Friday, September 30, 2022
ሌሎች ዓምዶች
    - Advertisement -
    - Advertisement -
    ዜናሁለት የመንግሥት ዩኒቨርሲቲዎች ትምህርት እየሰጡ አይደለም

    ሁለት የመንግሥት ዩኒቨርሲቲዎች ትምህርት እየሰጡ አይደለም

    ቀን:

    በመንግሥት ከፍተኛ ትምህርት ተቋማት ውስጥ ባጋጠሙ የፀጥታ መደፍረሶችና ግጭቶች ምክንያት የቡሌ ሆራ ዩኒቨርሲቲ እስከ ጥር 1 ቀን 2011 ዓ.ም. ተዘግቶ እንዲቆይ ሲወሰን፣ በተመሳሳይ ምክንያት ትምህርት መስጠት ያልጀመረው የሚዛን ቴፒ ዩኒቨርሲቲ የቴፒ ካምፓስ ከጥር 3 ቀን 2011 ዓ.ም. ጀምሮ ትምህርት እንደሚጀምር ተገለጸ፡፡

    በቡሌ ሆራ ዩኒቨርሲቲ ከታኅሳስ 2011 ዓ.ም. ጀምሮ በተከሰቱ ግጭቶች በተማሪዎች ላይ ጉዳት መድረሱና ትምህርት መስጠት ማቆሙ ይታወሳል፡፡ በዚህም ምክንያት ጠቅላይ ሚኒስትር ዓብይ አህመድ (ዶ/ር) ለተማሪዎቹ ትምህርታቸውን ተረጋግተው እንዲማሩ መልዕክት አስተላልፈው እንደነበርም ይታወቃል፡፡ ነገር ግን በዩኒቨርሲቲው የነበረው ችግር ሳይፈታ ለቀናት ቆይቶ እንደነበር አይዘነጋም፡፡ ከዚህም በመቀጠል ተቋሙ ከተማሪዎችና ከአካባቢው ነዋሪ ጋር ውይይቶችን አድርጎ ነበር፡፡

    በመንግሥት ዩኒቨርሲቲዎች እየተስተዋለ ባለው የፀጥታ መደፍረስ ችግር ላይ ማክሰኞ ታኅሳስ 23 ቀን 2011 ዓ.ም. ከቀትር በኋላ መግለጫ የሰጡት የሳይንስና ከፍተኛ ትምህርት ሚኒስትር ሒሩት ወልደማርያም (ዶ/ር)፣ ከላይ ከተጠቀሱት የትምህርት ተቋማት ውጪ በቀሪዎቹ ትምህርት እየተሰጠ መሆኑን ገልጸዋል፡፡

    በከፍተኛ ትምህርት ተቋማት እየተከሰቱ ያሉ ችግሮችም በዋናነት ከውጭ የፖለቲካ አጀንዳዎችና ከተማሪዎች አገልግሎት ጋር በተያያዙ በሚነሱ ጥያቄዎች ምክንያት የመማር ማስተማር ሒደቱን እያወኩ መሆኑን ተናግረዋል፡፡

    የግል ግጭቶች የብሔር መልክ እንዲይዙ በመደረጋቸው ለግጭቶቹ ምክንያት እንደነበሩ ሚኒስትሯ ጠቁመው፣ በዚህም ምክንያት በባህር ዳር፣ በደብረ ታቦር፣ በጅግጅጋና በቡሌ ሆራ ዩኒቨርሲቲዎች የሰላም መደፍረሶች መከሰታቸውን አስረድተዋል፡፡

    ከቡሌ ሆራ በስተቀር በሌሎቹ ያጋጠሙ ጊዜያዊ ችግሮች እንደነበሩና መፈታታቸውን፣ ነገር ግን በቡሌ ሆራ ውይይቶች ከተደረጉ በኋላ ፈቃደኛ የሆኑ ተማሪዎች ወደ ቤተሰብ ተሸኝተዋል ብለዋል፡፡

    ተማሪዎቹ በሥነ ልቦና በኩልም እስኪረጋጉ ድረስ ዕረፍት ተሰጥቷቸው፣ ጥር 1 ቀን 2011 ዓ.ም. ምዝገባ አድርገው ትምህርት እንደሚጀምሩ ታውቋል፡፡ ከዚህም ጋር በተያያዘ እስካሁን ተዘግቶ የቆየው የሚዛን ቴፒ ዩኒቨርሲቲ የቴፒ ካምፓስ ነባር ተማሪዎችና አዳዲስ ተማሪዎችን ለመቀበል መዘጋጀቱን ለማወቅ ተችሏል፡፡

    በአካባቢው በነበረው የፀጥታ ችግር ሚዛን ቴፒ ዩኒቨርሲቲን ጨምሮ የተለያዩ የመንግሥት ተቋማት ተዘግተው መቆየታቸው ይታወሳል፡፡ ‹‹በተቋማቱ ተመሳሳይ ችግሮች እንዳይከሰቱና ሰላማዊ የመማር ማስተማሩ ሒደት እንዲቀጥል ተማሪዎች ራሳቸው ዘብ እንዲቆሙ ይደረጋል፤›› ያሉት ሚኒስትሯ፣ የትምህርት ተቋማቱ ከፖለቲካ እንቅስቃሴዎች ነፃ ናቸው ብለዋል፡፡ ከዚህ ቀደም በዩኒቨርሲቲዎች የነበሩ የኢሕአዴግ አስተባባሪዎች እንዲወጡ መደረጋቸውንም አስታውሰዋል፡፡

    ከዚህ ቀደም በተለይ በጅግጅጋ ዩኒቨርሲቲ ይማሩ የነበሩ የኦሮሞ ተወላጅ ተማሪዎች በሶማሌ ክልል ተከስተው በነበሩ ግጭቶች የብሔር ጥቃት ሊደርስብን ይችላል በሚል ሥጋት፣ በራሳቸውና በሌሎች ክልሎች በሚገኙ ዩኒቨርሲቲዎች በጊዜያዊነት እንዲመደቡ ባቀረቡት ጥያቄ መሠረት ጥያቄያቸው ተግባራዊ መደረጉ ይታወሳል፡፡

    እነዚህ ተማሪዎች ችግሩ ሲፈታ ቀድሞ ወደነበሩበት ጅግጅጋ ዩኒቨርሲቲ ተመልሰው ትምህርታቸውን እንደሚቀጥሉ ተጠብቆ የነበረ ቢሆንም፣ ወደ ዩኒቨርሲቲ አለመመለሳቸው ታውቋል፡፡

    ተማሪዎቹ ፋይላቸው ከጅግጅጋ ዩኒቨርሲቲ አዲስ ወደተመደቡበት ተቋም ተልኮ፣ እዚያው ትምህርታቸውን እንዲቀጥሉ መደረጉን ሚኒስትሯ በጋዜጣዊ መግለጫቸው ወቅት ገልጸዋል፡፡

    - Advertisement -

    ይመዝገቡ

    spot_img
    spot_img