Sunday, September 25, 2022
ሌሎች ዓምዶች
    - Advertisment -
    - Advertisment -

    ፖለቲከኞችና የመብት ተሟጋቾች ራሳቸውን ይፈትሹ!

    ይህንን ርዕሰ ጉዳይ የምናነሳው፣ ሰሞኑን ከዚህ ዓለም በሞት የተለዩትን የቀድሞውን የኤፌዴሪ ፕሬዚዳንት ነጋሶ ጊዳዳ (ዶ/ር) እንደ ምሳሌ በማውሳት ነው፡፡ እሳቸው በ1993 ዓ.ም. በሕወሓት ውስጥ በተከሰተው መሰንጠቅ ምክንያት ከዚህ ዓለም በሞት ከተለዩት ጠቅላይ ሚኒስትር መለስ ዜናዊ ጋር በተፈጠረ አለመግባባት፣ ኃላፊነታቸውን ካስረከቡ በኋላ የደረሰባቸው ፈተና አይዘነጋም፡፡ በኢትዮጵያ ፖለቲካ ውስጥ አደገኛ የሚባለው ጥላቻና ቂም በቀል ሰለባ ከሆኑት ኢትዮጵያውያን መሀል አንዱ፣ እሳቸው ነበሩ ቢባል ማጋነን አይሆንም፡፡ የፕሬዚዳንትነቱን መንበር ለተተኪው ከለቀቁ በኋላ፣ ሊያገኙዋቸው ይገቡ የነበሩ ጥቅማ ጥቅሞች በሙሉ እንዲሻሩባቸው ተደርገው ከባዱን የመከራ ገፈት ቀምሰዋል፡፡ ለሚያምኑበት ዓላማ በፅናት በመቆማቸው ምክንያት የታላቅ ሰብዕና ባለቤት በመሆን የሕዝብ ፍቅር አግኝተዋል፡፡

    ያንን ሁሉ መከራ በፅናት ተሻግረው ያተረፉት ትልቅ ነገር ቢኖር የሕዝብ ክብርና ፍቅር ነበር፡፡ ከግል ጥቅምና ሥልጣን በላይ ለአገር በማሰብ ለህሊናቸው ያደሩ ታላቅ ሰው ነበሩ፡፡ በጣም ትሁት፣ ቅን፣ ታማኝና ለእውነት የቆሙ ሰው ስለነበሩ እንደተከበሩ አልፈዋል፡፡ አብረዋቸው የሠሩም ይመሰክሩላቸዋል፡፡ እንደ ነጋሶ ጊዳዳ (ዶ/ር) ለህሊና የተገዛ ሰብዕና ተላብሶ ማለፍን የሚያህል መታደል ማግኘት ከባድ ነው፡፡ እሳቸው ላመኑበት ዓላማ ሲሉ ሥልጣንን፣ ክብርን፣ ዝናንና ጥቅማ ጥቅምን ንቀው አልፈዋል፡፡ እሳቸው ከዚህ ዓለም በሞት ቢለዩም፣ ታሪካቸውና ሥራቸው ግን ከትውልድ ወደ ትውልድ እየተሸጋገረ ይታወሳሉ፡፡ ላመኑበት ዓለማ በፅናት የቆሙ ታላቅ ኢትዮጵያዊ ስለነበሩም ዝንተ ዓለም ይመሠገናሉ፡፡ ለቤተሰቦቻቸው፣ ለወዳጅ ዘመዶቻቸውና ለመላው የኢትዮጵያ ሕዝብ መፅናናትን እንመኛለን፡፡

    ኢትዮጵያ በታሪኳ እጅግ የገዘፈ የሰብዕና ባለቤት የሆኑ ልጆቿን በተለያዩ ዘመናት ዓይታለች፡፡ በጦር ሜዳ ሕይወታቸውን ከገበሩላት፣ ደማቸውን ካፈሰሱላትና አጥንታቸውን ከከሰከሱላት በተጨማሪ፣ በተለያዩ መስኮች ስሟን ያስጠሩ ጀግኖች ልጆች ነበሯት፡፡ ዛሬም እንደሚኖሩ ምንም ጥርጥር የለም፡፡ በዚህ ዘመን ኢትዮጵያ ከልጆቿ ብዙ ነገሮች ትፈልጋለች፡፡ አስተማማኝ ሰላም፣ በሕግ የበላይነት ሥር የተመሠረተ ዴሞክራሲያዊ ሥርዓትና ፍትሐዊ የሆነ ኢኮኖሚያዊ ዕድገት ይጠቀሳሉ፡፡ እነዚህን መሻቶች ዕውን ለማድረግ ግን በተለይ ፖለቲከኞችና ለመብት እንሟገታለን የሚሉ ወገኖች ሰከን ማለት አለባቸው፡፡ ይህ ስክነት የሚያስፈልገው አገርን ወደ ቀውስ ከሚያንደረድሩ አላስፈላጊ ድርጊቶች ለመታቀብ ብቻ ሳይሆን፣ በሁሉም ኢትዮጵያዊያን ተሳትፎና ይሁንታ ሰላሟና ደኅንነቷ አስተማማኝ የሆነ አገር ለመገንባት ጭምር ነው፡፡ ከምንም ነገር በላይ አገርን የማያስቀድም የፖለቲካ ዓላማም ሆነ አጀንዳ እንዳይኖር የሚታገሉ ፖለቲከኞችና የመብት ተሟጋቾች ያስፈልጋሉ፡፡ ለዚህ ደግሞ ሀቀኝነት፣ ቅንነትና ንፅህና ያስፈልጋል፡፡ ይኼንን ሳያሟሉ በሕዝብ ስም መነገድ ቁማርተኝነት ነው፡፡ 

    ፖለቲከኞችና የመብት ተሟጋቾች ነን የሚሉ ወገኖች ለአገር የሚጠቅም ሥራ ካላከናወኑ፣ የዓላማ ሰው ሆነው ሰብዕናቸውን መገንባት ካልቻሉና የሚወክሉትን ማኅበረሰብም ሆነ የመላውን ሕዝብ አመኔታና ክብር ካላገኙ አደባባይ በኩራት ለመውጣት ይቸግራቸዋል፡፡ ለትውልድ የሚተላለፍ አርዓያነት መገንባት ሲገባቸው፣ ሕዝቡ ውስጥ ግጭት እየቀሰቀሱ የአገርን ህልውና የሚፈታተኑ ከሆነ ትውልድና ታሪክ ይጠይቋቸዋል፡፡ ለጥፋት ብቻ የሚዘረጉ እጆች አገርን የሚጎዱ ቢሆንም፣ ለጊዜው ነው እንጂ በሕዝብ ዘንድ ጥላቻን ነው የሚያተርፉት፡፡ ለአገሩ እጅግ ከፍተኛ የሆነ ፍቅር ያለው አስተዋዩ የኢትዮጵያ ሕዝብ ክብር የሚሰጠው፣ ለዓላማ ኖረው የሚያስከብሩትን ብቻ ነው፡፡ ለግልና ለቡድን ጥቅም እየተስገበገቡ ራሳቸውንና አገርን የሚያዋርዱትን ይፀየፋቸዋል፡፡ ፖለቲከኞችና የመብት ተሟጓቾች በዚህ ደረጃ ራሳቸውን ካልፈተሹ የሚያልሙት ሁሉ የእምቧይ ካብ ከመሆን አያልፍም፡፡

    አገር ከትናንት የተሻለ ሥርዓት ገንብታ ለዜጎቿ በሙሉ የምትመች መሆን የምትችለው፣ መጀመርያ በህልውናዋ ላይ መቆመር ሲያበቃ ነው፡፡ በመቀጠል ጠንካራ ተቋማትን በመገንባት፣ በሕግ የበላይነት የሚያምንና ተግባራዊ የሚያደርግ መንግሥታዊ ሥርዓት መመሥረት ሲቻል ነው፡፡ ከዚያ በኋላ ግን ፖለቲካዊ፣ ኢኮኖሚያዊና ማኅበራዊ ጉዳዮች መልክ እየያዙ መጠናከር ሲቻል፣ ኢትዮጵያ በአፍሪካ አንፀባራቂ አገር መሆን ትችላለች፡፡ ለዚህ ሁሉ ግን ከራስ በፊት ለአገር የሚሉ ፖለቲከኞችና የመብት ተሟጋቾች ነን የሚሉ ወገኖች መኖር አለባቸው፡፡ በአደባባይ ሰላምን እየደሰኮሩ ውስጥ ውስጡን ሴራ መጎንጎን ለአገር ጥፋት እንጂ ፋይዳ የለውም፡፡ በዚህ ዓይነት ድርጊት የተካኑ እኩዮች በሚፈጥሩት ችግር ከሦስት ሚሊዮን በላይ ወገኖች መፈናቀላቸውና በሺዎች የሚቆጠሩ ንፁኃን መገደላቸው ከቶውንም ሊረሳ አይገባም፡፡ በግጭት ነጋዴዎች አማካይነት እየደረሰ ያለው ፈተና የአገርን ካስማና ማገር እየነቃቀለ መሆኑን መዘንጋትም ተገቢ አይደለም፡፡ በእኩይ መንፈስ የተሞሉ ግለሰቦችና ቡድኖች ለአገራቸው የሚለፉ ትጉሃን ወገኖችን ማደናቀፍና ተስፋ ማስቆረጥ የዘወትር ተግባራቸው እንደሆነ፣ በማኅበራዊ ሚዲያ ውስጥ የተሰገሰጉትን ማየት ብቻ በቂ ነው፡፡ በእንዲህ ዓይነት ዕኩይ ድርጊት ውስጥ የተሰማሩ ኃይሎች ራሳቸውን ቢፈትሹ ይመረጣል፡፡ ምክንያቱም ድርጊታቸው ያሳፍራልና፡፡

    ለአሁኑ ወጣት ትውልድም ሆነ ለመጪው ትውልድ አርዓያ ለመሆን የሚያስችል ሰብዕና ያስፈልጋል፡፡ ይህ ሰብዕና ከትምህርት፣ ከልምድና ከክህሎት በተጨማሪ ትህትናን፣ ቅንነትንና ታማኝነትን ማካተት ይኖርበታል፡፡ በሥነ ምግባር የዳበረ ኅብረተሰብ የክፋት ድርጊቶችን የሚፀየፍ በመሆኑ ለሴራ፣ ለጥላቻና ለቂም በቀል ፖለቲካ አይንበረከክም፡፡ ላመኑበት ዓላማ በፅናት የሚቆሙ ጀግኖችን የሚያፈራ ከመሆኑም በላይ፣ ማናቸውንም ፈተናዎች ለመቋቋም የሚያስችል ጠንካራ ሥነ ልቦና ይኖረዋል፡፡ የኢትዮጵያ ሕዝብ ደግሞ በዚህ አይታማም፡፡ ጥሩ መሪ ካገኘ አስደማሚ ገድሎችን እንደሚያከናውን ታላቁ የዓድዋ ጦርነት ድል ታላቅ ምሳሌ ነው፡፡ ለመጀመርያ ጊዜ ጥቁር ሕዝብ በአውሮፓ ኮሎኒያሊስት ኃይል ላይ የተጎናፀፈው ይህ ድንቅና ታላቅ ድል፣ የኢትዮጵያን ሕዝብ ወደር የለሽ የአገር ፍቅር ስሜት አመላካች ነው፡፡ ይህንን ጨዋ፣ ምሥጉን፣ ታታሪና አስተዋይ ሕዝብ በአግባቡ መርቶ ታላቅነትን መጎናፀፍ እየተቻለ አሳፋሪ ድርጊት ውስጥ መገኘት አስነዋሪ ነው፡፡ ፖለቲከኞች ይህንን መርህ ጥሰው ያልተገባ ድርጊት ውስጥ ሲገኙ፣ የመብት ተሟጋቾች ነን የሚሉ ከአንድነት ይልቅ መከፋፈልን ሲሰብኩ ሊበቃችሁ ይገባል መባል አለበት፡፡ በአገር ህልውና ቀልድ ስለሌለ ራሳቸውን መፈተሽ አለባቸው!

    በብዛት የተነበቡ ፅሁፎች

    የአውሮፓ ኅብረት ተወካይ በተመድ ጉባዔ ‹‹የትግራይ መንግሥት›› በማለት ላደረጉት ንግግር ማስተካከያ እንዲደረግ ኢትዮጵያ ጠየቀች

    በስዊዘርላንድ ጄኔቭ እየተካሄደ በሚገኘው 51ኛው የተባበሩት መንግሥታት ድርጅት (ተመድ)...

    መንግሥት የሥራ ግብር ምጣኔን እንዲቀንስ ተጠየቀ

    የኢትዮጵያ ሠራተኛ ማኅበራት ኮንፌዴሬሽን (ኢሠማኮ) መንግሥት የሠራተኛውን የኑሮ ጫና...

    የመንግሥት ዩኒቨርሲቲዎች የድጎማ በጀት ለፖለቲካ ሥራ ማስፈጸሚያ እንደሚውል የሚያሳይ ሪፖርት ቀረበ

    ለመንግሥት ዩኒቨርሲቲዎች የሚደረግ የበጀት ድጎማ ከመደበኛው ሥራ ይልቅ ከዋናው...

    ብሔራዊ ባንክ ለፋይናንስ ተቋማት ለሚሰጠው ፈቃድና አገልግሎት እስከ አንድ ሚሊዮን ብር ሊያስከፍል ነው

    የኢትዮጵያ ብሔራዊ ባንክ ለአገሪቱ የፋይናንስ ተቋማት ለሚሰጠው የፈቃድ፣ የብቃት...
    - Advertisment -

    ትኩስ ፅሁፎች

    በኢትዮጵያ ላይ የቀጠለው የምዕራባውያን ጣልቃ ገብነት

    ምዕራባውያን አገሮች በኢትዮጵያ ላይ ጠንካራ ጫና ማሳደራቸውን ቀጥለዋል፡፡ በዲፕሎማሲም...

    የመንግሥት ዩኒቨርሲቲዎች የድጎማ በጀት ለፖለቲካ ሥራ ማስፈጸሚያ እንደሚውል የሚያሳይ ሪፖርት ቀረበ

    ለመንግሥት ዩኒቨርሲቲዎች የሚደረግ የበጀት ድጎማ ከመደበኛው ሥራ ይልቅ ከዋናው...

    መንግሥት የሥራ ግብር ምጣኔን እንዲቀንስ ተጠየቀ

    የኢትዮጵያ ሠራተኛ ማኅበራት ኮንፌዴሬሽን (ኢሠማኮ) መንግሥት የሠራተኛውን የኑሮ ጫና...

    የአዲስ አበባ ንግድና ዘርፍ ማኅበራት ምክር ቤት የአመራሮች ምርጫና ቀጣይ ዕቅዶቹ

    የአዲስ አበባ ንግድና ዘርፍ ማኅበራት ምክር ቤት ሲጠበቅ የነበረውን...

    በ15 ቢሊዮን ብር የተመዘገበ ካፒታል የማይክሮ ፋይናንስ አገልግሎቱን ያሻገረው ስንቄ ባንክ ሥራ ጀመረ

    ከማክሮ ፋይናንስ ተቋምነት ወደ ባንክ አገልግሎት ከተሸጋገሩ አምስት የማክሮ...
    spot_img

    ተዛማጅ ፅሁፎች

    ብልሹ አሠራሮች እንዲወገዱ ሕግና ሥርዓት ይከበር!

    በኢትዮጵያ ምድር ጦርነትን ለአንዴና ለመጨረሻ ጊዜ አጠናቆ ሙሉ ለሙሉ ፊትን ወደ ልማት ለማዞር ያለው ፍላጎት አሁንም ፈተና እየገጠመው ነው፡፡ ኢትዮጵያ አዲሱ ዓመት ሲብት በሙሉ...

    የግብይት ሥርዓቱ የሕገወጦች መፈንጫ አይሁን!

    በጥቂቶች ስግብግብነት ብዙኃኑ ሕዝብ እንዳይጎዳ ተገቢ ሞራላዊ፣ ሕጋዊና ፖለቲካዊ ዕርምጃዎች ሲወሰዱ ድጋፍ መስጠት ይገባል፡፡ ሰሞኑን መንግሥት በኤሌክትሪክ የሚሠሩ ተሽከርካሪዎች ሱር ታክስና ኤክሳይስ ታክስን ጨምሮ፣...

    የኢኮኖሚው ጉዞ ከድጡ ወደ ማጡ እንዳይሆን!

    ጦርነት ውስጥ ያለች አገር ኢኮኖሚ ጤንነት እንደማይሰማው ለማንም ግልጽ ቢሆንም፣ ከጦርነቱ በተጨማሪ በየዕለቱ ገበያው ውስጥ የሚስተዋለው የዋጋ ጭማሪ ግን አስደንጋጭ እየሆነ ነው፡፡ የብር የመግዛት...