Sunday, November 27, 2022
ሌሎች ዓምዶች
    - Advertisement -
    - Advertisement -
    የሳምንቱ ገጠመኝየሳምንቱ ገጠመኝ

    የሳምንቱ ገጠመኝ

    ቀን:

    ወቅቱ የሠርግ ስለሆነ አንድ ትዝታዬን ልንገራችሁ፡፡ በአንድ ወቅት የተዋወቅኩት ሰው ወንድም ሠርግ ላይ የተገኘሁት በመኪናዬ ምክንያት ነው፡፡ ቀደም ሲል የደረሰኝ የሠርግ ካርድ ሆቴል የተዘጋጀ የምሣ ሥነ ሥርዓት ላይ ለመታደም ነበር፡፡ ነገር ግን የሠርጉ ዕለት ሲቀርብ የአጃቢ ፕሮግራም ተልኮልኝ አጀቡን እንድቀላቀል መወሰኑ ተነገረኝ፡፡ ልብ በሉ ለዚህ ምክንያቱ ደግሞ በቅርቡ እጄ በአጋጣሚ የገባው ዘመናዊ ሐንዳይ የቤት አውቶሞቢል ነው፡፡ ይህ ዘመናዊና መልኩ የሚያምር አውቶሞቢል የሀብታሞቹ ሠርገኞችና ዕድምተኞች ባልደረባ አድርጎኝ በአንዴ ያላሰብኩት የተንዛዛ የሠርግ ፕሮግራም ውስጥ ከተተኝ፡፡

    የሠርጉ ሥነ ሥርዓት ቅዳሜ ሊካሄድ፣ ሐሙስ ከሰዓት በኋላ ጀምሮ ሚዜዎችና አጃቢዎች ዘመናዊ መኪኖቻችንን እንደ ባቡር ቀጣጥለን ሙሽሪት ቤት እንድንሄድ ፕሮግራም ተይዟል፡፡ ከቀኑ ዘጠኝ ሰዓት ላይ በደንብ የማላውቀው ጓደኛችን ወንድም ቤት ስደርስ ከሠርግ ያልተናነሰ  ድግስ ጠበቀኝ፡፡ ትልቁን ሳሎን በሰፊው የሞላው የቡፌ ጠረጴዛ ላይ የተዘረጋው የምግብ ዓይነት አንድ ባታሊዮን ጦር ይመልሳል፡፡ በዚያ ላይ ብሉ ሌብል፣ ግሪን ሌብል፣ ጎልድ ሌብልና ሺቫዝ ሬጋልን የመሳሰሉ ውስኪዎች በየዓይነቱ ተደርድረው እንደ ጉድ ይኮመኮማል፡፡ የድግሱ ሥነ ሥርዓት ከተጠናቀቀ በኋላ ሌላው ዝግጅት መቀጠል ጀመረ፡፡

    አመሻሽ ላይ ወደ ሙሽሪት ቤት የሚሄደው ጥሎሽ በሻንጣዎችና በተለያዩ ካርቶኖች ተደርድሮ ሲታይ ከመርከብ የተራገፈ የሀብታም ሸቀጥ ይመስላል፡፡ የሙሽሪት አልባሳት፣ መጫሚያዎች፣ ሽቶዎች፣ መጋጌጪያዎችና የተለያዩ ቁሳቁሶች ከሚሊዮን ብር በላይ እንደሚያወጡ የሰማሁት ዘግይቼ ቢሆንም ብዙም አልገረመኝም፡፡ ምክንያቱ ደግሞ በረባውና ባልረባው ጉዳይ የሚወጣው ገንዘብ ብዙ ነበርና ነው፡፡ በተያዘልን ፕሮግራም መሠረት ሙሽሪት ቤት ስንደርስ መሽቶ ነበር፡፡ ተገቢውን ባህላዊ ሥርዓት አከናውነን ወደ ውስጥ ስንዘልቅ እዚህም ሠርግ የሚያህል ድግስ ጠበቀን፡፡ በስንት ውጣ ውረድና ትግል ያመጣነውን ጥሎሽ አስረክበን ምግብና መጠጡን ተያያዝነው፡፡ ጭፈራው ደራ፡፡ እንዲህ ዓይነት ከውድ ውስኪዎች በስተቀር የማይስተናገዱበት የጥሎሽ እራት ዓይቼ ስለማላውቅ ያለ ቦታዬ የተገኘሁ መሰለኝ፡፡ እኩለ ሌሊት አካባቢ በስንት መከራ ተሸኘን፡፡ ያውም በየመሀሉ ጥሎሹ ልጅቷን አይመጥንም እየተባልን እየተሰደብን፡፡ አንድ አይሱዙ የጭነት ተሽከርካሪ የሞላው ጥሎሽ አነሰ ነው የሰዎቹ ቅሬታ፡፡

    ቅዳሜ ከንጋቱ 12 ሰዓት ሲሆን ሠርጉ ቤት እንድንገናኝ በጥብቅ ተነግሮናል፡፡ እኔ የማርፈድ አመል ስላለብኝ አንድ ሰዓት ስደርስ ሁሉም እዚያው ነበሩ፡፡ ሙሽራው እየተጣጠበ፣ ፀጉሩንና ፂሙን እየተስተካከለና በታዋቂ አልባሾች እየለበሰ ሳለ እኛ ደግሞ የተለመደውን ምርጥ ቁርስ አጣጣምን፡፡ ከዚያም መኪኖቻችንን በተሰጠን ደረጃ መሠረት ደረደርን፡፡ ሁሉንም ነገር አስተካክለን ከጨረስን በኋላ መልበስ ጀመርን፡፡ ከዱባይ የመጣልንን ሙሉ ልብስ ከእነ ሸሚዙና ከእነ ከረባቱ ለብሰንና ምርጥ ጫማ አጥልቀን ሽቶ መቀባባትና ራሳችንን ማስተካከል ያዝን፡፡ ሚዜዎች አንድ ዓይነት፣ አጃቢዎቹም እንዲሁ በተለየ ቀለም አንድ ዓይነት፡፡ ዓይቼ የማላውቀው የሠርግ ሥርዓት ውስጥ ገብቼ የፊልም አክተር መሰልኩ፡፡ ይኼ ሁሉ ቅንጦት የተሞላበት ሠርግ ላይ በመገኘቴ ከደስታ በላይ አስክሮኛል፡፡ በዚያ ላይ የቆነጃጅቱ ብዛት አይጣል ነው፡፡

    ሙሽራውን ከረፋዱ አምስት ሰዓት ላይ ከቤቱ አስወጥተን ወደ ሙሽሪት ቤት አመራን፡፡ ሙሽሪት ቤት ረዥም ቆይታ ካደረግን በኋላ ከቀኑ ሰባት ሰዓት ሲሆን ወደ ሆቴል ተጓዝን፡፡ ሆቴል 8፡30 ሰዓት ላይ ስንደርስ አዳራሹን ግጥም ብሎ የሞላው የሠርግ ታዳሚ ከሁለት ሺሕ በላይ ይሆናል፡፡ ከዘጠኝ ሰዓት ጀምሮ እስከ ምሽቱ ሁለት ሰዓት በሆቴል የተደረገው የተንበሸበሸ ሥነ ሥርዓት በከፍተኛ ወጪ የተዘጋጁ ምግቦችና መጠጦች ከመቅረባቸውም በላይ ሁለት ዘመናዊ ባንዶች የታደሙበት ነበር፡፡ ጥሬ ሥጋ፣ ክትፎ፣ ጥብስና የተለያዩ የውጭና የአገር ቤት ምግቦችን በልተው በውስኪ ዓይነቶች የተንበሸበሹ ታዳሚዎች አቅላቸውን የሳቱበት ሠርግ ነበር ማለት ይቻላል፡፡ በኋላ እንደሰማሁት የሠርጉ ጠቅላላ ወጪ ከአምስት ሚሊዮን ብር በላይ መሆኑን ነው፡፡ ከሠርጉ በኋላ መልሱና ቅልቅሉን ጨምሮ ከአሥር በላይ ጥሪዎች ላይ ሁለት ሳምንት ሙሉ ስገኝ ሥጋና ውስኪ አንገፈገፉኝ፡፡

    ሁሉም ነገር በሰላም ተጠናቆ ወደ መደበኛው ኑሮዬ ስመለስ የከረምኩበት ሠርግ ህልም መሰለኝ፡፡ ሠርገኞቹ፣ ሚዜዎቹ፣ አጃቢዎቹና ሌሎች በቅርብ ርቀት የነበሩ ሰዎች በሙሉ ሕይወታቸው የእኔና የቢጤዎቼ ዓይነት አልነበረም፡፡ ኑሮአቸው የተንደላቀቀ፣ አመጋገባቸውና አጠጣጣቸው የለተየ፣ ወሬያቸውና አስተሳሰባቸው ሁሉ ከተራው ዜጋ እጅጉ የራቀ፣ ወዘተ ነበር፡፡ በዚያ ላይ የሚኖሩባቸው መኖሪያ ቤቶች በቃላት ለመግለጽ የማይቻሉ ናቸው፡፡ እኔ እዚያ እንዴት ልገኝ ቻልኩ? አዎ? እኔና ጓደኞቼ የተለመደው ቦታ ቢራ ስንጠጣ የተዋወቅነውና በወሬ መሀል የቀረበን ሰው ነው ሠርግ የጠራን፡፡ ጓደኞቼ ሌላ ጊዜም ቢሆን ሠርግና ድግስ ስለማይወዱ ምክንያት ፈጥረው እንደማይገኙ ሲነግሩት እኔ ፈቃደኛነቴን ገለጽኩለት፡፡ በአጋጣሚ ለቤተሰብ ከውጭ የተላከ ሐንዳይ መኪና ከጉምሩክ ሲወጣ ለተወሰነ ጊዜ መያዜን የተረዳው ይህ ሰው ለአጃቢነት መረጠኝ፡፡ ይህንን ሁሉ ጉድ ሲታዘቡ የነበሩ ጓደኞቼ “ሰርጎ ገብ” ብለው ስም አወጡልኝ፡፡ ያለ ቦታዬ ተገኝቼ የከረምኩበት ሠርግ ላይ ከተዋወቅኳት ከአንድ ሀብታም ወጣት ጋር የጀመርኩት ፍቅር የት እንደሚያደርሰኝ ግን ግራ አጋብኝ ነበር፡፡ እውነት እላችኋላሁ በመሀላችን ያለው ልዩነት የብርሃንና የጨለማ ያህል ነበር፡፡ ለመሆኑ ኢትዮጵያ ውስጥ እንዲህ ዓይነት ልዩነት አለ እንዴ? እኔ ግን በአንድ ወቅት በዓይኔ አየሁት፡፡ መለስ ብዬ ሳስታውሰው ያ ሁሉ ሁካታና ቅንጦት የተሞላበት ሠርግ እንዲሁ ከመሬት በተገኘ ሀብት የተከናወነ አይደለም፡፡ ምንጩ ያልታወቀ ሲሳይ ውጤት መሆኑ አሁን ገብቶኛል፡፡ ምክንያቱም አሁን የደጋሾቹም፣ የአጋፋሪዎቹም ጀርባ የሚናገረው የዘረፋው ቡድን ግብረ አበሮች መሆናቸውን ነው፡፡ ሁሉም ነገር የሚገባን ጊዜ ካለፈ መሆኑ ግን ይቆጫል፡፡  

    (መክብብ ካሳሁን፣ ከጎፋ ማዞሪያ)

    spot_img
    - Advertisement -

    ይመዝገቡ

    spot_img
    spot_img

    ተዛማጅ ጽሑፎች
    ተዛማጅ

    በችግር የተተበተበው የሲሚንቶ አቅርቦት

    ሲሚንቶን እንደ ግብዓት ተጠቅሞ ቤት ማደስ፣ መገንባት፣ የመቃብር ሐውልት...

    ‹‹የናይል ዓባይ መንፈስ›› በሜልቦርን

    አውስትራሊያ ስሟ ሲነሳ ቀድሞ የሚመጣው በተለይ በቀደመው ዘመን የባህር...

    ‹‹ልብሴን ለእህቴ››

    ለሰው ልጅ መኖር መሠረታዊ ፍላጎት ተብለው ከተዘረዘሩት ውስጥ ልብስ...

    የአዲስ አበባ ትምህርት ቤቶች የምርመራ ውጤት እስከምን?

    በፍቅር አበበ የትምህርት ጥራትን፣ ውጤታማነትንና ሥነ ምግባርን ማረጋገጥ ዓላማ አድርጎ...