Monday, June 24, 2024
- Advertisement -
- Advertisement -
ማኅበራዊለቴክኒክና ሙያ ትምህርት ያለው አሉታዊ አመለካከት የዘርፉ ችግር እንዳይቀረፍ ምክንያት ሆኗል

ለቴክኒክና ሙያ ትምህርት ያለው አሉታዊ አመለካከት የዘርፉ ችግር እንዳይቀረፍ ምክንያት ሆኗል

ቀን:

በሔለን ተስፋዬ

ማኅበረሰቡ ለቴክኒክና ሙያ እንዲሁም ለዘርፉ ሙያተኛ ያለው አመለካከት ዝቅተኛ በመሆኑ ዘርፉ ሥራ አጥነትንና ሌሎች ችግሮችን እንዳይፈታ ምክንያት መሆኑን የሳይንስና ከፍተኛ ትምህርት ሚኒስትር  ሒሩት ወልደ ማርያም (ፕሮፌሰር) ተናገሩ፡፡

‹‹በክህሎት በሥነ ምግባር የታነፀ ትውልድ ለልማታችንና ለሰላማችን ዋስትና ነው›› በሚል መሪ ቃል ከሰኔ 6 እስከ ሰኔ 11 ቀን 2011 ዓ.ም. በአሠልጣኞች፣ በሠልጣኞችና በኢንተርፕራይዝ አንቀሳቃሾች መካከል ያለው የቴክኖሎጂና የክህሎት ተግባራዊ ምርምር ውድድር በማስመልክት በተዘጋጀው መድረክ የሳይንስና ከፍተኛ ፕሮፌሰር ሒሩት እንደተናገሩት፣ በኢንዱስትሪ መሪነት 700 የሚሆኑ የሙያ ዘርፎችን በማዘጋጀት የዜጎችን ፍትሐዊ ተጠቃሚነት ለማረጋገጥ በመንግሥት 670 እና በግል 1,000 የቴክኒክና ሙያ ኮሌጆች በዓመት በመደበኛ 360,000 በገበያ ተኮር አጫጭር ሥልጠና ከ600,000 በላይ ዜጎችን በማሠልጠን ለኢንዱስትሪው ባለሙያዎች ከመቅረብ ባሻገር፣ ወጣቶችና ሴቶች የራሳቸውን ኢንተርፕራይዝ በግልና በማኅበር መሥርተዋል፡፡

 ይሁን እንጂ ከተጨባጭ ዘላቂ ውጤት አኳያ ሲታይ አሁንም መፈታት ያለባቸውና ርብርብ የሚፈልጉ ጉዳዮች በርካታ ናቸው ያሉት ሚኒስትሯ፣ የዘርፉ አመራርና ፈጻሚ እንዲሁም በተጠቃሚው ኅብረተሰብ በቴክኒክና ሙያ ትምህርት ሥልጠና አስፈላጊነትና ፋይዳው ላይ ያለው ግንዛቤ የተሟላ አለመሆኑ፣ ኢንዱስትሪው ገና በማደግ ላይ የሚገኝ በመሆኑ የውጤት ተኮር ባለቤት ሆኖ መምራት አለመጀመሩ፣ ተሳትፎው አናሳ መሆኑ፣ የሙያው ተደራሽነት ዝቅተኛ መሆን ፍትሐዊነትና ጥራትን ማስጠበቅ ተፈላጊው ደረጃ ላይ አለመድረሱ በዋናነት የሚጠቀሱ ተግዳሮቶች ናቸው ብለዋል፡፡

በቴክኒክና ሙያ ትምህርትና ሥልጠና ግንዛቤን ለማስፋትና የኅብረተሰቡን ተሳትፎ ለማሳደግ ከባለድርሻ አካላትና ምሁራን ጋር መድረኩ መዘጋጀቱ ለዘርፉ ከፍተኛ ግብዓት እንደሚገኝበትም ሚኒስትሯ ገልጸዋል፡፡

የቴክኒክና ሙያ ዘርፍ ሥራ ፈላጊ ብቻ ሳይሆን ሥራ ፈጣሪ ዜጎችን የሚያፈራ ከመሆኑ ባለፈ የችግሮች መፍቻ ቁልፍ እንደሆነ ይታመናል ያሉት የፌዴራል ቴክኒክና ሙያ ትምህርት ሥልጠና ዋና ዳይሬክተር አቶ ጌታቸው ነጋሽ ናቸው፡፡

ዳይሬክተሩ እንደተናገሩት፣ ዘርፉን የሚቀላቀሉ ሠልጣኞች ቁጥር ከጊዜ ወደ ጊዜ እየተሻሻለ ቢመጣም፣ ቴክኒክና ሙያ አሁንም እንደ ሁለተኛ ምርጫ እየታየ እንደሆነ ገልጸው፣ አሉታዊውን አተያይ መቀየር ያስፈልጋል ብለዋል፡፡

በአገር አቀፍ የቴክኒክና ሙያ ትምህርት ላይ ያተኮረው ሲምፖዚየምና ኤግዚቢሽን ሁሉም ክልሎችና ከተማ መስተዳድሮች እንዲሁም አነስተኛ ኢንተርፕራይዞች ተሳትፈዋል፡፡

በክህሎት ውድድር ዘጠኝ የተለያዩ የሙያ መስኮች 72 አሠልጣኞችና 54 ሠልጣኞች የተሳተፉ ሲሆን፣ በቴክኖሎጂ ውድድር በክልል በተካሄዱ ውድድሮች አንደኛ የወጡ 18 ቴክኖሎጂዎች ለውድድር ቀርበዋል፡፡ ከዚህ ውስጥ ዘጠኙ በአሠልጣኞች፣ አምስቱ በሠልጣኞች፣ አራቱ ደግሞ በኢንተርፕራይዝ አንቀሳቃሾች የቀረቡ ናቸው፡፡

ከተግባራዊ ጥናትና ምርምር አኳያ ዘጠኝ አሠልጣኞች የጥናትና ምርምር ሥራዎቻቸውን በማቅረብ በዓውደ ርዕዩ በአጠቃላይ 127 ቴክኖሎጂዎች ለዕይታ ቀርበዋል፡፡ አሸናፊ ተወዳዳሪዎችም ተሸልመዋል፡፡

ተሸላሚዎች የተወዳዳሩበት የክህሎት ዓይነት ኢንስትሩመንቴሽንና ኮንትሮል ሰርቢስ ዘርፍ አብርሃም ሲሳይ፣ ዮሐንስ ተክለ ማርያም፣ አብዱልፈታ አብዱረህማን ከአማራ፣ ከትግራይ ክልልና ከድሬዳዋ ከአንድ እስከ ሦስተኛ የወጡ ሲሆን፣ በቢውልዲንግ ኤሌክትሪክ ኢንስታሌሽን ደግሞ አማኑኤል ማሙሽ፣ ሀብታሙ የሽጥላ፣ ዳዊት ካሳሁን ከኦሮሚያ፣ ከደቡብና ከቤኒሻንጉል ክልል እንዲሁም በእንጨት ሥራ (Furniture Making) ፈቃዱ ኃይሌ፣ ሀብታሙ አበራ፣ ብርሃኔ ኪሮስ ከኦሮሚያ፣  ከደቡብና ከትግራይ ክልል የወርቅ፣ የብርና የነሐስ እንዲሁም 13,000፣ 11,000 እና 9,000 ብር በተከታታይና ሰርተፍኬት ከተበረከተላቸው ሠልጣኞች መካከል ይገኙበታል፡፡

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

አስጨናቂው የኑሮ ውድነት ወዴት እያመራ ነው?

ከቅርብ ጊዜያት ወዲህ የኑሮ ውድነት እንደ አገር ከባድ ፈተና...

‹‹ወላድ ላማቸውን አርደው ከደኸዩት ወንድማማቾች›› ሁሉም ይማር

በንጉሥ ወዳጅነው   የዕለቱን ጽሑፍ በአንድ አንጋፋ አባት ወግ ልጀምር፡፡ ‹‹የአንድ...

የመጋቢቱ ለውጥና ፈተናዎቹ

በታደሰ ሻንቆ ሀ) ችኩሎችና ገታሮች፣ መፈናቀልና ሞትን ያነገሡበት ጊዜ እላይ ...

ጥራት ያለው አገልግሎት መስጠት የሚያስችል ሥርዓት ሳይዘረጉ አገልግሎት ለመስጠት መነሳት ስህተት ነው!

በተለያዩ የመንግሥትና የግል ተቋማት ውስጥ ተገልጋዮች በከፈሉት ልክ የሚፈልጉትን...