Thursday, April 18, 2024
- Advertisement -
- Advertisement -
ዜናየአሜሪካ ኤምባሲ በጋምቤላ በግብረ ሰናይ ሠራተኞች ላይ የተፈጸመውን ግድያ አወገዘ

የአሜሪካ ኤምባሲ በጋምቤላ በግብረ ሰናይ ሠራተኞች ላይ የተፈጸመውን ግድያ አወገዘ

ቀን:

በኢትዮጵያ የአሜሪካ ኤምባሲ በጋምቤላ ክልል አክሽን አጌንስት ሀንገር የተባለ ግብረ ሰናይ ድርጅት ሠራተኛ የሆኑ ሁለት ኢትዮጵያውያን መገደላቸውን አወገዘ፡፡ ሁለቱ ኢትዮጵያውያን ሠራተኞች ነሐሴ 30 ቀን 2011 ዓ.ም. ነበር በታጣቂዎች የተገደሉት፡፡

ኤምባሲው ዓርብ መስከረም 2 ቀን 2012 ዓ.ም. ለሪፖርተር በላከው መግለጫ፣ ‹‹የአሜሪካ ኤምባሲ መንግሥታዊ ያልሆነው የአክሽን አጌንስት ሀንገር ሁለት ሠራተኞችን ሕይወት የቀጠፈውንና ነሐሴ 30 ቀን 2011 ዓ.ም. በግብረ ሰናይ ሠራተኞች ላይ ያነጣጠረውን ጥቃት አጥብቆ ያወግዛል፤›› ያለ ሲሆን፣ ‹‹በእነዚህ ሠራተኞች ሞት የተሰማንን ጥልቅ ሐዘን መግለጽና ለወዳጅ ቤተሰቦቻቸው መጽናናትን እንመኛለን፤›› ብሏል፡፡

‹‹ይኼ የግብረ ሰናይ ድርጅት ተሽከርካሪን ዒላማ ያደረገ ጥቃት ሊወገዝ የሚገባው ነው፡፡ የዚህ ወንጀል ፈጻሚዎችም በአስቸኳይ እንዲያዙና ለሕግ እንዲቀርቡ ጥሪ እናደርጋለን፤›› ያለው ኤምባሲው፣ እንዲህ ያለ በግብረ ሰናይ ድጋፍ ሰጪዎች ላይ የሚፈጸም ጥቃት በተረጂና ደሃ በሆኑ ቤተሰቦች ላይ የሚፈጸም ጥቃት ነው ሲልም አምርሮ ኮንኗል፡፡ ስለዚህም በየትኛውም የመንግሥት አስተዳደር ዕርከን ላይ የሚገኙ ኃላፊዎች የሚጠበቅባቸውን ሁሉ በማድረግ፣ ለግብረ ሰናይ ሠራተኞች ጥበቃ እንዲያደርጉላቸው ጥሪ አቅርቧል፡፡

- Advertisement -

Video from Enat Bank Youtube Channel.

የሁለቱን ሠራተኞች ሕይወት የቀጠፈው ግድያ የተፈጸመው ኝጉኤንዬል ከተባለ የስደተኞች መጠለያ ካምፕ አምስት ኪሎ ሜትሮች ራቅ ብሎ በሚገኝ ሥፍራ ሲሆን፣ ጥቃቱን የፈጸሙት ታጣቂዎች የሠራተኞችን መኪና በማስቆም እንደተኮሱባቸው ታውቋል፡፡ በመኪናው ውስጥ ከነበሩት ሦስት ሰዎች አንዱ በሕይወት ማምለጥ እንደቻለ ለማወቅ ተችሏል፡፡

ይኼንን ጥቃት ተከትሎ መግለጫ ያወጣው የአውሮፓ ኅብረት ኮሚሽን የአውሮፓ ሲቪል ጥበቃና የግብረ ሰናይ ድጋፍ ሥራ ዳይሬክቶሬት፣ በጋምቤላ የፀጥታ ሁኔታ ከጊዜ ወደ ጊዜ አስከፊ እየሆነ መምጣቱን በመጥቀስ፣ ለዚህ ምክንያቱ በተለይ በአኙዋክና በኑዌር ብሔሮች መካከል ያለው ቅራኔ መፈታት ባለመቻሉ ነው ብሏል፡፡

‹‹በሁለቱ ቡድኖች መካከል በተደጋጋሚ ግጭት ስለሚከሰት የግብረ ሰናይ ሠራተኞች የደኅንነት ሥጋት በመደቀን መንቀሳቀስ እንዳልቻሉም አድርጓቸዋል፤›› ብሏል ዳይሬክቶሬቱ በመግለጫው፡፡

በዚህም ሳቢያ በጋምቤላ ይንቀሳቀሱ የነበሩ ሰብዓዊ ዕርዳታ ሰጪዎች ሥራቸውን ለማቆም መገደዳቸውን በመጠቆም፣ ከክልሉና ከፌዴራል መንግሥት አፋጣኝ ምላሽ እንዲሰጥ እየጠየቁ ነው ብሏል፡፡

አክሽን አጌንስት ሀንገር በኢትዮጵያ ከ1993 ዓ.ም. ጀምሮ ሲሠራ የቆየ ሲሆን፣ በጋምቤላ ያለውን እንቅስቃሴ ሙሉ ሙሉ ማቆሙን አስታውቋል፡፡

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

ሰላማዊ የፖለቲካ ትግልና ፈተናው

የኦሮሞ ነፃነት ግንባር (ኦነግ) የፖለቲካ ኦፊሰር የአቶ በቴ ኡርጌሳን...

አበጀህ ማንዴላ! አበጀሽ ደቡብ አፍሪካ!

በአየለ ት. የፍልስጤም ጉዳይ የዓለም አቀፍ ፖለቲካንም ሆነ የተባበሩት መንግሥታትን...

የውጭ ባለሀብቶች ለኢትዮጵያውያን ብቻ በተፈቀዱ የንግድ ዘርፎች እንዲገቡ የመወሰኑ ፋይዳና ሥጋቶች

ጠቅላይ ሚኒስትር ዓብይ አዓመድ (ዶ/ር) የውጭ ኩባንያዎች በጅምላና ችርቻሮ...