Friday, March 1, 2024
- Advertisement -
- Advertisement -
ዜናበሞጣ ከተማ በቤተ እምነቶች ላይ የደረሰው ጥቃት እየተወገዘ ነው

በሞጣ ከተማ በቤተ እምነቶች ላይ የደረሰው ጥቃት እየተወገዘ ነው

ቀን:

በአማራ ክልል በምሥራቅ ጎጃም ዞን በሞጣ ከተማ ዓርብ ታኅሳስ 10 ቀን 2012 ዓ.ም. ምሽት አንድ ሰዓት አካባቢ፣ በቤተ ክርስቲያንና በመስጊዶች ላይ የደረሰው የእሳት ቃጠሎ ጥቃት በመላ አገሪቱ እየተወገዘ ነው፡፡

የብዙ ሊቃውንት መፍለቂያው በሆነው በጥንታዊውና ታሪካዊው ሞጣ ቅዱስ ጊዮርጊስ ቤተ ክርስቲያን ላይ የእሳት ቃጠሎ ሙከራ መደረጉ፣ ከዚያ በኋላ ደግሞ መስጊዶችና ሱቆች መቃጠላቸው ይታወሳል፡፡

ድርጊቱ የሁለቱንም ሃይማኖት ተከታዮች የማይወክልና ለዘመናት በአካባቢውና በዙሪያው በፍቅር ያሳለፉትን ጊዜ የማይመጥን አሳፋሪ ድርጊት መሆኑን፣ በክርስቲያንና በሙስሊም ማኅበረሰቦች እየተወገዘ ነው፡፡ የቤተ ክርስቲያኑ ጉልላት ላይ ጭስ በመታየቱ የአካባቢው ሙስሊሞችና ክርስቲያኖች በፍጥነት ተረባርበው የከፋ ጉዳት ሳይደርስ እሳቱን መቆጣጠር መቻሉ አስደሳች ቢሆንም፣ ስሜትን አስቀድመው ይሁን ወይም ሌላ ተልዕኮ ተቀብለው በማይታወቅ ሁኔታ መስጊዶችንና ሱቆችን ያቃጠሉና የዘረፉ በሙሉ በቁጥጥር ሥር ውለው ለሕግ እንዲቀርቡ የሁለቱም እምነት ተከታዮች እየጠየቁ ነው፡፡

- Advertisement -

Video from Enat Bank Youtube Channel.

ለበርካታ ዘመናት ጠንካራ ትስስር ያለው የሞጣ ሙስሊምና ክርስቲያን፣ በጊዜ አመጣሽ የውንብድና ሥራ የሚፈታ እንዳልሆነ ማሳያው ሰሞኑን በሁለቱም በኩል እየተደረገ ያለው የእርስ በርስ መደጋገፍ ዓይነተኛ ምስክር መሆኑን በርካታ የተለያዩ አካባቢ ነዋሪዎች እየተናገሩ ነው፡፡ ሙስሊሙ አብያተ ክርስቲያናትን፣ ክርስቲያኑ መስጊዶችን ላለፉት ሺሕ ዓመታት እየገነቡና እየተጋገዙ እንደኖሩት ሁሉ፣ ያለ ምንም ጣልቃ ገብነት ራሳቸውና የክልሉ መንግሥት የተቃጠሉትን እንደሚገነቡም እየተገለጸ ነው፡፡

በእምነት ተቋማት ላይ የሚደረግ ጥቃት መወገዝ እንዳለበት የሚናገሩት ነዋሪዎች ሰሞኑን በሞጣ አንድ መስጊድ ውስጥ የተያዘ አንገቱ ላይ ማተብ ያሰረ ወጣት፣ በድጋሚ ጥቃት ለማድረስ ሳይሆን ሆን ብሎ የክርስቲያኖችና የሙስሊሞች ትስስር ለማለያየት የተደረገ ሙከራ በመሆኑ መንግሥት ተጠርጣሪውን በደንብ መርምሮ ሥረ መሠረቱን ማወቅና ጠበቅ ያለ ዕርምጃ እንዲወስድ እየጠየቁ ነው፡፡ የክልሉ መንግሥት በክልሉ በሚገኙ የእምነት ተቋማት፣ የትምህርትና የንግድ ተቋማት ላይ በተደጋጋሚ የሚደርሱት ጥቃቶች ላይ ልዩ ትኩረት ሰጥቶ በመሥራት፣ የነዋሪዎችን ሰላም ለማደፍረስ በሚንቀሳቀሱ ሰርጎ ገቦች ላይ ጥብቅ ዕርምጃ እንዲወሰድ ተጠይቋል፡፡

የክልሉ መንግሥት የደኅንነት ግንባታ ቢሮ ኃላፊ አቶ አገኘሁ ተሻገር፣ የክልሉ የሃይማኖት ተቋማት ጉባዔ ቦርድ ሰብሳቢ መልአከ ሰላም ኤፍሬም ሙሉዓለም፣ የክልሉ እስልምና ጉዳዮች ጠቅላይ ምክር ቤት ፕሬዚዳንት ሼክ ሰይድ አህመድ፣ የክልሉ አገረ ስብከት ሊቀ ጳጳስ አቡነ አብርሃምና ሌሎች ከፍተኛ የመንግሥት ባለሥልጣናት ጥቃቱ የተፈጸመባቸውን ቤተ እምነቶች ጎብኝተዋል፡፡ መስጅዶቹን ለመሥራትም ቃል ገብተዋል፡፡ ‹‹ዛሬ ይኼ ነገር ባይፈጠር መልካም ነበር፡፡ ነገር ግን ተፈጥሯል፡፡ ልባችንን የሚነካ ክስተት ነው፡፡ ምናልባትም አላህ የተሻሉ ሆነው መስጅዶቻችን እንዲሠሩ ፈልጎ ይሆናል፡፡ አላህ በሰበብ አስባብ አይደል የሚያደርገው፤›› ያሉት ቀዳሚ ሙፍቲ ዑመር እንድሪስ ሲሆኑ፣ ‹‹ባለሥልጣኖቻችን ለሥልጣን ሲሉ በሕዝቡ ላይ መርዝ ነሰነሱበት እንጂ፣ የኢትዮጵያ ሕዝብ እንዲህ አልነበረም፤›› ብለዋል፡፡ መስጊዶች በአማራ ክልል  ብቻ ሳይሆን በተለያዩ ክልሎች የተቃጠሉ ቢሆንም፣ ድርጊቱ ግን ክርስቲያኑንና ሙስሊሙን እንደማይወክል በርካታ የሁለቱም እምነት ተከታዮች ገልጸዋል፡፡

መንግሥት ሕግ በማስከበር መስክ ከፍተኛ ድክመት እየታየበት መሆኑን የገለጹት ነዋሪዎቹ፣ ጥቃት አድራሾቹን በፍጥነት በቁጥጥር ሥር እንዲውሉ ጠይቀዋል፡፡ ከዚህ በፊት የተፈጸሙ አሳፋሪ ድጊቶችም እንዳይደገሙ ቁጥጥሩን ያጥብቅ ብለዋል፡፡ ኃላፊነታቸውን ያልተወጡ የመንግሥት ሹሞች ተጠያቂ እንዲሆኑም አሳስበዋል፡፡

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

[ክቡር ሚኒስትሩ ወደ መኖሪያ ቤታቸው ሲገቡ ባለቤታቸው በቴሌቪዥን የሚተላለፈውን ዜና በመደነቅ እየተመለከቱ አገኟቸው]

እንዲያው የሚደንቅ ነው እኮ። ምኑ? ዜና ተብሎ በቴሌቪዥን የሚተላለፈው ነገር ነዋ፡፡ ምኑ...

በኦሮሚያ የሚፈጸሙ ግድያዎችና የተጠያቂነት መጥፋት

የካቲት 11 ቀን 2016 ዓ.ም. ቢሾፍቱ አቅራቢያ በሚገኘው የዝቋላ...

የኢትዮጵያ መዋዕለ ንዋይ ገበያ ከሚያስፈልገው ካፒታል ውስጥ 90 በመቶውን ሰበሰበ

እስካሁን 15 ባንኮች የመዋዕለ ንዋይ ገበያው ባለድርሻ ሆነዋል የኢትዮጵያ መዋዕለ...

አዲሱ የንብ ባንክ ቦርድ የባንኩን ካፒታል በአሥር ቢሊዮን ብር ለማሳደግ ማቀዱ ተሰማ

አዲሱ የንብ ኢንተርናሽናል ባንክ የዳይሬክተሮች ቦርድ የባንኩን ካፒታል በአሥር...