Thursday, July 25, 2024
- ማስታወቂያ -
- ማስታወቂያ -

የአፍሪካ ልማት ባንክ ለኢትዮ ጂቡቲ ኮሪደር የፍጥነት መንገድ ግንባታ 98 ሚሊዮን ዶላር ዕርዳታ ለመስጠት ተስማማ

ተዛማጅ ፅሁፎች

በኢትዮጵያና በጂቡቲ ትብብር ለሚገነባው የትራንስፖርት ኮሪደር የፍጥነት መንገድ ፕሮጀክት፣ የአፍሪካ ልማት ባንክ ግሩፕ የ98 ሚሊዮን ዶላር ዕርዳታ ለመስጠት ከመንግሥት ጋር ስምምነት ተፈራረመ፡፡

ስምምነቱ ሰኞ ሐምሌ 29 ቀን 2011 ዓ.ም. በገንዘብ ሚኒስትሩ አቶ አህመድ ሺዴና በአፍሪካ ልማት ባንክ ግሩፕ የኢትዮጵያ ኃላፊ ሚስተር አብዱል ካማራ መካከል በተፈረመበት ወቅት እንደተገለጸው፣ የዕርዳታ ገንዘቡ በባንኩ ልማት ፈንድ በኩል ለኢትዮጵያ እንደሚሰጥ ታውቋል፡፡

የኢትዮ ጂቡቲ ትራንስፖርት ኮሪደር በተያዘው በጀት ዓመት ወይም እ.ኤ.አ. በ2020 ተጀምሮ በአምስት ዓመታት ውስጥ ግንባታው እንደሚጠናቀቅና 255 ሚሊዮን ዶላር ወይም ከ7.5 ቢሊዮን ብር በላይ እንደሚፈጅ ይጠበቃል፡፡ ሁለቱ መንግሥታትም ለመንገዱ ግንባታ የየድርሻቸውን ያዋጣሉ፡፡

በዚህ መሠረት የአፍሪካ ልማት ባንክ በልማት ፈንዱ በኩል ለኢትዮጵያ መንግሥት ከሚሰጠው 98 ሚሊዮን ዶላር በተጨማሪ፣ ለጂቡቲ መንግሥትም 5.3 ሚሊዮን ዶላር ድጋፍ ያደርጋል፡፡ የኢትዮጵያ መንግሥትም በጋራ ወጪ የሚታሰብ 151 ሚሊዮን ዶላር እንደሚጠበቅበት ከስምምነቱ ለመገንዘብ ተችሏል፡፡

ፕሮጀክቱ በመጀመሪያው ምዕራፍ ግንባታ ሒደት የ60 ኪሎ ሜትር ግንባታ የሚካተትበት፣ ባለአራት መስመር የፍጥነት መንገድ ይገነባበታል፡፡ ይህም በጥቅሉ 126 ኪሎ ሜትር ርዝማኔ ያለውንና ከአዳማ-አዋሽ በሚዘረጋውና ደወሌ ላይ ብቻ በሁለቱ ከተሞች አዋሳኝ ኬላ ሲደርሱ መኪኖች ከሚቆሙበት በስተቀር፣ የፍጥነት መንገዱ በቀጥታ ከአዳማ እስከ አዋሽ እንደሚያገናኝ ይጠበቃል፡፡

በአሁኑ ወቅት ከ3,000 ያላነሱ ከባድ የጭነት ተሽከርካሪዎች 900 ኪሎ ሜትር ገደማ በሚሸፍነው ከአዲስ አበባ ጂቡቲ የገቢና ወጪ ንግድ ሸቀጦች ያመላልሳሉ፡፡ በአዲሱ የትራንስፖርት ኮሪደር ላይ የሚገነባው የፍጥነት መንገድ ሲጠናቀቅ የትራንስፖርት ወጪን ከመቀነስ ባሻገር፣ በሁለቱ አገሮች መካከል ያለውን የንግድና የኢኮኖሚ ትስስር እንደሚያግዘው ታምኖበታል፡፡

የአፍሪካ ልማት ባንክ በኢትዮጵያ እስከ 1.7 ቢሊዮን ዶላር ድጋፍ ባደረገባቸው 24 ፕሮጀክቶች ውስጥ እየተሳተፈ ነው፡፡ ፕሮጀክቶቹ በአብዛኛው በትራንስፖርት፣ በኤሌክትሪክ ኃይል በተለይም ከኢትዮጵያ ወደ ጂቡቲ፣ ኬንያና ወደ ሌሎችም አገሮች የተዘረጉትን ጨምሮ በውኃና ሳኒቴሽን መሠረተ ልማት አውታሮች፣ በመልካም አስተዳደርና ተጠያቂነት፣ በግሉ ዘርፍ ልማት፣ እንዲሁም በግብርናና በምግብ ዋስትና መስክ የሚንቀሳቀሱ ናቸው፡፡

ከእነዚህ ውስጥ ከ32 በመቶ በላይ የባንኩ ድጋፎች በመንገድ ሥራ ላይ መዋላቸውንና 515 ሚሊዮን ዶላር እንደሚገመቱ አስታውቋል፡፡ በአሁኑ ወቅት 610 ኪሎ ሜትር የሚሸፍኑ አራት የመንገድ ፕሮጀክቶች በኢትዮጵያ ግንባታቸው እየተካሄደ እንደሚገኝ የአፍሪካ ልማት ባንክ መረጃዎች ያሳያሉ፡፡   

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች