Wednesday, February 1, 2023
- Advertisment -
- Advertisment -

በንፁኃን ሕይወት የሚቆምሩ መጠየቅ አለባቸው!

ኢትዮጵያ አሁንም የግጭት ሰለባ እየሆነች ነው፡፡ በፖለቲካ ኃይሎች መካከል እየጦዘ ያለው ቅራኔ፣ ለንፁኃን ሕይወት ደንታ ቢስ መሆኑን እያሳየ ነው፡፡ ሰሞኑን በማኅበራዊ መገናኛ ትስስሮች ውስጥ ትኩረት የሳበውና በተዘጋ መንገድ ላይ በአሳዛኝ ገጽታ ተከፍቶ የሚታየው ሕፃን የኢትዮጵያን ወቅታዊ አስፈሪ ሁኔታ ብቻ ሳይሆን፣ የደረስንበትን አሳፋሪ ገመናችንን ግልጽልጽ አድርጎ ያሳያል፡፡ የሕፃኑን የተሰበረ አሳዛኝ ገጽታ እያንዳንዱ ኢትዮጵያዊ እንደ ራሱ አድርጎ መውሰድ ካልቻለ፣ ፅንፈኝነትና ጀብደኝነት የተሞላው የአገሪቱ ፖለቲካ የንፁኃንን ደም ማፍሰስ ይቀጥላል፡፡ ፖለቲካውን እንመራለን ከሚሉ ታዋቂ ሰዎችና ስብስቦች ቁጥጥር ውጪ እየሆነ ያለው የኢትዮጵያ ሁኔታም፣ ሕግን ከማክበርና ከማስከበር በላይ እየሄደ የጉልበት መፈተሻ መሆኑም ተባብሶ ይቀጥላል፡፡ ከአምባገነንነት ወደ ዴሞክራሲያዊ ሥርዓት ለመሸጋገር ጥርጊያውን ማመቻቸት ቀርቶ፣ በሰላም ወጥቶ መግባት ለአደጋ ተጋልጧል፡፡ እንኳንስ በሥርዓት ለመነጋገርና ቅራኔን ለመፍታት፣ ሥርዓት የሚባለው ጽንሰ ሐሳብ ትርጉሙ ጠፍቷል፡፡ ሕግ ለማስከበር ሕጋዊ አሠራርን መጠቀም ሲገባና በሕግ መዳኘት ያለበትም ሕጋዊውን መስመር መከተል ሲገባው፣ ለማመን በሚያዳግት ሁኔታ ያልተጠበቁ ድርጊቶች ተፈጽመው አገር ይታመሳል፡፡ የንፁኃን ሕይወት እየተቀጠፈ የአገር አንጡራ ሀብት ይወድማል፡፡ የኢትዮጵያ ሕዝብም ላዩ ላይ በሚቆምሩ ኃይሎች መከራውን ያያል፡፡ ለንፁኃን ሕይወት መጥፋት ኃላፊነት ያለባቸው በሙሉ ተጠያቂነት ሊኖርባቸው ይገባል፡፡ ተጠያቂነት እየጠፋ ነው ሥርዓተ አልበኝነት የነገሠው፡፡

መንግሥት በዕለት ተዕለት ሥራውም ሆነ አንዳች ያልተጠበቀ ክስተት ሲያጋጥም የሚያወጣቸው የተምታቱ መግለጫዎች፣ በተጨማሪም በሌሎች ወገኖች የሚወጡ መረጃዎችና ትንታኔዎች ኃላፊነት እየጎደላቸው ብዙ ጉዳቶች ደርሰዋል፡፡ መንግሥት ሕግ አስከብራለሁ ብሎ ሲንቀሳቀስ ሕጋዊ አሠራሮችን በሚገባ መጠቀም ሲገባው፣ በሚፈጽማቸው ያልተገቡ ድርጊቶች ሳቢያ ግጭት ይቀሰቀሳል፡፡ ይህም በተደጋጋሚ ታይቷል፡፡ አጋጣሚውን ለራሳቸው አጀንዳ መጠቀም የሚፈልጉ ኃይሎችም ችግሩን በማባባስ ደም አፋሳሽ ግጭት ይቀሰቅሳሉ፡፡ እነዚህን ድርጊቶች በሚፈልጉት ዓውድ የሚተነትኑ ደግሞ በእሳት ላይ ቤንዚን ያርከፈክፋሉ፡፡ ሰሞኑን ኢትዮጵያን የገጠማት አደገኛ ክስተት እንዲህ ዓይነቱ ወልጋዳ አተያይ የፈጠረው ነው፡፡ ኢትዮጵያን ወደፊት የሚያራምድ ሳይሆን ወደኋላ የሚመልስ፣ የሕዝቡን የዘመናት ጥያቄ በቅጡ የሚመልስ ሳይሆን የሚያወሳስብ፣ ከብሔራዊ መግባባት ይልቅ ለእርስ በርስ ጦርነት የሚጋብዝ፣ ኃላፊነትን በአግባቡ የመወጣት መንገድን ከማመላከት ይልቅ ጉልበት ያለው ያሻውን ማድረግ እንደሚችል የሚያስገነዝብና በአጠቃላይ ዕድገት ሳይሆን ውድቀትን የሚጋብዝ ነው፡፡ አደገኛና ለማይወጡት ቀውስ የሚዳርግ  ሁኔታ ውስጥ መግባታችንን የሚጠቁም ነው፡፡ ነገሮች ከቁጥጥር ውጪ እየሆኑ የአገርም የሕዝብም ህልውና እያሳሰበ ነው፡፡ ከዚህ አደገኛ አጣብቂኝ ውስጥ መውጣት ያስፈልጋል፡፡ ካልተቻለ ግን መዘዙ ከባድ ነው፡፡ ተጠያቂነት መኖር አለበት፡፡

በአገሪቱ ፖለቲካ ውስጥ በቀጥታም ሆነ በተዘዋዋሪ የሚሳተፉ ኃይሎች ኃላፊነት እየጎደላቸው ንፁኃን እየተጎዱ ነው፡፡ የአገር አንጡራ ሀብት እየወደመ ነው፡፡ ሰላምና መረጋጋት እየጠፋ ከቅርብ ጊዜ ወዲህ መለወጥ የጀመረው ገጽታ እየተበላሸ ነው፡፡ ልዩነትን በአግባቡ ማስተናገድ ባለመፈለጉ ብቻ ከሕጋዊነት ይልቅ ሕገወጥነት እየበረከተ ነው፡፡ ከፖለቲካ ሥልጣንና ከሌሎች ጥቅማ ጥቅሞች በላይ ሕዝብና አገር መኖራቸው እየተዘነጋ ነው፡፡ በሕዝብ ስም መነገድ የተለመደ የቁማር መጫወቻ ስለሆነ፣ በዚህ የዋህ ሕዝብ ስም የማይነግድ የለም፡፡ በጠረጴዛ ዙሪያ ተቀምጦ መነጋገር ባልተለመደበት የኢትዮጵያ ኋላቀር ፖለቲካ ምክንያት፣ ፖለቲከኞች ሒሳባቸውን የሚያወራርዱት የሕዝቡን ሰላም በመንሳት ነው፡፡ አሁን ደግሞ ደጋፊን አሰባስቦ  ለሚፈለገው ዓላማ በማሰማራት፣ የሕዝብን ሰላምም ሆነ የአገርን ደኅንነት ማቃወስ የተለመደ ድርጊት ሆኗል፡፡ ኢትዮጵያውን የፈለጉትን የፖለቲካ አቋም በመያዝ የመደራጀትም ሆነ ፖለቲካዊ እንቅስቃሴ የማድረግ መብት ሊኖራቸው ይገባል፡፡ ይህ መብት ግን ኃላፊነትን ይጠይቃል፡፡ ይህ ኃላፊነት ልዩነትን ከማክበር ጀምሮ በሕግ መገዛትን ያካትታል፡፡ ራስን ከሕግ በላይ በማድረግ የፈለግኩትን የማድረግ መብት አለኝ ማለት አይቻልም፡፡ በዚህ ዓይነቱ ሥርዓተ አልበኝነት አገር ሰላም አይሆንም፣ የሕዝብ ደኅንነትም ዋስትና የለውም፡፡ ሌላው ቀርቶ ራስን ከጥቃት ለመከላከል እንኳ ሕግን መሣሪያ ማድረግ የማይታለፍ ኃላፊነት መሆን አለበት፡፡ ነውጠኝነት አገር ያፈርሳል እንጂ አይገነባም፡፡ ነውጠኞች በሕግ መጠየቅ አለባቸው፡፡

በአሁኗ ኢትዮጵያ ያኮረፈ ሁሉ እየተነሳ መንገድ ሲዘጋ፣ የዜጎችን ሕጋዊ የመንቀሳቀስ መብት ሲገድብ፣ ጥቃት ሲፈጽም፣ ሲዘርፍና ሲያቃጥል እንዴት ነው ስለሕግ የበላይነት መነጋገር የሚቻለው? የመንግሥት ሹማምንትም ሆኑ የፀጥታ ኃይሎች በሕግ ከተሰጣቸው ወሰን አልፈው ሕግ በማስከበር ስም ተገቢ ያልሆነ ድርጊት የሚፈጽሙ ከሆነ፣ ሕግ ማክበርም ሆነ ማስከበር እንዴት ይቻላል? የፖለቲከኞች ፍላጎት ከሕዝብና ከአገር ህልውና በላይ ሲሆን ማስቆም ካልተቻለ፣ ስለየትኛው ዴሞክራሲያዊ ሥርዓት ግንባታ ነው የምንነጋገረው? ልዩነት በተፈጠረ ቁጥር ከንግግርና ከድርድር በመሸሽ በጉልበት እንሞካከር ከተባለ፣ እንዴት ሆኖ ነው ለሕዝብና ለአገር እየሠራን ነው የሚባለው? አገር ከግለሰቦችና ከስብስቦች በላይ መሆኗ እየታወቀና ሕዝብም የአገሩ የሥልጣን ሉዓላዊ ባለቤት እንደሆነ እየታመነ፣ ግለሰቦች ከአገርና ከሕዝብ በላይ ሆነው ያሻቸውን ማድረግ ከቻሉ የአገር ዕጣ ፈንታ ምን ሊሆን ነው? የወደፊቱ ትውልድስ እንዴት ነው የሚቀረፀው? ሊገኝ ይችላል ተብሎ ከሚታሰብ ሥልጣንና ጥቅም ትርፍራፊ ለማግኘት የሚፈልጉ ወገኖችስ በእሳት ላይ ቤንዚን እያርከፈከፉ እስከ መቼ ይቀጥላሉ? ኢትዮጵያስ በዚህ ሁኔታ መድረሻዋ የት ይሆን? ችግር ባጋጠመ ቁጥር ንፁኃን እስከ መቼ ድረስ ይገደላሉ? ለእነዚህና መሰል ጥያቄዎች ምላሽ ሳይሰጡ በደፈናው መቀጠል ደመነፍሳዊነት ነው፡፡ ይህ ደግሞ ሕዝብና አገርን ይጎዳል፡፡ አገር እንዳትጎዳና የሕዝብ ደኅንነት አስተማማኝ እንዲሆን ተጠያቂነት መኖር አለበት፡፡  

መላው የኢትዮጵያ ሕዝብ ፖለቲከኞችንም ሆነ በተለያዩ መንገዶች የተደራጁ ኃይሎችን መግራት አለበት፡፡ በተለይ የአገር ጉዳይ ያገባናል የሚሉ ኢትዮጵያዊያን በአገራቸው ጉዳይ ዝምታቸውን መስበር አለባቸው፡፡ የኢትዮጵያ የፖለቲካ ምኅዳር ከግዴለሾች፣ ከቂመኞች፣ ለሥልጣን ከሚንገበገቡና አምባገነንነትን በተለየ ቅርፅና ይዘት ሊያመጡ ካሰፈሰፉ ኃይሎች መታደግ ወቅቱ የጣለባቸው ኃላፊነት ነው፡፡ ይህንን ኃላፊነት አለመወጣት በታሪክ ያስጠይቃል፡፡ ከኢትዮጵያ ፖለቲካ ውስጥ ጉልበተኝነትና ሥርዓተ አልበኝነት በፍጥነት መውጣት አለበት፡፡ ለውይይትና ለድርድር ዝግጁ ያልሆኑና ባገኙት አጋጣሚ ሥልጣን እጃቸው ለማስገባት የሚሹ ኃይሎችን ማስቆም ታሪካዊ ግዴታ ነው፡፡ ሥልጣን በሕዝብ ድምፅ የሚገኝ እንጂ፣ ከዚህ ቀደም እንደተለመደው በጉልበተኞች የሚቀማ አለመሆኑን መስማማት የግድ ይላል፡፡ የሕዝብ ድምፅ የሚከበረው የኢትዮጵያ ሕዝብ ከዳር እስከ ዳር ሊግባባበት የሚችል ምርጫ ሲካሄድ ብቻ ነው፡፡ ምርጫ ዴሞክራሲያዊ መሆን የሚችለው ደግሞ ከመነሻው እስከ ፍፃሜው ድረስ ሒደቱ ሁሉንም ወገኖች የሚያግባባ ሲሆን ብቻ ነው፡፡ ወደዚህ ሒደት ለማምራት ግን የአሁኑ አያያዝ የሚያስችል አይመስልም፡፡ መጀመርያ ጉልበተኞች የሚርመሰመሱበት ዓውድ ሰላምና ነፃነቱ ሊረጋገጥ ይገባል፡፡ አሁን ባለው ሁኔታ ግን የሚታይ ነገር የለም፡፡ ፖለቲካው በንፁኃን ሕይወት ሒሳብ እየተወራረደበት ነው፡፡ ንፁኃን ያለ ጥፋታቸው እየተገደሉ ነው፡፡ ይህንን ማስቆም መቅደም አለበት፡፡ ተጠያቂነት ሳይረጋገጥ ወደፊት መራመድ አይቻልም፡፡ በንፁኃን ሕይወት የሚቆምሩ መጠየቅ አለባቸው!

በብዛት የተነበቡ ፅሁፎች

በኦሮሚያ ክልል በስድስት ከተሞች የተዋቀረውን ሸገር ከተማን የማደራጀት ሥራ ተጀመረ

በአዲስ አበባ ዙሪያ በሚገኙ ስድስት ከተሞች የተዋቀረው ሸገር ከተማን...

ኢትዮጵያ በትክክለኛ ግንዛቤ ላይ የተመሠረተ ሕገ መንግሥት ማበጀት እንደሚገባት ማሳሰቢያ ተሰጠ

የኢትዮጵያ ሕገ መንግሥት ከተረቀቀበት ጊዜ አንስቶ ለተለያዩ ጥያቄዎችና ሐሳቦች...

ሕዝብ በሌለበት ሕዝበ ውሳኔ ይካሄድ መባሉን እንደማይቀበለው የቁጫ ምርጫ ክልል አስታወቀ

በኢዮብ ትኩዬ ጥር 29 ቀን 2015 ዓ.ም. ይካሄዳል የተባለውን ‹‹የደቡብ...

‹‹ወልቃይት የአማራ ብቻ ሳይሆን የኢትዮጵያም እስትንፋስ ነው›› አቶ ዓብዩ በለው፣ የልሳነ ግፉአን ድርጅት ፕሬዚዳንት

ለወልቃይት የአማራ ማንነት መከበር የሚታገለው የልሳነ ግፉአን ድርጅት ፕሬዚዳንት...
- Advertisment -

ትኩስ ፅሁፎች

[ክቡር ሚኒስትሩ በወቅታዊ ፀጥታና ደህንነት ጉዳዮች ላይ የቀረበላቸውን ምክረ ሐሳብ እያደመጡ ነው]

ችግሩ ምን እንደሆነ በትክልል ለይተነዋል ግን ግን ምን? በይፋ መናገር አልነበረብንም። ለምን? ችግሩን...

የ12ኛ ክፍል የብሔራዊ ፈተና ውጤትና እንደምታው

የተባበሩት መንግሥታት ድርጅት የትምህርት፣ የሳይንስና የባህል ድርጅት (UNESCO) የትምህርትን...

ንግድ ባንክ ከቪዛና ማስተር ካርድ ጋር ተደራድሮ ያስጀመረው የገንዘብ ማስተላለፊያ ቴክኖሎጂና ፋይዳው

ከውጭ ወደ አገር በሕጋዊ መንገድ የሚላክ ገንዘብ (ሬሚታንስ) መጠን...

ይኼ አመላችን የት ያደርሰን ይሆን?

እነሆ ከፒያሳ ወደ ካዛንቺስ። ‹‹አዳም ሆይ በግንባር ወዝ ትበላለህ››...

የፀረ ሙስና ትግሉ ጅማሮና የመንግሥት ሠራተኛው

በንጉሥ ወዳጅነው   በኢትዮጵያ ሁኔታ የመንግሥት ሠራተኛ ወይም በሲቪል ሰርቪስ ውስጥ...
spot_img

ተዛማጅ ፅሁፎች

የፈተናው ውጤት የፖለቲካው ዝቅጠት ማሳያ ነው!

በ12ኛ ክፍል መልቀቂያ ፈተና ከአጠቃላይ ተፈታኞች ውስጥ 3.3 በመቶ ያህሉ ብቻ ማለፋቸው፣ የአገሪቱን የትምህርት ጥራት ደረጃ በሚገባ ያመላከተ መስተዋት እንደሆነ አድርጎ መቀበል ተገቢ ነው፡፡...

የምግብ ችግር አገራዊ ሥጋት ስለደቀነ ፈጣን ዕርምጃ ይወሰድ!

ኢትዮጵያ ውስጥ የሰው ልጆችን አቅም በብርቱ እየፈተኑ ያሉ በርካታ ችግሮች አሉ፡፡ ከችግሮቹ ብዛት የተነሳ አንዱን ከሌላው ለማስቀደም የማይቻልበት ደረጃ ላይ የተደረሰ ቢሆንም፣ የምግብና የሰላም...

ፖለቲካና ሃይማኖትን እየቀላቀሉ በእሳት መጫወት አይቻልም!

ኢትዮጵያ ውስጥ ከፍተኛ ጥንቃቄ ከሚሹ ጉዳዮች ውስጥ አንዱ ሃይማኖት ነው፡፡ የሃይማኖት ጉዳይ ለተቋማቱና ለምዕመናኑ ብቻ የተተወ ነው፡፡ በሥራ ላይ ባለው ሕገ መንግሥትም መንግሥትና ሃይማኖት...