Saturday, January 28, 2023
- Advertisement -
- Advertisement -

የተመረጡ ፅሑፎች

ችግር እንዲከስም በጎነት ይለምልም

በ2011 ዓ.ም. በመልካም የምናስባቸውና እንዲቀጥሉ የምንመኛቸው በጎ ተግባራት ተከናውነዋል፡፡ በግል፣ በቡድንና በተቋማት ደረጃ የተፈጸሙ በጎ ተግባራት በመልካም ተነሳሽነት የተከናወኑ እንደነበሩም መገንዘብ ይቻላል፡፡

ለሌሎች መልካምን በማድረግ ማኅበራዊ ኃላፊነትን ለመወጣት በየፈርጁ ሲደረጉ የሰነበቱ እንቅስቃሴዎች ይበሉ ያሰኛሉ፡፡ በዓመቱ አቅመ ደካሞችን ለመደገፍ ተሞክሯል፡፡ ለተፈናቀሉ ወገኖች፣ ‹‹እኛም የአቅማችንን እናበርክት፤›› በሚል መነሻ ዜጎች በቻሉት መጠን እጃቸውን ዘርግተዋል፡፡ የአቅመ ደካሞችን የመኖሪያ ቤት (መኖሪያ ቤት ከተባለ ነው) ማደስ፣ የዳስ ትምህርት ቤቶችም ቀን ወጥቶላቸው ጣሪያና ግድግዳቸው ታድሰው፣ ቀለም ተቀብተው የተዋቡት በበጎ አድራጊዎች ነው፡፡ የቻለና አቅሙ ያለው በገንዘቡ፣ ያልቻለው በጉልበቱ ያረጁ ያፈጁ ቤቶችን በማደስ በአቅመ ደካሞች ተመርቋል፡፡ የትምህርት ቤት ቁሳቁስና የደንብ ልብስ ገዝቶ ለልጆቹ ማቅረብ ጭንቅ የሆነበት ወላጅ ዘንድሮ በዚህ ሐሳብ እንዳይገባው መደረጉ ትልቅ ለውጥና አሳቢነት ነው፡፡

በአዲስ አበባ ከተማ የታደሱ የሕክምና ተቋማት ወጪያቸው የተሸፈነው ለበጎ ተግባር የተደረገውን ጥሪ በተቀበሉ የንግድ ማኅበረሰቡ አባላት በመሆኑም ይህ ተግባራቸው እንደሚቀጥል ተስፋ በማድረግ ጥረታቸውን ማመስገኑ ተገቢ ነው፡፡

ከ600 ሺሕ በላይ ለሆኑ የአዲስ አበባ ከተማ የመንግሥት ትምህርት ቤቶች ተማሪዎች ሙሉ የደንብ ልብስና የትምህርት መገልገያ መሣሪያዎች በነፃ እንዲቀርብላቸው የተደረገው፣ ቀና በሚያስቡና ለዚህም በሚተባበሩ እጆች በመሆኑ፣ ቅንነትና መልካምነት ከሰፈነ ከባዱና የማይቻለውን በመቻል ብዙ እንደሚሠራ ያሳየው ነው፡፡ ለወገን ደራሽ ወገን ስለመሆኑ ቁልጭ አድርጎ ያሳየ በመሆኑም በተምሳሌነቱ የሚወሳ ጅምር ነው፡፡ የዚህ በጎ ጅምር ትርጉሙ ብዙ ነው፡፡ የኑሮ ውድነት አንጎል በሚያዞርበት ወቅት፣ ወላጆች ለልጆቻቸው የሚያስፈልጋቸው የትምህርት ቁሳቁስ ባይቀርብላቸው ኖሮ ሰቆቃቸውን መገመት አያዳግትም፡፡  

ታዋቂ አርቲስቶች ‹‹አበባዮሽ፤ ለምለም!››ን በየሱቁ ዘፍነውና ገንዘብ አሰባስበው  አረጋውያንን ለመደገፍ የተጠቀሙበት ዘዴ፣ ከታሰበበት እንዲህም በማድረግ መደጋገፍ እንደሚቻል አስተማሪ መልዕክት ያስተላለፉበት ነበር፡፡ ‹‹50 ሎሚ ለአንድ ሰው ሸክሙ ለ50 ሰው ጌጡ›› እንዲሉ ላንዱ የከበደውን ሸክም በጋራ የማቃለሉን በጎ ተግባር ስንመለከት፣ በመንግሥት በሚደረግ ጥሪ ብቻም ሳይሆን፣ በራስ ተነሳሽነትም ጭምር ብዙ መሥራት እንደሚቻል የሚያስገነዝብ ነው፡፡

የዩኒቨርሲቲ ተማሪዎችና ወጣቶች በበጎ ፈቃደኝነት የመጀመርያና ሁለተኛ ደረጃ ተማሪዎችን በማስጠናት፣ የአቅመ ደካሞችን ልብስ በማጠብና ቤታቸውን በማሳመር ያሳዩት ርብርብ የበለጠ እየተለመደና እየተዘወተረ ቢሄድ ብዙ ነገራችንን እንደሚቀይረው ይናገራል፡፡ በአስታማሚነት እየገቡ በሆስፒታሉ ሽር ጉድ ሲሉ ያየናቸው ወጣቶች፣ የታማሚዎች ተስፋ እንዲለመልም አድርገዋል፡፡ መረዳዳትና መደጋገፍ እንዲህ ነው፡፡ ‹‹ወጣት የነብር ጣት›› መባሉስ ለዚህም አይደል፡፡  

እንዲህ ያለው መልካም ሒደት፣ ዘርና ሃይማኖት ሳይለይ የተጣለ መልካም እርሾ ነው፡፡ በጎ ለመሥራት ኢትዮጵያዊ መሆን እንደሚበቃ ያስረገጠ፣ ሌላው ሁሉ ትርፍ አላፊ እንደሆነ ያሳየ ጅምር ነው፡፡ ስለዚህ መልካሙ ተግባር እንደ ባህል እንዲዘልቅ፣ ተቋማዊ እንዲሆን መረባረቡ ከድህነትም ከችግርም ለመውጣት መልካም መንገድ መሆኑ አያጠያይቅም፡፡

ዕርዳታ የሚያስፈልጋቸውን ወገኖችን በተገቢው መንገድ ለመደገፍ የሚያስችል ቋሚ አሠራር ቢዘረጋ፣ አገልጋይነትንና በጎ ማድረግን እስካሁን ከተመለከትነውም በላይ በማድረግ የችግር ሸክማችንን ቀስ በቀስ መጣል የምንችልበት መንገድ ይሆናል፡፡ የመንፈስ ርካታን የሚያሰፍነው እንዲህ ያለው ተግባር፣ አብሮነትን ለማጎልበት የሚኖረውን አስተዋጽኦም መዘንጋት የለብንም፡፡

በጎ በማድረግ እንቅስቃሴ ውስጥ በተለየ መልኩ ልንመለከተው የምንችለው ነገር ቢኖር፣ ከዚህ ቀደም ተመሳሳይ ሥራ ሠርተው ነገር ግን ሥራቸውን ሰዎች እንዲያውቁባቸው ተቆጥበተውና ተጠንቅቀው፣ ከልብ በመነጨ ፍላጎት ያደረጉት መልካም ተግባር ይበል የሚያሰኝ ነው፡፡ አደረኩ ለማለት ሳይሆን፣ እንደ ዜጋ አቅም በፈቀደ መጠን ሌሎችን መደገፍ ባለመቻል ሊመጣ የሚችለውን ማኅበራዊ ቀውስ በመከላከል ረገድ አስተዋጽኦው ምን እንደሚመስል ስናስብ፣ በጎ ሰዎችና ሥራዎቻቸው ይበርክቱ፣ ያኑርልን ማለታችን የግድ ነው፡፡ ጉዳዩን ከኢኮኖሚ አንፃር ልናየውም እንችላለን፡፡ በቅርቡ ሆስፒታሎች፣ ትምህርት ቤቶችና ሌሎችም ማኅበራዊ ተቋማትን በበጎ ፈቃደኝነት የመጠገኑ ሥራ በመደበኛው የግንባታ አሠራር ቢከናወን ይጠይቅ የነበረው ካፒታል ምን ያህል እንደሚሆን፣ በመንግሥት ላይም የሚያስከትለው ከፍተኛ ወጪ ቀላል አይደለም፡፡ እነዚህ ተቋማት ለተሻለ አገልግሎት ታድሰውና ተጠግነው ዝግጁ የሆኑት በጥቂት ወራት ውስጥ ነው፡፡ በመደበኛው አሠራር ቢሆን ግን ጨረታ ወጥቶ፣ ሥራው ለተቋራጭ ተሰጥቶ ቢሆን ኖሮ የሚጠየቀው የገንዘብ መጠን ከፍተኛ በሆነ ነበር፡፡ ይህ ብቻ አይደለም፡፡ ለጨረታ ዝግጅት ተብሎ የሚፈጀው ጊዜ አንዱ በገንዘብ ቢተመን ምን ያህል ነው? የጨረታውን አሸናፊ ለመለየት የሚወስደው ጊዜና የተንዛዛው ሒደት፣ በመሀሉ ለራሳቸው ጥቅም ሥሌት ውስጥ የሚገቡ የአቋራጭ ቀበኞችን ሌብነትም ያስቀረ ነው፡፡ ሥራውን በተገቢው መንገድ ከመሥራት ይልቅ ከተመደበው በጀት ቆንጥረው ገለል የሚሉ የጨረታ አሸናፊዎች የትዬለሌ እንደሆኑ የቅርብ ጊዜ ትውስታ ነው፡፡

ስለዚህ ባለፈው ዓመት በተለያዩ የአገሪቱ ክፍሎች የታዩት በበጎ ፍቃደኝነት ላይ የተመሠረቱ አገልጋይነት የበለጠ ሆኖ እንዲቀጥል ያስፈልጋል፡፡ በቀዳሚው ዓመት የተመለከትናቸው የበጎ ፈቃደኝነት ላይ የተመሠረተው ተግባር የበለጠ እንዲጎለብት ዕገዛ ካደረጉ ምክንያቶች አንዱ ከጠቅላይ ሚኒስትሩ ጀምሮ ከፍተኛ የመንግሥት ባለሥልጣናትና ታዋቂ ሰዎች የተለያዩ የኅብረተሰብ ተወካዮች አቅመ ደካሞችን ባሉበት ቦታ ድረስ በመሄድ አርዓያ መሆን መቻላቸውን ግን መዘንጋት የለብንም፡፡

በበጎ አድራጎት ተግባር ዜጎች በዚህ መልኩ የመነሳሳታቸውን ያህል ከሸመታና የገበያ ሥርዓታችን አንፃር ያየነው ተግባር ግን አንገታችንን ያስደፋ እንደነበር መግለጽ ይቻላል፡፡ ዜጎች በኑሮ ውድነት መጎዳታቸው እየታየ የበለጠ እንዲጎዱ መንገድ የሚከፍት ተግባራት ላይ በመሰማራት ይቅር የማይባል ሥራ ሲሠሩ የነበሩ አንዳንድ ወገኖች አሁንም ልብ ይስጣቸው፡፡ በጎ በጎውን ያመላክታቸው ልንላቸው ይገባል፡፡ የበጎነት መገለጫ አንዱ በአግባቡ መነገድና የተመጠነ ትርፍ ማግኘት መሆኑንም አውቀው በምግባር ይሠሩ ዘንድ እንለምናለን፡፡

Latest Posts

- Advertisement -

ወቅታዊ ፅሑፎች

ትኩስ ዜናዎች ለማግኘት