Wednesday, December 7, 2022
ሌሎች ዓምዶች
    - Advertisement -
    - Advertisement -
    የሳምንቱ ገጠመኝየሳምንቱ ገጠመኝ

    የሳምንቱ ገጠመኝ

    ቀን:

    ከዓመታት በፊት የምናውቃቸው አስገራሚ ነገሮች በዚህ ዘመን ሲደገሙ ነገርን ነገር ያነሳዋል የሚባለውን አባባል ያስታውሱኛል፡፡ እኔ ከበፊት ጀምሮ እስካሁን የታዘብኳቸውን እስኪ ተከታተሉኝ፡፡ በፊት በፊት መጠጥ ቤት ውስጥ አንዳንድ ጉደኛ ሰዎች ያጋጥሟችኋል፡፡ ድንገት አንድ ጉዳይ ይነሳና በዚያ መነሻ፣ ‹‹እከሌና እከሊትን እኮ አውቃቸዋለሁ፡፡ እንዲያውም ዛሬ ምሳ አብረን ነው የበላነው፡፡ በጣም እንቀራረባለን እኮ፣. . . ጲሪሪም. . . ጲሪሪም. . . ›› ይሏችኋል፡፡ እነሱ ስማቸውን እያነሱ የሚነግሩን ‹‹እከሌ›› የተባሉ የጦር ጄኔራል ወይም ‹‹እከሌ›› የሚባሉ ሚኒስትር ሊሆኑ ይችላሉ፡፡ እነዚህ ሰዎች የተለየ ጥቅም ለማግኘት ወይም ለማስፈራራት ሲፈልጉ፣ የትልልቅ ሰዎችን ስም ከለላ በማድረግ ብዙ ነገር ይዘበዝባሉ፡፡ አንዳንዴ ሳስበው ዕብድ ቢመስሉኝም በሰዎቹ ስም እየነገዱ ይሆናል፣ ወይም ከሰዎቹ ጋር የሚያቆራኛቸው ጥቅም አለ ማለት ነው፡፡ ለዓመታት በባለሥልጣናት ስም የሚነግዱ ወይም አብረው የነገዱ የነበሩትን ያህል፣ አሁን ደግሞ ተረኞች የተፈጠሩ ይመስላሉ፡፡ ታሪክ ራሱን ይደግማል የሚባለው ለካ እውነት ነው፡፡

    አንድ ጊዜ አንዱ ድምፁን ከፍ አድርጎ የአንድ ታዋቂ ባለሥልጣን ስም ይጠራና በጣም እንደሚተዋወቁ እየተናገረ፣ ‹‹ትናንት አብረን ሲንግል ማልት ውስኪ ስንጠጣ ነው ያመሸነው፤›› ይላል፡፡ በሰውየው ንግግር በጣም የተገረመ ሌላ ሰው፣ ‹‹ከማን ጋር?›› ይለዋል ለማጣራት ፈልጎ ነው እንግዲህ፡፡ ሰውየው የባለሥልጣኑን ስም እንደገና ይጠራለታል፡፡ ጠያቂው በጣም ተናዶ ስለነበር፣ ‹‹በቃህ! እሱ እንኳን ውስኪ ኮካ ኮላ እንኳ ጠጥቶ አያውቅም፡፡ አንተ ደግሞ በፍፁም የማታውቀውን ስም እያነሳህ አፍህን አትክፈት፤›› ሲለው ሰውየው ደንግጦ ጭጭ ይላል፡፡ አጋጣሚ ባገኘ ቁጥር የታዋቂ ሚኒስትሮችንና ወታደራዊ ሹማምንትን ስም እየጠራ ብዙዎችን ሲያሸማቅቅ የነበረ ሞላጫ፣ ከዚያ በኋላ እዚያ ቦታ ድርሽ ሳይል ቀረ፡፡ አንዳንዴ እኮ ደፋር አያሳጣን ያስብላል፡፡

    እኔ ከዚህ ቀደም እንዲህ ዓይነት በርካታ ሰዎችን ታዝቤያለሁ፡፡ የዛሬ ሁለት ዓመት ገደማ አንዱ ቢሮዬ ይመጣና ስፖንሰርሺፕ ይጠይቀኛል፡፡ እኔ በኃላፊነት የምመራው መሥርያ ቤት እሱና ቢጤዎቹ የሚያዘጋጁትን በዓል 200 ሺሕ ብር በመክፈል ስፖንሰር እንዲሆን ነው ጥያቄው፡፡ ይኼንን ገንዘብ ለሠራተኞቻችን በቦነስ መልክ ብንሰጥ ምን ያህል የተቀደሰ ተግባር እንደሆነ በሚገባ ስለማውቅ እንደማይቻል እነግረዋለሁ፡፡ ከዚህ በኋላ ሰውየው ቴአትር ጀመረ፡፡ ‹‹እኛ እኮ የኢሕአዴግና የመንግሥት ደጋፊዎች ስለሆንን ብዙ ድርጅቶች ቃል ገብተውልናል፡፡ የእናንተ ድርጅት ይህንን ገንዘብ ቢሰጥ ኢሕአዴግ በጥሩ ዓይን ያየዋል፡፡ ተጠቃሚም ትሆናላችሁ. . .›› እያለ ሲዘበዝብ ደሜ ፈላ፡፡ ስለዚህ መናገር ነበረብኝ፡፡ ‹‹ሰማህ በአገራችን ውስጥ የሚፈለገው ጥገኝነት ሳይሆን ሕግና ሥርዓት አክብሮ እየሠሩ ማደግ ነው፡፡ አይቻልም ስልህ እሺ ብለህ መሄድ እንጂ፣ እንዲህ ዓይነቱን ርካሽና ተራ ወሬ መዘብዘብ አስፈላጊ አልነበረም፡፡ ስለዚህ ውጣ!›› ስለው ተንሿኮ ሄደ፡፡ ሾካካ፡፡ የእሱ ቢጤ ብዙ ስለነበሩ ከባድ ችግር ይገጥመን እንደነበረ አልረሳም፡፡

    የመንግሥት ባለሥልጣናትን፣ የፖለቲካ ድርጅትን፣ የታዋቂ ግለሰቦችን፣ የሀብታሞችን፣ ወዘተ. ስም እየጠሩ የሚያጭበረብሩ ብዙ ነበሩ፣ ዛሬም አሉ፡፡ በዘመኑ አጠራር ‹‹ጉዳይ ገዳይ›› ይባላሉ፡፡ እንዲህ ዓይነቶቹ ደግሞ መጠጥ ቤቶች፣ ቁርጥ ቤቶች፣ የተለያዩ መዝናኛ ሥፍራዎችና መሥርያ ቤቶች አካባቢ አይጠፉም፡፡ አሁን አሁን የከተማችን ታዋቂ የመጠጥና የምግብ ውድ ቤቶች የእነዚህ ግለሰቦች መናኸሪያ እየሆኑ ናቸው፡፡ እነዚህ ንግድ ቤቶች በተለይ የዘመናችን ሀብታሞች ውስኪና ቮድካ የሚጎነጩባቸው ብቻ ሳይሆኑ፣ በተለያዩ ምክንያቶች እጅ መንሻ ሰጥተው ላጋጠማቸው ችግር መፍትሔ የሚፈልጉ ሰዎች መቃጠሪያ ናቸው፡፡ በስም ተጠቃሚ የሆኑ ሞላጮችም እንዲህ ዓይነቱን መልካም አጋጣሚ በመጠቀም ይከብራሉ፡፡ እነሱ ‹‹ጉዳይ ገዳይ›› ለሚባሉ ተላላኪዎች ባለጉዳዮችን ያስተላልፋሉ፡፡ እንዲህ ዓይነቱን ድርጊት የሚፀየፉ ኩሩ ኢትዮጵያውያን ደግሞ እህህህ. . . እያሉ ይበግናሉ፡፡ 

    በቅርቡ አንደኛው የከተማችን ታዋቂ መጠጥ ቤት የወጉን ለማድረስ ተገኝቻለሁ፡፡ አራት ሆነው ‹‹ጎልድ ሌብል›› ጠርሙስ ውስኪ አስወርደው ከሚጎነጩት መካከል አንዷ ሴት ናት፡፡ በአነጋገሯ ፈጠን፣ በአስተያየቷ ደፈር፣ በአጠጣጥዋ ጠንከር ያለች ናት፡፡ በየመሀሉ በተደወለላት ወይም ራሷ በደወለች ቁጥር የታዋቂ ሰዎች ስም ይነሳል፡፡ እንዴ በዚህ ዘመን ምን እያደረገች ነው? ‹‹በእኔ ይሁንብህ ወይም ይሁንብሽ›› በታጀበው አነጋገሯ ስማቸውን በምታነሳቸው ታዋቂ ሰዎች አማካይነት ጉዳያቸውን እንደምታስፈጽም በድፍረት ትናገራለች፡፡ ስልኳን አንስታ መነጋገር በጀመረች ቁጥር ሁላችንም እንድንሰማ ድምጿን ከፍ አድርጋ መሆኑ ገበያ ፍለጋ እንደሆነ ያስታውቃል፡፡  እንደዚች ዓይነት ደፋር ዓይቼ ስለማላውቅ ነው መሰል አፌን ከፍቼ ነበር የምከታተላት፡፡

    የዚህችን ሴት ድፍረት ሲታዘብ የነበረ አንድ የማላውቀው ሰው፣ ‹‹ይቅርታ እዚህ አገር ማፈር ቀረ እንዴ?›› በማለት ጥያቄ አቀረበልኝ፡፡ ‹‹ይኸው እንደምታየው ነው፤›› አልኩት፡፡ ‹‹የእኔ ወንድም በየደረስክበት እኮ ማንም እየተነሳ የባለሥልጣን ወይም የታዋቂ ሰው ጓደኛ መሆኑን ይነግርሃል፡፡ ይኼ በጣም የሚያሳዝንና የሚያሳቅቅ ተግባር ነው. . . ›› ብሎኝ ሒሳቡን ከፍሎ ውልቅ አለ፡፡ ከጎኔ የተቀመጡ ሁለት ሰዎች በሴትየዋ የድፍረት ንግግር መነሻ ወግ ይዘዋል፡፡ የሰዎቹ ወግ ሌላ ገጽታ ያስቃኘናል፡፡

    አንደኛው፣ ‹‹አንድ ጊዜ 100 ሺሕ ብር ከባንክ አውጥቼ ወደ ቢሮ ልሄድ አሮጌ መኪናዬን ለማስነሳት ስሞክር እምቢ አለኝ፡፡ ቢሮዬ ቅርብ ስለነበር ፌርማታ ላይ የቆመ ሚኒባስ ወያላ ሲጣራ ሮጥ ብዬ ገባሁ፡፡ እንደ ገባሁ ሚኒባሱ በፍጥነት መጓዝ ሲጀምር፣ ሳላውቅ የገባሁበት ሚኒባስ አራት ወጠምሻ ጎረምሶች ተጭነውበታል፡፡ ሁኔታው ስላላማረኝ ስልኬን አውጥቼኢንስፔክተር ከኋላህ ያለው ታክሲ ውስጥ ነኝ አቁሙልኝብዬወራጅስል ሾፌሩ በድንጋጤ ሲያቆምልኝ ተንደርድሬ ወረድኩኝ፡፡ ይህ ዘዴ በድንገት ባይመጣልኝ ኖሮ ጉድ ሆኜ ነበር፡፡ አንዳንዴ እንዲህ ዓይነት ብልጥነት ከመዘረፍም ከመገደልም ያድናል. . . ›› እያለ ሲያወራ ይኼም አለ ለካ አልኩ፡፡ ቢያንስ ሰውን ከማስፈራራትና ከመዝረፍ ይኼኛው ሳይሻል ይቀራል? ለማንኛውም በሬዲዮም ሆነ በቴሌቪዥን ስለሌብነት መንሰራፋት ተወርቶ ቡራ ከረዩ ሲባል፣ በየስርቻው ደግሞ ምድረ ‹‹ጉዳይ ገዳይ›› አገር ያምሳል፡፡ በወቅቱ እኔን የገረመኝ ያቺ ደፋር ሴት የአገር ቱባ ባለሥልጣናትን ስም እየጠራች በአደባባይ ስትንጎማለል ማንም ምንም አለማለቱ ነው፡፡ በመሀል ግን አንድ ወዳጄ አንድ ቀን የነገረኝ ትዝ አለኝ፡፡ ይኼ ወዳጄ፣ ‹‹አንድ ታዋቂ ተብዬ አርቲስት የጠቅላይ ሚኒስትሩ አብሮ አደግ ነኝ አለኝ፤›› ብሎ ሲነግረኝ እኔ ደግሞ፣ ‹‹ምን አልከው ታዲያ?›› አልኩት፡፡ ወዳጄ ከት ብሎ እየሳቀ፣ ‹‹ከ100 ሚሊዮን ሕዝብ ውስጥ 27 በመቶው ወፈፍ ያደርገዋል እየተባለ እንዴት ሆኖ ነው ከወፈፌ ጋር አንጃ ግራንጃ የምፈጥረው?›› ሲለኝ ተሳስቀን ዝም ከማለት ውጪ አማራጭ አልነበረንም፡፡

    (ዳዊት አባተ፣ ከጎተራ ኮንዶሚኒየም)

    spot_img
    - Advertisement -

    ይመዝገቡ

    spot_img

    ተዛማጅ ጽሑፎች
    ተዛማጅ

    ‹‹መንግሥት የሕዝብን ደኅንነት ባለመጠበቁ  መንግሥት ነኝ የማለት ልዕልና የለውም›› የፖለቲካ ፓርቲዎች

    የወለጋ ዞኖች በኮማንድ ፖስት ሥር እንዲተዳደሩ ተጠየቀ በኦሮሚያ ክልል ወለጋ...

    ጎህ ቤቶች ባንክ ወደ ቤት ልማት ለመግባት ብሔራዊ ባንክን ፈቃድ ጠየቀ

    በስምንት ወራት ውስጥ 7.9 ሚሊዮን ብር ማትረፉን አስታውቋል ኢትዮጵያ ውስጥ...

    የመንግሥት ተቀዳሚ ኃላፊነት ንፁኃንን ከአጥቂዎች መከላከል ነው!

    በኦሮሚያ ክልል ውስጥ ንፁኃን ያለ ኃጢያታቸው የሚጨፈጨፉበት ምክንያት ብዙዎችን...

    የአካል ጉዳተኞች የሥራ ሥምሪት አካታችነት ሁለት በመቶ ብቻ መሆኑ ተገለጸ

    በኢትዮጵያ አካል ጉዳተኞች በሥራ ሥምሪት መካተት እንዳለባቸው የሚገልጽ አዋጅ...