Wednesday, July 24, 2024

ክቡር ሚኒስትሩ ደላላው ወዳጃቸው ደውሎላቸው በስልክ እየተነጋገሩ ነው

[ክቡር ሚኒስትሩ ከአማሪካያቸው ጋር ቢሮአቸው ውስጥ እየተነጋገሩ ነው]

  • አንተ ይኼንን ማኅበራዊ ሚዲያ የሚባል ነገር ትጠቀማለህ እንዴ?
  • ክቡር ሚኒስትር በሚገባ ነዋ፡፡
  • ምን ያደርግልሃል?
  • ኧረ እንዲህ አይባልም ክቡር ሚኒስትር፡፡
  • ለምን?
  • በዚህ ዘመን ሁሉም ሰው መጠቀም አለበት ክቡር ሚኒስትር፡፡
  • እኔ ግን መጠቀም አልፈልግም፡፡
  • ክቡር ሚኒስትር ካልተጠቀሙማ እንደሌሉ ይቁጠሩት፡፡
  • እኮ ለምን?
  • ሁሉም ባለሥልጣናት ይጠቀማሉ እኮ፡፡
  • እኔ ግን ደስ አይለኝም፡፡
  • ክቡር ሚኒስትር ካልተጠቀሙማ በሥልጣን ላይ መቆየትዎ ያጠራጥረኛል፡፡
  • ምን ማለትህ ነው?
  • በዚህ ጊዜ የሚፈለገው መረጃ ያለው ተሿሚ ነው ክቡር ሚኒስትር፡፡
  • እኔ እኮ የምሰማው ሁሉ እያስጠላኝ ነው፡፡
  • ክቡር ሚኒስትር  ማስተካከል የሚቻለው እኮ እየተጠቀሙ ነው፡፡
  • ሰሞኑን ደግሞ የለየለት አስፀያፊ ነገር መጻፉን ሰማሁ ልበል?
  • ስለምን ጉዳይ ክቡር ሚኒስትር?
  • አንዷ ለመተቸት ብላ በግጥም ተሳደበች ተባለ፡፡
  • ክቡር ሚኒስትር ማንም ሰው መንግሥትን የመተቸት መብት አለው፡፡
  • በትችት ስም መሳደብ ነውር እኮ ነው፡፡
  • ከዚያ የባሰውን ስድብ አልሰሙም ለካ?
  • የምን ስድብ?
  • ለገጣሚዋ የተሰጣት ምላሽ ነዋ ክቡር ሚኒስትር፡፡
  • ስድቡ ምን ይሆን?
  • በጽሑፍም በንግግርም ለመግለጽ ይከብዳል፡፡
  • ማኅበራዊ ትስስሩ ይህንን ያህል ከዘቀጠማ ምን ያደርግልኛል?
  • ክቡር ሚኒስትር ለመውቀስም ሆነ ለማስተካከል ውስጡ መገኘት ጥሩ ነው፡፡
  • እኔ ግን ቀፎኛል፡፡
  • እንግዲያውስ ችግር አለብዎት ክቡር ሚኒስትር፡፡
  • የምን ችግር ነው ያለብኝ?
  • ሥልጣን ላይ ሆነው ትችት መስማት አይፈልጉም ማለት ነው፡፡
  • አንተ ሰውዬ አብደሃል እንዴ?
  • አብደሃል ሲሉ አንድ ነገር ትዝ አለኝ፡፡
  • ምንድነው እሱ?
  • ከአጠቃላይ ሕዝባችን 27 በመቶ ወፈፍ ያደርገዋል የሚል ጥናት መውጣቱን አልሰሙም ክቡር ሚኒስትር?
  • አንተ ለይቶልሃል ማለት ነው፡፡
  • ጥናቱ እኮ ይፋ የተደረገው የዓለም ጤና ቀን ሲከበር ነው፡፡
  • ሃያ ሰባት በመቶ አብደናል እያልከኝ ነው?
  • አሁንማ ቁጥራችን ሳይጨምር አይቀርም ክቡር ሚኒስትር፡፡
  • እንዴት ሆኖ?
  • እኔና እርስዎን ጨምሮ፡፡
  • ይኼ ፌስቡክ የሚሉት ነገር በእርግጥም አሳብዶሃል፡፡
  • እርስዎም ይቀላቀሉና ይለይልን ክቡር ሚኒስትር፡፡
  • ምን አልክ አንተ?
  • ብቻዎን እንዳይቀሩ!

[ክቡር ሚኒስትሩ ከአንድ የተቃዋሚ ፖለቲካ ፓርቲ መሪ ጋር ሆቴል ውስጥ ድንገት ተገናኝተው ማውራት ጀመሩ]

  • እንዴት ነህ እባክህ ክቡር ተቃዋሚ?
  • አለንም የለንም ለማለት የሚያስቸግር ጊዜ ላይ ነን ክቡር ሚኒስትር፡፡
  • ምን ተገኘ ደግሞ?
  • እዚህ አገር ሐሳብን በነፃነት መግለጽ አሁንም በጠላትነት ያስፈርጃል እኮ፡፡
  • አንተ አልተደመርክም ማለት ነው?
  • መደመር ማለት እኮ መጨፍለቅ አይደለም ክቡር ሚኒስትር፡፡
  • ምን ሆነሃል ታዲያ?
  • ጉልበተኛና ተሳዳቢ እየበዛ ነው የምልዎት፡፡
  • በለውጥ ወቅት ያጋጥማል እኮ፡፡
  • ለውጥ በሥርዓት መመራት አለበት ነው የምልዎት፡፡
  • የለውጡ ተጠቃሚ እንደመሆንህ ማገዝ አለብህ፡፡
  • ምን አግኝቼ ነው የተጠቀምኩት?
  • አንተ ከስደት ደጋፊዎችህ ደግሞ ከእስር ነፃ መውጣታችሁን እንዳትረሳ፡፡
  • ለውጡ የጋራችን አይደለም እያሉኝ ነው?
  • ለውጡ የጋራ ቢሆንም ድርሻ ላይ እንለያያለን፡፡
  • ምን እያሉኝ ነው ክቡር ሚኒስትር?
  • እያልኩህ ያለሁት እንደ ፖለቲከኛ አውራ ነው፡፡
  • እኔ እንደምን እያወራሁ ነው ታዲያ?
  • እንደ ሶሻል ሚዲያ አርበኞችህ ነዋ፡፡
  • እኔ እዚያ ሠፈር እንደሌለሁበት ብነግርዎትስ?
  • አትሳተፍም ማለት ነው?
  • አዎ ክቡር ሚኒስትር፡፡
  • አንድ ነገር ልምከርህ?
  • እሺ ይምከሩኝ፡፡
  • አቅምህን አውቀህ ብትሳተፍ ይሻልሃል፡፡
  • ለፓርቲዬ ካልጠቀመው ምን ያደርግልኛል?
  • ቢያንስ የሚባለውን ነገር ሁሉ ታውቅበታለህ፡፡
  • እዚያ ሠፈር እኮ ብልግና በዝቷል ክቡር ሚኒስትር፡፡
  • ቢጤዎችን አደራጅተህ ታገል፡፡
  • እኛ እኮ እንደ እናንተ በጀት የለንም፡፡
  • ለሌላ ነገር ግን አትሰንፉም፡፡
  • ለምሳሌ?
  • ስም ለማጥፋት፡፡
  • ለእሱማ እናንተ አትብሱም እንዴ?
  • እኛ ደግሞ ምን እናደርጋለን?
  • ሆድ ይፍጀው!

[ክቡር ሚኒስትሩ ዘንድሮ ዩኒቨርሲቲ ከሚገባ ልጃቸው ጋር እያወሩ ነው]

  • አንተ መቼ ነው ትምህርት የምትጀምረው?
  • ከአንድ ሳምንት በኋላ ተብሏል ዳዲ፡፡
  • በል እንግዲህ ጠንቀቅ እያልክ፡፡
  • ምኑን ነው የምጠነቀቀው?
  • የሶሻል ሚዲያ አጠቃቀምህን ነዋ፡፡
  • ዳዲ አይዞህ አታስብ፡፡
  • በተለይ ከአንተ ስድብ የሚባል ነገር እንዳልሰማ፡፡
  • ዳዲ እኔ ከጓደኞቼ ጋር ነው ሐሳብ የምለዋወጥበት፡፡
  • ምን ዓይነት ሐሳብ?
  • አለ አይደል  ስለፊልም፣ ሙዚቃ፣ እና…
  • እና ምን?
  • አልፎ አልፎ  ስለ ‹ቺኮች› ነው ዳዲ፡፡
  • ‹ቺኮች› ደግሞ ምንድናቸው?
  • ዳዲ አለ አይደል ስለ ‹ገርል ፍሬንዶቻችን› ነው፡፡
  • የምን ‹ገርል ፍሬንድ› እባክህ?
  • ዳዲ አታሳፍረኛ?
  • አንተ መማር ሲገባህ እንዲህ ዓይነት ነገር ምን ያደርግልሃል?
  • እንዴ ዳዲ ምን ማለትህ ነው?
  • አንተ ራስህ ምን ማለትህ ነው?
  • እኔ እኮ 18 ዓመት ሞልቶኛል ዳዲ?
  • ዩኒቨርሲቲ እስክትጨርስ በእኔ ቁጥጥር ሥር ነህ፡፡
  • ዳዲ ሕጉ እኮ የሚለው 18 ዓመት ድረስ ነው፡፡
  • ሕጉ እንደዚያ ካለ በል እንግዲህ ራስህን ቻል፡፡
  • እስከ 21 ዓመቴ ደግሞ አስፈላጊውን የማሟላት ኃላፊነት አለብህ ዳዲ፡፡
  • አንተን የሚመችህ ነገር ብቻ ነው የምትነግረኝ?
  • በእናንተ ጊዜ ወላጆች ቤት ብዙ ትቆዩ አልነበር?
  • ማን ነው የነገረህ እባክህ?
  • አጎቴ ነው የነገረኝ ዳዲ፡፡
  • ምን ብሎ?
  • አባትህ በ30 ዓመቱ ነው ከቤት ራሱን ችሎ የወጣው ብሎ ነዋ፡፡
  • ሌላስ ምን አለህ?
  • አባታችን ከእናትህ ጋር ባያጋባው ኖሮ የተወለደበት አልጋ ላይ ያረጅ ነበር ብሎኛል፡፡
  • ወሬኛ በለው፡፡
  • እውነት ነው አይደል ዳዲ?
  • ለማንኛውም አርፈህ ተማር፡፡
  • እሺ ዳዲ፡፡
  • በፌስቡክ አንዳችም መጥፎ ነገር እንዳትጽፍ፡፡
  • እሺ ዳዲ፡፡
  • አንድ ነገር ከሰማሁ ወዮልህ፡፡
  • ዳዲ ምን ሆነሃል?
  • የፌስቡክ ስድብ መስማት ሰልችቶኛል፡፡
  • ማን ሰደበህ?
  • እኔን የሰደበኝ የለም፡፡
  • አሁን ገባኝ፡፡
  • ምኑ ነው የገባህ?
  • መንግሥታችሁ እየተሰደበ ነው አይደል?
  • ኧረ እሱስ ዕዳው ገብስ ነው፡፡
  • አንዳንዶቹ ባለሥልጣናትና ደጋፊዎቻችሁ ትችት አንሰማም እያሉ ነው አሉ፡፡
  • ማን ነገረህ?
  • እያየሁ ነዋ ዳዲ፡፡
  • ምኑን ነው ያየኸው?
  • ሲሳደቡና ሲያስፈራሩ ነዋ፡፡
  • ምን እያሉ?
  • ለመናገር ይከብዳል!

[ክቡር ሚኒስትሩ ደላላው ወዳጃቸው ደውሎላቸው በስልክ እየተነጋገሩ ነው]

  • ዛሬ ምን ፈልገህ ነው የደወልከው?
  • ክቡር ሚኒስትር አንድ አሪፍ ቢዝነስ ሰምቼ ነው፡፡
  • ምን ይሆን ደግሞ?
  • ከስልክ ይልቅ በአካል ብንገናኝስ?
  • ንገረኝ አትፍራ፡፡
  • ለምን አልፈራ ክቡር ማኒስትር?
  • ምን አስፈራህ?
  • ቢጠለፍስ ክቡር ሚኒስትር?
  • ደኅንነቱ የተጠበቀ ስልክ ነው ያለኝ፡፡
  • ኧረ ይተው ክቡር ሚኒስትር፡፡
  • ምነው?
  • በዚህ ዘመን ሚስጥራዊነት የሚባል ነገር የለም፡፡
  • እኮ ለምን?
  • አዳማጩ ብዙ ነው ክቡር ሚኒስትር፡፡
  • አይዞህ አትፍራ፡፡
  • እኔ ለእርስዎ ብዬ ነው ክቡር ሚኒስትር፡፡
  • ለእኔ ምን?
  • እርስዎ ባለሥልጣን ስለሆኑ ትኩረት ይስባሉ፡፡
  • እና?
  • እናማ ይጠንቀቁ ለማለት ነው፡፡
  • ባልጠነቀቅስ?
  • ጉድዎ ፌስቡክ ላይ ይዘረገፍልዎታል ክቡር ሚኒስትር፡፡
  • ማነው ዘርጋፊው እባክህ?
  • ሥልጣንና ጥቅም ፈላጊው በዝቷል ነው የምልዎት፡፡
  • የእኔ መረጃ ከየት ይገኛል?
  • ዘንድሮ ማፈትለኪያው አይታወቅም፡፡
  • አንተ ይህንን ሁሉ እንዴት አወቅህ?
  • የስንቱን ገመና አይደል እንዴ ፀሐይ የሚሞቀው ክቡር ሚኒስትር?
  • እና ተጠንቀቅ ነው የምትለኝ?
  • መጠንቀቁ እንዳለ ሆኖ ብቻዎን ሲሆኑም ግድግዳውን አይመኑ፡፡
  • ይኼንን ያህልማ ፈሪ አታድርገኝ፡፡
  • ክቡር ሚኒስትር የዘንድሮ ሰው መምጫው ከብዷል፡፡
  • አንተ ሰውዬ ምን ሆነሃል?
  • ይኼ የድለላ ሥራ ብዙ ነው የሚያሰማኝ፡፡
  • ምን ሰማህ ደግሞ?
  • የታዋቂ ሰዎች እያንዳንዱ ጥቃቅን ነገር ሳይቀር ሰው አፍ ውስጥ ነው ያለው፡፡
  • ማስረጃ የሌለው ወሬ ምን ይረባል ብለህ ነው?
  • በአሁኑ ጊዜ ማንም ለማስረጃ አይጨነቅም፡፡
  • ለምንድነው ታዲያ የሚጨነቀው?
  • ቀጠን ያለች እውነት ካለች በቂ ነው ክቡር ሚኒስትር፡፡
  • ከዚያስ እባክህ?
  • ከዚያማ በዚያች ቀጭን እውነት ላይ የሐሰት መረጃ ማዥጎድጎድ ነው፡፡
  • ጥቅሙ ምንድነው?
  • አንደኛ ጠላት የሚባልን ለማጥቃት፣ ሁለተኛ ወዳጅ የሚባልን ደግሞ በቁጥጥር ሥር ለማዋል፡፡
  • አንተ ድራማ ነው እንዴ የምታወራው?
  • ወይ ድራማ ክቡር ሚኒስትር?
  • ምንድነው ታዲያ?
  • ሴራ ነው የምልዎት፡፡
  • የምን ሴራ?
  • ጠልፎ መጣያ!

በብዛት የተነበቡ ፅሁፎች

- Advertisment -

ትኩስ ፅሁፎች

[ክቡር ሚኒስትሩ ከተቋሙ የሠራተኞች ማኅበር አመራር ጋር እየተወያዩ ነው]

ጤና ይስጥልኝ ክቡር ሚኒስትር? ሰላም! በአስቸኳይ እንደፈለጉኝ መልዕክት ደርሶኝ ነው የመጣሁት። አዎ።...

የሱዳን ጦርነትና የኢትዮጵያ ሥጋት

የሱዳን ጦርነት ከጀመረ አንድ ዓመት ከአራት ወራት አስቆጠረ፡፡ ጦርነቱ...

ግለሰብ ነጋዴዎችን በአስገዳጅነት የንግድ ምክር ቤት አባል ለማድረግ ያለመው ረቂቅ አዋጅ ተከለሰ

በምትኩ የንግድ ተቋማት በአስገዳጅነት የንግድ ምክር ቤት አባል ይሆናሉ...

አሳርና ተስፋ!

ከቱሉ ዲምቱ ወደ ቦሌ ጉዞ ልንጀምር ነው፡፡ ገና ከመንጋቱ...

የአገሪቱን የፖለቲካ ዕብደት ለማርገብ የኦሮሞ ፖለቲከኞች ሚና ምን ይሁን?

በያሲን ባህሩ   የኦሮሚያ ብልፅግና      በአገር ደረጃ የብሔር ፖለቲካ በሥራ...
spot_img

ተዛማጅ ፅሁፎች

[ክቡር ሚኒስትሩ ከተቋሙ የሠራተኞች ማኅበር አመራር ጋር እየተወያዩ ነው]

ጤና ይስጥልኝ ክቡር ሚኒስትር? ሰላም! በአስቸኳይ እንደፈለጉኝ መልዕክት ደርሶኝ ነው የመጣሁት። አዎ። ይህንን ደብዳቤ እየውና በጠየቁት መሠረት እንዲፈጸምላቸው አድርግ። ጉዳዩ ምንድነው? ከአንድ ክልል የቀረበ የትብብርና ድጋፍ ጥያቄ ነው። የምን ትብብር...

[ክቡር ሚኒስትሩ የቅርብ ወዳጃቸው ከሆነች አንድ ባለሀብት የተደወለላቸውን ስልክ አንስተው በኮሪደር ልማቱ ላይ የምታቀርበውን ቅሬታ እየሰሙ ነው]

ክቡር ሚኒስትር እኔ የኮሪደር ልማቱ ላይ ተቃውሞም ሆነ ጥላቻ እንደሌለኝ የሚያውቁ ይመስለኛል? በዚህ እንኳን አትታሚም።  የእውነቴን ነው ክቡር ሚኒስትር። አውቃለሁ ስልሽ? ለኮሪደር ልማቱ አዋጡ ሲባልም ያለማመንታት አምስት ሚሊዮን...

[ክቡር ሚኒስትሩ በችግኝ ተከላ ፕሮግራም ላይ ሳይገኝ ከቀረው አንድ የተቋማቸው ባልደረባ የሆነ የተቃዋሚ ፓርቲ አባልን አስጠርተው እያናገሩ ነው]

ለምንድነው በዚህ አገራዊ ፋይዳ ባለው ፕሮግራም ላይ ያልተገኘኸው? ክቡር ሚኒስትር ህሊናዬ አልፈቀደልኝም። መቃወምና መተቸት ብቻ ውጤት የሚያመጣ መስልዎህ ከሆነ ተሳስተሃል። አልተሳሳትኩም ክቡር ሚኒስትር? ቆይ የመጀመሪያ ዓመት የችግኝ ተከላ...