Monday, June 24, 2024
- Advertisement -
- Advertisement -
የሳምንቱ ገጠመኝየሳምንቱ ገጠመኝ

የሳምንቱ ገጠመኝ

ቀን:

አንዳንድ ጊዜ በሕይወታችን የሚገጥሙን ነገሮች አንዳንድ ነገሮችን ያስታውሱናል፡፡ ፍትሕ ፍለጋ የሚባዝኑ ነፍሶች በሞሉባት አገራችን መሰንበቻውን እየተከናወነ ያለውን የፍትሕ ፍለጋ ጥረት፣ ብዙዎች በትኩረት እየተከታተሉ እንደሆነ ግልጽ ነው፡፡ ከዓመታት በፊት የገጠመኝ ከሰሞኑ ሁኔታችን ጋር ቢገጥምብኝ እንዲህ አቅርቤዋለሁ፡፡ ጊዜው ራቅ ቢልም ትዝ የሚለኝና የሚያስገርም ያልኩት ነገር ይኼ ነው፡፡ እንደተለመደው ከኢንተርኔት የዓለም ወሬዎችን ስቃርም ድንገት ዓይኔ አንድ አስገራሚ ዜና ላይ አረፈ፡፡ ዜናውን ይዞት የወጣው ‹‹ዘ ጄሩሳሌም ፖስት›› የተባለ የእስራኤል ጋዜጣ ሲሆን፣ ምንጭ ያደረገው ናይሮቢ ውስጥ የሚታተመውን ‹‹ናይሮቢያን›› የተባለ ጋዜጣ ነበር፡፡ የዚህ አስገራሚ ዜና ርዕስ፣ ‹‹ኬንያዊው ጠበቃ በኢየሱስ ክርስቶስ ግድያ የእስራኤል መንግሥትንና አይሁዳውያንን ዘ ሔግ ችሎት ከሰሱ›› ይላል፡፡ ይህ ርዕስ ሲታይ ለጊዜው ግራ መጋባት ቢፈጥርም፣ ጠበቃው ሚስተር ዶላ ኢንዳዲስ መቀመጫውን በሔግ ያደረገው ዓለም አቀፍ የፍትሕ ችሎት፣ በኢየሱስ ክርስቶስ ላይ ሕገወጥ ፍርድ በማስተላለፍ ስቅላት የፈጸሙና ያስፈጸሙ ሊዳኙ ይገባቸዋል ብለው ነበር፡፡

በወቅቱ ኬንያዊው ጠበቃ እንዳሉት የእስራኤል መንግሥት የበለጠውን የኃላፊነት ድርሻ ሲወስድ፣ ከክርስቶስ ልደት በፊት ከ42 እስከ ክርስቶስ ልደት በኋላ 37 ድረስ የነበረው የሮማ ንጉሥ ታይቤሪየስ፣ ጲላጦስ፣ የተወሰኑ የአይሁድ ሽማግሌዎች፣ ንጉሥ ሔሮድስ፣ የጣሊያን መንግሥትና የእስራኤል መንግሥት ተጠያቂ ናቸው፡፡ እንደ ዘገባው ከሆነ፣ ጠበቃው እነዚህ የተጠቀሱት ተከሳሾች በኢየሱስ ክርስቶስ ላይ በፈጸሙት ሕገወጥ ፍርድና ስቅላት በቂ ማስረጃ ይጠቀስባቸዋል፡፡ ‹‹ዛሬ በመጽሐፍ ቅዱስ ላይ ተመዝግቦ የሚገኝ ማስረጃ አለ፡፡ የመጽሐፍ ቅዱስን ማስረጃ ደግሞ ማንም ሊያጣጥለው አይችልም፤›› በማለት ጠበቃው ለጋዜጣው መናገራቸው በዘገባው ተካቶ ነበር፡፡ ጠበቃው ከሁለት ሺሕ ዓመታት በፊት ለተፈጸመው ድርጊት ተጠያቂ የነበሩ ሰዎች በሕይወት ባይኖሩም፣ እነሱ ይወክሉዋቸው የነበሩ መንግሥታት ኃላፊነቱን ይወስዳሉ ማለታቸውም በጊዜው ተሰምቷል፡፡

ጠበቃው የኢየሱስ ክርስቶስ ክስ፣ ችሎት፣ ክርክርና ውሳኔ ሕገወጥ ከመሆኑም በላይ የተፈጸመበት ድብደባ፣ ማሰቃየትና ስቅላት ወንጀል ነው ብለዋል፡፡ እሳቸውም ይኼንን ጉዳይ ከመረመሩ በኋላ የተጠቀሱት ወገኖችን የሚከሱት በዚያን ዘመን ስላልተፈጠሩ መሆኑን ገልጸው፣ በአሁኑ ዘመን ግን እንደ አንድ የኢየሱስ ወዳጅ ክስ መመሥረታቸውን ተናግረዋል፡፡ ክሳቸው በናይሮቢ ፍርድ ቤት ውድቅ ቢደረግባቸውም፣ እሳቸው ግን ወደ ዓለም አቀፉ ፍርድ ቤት ለመሄድ መገደዳቸውን በጊዜው ተናግረዋል፡፡ ዓለም አቀፍ ፍርድ ቤቱም ይኼንን ጉዳይ የማየት ሥልጣን እንደሌለው መግለጹን አስታውሳለሁ፡፡

ብዙዎች በጠበቃው ድርጊት ተገርመዋል፣ ግራ ተጋብተዋል፣ አሹፈዋል፡፡ ዘመናችን በርካታ የሚያስገርሙና የሚያስደነግጡ ጉዳዮች የሚከሰቱበት ቢሆንም፣ በበኩሌ የጠበቃውን ምልከታ አከብራለሁ፡፡ አንድ ሰው የመሰለውን ጉዳይ አጀንዳ አድርጎ ሲያቀርብ የመቀበልና ያለመቀበል መብቱ የእኛ ሲሆን፣ ግለሰቡ ወይም ግለሰቧ ሐሳባቸውን በማቅረባቸው ምክንያት ሊሳቅባቸው ወይም ሊጣጣሉ አይገባም፡፡ የሆኖ ሆኖ የጠበቃው ሐሳብ ያስኬዳል ወይም አያስኬድም የሚለው እንደተጠበቀ ሆኖ፣ ሕገወጥነትን በሕጋዊ መንገድ አደብ ለማስገዛት የሚነሱ ሰዎች ሲኖሩ አስደሳች ነው እላለሁ፡፡

እስኪ ዙሪያችንን እንመልከት፡፡ ኃይለኞችና ጉልበተኞች ሕግ ባለበት አገር ውስጥ እንዳሻቸው እየፈነጩ የማፊያ ተግባር ሲፈጽሙ፣ ‹‹ጎመን በጤና›› እየተባለ ይታለፍ የለም ወይ? በሀብቱ የሚመካ ሕገወጥ በሌብነት ከተካኑ ባለሥልጣናት ጋር ሰምና ወርቅ ሆኖ ድሆችን ሲያስለቅስ፣ መሬታቸውን ወይም ንብረታቸውን ሲነጥቅ፣ በአጃቢዎቹ አማካይነት የሰው ሚስት ሲቀማ፣ በኮንትሮባንድ አገር እየዘረፈ ሲበለፅግ ማን ደፍሮ ይናገራል? ማን ይደፍርስ ነበር? ደፈር ብለው የሚጠይቁ ሲነሱ ‹‹ታፔላ›› ተለጥፎላቸው የደረሰባቸው ሥቃይ ይታወቃል፡፡

በወቅቱ የኬንያውን ጠበቃ አስገራሚ ዜና የነገርኩዋት ጓደኛዬ የሚገርም ነገር ነበር የነገረችኝ፡፡ ይኼንን ጉድ አንብቡ፡፡ ከዓመታት በፊት አንድ የምታውቀው ሰው የንግድ ድርጅቱን የሚመራበትን የመንግሥት ቤት ድንገት ‹‹ለቀህ ውጣ›› ይባላል፡፡ ምክንያቱን ሲጠይቅ፣ ‹‹ልቀቅ ተብለሃል እንጂ ምክንያት ጠይቅ አልተባልክም፤›› የሚል አስፈሪ ምላሽ ያገኛል፡፡ ማስጠንቀቂያው በተሰጠው በአሥረኛው ቀን ቤቱ ይታሸጋል፡፡ ከ30 ዓመታት በላይ በሕጋዊ መንገድ ተሰጥቶት የሚሠራበትን የንግድ ቤት ተቀምቶና ንብረቱ የትም ተጥሎ በመጨረሻ ለሌላ ባለጊዜ ግለሰብ ይሰጥበታል፡፡ የደረሰበትን ኢፍትሐዊ ድርጊት በፍርድ ቤት ለመከራከር ይወስናል፡፡ ሦስት ዓመት ሙሉ ተከራክሮ በሐሰተኛ ፍርድ በተሠራበት ደባ ይረታል፡፡ ይግባኝ ቢልም አይቀናውም፡፡ በመጨረሻ ጭንቅላቱን ነካ ያደርገዋል፡፡ ብቻውን ማውራት ሲጀምርም ‹‹አበደ›› ይባላል፡፡ እንዴት አያብድ?

አንድ ቀን የተወረሰበት የንግድ ቤት ግድግዳ ላይ፣ ‹‹ዛሬ በኃጢያት የተቀማሁትን ቤቴንና ንብረቴን የሚያስመልስ ጀግና የሆነ ደፋር ዜጋ እስኪመጣ እጄን ሰጥቻለሁ፤›› ብሎ ጻፈ አለችኝ ጓደኛዬ፡፡ ለፍትሕና ለርትዕ የሚቆሙ ነፍሶች የተባረኩ ሲሆኑ፣ በተቃራኒው በሰው እንባና ደም የሚቀልዱ ደግሞ እኩያን ናቸው፡፡ ለማንኛውም ፍትሕን እየረገጡ ወንጀል ከሚፈጽሙ ይልቅ፣ ፍትሕን ከወንጀል የሚታደጉ ብፁዓን ናቸው፡፡ እኔ ሳስበው ያንን ምስኪን ሰው ፈጣሪ የሰማው ይመስለኛል፡፡ ምክንያቱም አይነኬ የሚመስሉ ስማቸው የገዘፈ ዘመነኞች በሕግ እንዲጠየቁ ሲደረግ እያየን ሲሆን፣ ለጊዜው ከፍትሕ ያመለጡ የሚመስላቸው እንደማይቀርላቸው ወቅቱ እየነገረን ይመስለኛል፡፡ ፍትሕ እንደ ሸቀጥ በሚቸበቸብበት አገር ውስጥ ተጠያቂነት ሲመጣ ወንጀል የሠሩ ብዙ በመሆናቸው፣ ተገቢውን ፍትሕ ማግኘታቸው ነገ ለሚታሰበው ብሔራዊ ዕርቅም ሆነ ምሕረት አመቺ ይሆናል፡፡ ይህ በተግባር ካልታየ ግን እንደ ኬንያው ጠበቃ ፍትሕ ፍለጋ የሚነሱ ሚሊዮኖች እንዳሉ መዘንጋት አይገባም፡፡ የትናንት ሥቃይ የሚሽረው ፍትሕ ሲሰጥ እንጂ ሲነፈግ አይደለም፡፡ ለቂምና ለበቀል በር አንክፈት፡፡ ወንጀል ሠርቶ መደበቅም ሆነ የወንጀለኛ ተከራካሪ ሆኖ ፍትሕን መጋፋት ካሁን በኋላ የሚሠራ አይመስለኝም፡፡ ያዋጣናል የሚሉ ካሉ ለጊዜው ነው እንጂ የትም መድረስ እንደማይችሉ መተማን ይኖርብናል፡፡

(የትምወርቅ ነጋሽ፣ ከፈረንሣይ ለጋሲዮን

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

አስጨናቂው የኑሮ ውድነት ወዴት እያመራ ነው?

ከቅርብ ጊዜያት ወዲህ የኑሮ ውድነት እንደ አገር ከባድ ፈተና...

‹‹ወላድ ላማቸውን አርደው ከደኸዩት ወንድማማቾች›› ሁሉም ይማር

በንጉሥ ወዳጅነው   የዕለቱን ጽሑፍ በአንድ አንጋፋ አባት ወግ ልጀምር፡፡ ‹‹የአንድ...

የመጋቢቱ ለውጥና ፈተናዎቹ

በታደሰ ሻንቆ ሀ) ችኩሎችና ገታሮች፣ መፈናቀልና ሞትን ያነገሡበት ጊዜ እላይ ...

ጥራት ያለው አገልግሎት መስጠት የሚያስችል ሥርዓት ሳይዘረጉ አገልግሎት ለመስጠት መነሳት ስህተት ነው!

በተለያዩ የመንግሥትና የግል ተቋማት ውስጥ ተገልጋዮች በከፈሉት ልክ የሚፈልጉትን...