Wednesday, February 1, 2023
- Advertisement -
- Advertisement -

የተመረጡ ፅሑፎች

የመማርያ ደብተሮች ባህላችንን የሚያንፀባርቁ ይሁኑ!

ከዚህ ቀደም በዚሁ አምድ ሥር አንድ አስተያየት መሰንዘሬን አስታውሳለሁ፡፡  ሰሚ ካለ አሁንም በዚያው ጉዳይ ላይ አንድ ነገር ማለቱ ተገቢ ሆኖ አግንቼዋለሁ፡፡ ለአስተያየቴ ጭብጥ በየዓመቱ ተማሪዎች የሚጠቀሙባቸው የመማርያ ደብተሮች ይዘት ከአገራዊ ገጽታ የሌላቸው መሆን ነው፡፡ ደብተሮች ይዘት እኛን ያለመምሰላቸው ነገር ሁሌም የሚያስቆጭ ሲሆን፣ ድርጊቱ አንድ ቦታ ላይ መቆም ይኖርበታል ከሚል እምነት ነው፡፡

ለዓመታዊ የትምህርት መርሃ ግብሩ የተዘጋጁትና በብዛት የተሠራጩት ደብተሮች ሽፋናቸው በውጭ የሲኒማ ተዋንያንና ምስሎች የተለበጠ ነበር፡፡ አስተያየቴን በሰነዘርኩበት በዚያን ወቅት ቃና ቴሌቪዥን ይተላለፍ ከነበሩ ተከታታይ ፊልሞች ላይ የሚተውኑ ተዋንያን ምስል የደብተሮቹ መለያ ሆኖ ይታያል፡፡ የእነዛራና ቻንድራ ምስሎች በደብተሮቹ ሽፋን ላይ ነግሰው ለልጆቻችን መማሪያ የመቅረቡ ነገር ስለእውነት ያናድድ ነበር፡፡ እንዲህ ባለው መንገድ ደብተሮቹ ታትመው ተማሪዎቻችን እንዲጠቀሙበት የፈረዱባቸው ወይም የፈረዱብንን የደብተር አስመጪዎችና አምራቾች በእጅጉ መኮነን ይገባቸዋል፡፡ እንደ አገር ኢትዮጵያውያን የሚገልጹ ስንት እሴቶች እያሉ፣ በአርያነታቸው ልናወድሳቸው ብሎም ትምህርት ሊቀሰምባቸው የሚችሉ ጀግኖች ያልዋት አገር፣ የደብተር ሽፋኖችን በውጭ ሰዎች መሞላቱ ምን ይባላል? ኢትዮጵያ ሌሎች የሚማረኩበት የቱሪስት መስህቦች የታደለች አገር መሆኗን የሚያሳዩ የበዙ መለያ ቅርሶች እያሏት፣ ለኢትዮጵያውያን ልጆቻችን የነዛራና ቻንድራ ምስል ያለባቸውን ምስሎች የያዙ ደብተሮች በድፍረት ማቅረቡ እንደ አገር ያለንበትን ደረጃ ያሳብቃል፡፡

በነገራችን ላይ ከዚህም ቀደም ቢሆን ቱጃር ባለሀብቶቻችን ደብተር አሳትመው ለማቅረብ በሚያደርጉት ጥረት፣ ለገበያ መወዳደሪያነት የሚመረጡት ከእኛ ብዙ ርቀት ያላቸውን ተዋንያንና ስፖርተኞች ምስል በመለጠፍ ነው፡፡ እኛን የማይገልጹና ልጆቻችንም ምሳሌ ሊያደርጓቸው የማይገቡ ምስሎችን ከማተም ውጭ አማራጭ የጠፋባቸው መስለው ዛሬን ድረስ ዘልቀዋል፡፡ በየጊዜው እኛን የማይመስሉ ምስሎችን በየደብተሩ እያሳተሙ የሚዘልቁትስ እስከመቼ ነው? ቢባልም የውጭ ተዋንያን፣ እግር ኳስ ተጫዋቾች፣ የአውሮፓና የአሜሪካ በበረዶ የተሸፈኑ ተራሮችና በመሳሰሉት ምስሎች ያልታጀበ ደብተር እንዳይታተም የተባለ አስመስለውት ቆይተዋል፡፡ ይህ አድራጎትታቸው ደግሞ የልጆቻችን አመለካከት ሲያንሻፍፉ ነበር ማለት ይቻላል፡፡

ጉዳዩን የበለጠ እንድንቆጭበት የሚያደርገው ደግሞ በመቶ ሚሊዮን ዶላሮች ወጪ የሚደረግበትና አስመጪዎችም ከፍተኛ ትርፍ ያገኙበታል የተባለውን የደብተር ማስመጣት ንግድ ወደ ደብተር አምራችነት አለመቀየራችን ነው፡፡ የሚገኘውን ትርፍ ጠርቀምቀም አድርጎ የውጭ ምንዛሪ ሊያስቀር በሚችል የማምረቻው ዘርፍ ቢሰማሩ፣ ራስንም አገርንም በጠቀመ ነበር፡፡

እንደ ብዙዎቹ አስመጪዎች ሁሉ በደብተር ማስመጣት ሥራ ላይ ያሉ ነጋዴዎቻችን የሚያሳትሙን ደብተር የሚፈጥረው ተፅዕኖ ሳያንስ፣ ከዓመት እስከ ዓመት የውጭ ምንዛሪያችንን እየበላ መቀጠል የለበትም፡፡ ስለዚህ ወኔ ያለው የደብተር ማምረቻ እስኪያቆምልን ቢያንስ ከውጭ የሚገቡት ደብተሮች እኛን እንዲመስሉ ቆምጨጭ ያሉ ዕርምጃዎች ሊወስዱ ይገባል፡፡

ጠቅላይ ሚኒስትሩ በቅርቡ ስለኢትዮጵያ እግር ኳስና በየጊዜው ስለሚፈጠሩ ሽኩቻዎች መንግሥት በጀት በመመደብ ወጣትም ገንዘብንም ማጣት የለብንም እንዳሉት ሁሉ፣ ትውልዱን ለመቅረፅ ልጆቻችን የምናስተምርበት ደብተር እኛን መስለው ለልጆቻችን አዕምሮ የተሻለ አመለካከት የሚገፋፉ እንዲሆኑ ማድረግ ተገቢ ነው፡፡ ጉዳዩ እንደ ቢዝነስ ብቻ መታየት የሌለበት በመሆኑ፣ መንግሥት ዕርምጃ በመውሰድ ነገሩን መሥመር እንዲይዝ ማድረግ ይቻላል፡፡ ‹‹የመማሪያ ደብተሮች ይዘት ይህንን ዓይነት ይዘት ሊኖረው ይገባል፤›› ብሎ ሕግ ማውጣት ይቻላል፡፡ አፈንጋጭ በሆኑ ምስሎች የታጀቡ ደብተሮች የሚያሳትመውን ደግሞ የውጭ ምንዛሪ መፍቀድ አይቻልም ሊልም ይችላል፡፡ ከዚህ ሁሉ ጣጣ ግን እንደ ዜጋ ምን እየሠራሁ ነው? ብሎ በማሰብ ራስን ማረም ከምንም በላይ መልካም ነገር ይሆናል፡፡

እዚህ ላይ ደብተር በማምረት የሚታወቁ አገራዊ ኩባንያዎች ለማኅበራዊ ኃላፊነት የሚሰጡት ትኩረት ይታወቃልና ምርቶቹን ኢትዮጵያዊ ገጽታ በማላበስ አርዓያ እንደሚሆኑ እንጠብቃለን፡፡

በነገራችን ላይ ልጆቻችን ሳይለዩ ዓመቱን ሙሉ በሚሸክፉት ደብተር ላይ ከእኛ ብዙ የራቁ ‹‹ታዋቂ ሰዎችን›› ምስል በመምረጥ ለደብተር ‹‹ማሳመርያ›› የማድረጉ ተግባር ዛሬ የተጀመረ አይደለም፡፡

በተለይ ካለፉት 30 ዓመታት ወዲህ ለኢትዮጵያውያን ተማሪዎች የሚቀርቡ አብዛኛዎቹ ደብተሮች የውጭ ተዋንያኖችን፣ ታዋቂ የእግር ኳስ ተጫዋቾችንና የመሳሰሉትን ይዘው በመውጣት የገበያ መፎካከሪያ ጭምር አድርገውት ቆይተዋል፡፡ ድርጊታቸው ግን ሊያመጣ የሚችለውን ተፅዕኖ ተረድተው እንኳን አልታቀቡም፡፡ ‹‹እንዲህ ያለው ነገር ተገቢ አይደለም›› ብሎ ሃይ ያላቸውም የለም፡፡ አሁን ግን ሃይ ሊባሉ ይገባል፡፡

እንዲህ ያሉ ድርጊቶች የባህል ወረራ እየተፈጸመብን ስለመሆኑ አንዱ ማሳያ ተደርጎ ሊወሰድ ይችላል፡፡ ልጆችን ምን ዓይነት ደብተር ይገዛላችሁ ሲባሉ እንዲህ ያለው ምስል ያለበት እስከማለት የደረሱበት ምክንያት፣ የመማሪያ ደብተሮች የሽፋን ምስሎች ተፅዕኖውን ያሳያል፡፡ በሚሊዮን የሚቆጠሩ ዜጎች የሚይዙትን ደብተር ሽፋኑን እኛን በሚመስሉ ምስሎችና መረጃዎች ቢዋብ ጥቅሙ የበዛ በሆነ ነበር፡፡ እንደው ለዓለም መራመድ ምርት አስተዋጽኦ ያላቸውን ሳይንቲስቶች ተመራማሪዎች የፈጠራ ሰዎችን እንኳን ቢያክሉበት ባልከፋ ነበር፡፡

ለማንኛውም አሁን የአገራችን ወቅታዊ ተጨባጭ ሁኔታ ተቀይሯል፡፡ ምክንቱም የተሻለ ትውልድ ለመቅረፅ በየአቅጣጫው የሚደረጉ ጥረቶች ይታያሉ፡፡ የበጎ አድራጎት ሥራ እየተበረታታ ነው፡፡ የትምህርት መረጃ መጽሐፍት አገራዊ ይዘት እንዲኖራቸው ለማድረግ እየተሠራ ነው፡፡ ስለዚህ መጪውን ትውልድ በተሻለ ለመቅረፅ አንዱ መንገድ እስከዛሬ በውጭ ተዋንያንና ስፖርተኛ ተለብጠው ለተማሪዎች መማርያ የሚሉ ደብተሮችን፣ ኢትዮጵያን የሚገልጹ ፍቅርና አንድነትን በሚያጎለብቱ ምስሎችና መልዕክቶች ተቀይረው እንዲታተሙ በማድረግ የዜግነት ግዴታችን እንወጣ፡፡

ቀጣዩ የትምህርት ዘመን ይህንኑ የሚገልጽ እንዲሆን የደብተር አስመጪዎች በዚሁ እሳቤ በመሥራት ኃላፊነታቸውን እንዲወጡ እንለምናለን፡፡ እንደውም ኢትዮጵያውነታችን የማያጠናክርና አንዳችን የሌላኛችን ባህል እንዲያውቁ የሚያደርጉ ምስሎች ያለባቸው እንዲሆኑ ማድረግ ነው፡፡

ይህንን በአስገዳጅ ሕግ ጭምር በመደገፍ ከቀጣዩ የትምህርት ዘመን ጀምሮ እንዲተገበር ማድረጉ ይገባል፡፡ የተማሪ ደብተሮች ሽፋኖች አገርን የማይገልጹ እውቀት የሚገኝባቸውን ምስሎች የሚያካትት በማድረግ ረገድ ሁሉም የበኩሉን ሊወጣ ይገባል፡፡

በተለይ የደብተር የውጭ ምንዛሪ ሲፈቀድ ይህንን ታሳቢ ማድረግ ይገባል፡፡ ነጋዴዎቻችንም ይህንኑ ያስቡ፡፡ እንደሸማችም እንዲህ ያሉ ደብተሮችን ባለመግዛት ማዕቀብ በማድረግም ይህንን ያልተገባ ተግባር የመዋጋት ልምድ በማዳበር ኃላፊነቱን ይወጣ፡፡

Latest Posts

- Advertisement -

ወቅታዊ ፅሑፎች

ትኩስ ዜናዎች ለማግኘት