Wednesday, May 22, 2024
- Advertisment -
- Advertisment -

ክቡር ሚኒስትሩ ከሚስታቸው ጋር እያወሩ ነው

[ክቡር ሚኒስትሩ መኪናቸው ውስጥ ገብተው ወደ ቢሮ ሊሄዱ ነው]

  • ወደ ቢሮ እንሂድ፡፡
  • እ…
  • ወደ ቢሮ ውሰደኝ፡፡
  • እ…
  • ምን ሆነሃል?
  • እ…
  • ተኝተሃል እንዴ?
  • ምን አሉኝ ክቡር ሚኒስትር?
  • ማታ የት ነው የነበርከው?
  • ቤቴ ነዋ ክቡር ሚኒስትር፡፡
  • ታዲያ መኪና ውስጥ ለምን ትተኛለህ?
  • እርቦኝ ነው ክቡር ሚኒስትር፡፡
  • ምን ማለት ነው?
  • አልገባዎትም ክቡር ሚኒስትር?
  • ምን እያልክ ነው?
  • ክቡር ሚኒስትር እኛ ቤት መብራት ብቻ ሳይሆን ምግብም በፈረቃ ነው፡፡
  • እንዴት ማለት?
  • ይኸው ቁርስ ከበላሁ ሦስተኛ ቀኔ ነው፡፡
  • አሁን ፆም አለ እንዴ?
  • ፆሙ ከገባ እኮ ቆየ፡፡
  • የምን ፆም ነው፡፡
  • መንግሥት ያዘዘው ነዋ፡፡
  • አንተ መንግሥትና ሃይማኖት እንደሚለያዩ አታውቅም እንዴ?
  • ወረቀት ላይ ነዋ የሚለያዩት ክቡር ሚኒስትር፡፡
  • አልገባኝም፡፡
  • አሁን እኮ የአንድ ሳንቲም ሁለት ገጽታ ሆነዋል፡፡
  • ምን?
  • ክቡር ሚኒስትር የአገራችን ፖለቲካ እያስጠላ መጥቷል፡፡
  • እንዴት?
  • ሁሉም ቦታ የፖለቲከኛ መድረክ ሆኗል፡፡
  • እ…
  • የፖለቲካ መሪዎቻችን የቤተ ክርስቲያን ቆብና ካባ ለብሰው ጳጳስ መምሰላቸው ሲያስገርመን ነበር፡፡
  • ምን አልከኝ?
  • እሱ አልበቃ ብሏቸው መስጊድም ገብተው ኢማም መሆን ሲያምራቸው ተመልክተናል፡፡
  • ያው መቻቻልን ለማስተማር እኮ ነው፡፡
  • ክቡር ሚኒስትር ሃይማኖትና መንግሥት የተለያዩ ናቸው አላሉኝም?
  • እሱማ ትክክል ነህ፡፡
  • ስለዚህ መንግሥት ድንበር ዘሎ እየገባ ነው፡፡
  • የት ነው የገባው?
  • ፈንጂ ወረዳ፡፡
  • ፖለቲከኛ ሆነሃል ልበል?
  • ስነግርዎት አሁን ፖለቲካ ያልገባበት የት አለ ብለው ነው?
  • እ…
  • ይኸው ብሎ ብሎ ስፖርታችንም ፖለቲካ ሆኗል አይደል እንዴ?
  • ምን ታደርገዋልህ?
  • ክቡር ሚኒስትር ይታሰብበት፡፡
  • ለመሆኑ መንግሥት የምን ፆም ነው ያወጀው?
  • የኑሮ ውድነት የሚባል ነዋ፡፡
  • እ…
  • ይኸው ቁርስ ዛሬ ከበላሁ በሦስተኛው ቀን ነው የሚደርሰኝ፡፡
  • ለምን?
  • በመሀል ባሉት ቀናት ሚስቴና ልጄ ናቸዋ የሚበሉት፡፡
  • ወይ ጉድ፡፡
  • ስለዚህ ዕድሜ ለመንግሥት ኑሯችንንም በፈረቃ አድርጎልናል፡፡
  • ቀልደኛ ነህ እባክህ?
  • ለነገሩ እርስዎ ምንም አይገባዎትም፡፡
  • ምኑ ነው የማይገባኝ?
  • የሕዝቡ ችግር ነዋ፡፡
  • እ…
  • ክቡር ሚኒስትር ችግሩ እንዲገባችሁ አንዳንዴ ምን እንደምመኝ ያውቃሉ?
  • ምንድነው የምትመኘው?
  • ከሕዝቡ ጋር…
  • እ…
  • ቤት እንድትቀያየሩ!

[ክቡር ሚኒስትሩ ቢሮ እንደገቡ አማካሪያቸውን አስጠሩት]

  • ፈለጉኝ ክቡር ሚኒስትር?
  • የት ነው የጠፋኸው?
  • መቼ ፈልገውኝ ያውቃሉ ክቡር ሚኒስትር?
  • ሪፖርት ካቀረብክልኝ ስንት ጊዜህ ነው?
  • ኧረ ክቡር ሚኒስትር ይተው፡፡
  • እንዴት?
  • ሪፖርት መቼ ተቋርጦብዎት ያውቃል?
  • የት አለና?
  • ይኸው ፊትዎ የተከመረው የሪፖርት መዓት ምንድነው?
  • እንዴት አላየሁትም ታዲያ?
  • ክቡር ሚኒስትር መቼ ቢሮ ይውሉና፡፡
  • እ…
  • ከባለሀብትና ከደላላ ጋር አይደል እንዴ የሚውሉት?
  • ምን አልከኝ?
  • ለማንኛውም ምን ፈልገው ነው?
  • አገሪቱ እንዴት ነች?
  • አገሪቱማ ታማለች፡፡
  • እንዴት?
  • ክቡር ሚኒስትር ሕዝቡ ከፍተኛ ምሬት ውስጥ ነው፡፡
  • እኮ ለምን?
  • ክቡር ሚኒስትር የኑሮ ውድነቱ ከአቅሙ በላይ ሆኖበታል፡፡
  • እኛ እኮ ፖለቲካው ላይ ስናተኩር ኢኮኖሚው ከእጃችን እያፈተለከ  ነው፡፡
  • ክቡር ሚኒስትር በኋላ ውኃ ቢወቅጡት እምቦጭ እንዳይሆን መጠንቀቅ ያስፈልጋል፡፡
  • እንዴት?
  • ፖለቲካው ያለ ኢኮኖሚው እንዲሁ ድካም ነዋ፡፡
  • ምን ይደረግ ታዲያ?
  • መንግሥት ገበያውን ማረጋጋት አለበት፡፡
  • እኮ በምን?
  • ክቡር ሚኒስትር የዋጋ ንረቱ እኮ ሰው ሠራሽ ነው፡፡
  • ሰው ሠራሽ ስትል?
  • በቃ ስግብግብ ነጋዴዎች ያላግባብ ለመክበር ብለው ሕዝቡ ላይ ዋጋ እየጨመሩበት ነው፡፡
  • ታዲያ ነፃ ገበያ ብለን ምን ይደረግ?
  • ክቡር ሚኒስትር ነፃ ገበያም ቢሆን ሕገወጥ ድርጊቶችን መንግሥት ሊያርም ይገባል፡፡
  • እሱስ ልክ ነህ፡፡
  • የዋጋ ንረቱ የተከሰተው ነጋዴዎች ያላግባብ ዕቃ እየደበቁ ስለሆነ ነው፡፡
  • የት ነው የሚደብቁት?
  • መጋዘናቸው ውስጥ ነዋ፡፡
  • እነዚህ ላይማ ዕርምጃ መውሰድ ነዋ፡፡
  • ምን ዓይነት ዕርምጃ?
  • ማሸግ ነዋ፡፡
  • ምን ብለን?
  • የለውጡ አደናቃፊዎች!

[ክቡር ሚኒስትሩ አንድ ነጋዴ ጋ ደወሉ]

  • ሰላም ክቡር ሚኒስትር፡፡
  • ሰላም ይንሳህ፡፡
  • ምነው ክቡር ሚኒስትር?
  • አገር ተበጥብጦ አንተ በሰላም መኖር የምትችል ይመስልሃል?
  • ምን እያሉ ነው ክቡር ሚኒስትር?
  • አገር ለምን ትበጠብጣለህ?
  • ክቡር ሚኒስትር ተሳስተው ደውለው ነው?
  • አልተሳሳትኩም፡፡
  • ምናልባት አክቲቪስት ጋ የደወሉ መስሎዎት ከሆነ ብዬ ነው?
  • ከእናንተማ አክቲቪስቶቹ ይሻላሉ፡፡
  • እንዴት?
  • እነሱ ቢያንስ ሕዝቡን የሚበጠብጡት በወሬ ነው፡፡
  • እኛስ?
  • እናንተማ በሆዱ ነው የመጣችሁበት፡፡
  • እ…
  • ስማ የምታደርጉትን ሁሉንም ነገር እናውቃለን፡፡
  • ተረጋጉ እንጂ ክቡር ሚኒስትር፡፡
  • እናንተ አገር እየበጠበጣችሁ እንዴት እንረጋጋ?
  • ምን አድርገን ነው የበጠበጥነው?
  • ይኸው አላግባብ ዋጋ ሕዝቡ ላይ እየጨመራችሁ ነዋ፡፡
  • ክቡር ሚኒስትር አገሪቱ የነፃ ገበያ መርህ እኮ ነው የምትከተለው፡፡
  • ቢሆንስ ታዲያ?
  • ስለዚህ ሕዝቡ ከፈለገ ይገዛል ካልፈለገ ይተዋላ፡፡
  • እንደዚህ ዓይነት ቀልድ ለማንም አያዋጣም፡፡
  • ምን እያሉ ነው ክቡር ሚኒስትር?
  • እዚህ ያደረሳችሁ የእኛ ሥርዓት መሆኑን ረሳኸው እንዴ?
  • እሱ እንኳን እዚህ የደረስነው በቀድሞው ሥርዓት ነው፡፡
  • አሃ አሁን ይኼ በቀል መሆኑ ነው?
  • የምን በቀል?
  • የለውጡ አደናቃፊ መሆንህን በሚገባ አውቃለሁ፡፡
  • ምንድነው የሚያወሩት ክቡር ሚኒስትር?
  • ምንም ብትመኘው ወደ ቀድሞው ሥርዓት አንመለስም፡፡
  • ክቡር ሚኒስትር ያልገባዎት ነገር ስላለ እኮ ነው፡፡
  • ምኑ ነው ያልገባኝ?
  • አሁን ዶላር ማግኘት ተስኖኝ ከብላክ ማርኬት ነው የምገዛው፡፡
  • ምን ይጠበስ ታዲያ?
  • ስለዚህ ዋጋ የጨመርኩት ስለማያዋጣኝ ነዋ፡፡
  • ስማ ዋጋማ የጨመርከው ስለማያዋጣህ ሳይሆን ሆዳም ስለሆንክ ነው፡፡
  • አይሳደቡ እንጂ፡፡
  • የሕዝቡን ሰላም በሲስተም እየበጠበጡ በሰላም መኖር አይቻልም፡፡
  • ምን ላድርግ እኔ?
  • ምን እንደምተደርግ ታውቃለህ?
  • ንገሩኝ?
  • የዕቃዎችህን ዋጋ ቀንስ፡፡
  • እሱማ አይሆንም፡፡
  • እንግዲያው ምን እንደማደርግ ታውቃለህ?
  • ምን ያደርጋሉ?
  • ትወረሳለህ!

[ክቡር ሚኒስትሩ ከሚስታቸው ጋር እያወሩ ነው]

  • ሕዝቡ ተማሯል አሉ እባክሽ?
  • በምን?
  • በኑሮ ውድነቱ ነዋ፡፡
  • እሱንማ አታንሳው፡፡
  • እንዴት?
  • የሚበላው ያጣው ስፍር ቁጥር የለውም ስልህ?
  • በጣም አሳሳቢ ነው፡፡
  • የሚበላው ያጣ ሕዝብ ደግሞ መሪውን ይበላል ተብሏል፡፡
  • እ…
  • ምን እ… ትላለህ አንድ ቀን ልትበላ ትችላለህ፡፡
  • ማን ነው የሚበላኝ?
  • ሕዝቡ፡፡
  • ነጋዴዎች ሆን ብለው ነው አሉ፡፡
  • ምን የሚያደርጉት?
  • ሕዝቡ ላይ ዋጋ የሚጨምሩት፡፡
  • እሱማ ግልጽ ነው፡፡
  • እንደዚያ ከሆነ ደግሞ እንዳልሽው ለእኛም አደጋ አለው፡፡
  • በሚገባ እንጂ፡፡
  • ስለዚህ አፋጣኝ የሆነ መፍትሔ ያስፈልገዋል፡፡
  • ምን ይደረግ ታዲያ?
  • በቃ በሕገወጥ ነጋዴዎች ላይ ዕርምጃ እንወስዳለን፡፡
  • ምን ዓይነት ዕርምጃ?
  • መውረስ ነዋ፡፡
  • ከዚያስ?
  • ከዚያማ እኛው እናከፋፍለዋለን፡፡
  • ምኑን?
  • ዕቃውን ነዋ፡፡
  • እንዴት አድርገን?
  • ራሳችን እንሆናለና፡፡
  • ምን?
  • ነጋዴ!

በብዛት የተነበቡ ፅሁፎች

- Advertisment -

ትኩስ ፅሁፎች

የማዳበሪያ አቅርቦትና ውጣ ውረዱ

በቅፅል ስሙ “The Father of Chemical Warfare” እየተባለ የሚጠራው...

የኢትዮጵያ ልማት ባንክ የትርፍ ምጣኔውን ከ70 በመቶ በላይ አሳደገ

ከሁለቱ መንግሥታዊ ባንኮች መካከል አንዱ የሆነው የኢትዮጵያ ልማት ባንክ...

ያልነቃ ህሊና!

ከሽሮሜዳ ወደ አራት ኪሎ ልንጓዝ ነው። ነቀፋ አንሶላው፣ ትችት...
spot_img

ተዛማጅ ፅሁፎች

[ክቡር ሚኒስትር በኢትዮጵያ ታምርት ንቅናቄ እንዲሳተፉ ከተለዩ ባለሀብቶች መካከል እንዱ ጋ ስልክ ደውለው በንቅናቄው ላይ እንዲሳተፉ ግብዣቸውን እያቀረቡ ነው]

መቼም ኢትዮጵያ ታምርት በሚል የተጀመረውን አገር አቀፍ ንቅናቄ ሳትሰማ አትቀርም ብዬ ተስፋ አደርጋለሁ። ልክ ነው፣ ሰምቻለሁ ክቡር ሚኒስትር። አሁን ደግሞ ንቅናቄውን ለማጠናከር ኢትዮጵያ ታምርት የሚል የታላቁ...

[ክቡር ሚኒስትሩ የቢሮ ሥራቸውን አጠናቀው ከውጭ አገር የመጣ ወንድማቸውን ለመጠየቅ ያረፈበት ገስት ሀውስ ሲደርሱ ወንድማቸው በቴሌቪዥን የሚተላለፈውን ፕሮግራም በመገረም እየተከታተለ አገኙት]

ውይ መጣህ እንዴ? እስኪ አረፍ በል፡፡ ምንድነው እንዲህ ያስደነቀህ? ተደንቄ ሳይሆን ግራ ግብት ብሎኝ ነው። ምኑ ነው ግራ ያጋባህ? የድልድይ ማስመረቅና የድልድይ ማፍረስ ነገር ነዋ። አልገባኝም? አለቃችሁ ድልድይ ሲያስመርቁ የተናገሩትን...

[ክቡር ሚኒስትሩ ከዘመዶቻቸውና ቤተሰቦቻቸው ጋር ሆነው በዓሉን በመኖሪያ ቤታቸው እያከበሩ ነው። ባለቤታቸውም ለበዓሉ የተዘጋጀውን ዳቦ ባርከው እንዲቆርሱ ለሚኒስትሩ እያቀረቡ ነው]

በል ዳቦውን ባርክና ቁረስልንና በዓሉን እናክብር? ጥሩ ወዲህ አምጪው... አዎ! በል መርቅ... ከዓመት ዓመት ያድርሰን... ኧረ በሥርዓት መርቅ ተው? ከዓመት ዓመት ያድርሰን አልኩኝ እኮ ...አልሰማሽም? ከዓመት ዓመት መድረሱ ብቻ ምን...