Thursday, October 6, 2022
ሌሎች ዓምዶች
    - Advertisement -
    - Advertisement -
    ዜናበተከራዮች ላይ የተጣለውን የዋጋ ጭማሪ መኢአድ ተቃወመ

    በተከራዮች ላይ የተጣለውን የዋጋ ጭማሪ መኢአድ ተቃወመ

    ቀን:

    የኢትዮጵያ ሕዝብ ለውጡ የእኔ ነው ብሎ በሙሉ ልብ ተቀብሎ ለማስቀጠል እየሠራ ባለበት በዚህ ጊዜ፣ የፌዴራል ቤቶች ኮርፖሬሽን በተከራዮች ላይ የዋጋ ማሻሻያ በሚል ሰበብ የወሰደው የቤት ኪራይ የዋጋ ጭማሪ ፍፁም ተገቢ ያልሆነና በአስቸኳይ ሊነሳ ይገባል በማለት፣ የመላው ኢትዮጵያ አንድነት ድርጅት (መኢአድ) ጥያቄ አቀረበ፡፡

    መኢአድ ይህን ጥያቄ ለመንግሥት ያቀረበው ሐሙስ ታኅሳስ 18 ቀን 2011 ዓ.ም. ቴዎድሮስ አደባባይ አካባቢ በሚገኘው ዋና ጽሕፈት ቤቱ፣ ‹‹ገቢን ያላገናዘበ ጭማሪ በአስቸኳይ ሊቆም ይገባል›› በሚል ርዕስ የፓርቲው አመራሮች ጋዜጣዊ መግለጫ በሰጡበት ወቅት ነው፡፡

    ‹‹በከተማችን አዲስ አበባና በሌሎችም የአገሪቱ ክፍሎች የዜጎችን ገቢና ኑሮ ያላገናዘበ የግልም ሆነ የመንግሥት ቤቶች የሚያደርጉት የኪራይ ዋጋ ሕዝቡን ወደ አላስፈላጊ ትርምስ የሚወስድ፣ እንዲሁም መንግሥት አሁን እየተከተለ ያለውን የለውጥ ጎዳና ሊያደናቅፍና አቅጣጫ ሊያስት እንደሚችል ሆን ተብሎ የተሠራ እስኪመስል ድረስ ዜጎችንም ሆነ የፖለቲካ ፓርቲዎችን ሥጋት ላይ ጥሏል፤›› በማለት፣ በቅርቡ በቤቶች ኮርፖሬሽን አማካይነት የተደረገውን የዋጋ ጭማሪ ክፉኛ ተቃውሟል፡፡

    መንግሥት በዝቅተኛ ገቢ የሚተዳደሩ ዜጎች ከዳቦ ጀምሮ በየደረጃው ያለው የዋጋ ንረት ከፍተኛ መሆኑን በመገንዘብ፣ የማስተካከያ ዕርምጃዎች መውሰድ እንዳለበት መኢአድ አሳስቧል፡፡

    ስለሆነም የቤቶች ኮርፖሬሽን ያስተላለፈው ውሳኔ በአስቸኳይ እንዲነሳ፣ ‹‹ስግብግብ ያላቸው ነጋዴዎች በተለያዩ ሸቀጣ ሸቀጦችና ሌሎች ዕቃዎች ላይ አላስፈላጊ ጭማሪ እያደረጉ ስለሆነ፣ የዋጋ ማስተካከያና ጥብቅ ቁጥጥር እንዲያደርግ ሲል ለመንግሥት ጥያቄ አቅርቧል፡፡

    ‹‹የትራንስፖርት እጥረት በከፍተኛ ሁኔታ በመኖሩ ምክንያት ሕዝቡ የዕለት ተዕለት ሥራውን ማከናወን እስኪሳነው ድረስ ተሠልፎ ፀሐይና ብርድ ላይ የሚውል በመሆኑ፣ አፋጣኝ የመፍትሔ ዕርምጃ እንዲወሰድ፤›› ሲልም ጠይቋል፡፡

    የንፁህ ውኃ አቅርቦትን በተመለከተ በወር አንድ ጊዜ እንኳን የማይመጣባቸው ክፍላተ ከተሞች ስላሉ እስከ ታች በመውረድ በፀረ ለውጥ ኃይሎች ላይ አፋጣኝ ሕጋዊ ዕርምጃ እንዲወሰድ፣ እንዲሁም የኤሌክትሪክ ኃይል አቅርቦትን በተመለከተ በአዲስ አበባም ሆነ በሌሎች አካባቢዎች ዜጎች በከፍተኛ ሥቃይ ላይ ስለሚገኙና ሥራም እየተጎዳ ስለሆነ፣ መንግሥት ለጉዳዩ ትኩረት በመስጠት የማያዳግም ማስተካከያ እንዲያደርግ መኢአድ ጠይቋል፡፡   

    - Advertisement -

    ይመዝገቡ

    spot_img
    spot_img