Sunday, June 23, 2024
- ማስታወቂያ -
- ማስታወቂያ -

የኢትዮጵያ መርከቦች ከኤርትራ ወደ ህንድና ቻይና ጭነት ማጓጓዝ መጀመራቸው ተገለጸ

spot_img

ተዛማጅ ፅሁፎች

የኢትዮጵያ የባህር ትራንስፖርትና ሎጂስቲክስ አገልግሎት ድርጅት ከሚያስተዳድራቸው አንዱ የሆነው መርከብ ድርጅት፣ የኤርትራ ጭነቶችን ወደ ህንድና ቻይና በማጓጓዝ ላይ እንደሚገኝ አስታወቀ፡፡ ሁለቱ አገሮች እንደ አዲስ ግንኙነታቸውን ከጀመሩ ወዲህ፣ ከ35,300 ቶን በላይ የዚንክ ማዕድን እንዳጓጓዘ ድርጅቱ አስታውቋል፡፡

በሦስት የኢትዮጵያ መርከቦች አማካይነት የዚንክ ማዕድን ወደ ህንድና ቻይና እንዳጓጓዘ ከድርጅቱ የተገኘው መረጃ ያስረዳል፡፡ በድርጅቱ መርከቦች ከተጓጓዙት ማዕድኖችም የኢትዮጵያ ንግድ መርከብ 1.1 ሚሊዮን ዶላር ማግኘቱ ተጠቁሟል፡፡

ቅዳሜ መስከረም 10 ቀን 2012 ዓ.ም. መግለጫ የሰጠው ድርጅቱ መቐለ፣ ፊንፊኔና ጋምቤላ በተሰኙት መርከቦች አገልግሎት መስጠቱን አስታውቋል፡፡

የባህር ትራንስፖርትና ሎጂስቲክስ አገልግሎት ድርጅት ዋና ሥራ አስፈጻሚ አቶ ሮባ መገርሳ፣ ለኤርትራ እየቀረበ የሚገኘውን የመርከብ አገልግሎት ጨምሮ የተቋሙን አፈጻጸም በማስመልከት ማብራሪያ ሰጥተዋል፡፡  

የኢትዮጵያ ብሔራዊ ባንክን መረጃ መሠረት በማድረግ እንደገለጹት፣ በ2011 ዓ.ም. የአገሪቱ አጠቃላይ የገቢ ጭነት መጠን 8.4 ሚሊዮን ቶን ነበር፡፡ በተጨማሪም የወጪ ንግድ ጭነት 280 ሺሕ ቶን ማጓጓዝ የተቻለ መሆኑን፣ ከዚህ ውስጥ አብዛኛው የቡና ምርት እንደነበር ዋና ሥራ አስፈጻሚው አብራርተዋል፡፡

በድርጅቱ የተጓጓዘው የመልቲ ሞዳል ኮንቴይነር ከቀደሙት ዓመታት በቁጥር ብልጫ የታየበት ሲሆን፣ 192 ሺሕ ኮንቴይነሮች የባህር ትራንስፖርት አገልግሎት ማግኘታቸው ተጠቁሟል፡፡ ከፋይናንስ አኳያም ድርጅቱ ከሰጣቸው አገልግሎቶች በ2011 ዓ.ም. 18.8 ቢሊዮን ብር ገቢ ማግኘቱን አስታውቋል፡፡

ከቅርብ ጊዜ ወዲህ አገልግሎቱን ለአፍሪካ አገሮች ማዳረስ የጀመረው ድርጅቱ፣ የሴኔጋል ጭነቶችን ጨምሮ የበርካታ አገሮችን ጭነቶች ወደ ቻይናና ወደ ሌሎችም አገሮች ማጓጓዝ እንደጀመረ ማስታወቁ ይታወሳል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች