Thursday, February 29, 2024
- Advertisment -
- Advertisment -

አገርን የማያስቀድም አጀንዳ ፋይዳ የለውም!

‹‹አዲስ እረኛ ከብት አያስተኛ›› እንዲሉ፣ ፋታ የማይሰጡ የአገር ትልልቅ ጉዳዮችን ወደ ጎን ብለው ጥቃቅን ነገሮች ላይ የሚያተኩሩ አፍለኞች እየበዙ ነው፡፡ በተለይ በፖለቲካው ምኅዳር ውስጥ የሚርመሰመሱ በአገር ውስጥና በውጭ የሚገኙ ግለሰቦችና ድኖች፣ ከአገር ደኅንነትና ጥቅም በላይ በመረማመድ ከፍተኛ ችግር እየፈጠሩ ነው፡፡ የረባ አገራዊ አጀንዳ ሳይኖራቸው በአጋጣሚ ራሳቸውን ያገዘፉ ግለሰቦች፣ ሚዲያውን ጭምር የጥላቻና የቂም በቀል መወጫ አድርገውታል፡፡ የወጣቶችን ደካማ ጎን በመጠቀም በስሜት ኮርኳሪ ቅስቀሳዎች፣ አገሪቱን ከዕለት ወደ ዕለት ሰላምና እረፍት እየነሷት ነው፡፡ ለአገር የሚጠቅም አማራጭ ሐሳብ ሳያቀርቡ፣ በሌሎች ሐሳቦች ላይ በመንተራስ የጥላቻ ቅስቀሳ ውስጥ ተዘፍቀዋል፡፡ መንግሥት ሲሳሳት በበሰለ ሐሳብ መተቸት፣ አላስፈላጊ ድርጊቶች ሲፈጸሙ ዕውቀትን መሠረት ያደረገ ወቀሳ ማቅረብና ትክክለኛውን መስመር ማስያዝ ሲገባ፣ የሚቀድመው ስድብና ዛቻ ሆኗል፡፡ በአገሪቱ ሐሳብ የነጠፈ ይመስል ልዩነትን ማክበር ብርቅ እየሆነ ነው፡፡ ኢትዮጵያውያን የሚታወቁባቸው መልካም ሥነ ምግባሮችና እሴቶች እየተጣሱ፣ ማንነት ላይ ያነጣጠሩ አሳፋሪ ስድቦችና ዘለፋዎች ይሰማሉ፡፡ ለአገር የማይጠቅሙ አጀንዳዎች እየተመዘዙ፣ ከዕለት ወደ ዕለት ወደ ቀውስ መንደርደር ልማድ ሆኗል፡፡ ለአገር የማይጠቅሙ ነገሮች እየበዙ ነው፡፡

አንድ ሰው የፈለገውን ሐሳብ በነፃነት የማራመድ ተፈጥሯዊ መብት አለው፡፡ ይህ መብት ደግሞ ለሌሎችም ጭምር እንደሚሠራ መገንዘብ ተገቢ ነው፡፡ አገር ወደ ተሻለና የሚያስደስት ሥርዓት መንደርደር የምትችለው ሰብዓዊና ዴሞክራሲያዊ መብቶች ሲከበሩ ነው፡፡ እነዚህ መብቶች እንዲከበሩ አንዱ ለማኝ ሌላው ተለማኝ መሆን የለበትም፡፡ ይልቁንም ይህንን ሥርዓት በጋራ ለማቆም በልዩነት ውስጥ የጋራ የሆነ ነገር መፍጠር ይገባል፡፡ ዴሞክራሲ የተለያዩ ሐሳቦች የሚደምቁበት ማዕድ እንደሆነ የጋራ ግንዛቤ ሊኖርም ይገባል፡፡ ከዚህ ውጪ አንዱ ጉልበተኛ ሌላው ተንበርካኪ፣ አንዱ ሕግ አክባሪ ሌላው ሕገወጥ ለመሆን መሞከር ከባድ ጥፋት ያስከትላል፡፡ በሌላ በኩል ሕዝብ አገለግላለሁ የሚል ማንም ወገን መጀመርያ ራሱን ከሐሜት፣ ከአሉባልታ፣ ከሴራና ከቂም ነፃ ማውጣት አለበት፡፡ በሕዝብ ስም እየነገዱ ራስን አጉል ነፃ አውጪና አርበኛ በማድረግ፣ ተገቢ ያልሆነ ድርጊት ውስጥ መገኘትም ትክክል አይደለም፡፡ ለአገር የማይጠቅም ድርጊት ውስጥ የሚገባው ለዴሞክራሲ ባህል ባዕድ ሲሆኑ ነው፡፡

  የአገር ጉዳይ ሲነሳ የእያንዳንዱ ዜግነት ኃላፊነት ከባድ እንደሆነ መገንዘብ ያስፈልጋል፡፡ የአገር ሰላምና ፀጥታ ሲደፈርስ ጉዳት የሚደርስባቸው ንፁኃን ናቸው፡፡ እያንዳንዱ ቀን በሰላም ተውሎ የሚታደርበት እንዲሆን ደግሞ የመንግሥት ኃላፊነት ብቻ ሳይሆን፣ የእያንዳንዱ ዜጋ መሆን ይኖርበታል፡፡ ሰላም የሚገኘው ከመንግሥት ከፍተኛ ሹማምንት ጀምሮ በእያንዳንዱ ዜጋ ሕግ ሲከበር ነው፡፡ የሕግ የበላይነት የሚረጋገጠው በዚህ መንገድ ብቻ ነው፡፡ አንድ ግለሰብ ሐሳቡን በነፃነት የመግለጽ መብቱን ሲጠቀም፣ በተቻለ መጠን ለሌሎች ኃላፊነት ሊሰማው ይገባል፡፡ ይህ ማለት ግን ሌሎች ከራሳቸው ፍላጎትና ዓላማ አንፃር የግለሰቡን ንግግር እየተረጎሙ ጥቃት ይፈጽሙ ማለት አይደለም፡፡ መብትና ግዴታ ተነፃፃሪ ናቸው ቢባልም፣ ግለሰባዊ ነፃነትን ሰፋ አድርጎ ማየት ለዴሞክራሲያዊ ሥርዓት ግንባታ ይረዳል፡፡ በዚህ መንፈስ የሐሳብ ልውውጦች ሲኖሩ፣ ከግላዊና ከቡድናዊ ጥቅም በላይ የአገር ይቀድማል ማለት ነው፡፡ ኢትዮጵያ ውስጥ አልታይ ያለው ይህ ዓይነቱ የጋራ ግንዛቤ ነው፡፡ ጥቃቅንና ተልካሻ ጉዳዮች ታላላቅ አገራዊ ጉዳዮችን እየሸፈኑ ነው፡፡

ኢትዮጵያ ባለፉት 16 ወራት በርካታ ክስተቶችን አስተናግዳለች፡፡ መልካም አጋጣሚዎችን በመጠቀም የመተባበርና የመተጋገዝ ስሜት ቢዳብር ኖሮ፣ እያጋጠሙ ያሉ ፈተናዎችን በመሻገር ብሩህ ተስፋ ማየት አይከብድም ነበር፡፡ ከሥልጣን ወዲያ ማዶ ያለውን የሕዝብ የጋራ አማካይ ፍላጎት ገሸሽ በማድረግ፣ በቀጥታም ሆነ በተዘዋዋሪ የሚደረገው ሽኩቻ ከፍተኛ ጉዳት አድርሷል፡፡ አሁንም እያደረሰ ነው፡፡ ለዘመናት በሕዝቡ መካከል የሰፈነውን አብሮነት የሚገዳደሩ የጥላቻ ቅስቀሳዎች በየጎራው ይነዛሉ፡፡ የሕዝቡን የጋራ እሴቶች የማይወክሉ አፀያፊ ድርጊቶች ይፈጸማሉ፡፡ እርግማን ያለ ይመስል የአገሪቱ ልሂቃን መናናቅና መጣላት ይቀናቸዋል፡፡ ከሴረኝነትና ከአሻጥር ውስጥ መውጣት አቅቷቸው የጎሪጥ ይተያያሉ፡፡ ከዚህ በፊት የተሠሩ ስህተቶችን ለመድገም ይሯሯጣሉ፡፡ የመነጋገርና የመደማመጥ ፍላጎት ስለሌላቸው በሴራ ንድፈ ሐሳብ ትንተና ተወጥረው፣ ወጣቶችን ግራ እያጋቡ የነገን ተስፋ ያጨልማሉ፡፡ ይህ ሁሉ ለኢትዮጵያ ምን ይጠቅማል ተብሎ ሲጠየቅ መልሱ ምንም ነው፡፡ ነገር ግን አሁንም መልካም አጋጣሚዎች እያመለጡ ነው፡፡ አገርን የማያስቀድሙ አጀንዳዎች እየበዙ ብዙዎችን ተስፋ እያስቆረጡ ነው፡፡

አሁን ሰከን ባለ መንገድ መነጋገር ይገባል፡፡ የዓመታት ቁርሾዎችና ጥላቻዎች የሚለዝቡት በመነጋገር ነው፡፡ ትኩረት ለብሔራዊ መግባባት መባል ይኖርበታል፡፡ የኢትዮጵያን ፖለቲካ መካን ከሚያደርጉት ችግሮች መካከል ዋነኛው፣ ለመግባባት ሳይሆን ለመጣላት ቅርብ የመሆን አባዜ ነው፡፡ ሥልጣን ላይ ያለው አካልም ሆነ ሌሎች የብሔርተኝነት ካርድ እየመዘዙ መበሻሸቁን ያቁሙ፡፡ ትልልቅ አገራዊ ችግሮች ፋታ እያሳጡ፣ የመበሻሸቂያ አጀንዳዎች መፍጠር ፋይዳ ቢስ ነው፡፡ በቅርቡ በአዲስ አበባና በባህር ዳር የተፈጸመው የከፍተኛ ባለሥልጣናት ግድያ፣ በቅጡ ተቀምጦ ለመነጋገርና የጋራ መፍትሔ ካለመፈለግ የተከሰተ መሆኑን ማመን የግድ ይላል፡፡ ፖለቲካው ውስጥ ከሐሳብ ልውውጥ በላይ ጠመንጃ እንዳይነግሥ ጠንክሮ መሥራት የግድ ነው፡፡ የኢትዮጵያ ሕዝብ የጉልበትና የሕገወጥነት መንገድ አንገሽግሾታል፡፡ ታሪኩም ከጦርነት ጋር በእጅጉ የተቆራኘ ስለሆነ በሚገባ ያውቀዋል፡፡ ኢትዮጵያ የሰላም፣ የዴሞክራሲና የብልፅግና መናኸሪያ እንድትሆንለት ይመኛል፡፡ በነፃነት፣ በእኩልነትና በፍትሐዊነት መተዳደር ይፈልጋል፡፡ አገርን የማያስቀድሙ አጀንዳዎች ፋይዳ ቢስ ለመሆናቸው ደግሞ፣ ከኢትዮጵያ ሕዝብ በላይ ምስክር የለም!

በብዛት የተነበቡ ፅሁፎች

- Advertisment -

ትኩስ ፅሁፎች

[ክቡር ሚኒስትሩ ወደ መኖሪያ ቤታቸው ሲገቡ ባለቤታቸው በቴሌቪዥን የሚተላለፈውን ዜና በመደነቅ እየተመለከቱ አገኟቸው]

እንዲያው የሚደንቅ ነው እኮ። ምኑ? ዜና ተብሎ በቴሌቪዥን የሚተላለፈው ነገር ነዋ፡፡ ምኑ...

በኦሮሚያ የሚፈጸሙ ግድያዎችና የተጠያቂነት መጥፋት

የካቲት 11 ቀን 2016 ዓ.ም. ቢሾፍቱ አቅራቢያ በሚገኘው የዝቋላ...

የኢትዮጵያ መዋዕለ ንዋይ ገበያ ከሚያስፈልገው ካፒታል ውስጥ 90 በመቶውን ሰበሰበ

እስካሁን 15 ባንኮች የመዋዕለ ንዋይ ገበያው ባለድርሻ ሆነዋል የኢትዮጵያ መዋዕለ...

አዲሱ የንብ ባንክ ቦርድ የባንኩን ካፒታል በአሥር ቢሊዮን ብር ለማሳደግ ማቀዱ ተሰማ

አዲሱ የንብ ኢንተርናሽናል ባንክ የዳይሬክተሮች ቦርድ የባንኩን ካፒታል በአሥር...

የጋራ ድላችን!

ከፒያሳ ወደ ቄራ ልንጓዝ ነው። ለበርካታ ደቂቃዎች ሠልፍ ይዘን...
spot_img

ተዛማጅ ፅሁፎች

ታላቁ የዓድዋ ድል ሲዘከር የጀግኖቹ የሞራል ልዕልና አይዘንጋ!

የታላቁ ዓድዋ ድል 128ኛ ዓመት ክብረ በዓል ሲዘከር፣ ለአገርና ለሕዝብ ክብር የሚመጥኑ ተግባራት ላይ ማተኮር ይገባል፡፡ በዓድዋ ከወራሪው ኮሎኒያሊስት ኃይል ጋር ተፋልመው ከትውልድ ወደ...

ሰብዓዊ ቀውሶችን ማስቆም ተቀዳሚ ተግባር ይሁን!

በቅርቡ ጠቅላይ ሚኒስትር ዓብይ አህመድ (ዶ/ር) ከአማራ ክልል የተለያዩ አካባቢዎች ተወክለው ከመጡ ሰዎች ጋር ያደረጉት ውይይት፣ በአማራ ክልልም ሆነ በሌሎች ሥፍራዎች የሚካሄዱ ግጭቶች ምን...

የበራሪው የኅብረተሰብአዊት ኢትዮጵያ ጀግና ጄኔራል ለገሠ ተፈራ ቅርሶችን የአዲስ አበባ ዩኒቨርሲቲ ተረከበ

በቀድሞው የኢትዮጵያ መንግሥት (1967-1983) ዘመን የኅብረተሰብአዊት ኢትዮጵያ ጀግና ሜዳይ የየካቲት 1966 1ኛ ደረጃ ኒሻን ተሸላሚ የነበሩ የአየር ኃይል ጀት አብራሪው የብርጋዴር ጄኔራል ለገሠ ተፈራ...