Sunday, June 23, 2024
- Advertisement -
- Advertisement -
ልናገርወቅታዊው ፈተና መንስዔውና የመፍትሔ ሐሳብ

ወቅታዊው ፈተና መንስዔውና የመፍትሔ ሐሳብ

ቀን:

በያሬድ በላይ

ውድ አንባቢያን ሁላችንም እንደምናውቀው አገራችን ኢትዮጵያ በአሁኑ ወቅት፣ ትልቅ ተስፋን በያዘና ተግዳሮት በበዛበት ወሳኝ የለውጥ ሒደት ውስጥ ትገኛለች፡፡ ለአንድ ችግር ትክክለኛ መፍትሔውን ለመፈለግ፣ በቅድሚያ ትክክለኛ መንስዔውን ማወቅ ተገቢ ይመስለኛል፡፡ ለመሆኑ የወቅታዊው የአገራችን ችግር መሠረታዊ መንስዔው ምንድነው? የመፍትሔ መንገዱስ? ይህች አጭር ጽሑፍ ለእነዚህ ጥያቄዎች ጠቅለል ያለ መልስ ትሰጣለች ብዬ አስባለሁ፡፡

ወቅታዊው ችግርና መሠረታዊ መንስዔው

“የእገሌ ብሔር ጥያቄ”  ወይም “የእገሌ ሕዝብ ፍላጎት”  የሚለው ቃል የዘር ፖለቲካ በማቀንቀን ሥልጣን ለመያዝ በሚያልሙ የአገራችን ፖለቲከኞች ሲዘወተር እንሰማለን፡፡ እነዚህ ፖለቲከኞች ይህን ቃል የሚጠቀሙት፣ አርቆ ሳያስብና ነገሮችን ሳያስተውል፣ በስሜታዊነት የሚገፋፋውን የኅብረተሰብ ክፍል በማነሳሳትና ሕዝብን ከሕዝብ በማጋጨት፣ ከተቻላቸውም በማለያየት፣ ሥልጣን እንይዛለን ብለው እኩይ ሐሳብ በማሰባቸው እንጂ፣ ለሕዝብና ለአገር በጎ በማሰብ አለመሆኑን ተግባራቸው ይመሰክራል፡፡ እንደ እውነቱ ከሆነ የማንኛውም ሕዝብ ፍላጎት ግልጽ ነው፡፡ ሁሉም የሚፈልገው ሰላምን፣ ፍትሕን፣ እኩልነትን፣ ብልጽግናንና በተከበረች አገር በአንድነት መኖርን ነው፡፡ የከንቱ ሥልጣን ፍላጎትና የጥላቻ ልብ ካላቸው ዘረኛ ግለሰቦችና ቡድኖች በስተቀር፣ ማንኛውም ኅብረተሰብ አንድነትን እንጂ መበታተንን ወይም መለያየትን አይፈልግም፡፡ ‹‹አንድነት›› ማለት ‹‹አንድ ዓይነት›› ማለት ሳይሆን ‹‹አንድነት በብዝኃነት›› (Unity with Diversity) ማለት ነው፡፡ 

ሕዝብን ከሕዝብ በማጋጨትና የተለያዩ እኩይ ተግባሮችን በመፈጸም ለውጡን ለማጨናገፍ መሞከር፣ በአገርና በሕዝብ ላይ የሚፈጸም እንደ አጥፍቶ መጥፋት የሚቆጠር ትልቅ ስህተትና በደል ነው፡፡ እስኪ ቆም ብለን በጥሞና አርቀን እናስብ እንበልና ይህ እኩይ ፍላጎት ቢሳካና ለውጡ ቢጨናገፍ ምንድነው በአገራችን ሊከሰት የሚችለው? ከመቶ ሚሊዮን በላይ ሕዝብ ያላት፣ ከ80 በላይ ቋንቋዎች የሚነገሩባትና አንዱ ዘር ከሌላው ተጋብቶና ተዋልዶ፣ በደምና ሥጋ ተዋህዶ በአንድነት የሚኖርባት ትልቅ አገር ብትፈርስ ማንም ተጠቃሚ አይሆንም፡፡ እያንዳንዱ ዜጋ ተጎጂ ነው የሚሆነው፡፡ በአንድነትና በእኩልነት መኖር ግን ለሁሉም ይበጃል እንጂ ማንንም አይጎዳም፡፡ ያለን ወቅታዊ ምርጫ ሁለት ብቻ ነው፡፡

አንደኛው የተጀመረውን ለውጥ በመደገፍ በተከበረችና በበለፀገች ትልቅ አገር ውስጥ በሰላም፣ በእኩልነት፣ በፍቅርና በአንድነት መኖርና ሉዓላዊት አገርን ለትውልድ ማሻገር ሲሆን፣ ሁለተኛው ደግሞ ለውጡን በማጨናገፍ በፈረሰች አገር (Failed State) ውስጥ በጦርነትና በረሃብ መሰቃየት ነው፡፡ በትክክል የሚያስብ ጤነኛ አዕምሮ ያለው ሰው ሁለተኛውን መንገድ ይመርጣል ብዬ አላስብም፡፡ የኢትዮጵያ አምላክና የኢትዮጵያ ሕዝብም ይህ ሁኔታ እንዲፈጠር አይፈቅዱም፡፡

ለመሆኑ በአሁኑ ወቅት በአገራችን የተከሰቱት ችግሮች መሠረታዊ መንስዔያቸው ምንድነው? ይኼንን ጥያቄ በትክክል ለመመለስና ወደ መፍትሔ ለመሄድ፣ እውነቱ ሳይሸፋፈንና ሳይድበሰበስ በግልጽ መነገር አለበት ብዬ አስባለሁ፡፡ በአሁኑ ወቅት ለተስፋፋው በዘር ላይ የተመሠረተ ፖለቲካና በተለያዩ አካባቢዎች ለሚታዩት ግጭቶችና የሕዝብ መፈናቀሎች መሠረታዊ መንስዔያቸውና ምክንያታቸው፣ ከ27 ዓመት ወዲህ በአገራችን ፖለቲከኞች የተፈጠረውና በጻፉት ሕገ መንግሥት ተደግፎ አገራችን ስትመራበት የቆየችው፣ በዓለም ብቸኛ የሆነበት የጎሳ ፌዴራሊዝም ሥርዓት (Ethnic Based Federalism) ነው፡፡ ለዚህ የጎሳ ፌዴራሊዝም መጠንሰስ ምክንያት የሆነው ደግሞ፣ በ1966 ዓ.ም. በአገራችን የተከሰተውን የፖለቲካ ለውጥ ተከትሎ፣ ‹‹የእገሌ ሕዝብ ነፃ አውጪ›› በሚል ሰበብና ስያሜ የተደራጁ፣ የሥልጣን ፍላጎትና የጥላቻ ልብ ያላቸው ዘረኛ ግልሰቦችና ቡድኖች የሚከተሉት አስተሳሰብና አካሄድ ነው፡፡ እስኪ ቆም ብልን እናስብ፣ ማንን ከማን ነው ነፃ የሚያወጡት? ተጋብቶና ተዋልዶ በአንድነት የኖረን ሕዝብ ማለያየት ወይም ማጣላት ነፃ ማውጣት አይደለም፡፡ ይልቁንም ማኮሰስና ማክሰር እንጂ፣ ለከንቱ ሥልጣን ፍላጎት ብሎ አገርንና ሕዝብን መበደልም ነው፡፡ ማንኛውም ሕዝብ አንድነትን፣ እኩልነትን፣ ሰላምንና ብልፅግናን ይሻል እንጂ መለያየትን ወይም መጣላትን አይፈልግም፡፡

አንዳንድ ጊዜ አንዳንድ የአገራችን ፖለቲከኞች ‹‹እኔ የእገሌ ሕዝብ ብሔርተኛ ነኝ›› ብለው አፋቸውን ሞልተው በይፋ በሚዲያ ሲናገሩ ስሰማ ይዘገንነኛል፡፡ አንድ ሰው እንደዚህ ሲያስብና ሲናገር፣ በሌላ አገላለጽ ዘረኛ (Racist) መሆኑንና ራሱ ከመጣበት ዘር በስተቀር ለሌላው ኢትዮጵያዊ ደንታ እንደ ሌለው ወይም ጥላቻ እንዳለው ነው የሚያሳየው፡፡ አንዳንድ የአገራችን ፖለቲከኞች ‹‹ዘር›› በማለት ፋንታ ‹‹ብሔር››፣ ‹‹ዘረኛ›› በማለት ፋንታ ‹‹ብሔርተኛ›› ሲሉ እንሰማለን፡፡ ነገር ግን ‹‹ብሔር›› ወይም “Nation” የሚባለው ቃል ትክክለኛ ትርጉሙ ‹‹አገር›› ማለት ነው፡፡ ለምሳሌ ብሔራዊ መዝሙር (National Anthem)፤ ብሔራዊ ቡድን (National Team) ይባላል፡፡ ይሁን እንጂ የጎሳ ፌዴራሊዝም ሥርዓቱን የመሠረቱት የአገራችን ፖለቲከኞች በሚከተሉት ርዕዮተ ዓለምና በጻፉት ሕገ መንግሥት፣ የአንድ አገር ሕዝብን በጎሳ ለመከፋፈል፣ ካስፈለገም ለማለያየት እንዲያመች ተደርጎ የተለየ ትርጉም ተሰጥቶት ቆይቷል፡፡

ጥላቻና ዘረኝነት ለማንም አይበጅም፣ ሁሉንም ነው የሚጎዳው ወይም የሚያጠፋው፡፡ በጥላቻና በዘረኝነት ቅስቀሳ አንድን የኅብረተሰብ ክፍል (ዘር) አነሳስቼ፣ ሥልጣን ይዤ በሰላም እኖራለሁ ማለት ከንቱ ህልም ወይም ቅዠት ነው፡፡ እዚህ ላይ ከ25 ዓመት በፊት የተከሰተውን የሩዋንዳን አስከፊ ታሪክ ማስታወስ ተገቢ ይመስለኛል፡፡ በወቅቱ አገዛዝ ላይ የነበሩት ፖለቲከኞች ባቀነባበሩት ሴራ ሕዝብን በሕዝብ ላይ በማስነሳትና አንዱ ዘር ሌላውን እንዲጨፈጭፍ በማድረግ፣ ዓለምን ያሳዘነና የአገሪቱን ታሪክ ለዘለዓለም ያጎደፈ ተግባር ፈጸሙ፡፡ ሆኖም ትንሿ የምሥራቅ አፍሪካ አገር ከሰቆቃው በኋላ ከዘረኝነት የፀዳ መሪና መንግሥት በማግኘቷ ዛሬም እንደ አገር ቆማ ቀጥላለች፡፡ የተበዳዮቹ ወገኖች ይቅርታ ሊያደርጉ ይችሉ ይሆናል፡፡ የግፉ ፈጻሚ ወገኖች ግን ለዘለዓለም ከህሊና ቁስል፣ ከኃፍረትና ከፀፀት ሊላቀቁ አይችሉም፡፡

የመፍትሔ ሐሳብ

ውድ ኢትዮጵያውያን ወገኖቼ በምንመኛት የበለፀገች ታላቅ አገር በሰላም፣ በፍትሕ፣ በእኩልነትና በአንድነት ለመኖርና የተከበረች ሉዓላዊት አገር ለትውልድ ለማስተላለፍ እንችል ዘንድ፣ እንደ አንድ ዜጋ የሚከተለውን የመፍትሔ ሐሳብ ማቅረብ እፈልጋለሁ፡፡

አንደኛ የአገራችን ፖለቲከኞችና አክቲቪስቶች ሁሉ ልባችሁን ከጥላቻ፣ ከቂምና ከዘረኝነት አፅድታችሁ፣ ፍቅርን፣ ይቅርታን፣ አንድነትንና ኢትዮጵያዊነትን ተከተሉ፡፡ ወደ ፊት እንጂ ወደ ኋላ አታስቡ፡፡

ሁለተኛ የአገራችን ፖለቲከኞች ሁሉ የግል ሥልጣን ፍላጎታችሁን ትታችሁ፣ ለራሳችሁ ዘር ብቻ ሳይሆን፣ ለመላው የኢትዮጵያ ሕዝብ ሰላምን፣ ፍትሕን፣ እኩልነትን፣ አንድነትንና ብልጽግናን ለማስፈን ተባበሩ፡፡

ሦስተኛ በተለያዩ ሚዲያዎች የጥላቻና የዘረኝነት ወሬ በማሰራጨት በሕዝብ መሀል ጥላቻና ግጭት ለመፍጠር የምትጥሩ ሰዎች፣ ከዚህ እኩይ ተግባራችሁ ተላቃችሁ ህሊናችሁን ለማይወቅስ በጎ ተግባር፣ ለአገር ሰላምና አንድነት ሥሩ፡፡

አራተኛ የአምላክ በጎ ፈቃድ ሆኖ በአሁኑ ወቅት ለአገራችን ኢትዮጵያ ትልቅ ራዕይ ያላቸው፣ ኢትዮጵያንና ሕዝቧን የሚወዱ፣ ከፍተኛ ችሎታና ብቃት ያላቸው፣ ዘረኝነትን፣ ሌብነትና ግፍን የሚያወግዙ፣ ፍትሕን፣ ፍቅርንና ይቅርታን የሚከተሉና ለአገር አንድነትንና ብልፅግና የሚተጉ የለውጥ መሪዎች አግኝተናል፡፡ በወቅታዊው ወጀብና ፈተና ውስጥ ሆነው እንኳን፣ አገርን ለማሳደግ የሚያደርጉትን ከፍተኛ ጥረት እያየን ነው፡፡ ስለዚህ ዜጎች ሁሉ ከመሪዎቻችን ጎን ሆነን ለተጀመረው አገራዊ ለውጥ መሳካት የበኩላችንን አስተዋጽኦ እንድርግ፡፡

ፈጣሪ ኢትዮጵያንና ሕዝቧን ይባርክ፡፡

   ከአዘጋጁ፡- ጽሑፉ የጸሐፊውን አመለካከት ብቻ የሚያንፀባርቅ ሲሆን፣ ጸሐፊውን በኢሜይል አድራሻቸው [email protected] ማግኘት ይቻላል፡፡

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

አስጨናቂው የኑሮ ውድነት ወዴት እያመራ ነው?

ከቅርብ ጊዜያት ወዲህ የኑሮ ውድነት እንደ አገር ከባድ ፈተና...

‹‹ወላድ ላማቸውን አርደው ከደኸዩት ወንድማማቾች›› ሁሉም ይማር

በንጉሥ ወዳጅነው   የዕለቱን ጽሑፍ በአንድ አንጋፋ አባት ወግ ልጀምር፡፡ ‹‹የአንድ...

የመጋቢቱ ለውጥና ፈተናዎቹ

በታደሰ ሻንቆ ሀ) ችኩሎችና ገታሮች፣ መፈናቀልና ሞትን ያነገሡበት ጊዜ እላይ ...

ጥራት ያለው አገልግሎት መስጠት የሚያስችል ሥርዓት ሳይዘረጉ አገልግሎት ለመስጠት መነሳት ስህተት ነው!

በተለያዩ የመንግሥትና የግል ተቋማት ውስጥ ተገልጋዮች በከፈሉት ልክ የሚፈልጉትን...