Friday, April 19, 2024
- ማስታወቂያ -
- ማስታወቂያ -

ደቡብ ኮሪያ ለኤሌክትሪክ ኃይል ግንባታና ለግብርና መስክ የሚውል የ7.6 ቢሊዮን ብር ብድር ፈቀደች

ተዛማጅ ፅሁፎች

እስካሁንም ከ570 ሚሊዮን ዶላር ያላነሰ የገንዘብ ድጋፍ ማድረጓን አስታውቃለች

የደቡብ ኮሪያ ሪፐብሊክ መንግሥት በኢትዮጵያ ለሚካሄዱ የኤሌክትሪክ ኃይል ማሰራጫ መስመሮችና ለግብርናው ዘርፍ በተለይም ለመስኖ እርሻ ሥራ ድጋፍ የሚውል የ264 ሚሊዮን ዶላር ወይም የ7.6 ቢሊዮን ብር የረዥም ጊዜ ብድር ፈቀደ፡፡

የረዥም ጊዜ ብድሩን የሰጠው የኮሪያው የወጪና ገቢ ንግድ ባንክ ወይም የኤግዚም ባንክ ከፍተኛ ዋና ዳይሬክተር ሚስተር ሺን ዲዮግ-ያንግና የገንዘብ ሚኒስትሩ አቶ አህመድ ሺዴ በገንዘብ ሚኒስቴር ጽሕፈት ቤት ሰኞ፣ ሚያዝያ 14 ቀን 2011 ዓ.ም. ተፈራርመዋል፡፡ ምንም እንኳ ብድሩ በረዥም ጊዜ የሚከፈልና አነስተኛ ወለድ የሚታሰብበት (ኮንሴሽናል) ብድር ነው ይባል እንጂ፣ በምን ያህል ዓመታት ውስጥ ተከፍሎ እንደሚጠናቀቅና ምን ያህል ወለድ እንደሚታሰብበት በስምምነቱ ወቅት አልተጠቀሰም፡፡

በብድር ስምምነቱ ወቅት የኤግዚም ባንክ ዋና ዳይሬክተር እንደገለጹት፣ የኮሪያ መንግሥት በኤግዚም ባንክ በኩል እ.ኤ.አ. ከ2011 ጀምሮ በኢትዮጵያ ለሚካሄዱ ፕሮጀክቶች ድጋፍ በማደረግ ላይ ይገኛል፡፡ ጅማሮውን ያደረገውም የኤሌክትሪክ ኃይል ፕሮጀክትን በገንዘብ በመደገፍ እንደነበርም አስታውሰዋል፡፡ እስካሁንም ከ570 ሚሊዮን ዶላር ያላነሰ ድጋፍ ለኢትዮጵያ መደረጉን ገልጸዋል፡፡ ገንዘቡ በአብዛኛው በኤሌክትሪክ ኃይልና በትራንስፖርት መስክ ለሚከናወኑ ፕሮጀክቶች ስለመዋሉም አስታውቀዋል፡፡

በሰኞው የፊርማ ሥነ ሥርዓት ወቅት እንደተብራራውም፣ በኃይል ማሰራጫ መስክ ለሦስት ዋና ዋና ሥራዎች ለአምስት ዓመታት የሚውል የ170 ሚሊዮን ዶላር ብድር መፈቀዱን የገንዘብ ሚኒስቴር አስታውቋል፡፡ በዚህም መሠረት፣ በደቡባዊው የአገራዊ ኃይል ማስፋፊያ ፕሮጀክት አማካይነት ለሚከናወኑ ሥራዎች ገንዘቡ እንዲውል ይደረጋል፡፡ በዚህም የሰሜን ምዕራብ ኢትዮጵያ ክፍል በቂ የኤሌክትሪክ ኃይል አቅርቦት እንዲያገኝ ያስችላል ተብሎ ይጠበቃል፡፡ በሁለተኛ ደረጃ ለኦሞ ኩራዝ ስኳር ፋብሪካ ያልተቋረጠና የማይዋዥቅ የኃይል አቅርቦት እንዲዘረጋ ለማስቻል ብሎም ወደ ፊት ለሚገነባው ለአርባ ምንጭ ኢንዱስትሪ ፓርክና በአካባቢው ለሚኖሩ ዜጎች ኃይል ማቅረብ እንዲችል ለማድረግ ሲሆን፣ በሦስተኛ ደረጃ በደቡብ ክልል በወጪ ንግድ ዘርፍ ለተሰማሩ አምራቾች እንዲውል ስምምነት ተደርጓል፡፡

በደቡብ ክልል ለሚከናወኑ ሥራዎች ከሚውለው የ170 ሚሊዮን ዶላር ባሻገር፣ በኦሮሚያ ክልል ለሚከናወኑ የከርሰ ምድር የመስኖ እርሻ ሥራዎችና ለሌሎችም የሚውል የ94 ሚሊዮን ዶላር ብድር ስምምነት ተፈርሟል፡፡ ይህ ብድር ከሚያካትታቸው ሥራዎች ውስጥም የግብርና ምርትን እንዲጨምር ማስቻል፣ ቋሚ የመስኖ እርሻ መሠረተ ልማትን መዘርጋት ብሎም የገበሬዎችን የቤተሰብ ገቢ ማሻሻልና በአደኣ በቾ ውስጥ ለእርሻ ተስማሚ የሆነውን አካባቢ በመጠቀም በዚያ አካባቢ የሚታየውን ፍጹም ድህነት ማቃለል ከብድር ስምምነቱ ውስጥ ከተካተቱ ጉዳዮች መካከል ይገኙበታል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች