Wednesday, October 5, 2022
ሌሎች ዓምዶች
    - Advertisement -
    - Advertisement -
    ይድረስ ለሪፖርተርየአቢሲኒያ ባንክ ጥበቃ ሠራተኞች ብሶት ይደመጥ!

    የአቢሲኒያ ባንክ ጥበቃ ሠራተኞች ብሶት ይደመጥ!

    ቀን:

    አቢሲኒያ ባንክ ከቀደምት ባንኮች አንዱና አንጋፋ ባንክ መሆኑ ይታወቃል፡፡ በሠራተኞች አያያዝ በተለይም በጥበቃ ሠራተኞች ላይ ግን ከፍተኛ ቅሬታ ይነሳበታል፡፡

    ባንኩን ለከፍተኛ ሥጋት ሊያጋልጥ የሚችል አደጋ ይታያል፡፡ ከጥበቃ አስቀጣሪ ኤጀንሲዎች ጋር የጥቅምና የኮሚሽን ግንኙነት ያላቸው ጥቂቶች የፈጠሩት ትልቅ ክፍተት አለ፡፡ የጥበቃ ሥራ ሕይወትንና ንብረትን የመጠበቅ ትልቅ ኃላፊነት የሚጠይቅ ሥራ ነው፡፡ የገንዘብ ተቋማትን መጠበቅ ከፍተኛ ጥንቃቄ የሚጠይቅ ቢሆንም፣ የባንኩ የጥበቃ ሠራተኞች የጥበቃ ሥራውን የምደባና የቅጥር ሒደት በያዘው ኤጀንሲ በኩል የሚከፈለን ክፍያ ዝቅተኛና ኑሯችንን ለመደጎም የሚበቃን ባለመሆኑ፣ በዚሁ ኤጀንሲ በኩል ለሌሎች ባንኮችና ድርጅቶች ተጨማሪ ወይም ሁለተኛ ሥራ ለመሥራት እየተገደድን ነው፡፡ በዚህ ምክንያት ለድካም እንጋለጣለን፡፡

    ይህ በሆነበት አግባብ የሚቀርብልን የደንብ ልብስም የባንኩን ደረጃ የማይመጥን፣ ከሌሎች ባንኮች አንፃርም የሚያሳጣና እጅግ የወረደ ነው፡፡ በቅርብ የተመሠረቱ ባንኮች በሥነ ምግባራቸው የተመሠገኑ፣ ሥርዓት የተላበሱና ባንኩን የሚመጥኑ ሠራተኞችን ሲቀጥሩ እናያለን፡፡ ባንኮቹን የሚመጥን የደንብ ልብስ እያለበሱ የጥበቃ ጓዶቻቸው ለዕይታ ማራኪ የሆነ የባንክ ድባብ እንዲፈጠር ያደርጋሉ፡፡

    በአንፃሩ የአቢሲኒያ ባንክ አካሄድ በዚህ ረገድ ወደ ኋላ እየሆነ፣ በኤጀንሲ በኩል የቀጠራቸው ሠራተኞችም ከፍተኛ ምሬትና አቤቱታ ሲያሰሙ ይታያሉ፡፡

    በጥበቃ አባላት ተባባሪነት ባንኩ ላይ የዘረፋ ሙከራ መደረጉ ይታወቃል፡፡ አስቀጣሪ ኤጀንሲው በሚያደርሰው በደል ሠራተኛው እየተማረረና እየተራበ መሣሪያ ተሸክሞ መሥራት እያቃተው በመሆኑ፣ ባንኩን የባሰ አደጋ ላይ ሊጥል የሚችል ሁኔታ ሊፈጠር እንደሚችል ግልጽ ነው፡፡

    የባንኩ ቦርድ ይህንን ተመልክቶ በኢትዮጵያ የሚታየውን የፀጥታ ሁኔታም አጢኖ፣ መጪውንም ጊዜ ገምግሞ በባንኩ በኩል በቀጥታ የሚመለመሉ የጥበቃ አባላትን መቅጠር ይኖርበታል፡፡ ሠራተኛው በሥራው ደስተኛ ሆኖ የሚሠራበትን ከባቢ ሁኔታ በመፍጠር ኤጀንሲው ከባንኩና ከሠራተኛው መሀል የሚወጣበትን መንገድ ፈጥሮ አቤቱታና ቅሬታ የማይጎላበት ሰላማዊ የባንክ ድባብ እንዲሰፍን ቦርዱ ይህንን የጥበቃ ሠራተኞችን ችግር እንዲሰማ፣ የባንኩን ደንበኞች በሚገባ የምናስተናግድለት፣ ንብረቱን የምንጠብቅለት የእኛ የአገልጋዮቹን አቤቱታ በመስማት አስቸኳይ መፍትሔ እንዲሰጠን በአክብሮት እንጠይቃለን፡፡

    (ከአቢሲኒያ ባንክ የጥበቃ ሠራተኞች፣ አዲስ አበባ)

    - Advertisement -

    ይመዝገቡ

    spot_img
    spot_img