ያደረጋቸው ዘር/ብሔር አይደለም (ዘረኝነትን የሚፀየፉ ናቸውና)፣ ቁሳዊ ጥቅምም እንዳልሆነ ግልጽ ነው፡፡ አንድ ያደረጋቸው ትልቁ የጋራ አስተሳሰባቸው ነው፡፡ ለእናታቸው ለእምዬ ኢትዮጵያ ያላቸው ፍቅር ነው፡፡ ለጋራ አገራቸውና ለሕዝቧ ያላቸው ትልቅ ራዕይ ነው፡፡ ፍቅርንና አንድነትን መፈለጋቸው ነው፡፡ ሁሉም ኢትዮጵያዊ ይህንን ትልቅ ሐሳብና ራዕይ ከተጋራ፡፡ ያለ ጥርጥር አገራችን በአጭር ጊዜ ውስጥ ትለወጣለች ብዬ አምናለሁ፡፡

ኢትዮጵያ በተፈጥሮ የታደለች ትልቅ አገር ነች፡፡ በዘመናዊ ግብርና መሥራት ከተቻለ ከአገራችን አልፎ ሌሎችን ሊመግብ የሚችል ሰፊና ለም የእርሻ መሬት ወርቅና ከወርቅ በላይ የከበሩ ማዕድናት፣ የነዳጅ ዘይት፣ የላቀ የውኃ ሀብት፣ አብዛኞቹ የዓለማችን አገሮች ያልታደሉት ከዓመት እስከ ዓመት የሚዘልቅ ምቹ የአየር ፀባይ፣ ወዘተ. ያላት አገር ነች፡፡ ሁሉም የአገራችን ክፍል የተፈጥሮ ፀጋ አለው፡፡ ለሙ አካባቢ የእርሻ መሬት ሲኖረው፣ ደረቁ አካባቢ ደግሞ ማዕድንና የነዳጅ ዘይት አለው፡፡ እልም ያለ አሸዋማ በረሃ ውስጥ የሚኖሩት የመካከለኛው ምሥራቅ አገሮች የበለፀጉት ለም የእርሻ መሬት ኖሯቸው ሳይሆን፣ በዋነኛነት በነዳጅ ዘይትና በማዕድናት ነው፡፡ በተጨማሪም እርስ በርሳቸው ሳይበጣበጡና ሳይከፋፈሉ በሰላም በመኖራቸው ነው፡፡

እኛ ኢትዮጵያውያን ግን ሁሉም የተፈጥሮ ፀጋ ኖሮን የቸገረንና ያጣነው ፍቅርን፣ አንድነትንና ሰላምን ነው (በላቀ የአገር ፍቅሯ የምትታወቀው ድምፃዊት ጂጂ ከዓመታት በፊት ‹‹እኔስ የራበኝ ፍቅር ነው›› አንዳለችውና ተወዳጁ ድምፃዊ ጌትሽ ማሞ ደግሞ ‹‹ለካስ ያጣነው ፍቅር ነበር›› እንዳለው)፡፡ ችግራችን ሰው ሠራሽ ነው፡፡ ከተሳሳተ አስተሳሰብ፣ ከጥላቻ፣ ከዘረኝነትና ከስግብግብነት የሚመነጭ ነው፡፡ ሰው ሠራሹ ችግር ሲፈታ፣ አገር ሰላም ስትሆንና አሁን የተጀመረው ፖለቲካዊና አስተዳደራዊ ለውጥ ሲሳካ (እንደሚሳካም አልጠራጠርም)፤ ኢትዮጵያ በአጭር ጊዜ ውስጥ ልትበለፅግና ሁሉም ኢትዮጵያዊ በሰላም፣ በእኩልነት፣ በፍቅርና በብልፅግና ሊኖርባት የሚችል አገር ትሆናለች፡፡ ስለዚህ ብሔርተኛ ፖለቲከኞች እባካችሁ አርቃችሁና አስፍታችሁ በቅንነት አስቡ፣ ልባችሁን አፅዱ፡፡ በላቀና ጥልቅ አስተሳሰብ፣ ፍቅርን፣ ይቅርታን፣ መተባበርንና አንድነትን በመከተል ዜጎች በሙሉ በአንድነት፣ በሰላምና በፍቅር የሚኖሩባት ያልተከፋፈለች፣ የማናፍርባት፣ የተከበረችና የበለፀገች አትዮጵያን እንገንባ፡፡

ሕይወት አጭር ናት፡፡ የጤነኛ ሰው አማካይ የሕይወት ዘመን ከ70 እስከ 80 ዓመት ቢሆን ነው፡፡ ከዚህ ላይ የአሁን ዕድሜያችንን ስንቀንስ ቀሪ ዘመናችን በጣም አጭር መሆኑን እንገነዘባለን፡፡ በየዓመቱ ልደታችንን ስናከብር ወደ ሞት እንቀርባለን፡፡ ሁላችንም እናልፋለን፡፡ ስናልፍ ሁሉንም ቁሳዊ ሀብታችንን ትተን ነው የምንሄደው፡፡ ከመቃብራችን በላይ የሚቀረው በሕይወት ሳለን የሠራነው ተግባርና ስማችን ብቻ ነው (ስም ከመቃብር በላይ ይውላልና)፡፡ እኩይ አስባችሁና እኩይ ሠርታችሁ ሲወቀስና ሲወገዝ የሚኖር ስምና የተረገመች ነፍስ ይዛችሁ አትለፉ፡፡ ይልቁንም ትልቅ አስባችሁ፣ ለአገራችሁና ለሕዝቧ መልካም ሥራን ሠርታችሁ፣ በሕይወት ስትኖሩ የህሊና እርካታና ሰላም አግኝታችሁ፣ ለትውልድ ታላቅ አገርን አስረክባችሁ፣ ስማችሁን በዘለዓለማዊ ክብርና ምሥጋና ትውልድ ሁልጊዜ የሚያስታውሰውና የሚዘክረው አድርጋችሁ እለፉ፡፡ ፈጣሪ ኢትዮጵያንና ሕዝቧን ይባርክ!

ከአዘጋጁ፡- ጽሑፉ የጸሐፊውን አመለካከት ብቻ የሚያንፀባርቅ መሆኑን እየገለጽን፣ በኢሜይል አድራሻቸው   [email protected] ማግኘት ይቻላል፡፡

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

የንብረት ማስመለስ ረቂቅ አዋጅና የሚስተጋቡ ሥጋቶች

ከሰሞኑ ለሕዝብ ተወካዮች ምክር ቤት የቀረበው የንብረት ማስመለስ ረቂቅ...

የመጨረሻ የተባለው የንግድ ምክር ቤቱ ምርጫና የሚኒስቴሩ ውሳኔ

በአገር አቀፍ ደረጃ ደረጃ የንግድ ኅብረተሰቡን በመወከል የሚጠቀሰው የኢትዮጵያ...

ሚስጥሩ!

ጉዞ ከካዛንቺስ ወደ ስድስት ኪሎ፡፡ የጥንቶቹ አራዶች መናኸሪያ ወዘናዋ...