Monday, April 15, 2024
- Advertisment -
- Advertisment -

ክቡር ሚኒስትሩ በሌላ ሚኒስትር እየተገመገሙ ነው

[ክቡር ሚኒስትሩ አማካሪያቸውን አስጠሩት]

  • አቤት ክቡር ሚኒስትር?
  • የት አለ ሪፖርቱ?
  • የትኛው ሪፖርት?
  • ሥራውን እርግፍ አድርገህ ትተኸዋል ልበል?
  • ኧረ በፍፁም ክቡር ሚኒስትር፡፡
  • የምርጫ ዓመት መሆኑን ረሳኸው እንዴ?
  • እንዴታ ክቡር ሚኒስትር?
  • ታዲያ የትኛው ሪፖርት እንዴት ትለኛለህ?
  • እ…
  • ሲሆን እኮ በየደቂቃው ነው ሪፖርት ማድረግ ያለብህ፡፡
  • እሱስ ልክ ነዎት፡፡
  • ይኸው ባለጋራዎቻችንም እየተጠናከሩ ነው፡፡
  • እንዴት ክቡር ሚኒስትር?
  • ያው አንዳንድ ፓርቲዎች ልክ እንደ እኛ ራሳቸውን ለማጠናከር እንቅስቃሴ እያደረጉ ነው፡፡
  • የሰሞኑን ዜና ሰምተው ነው?
  • እህሳ፡፡
  • ለእኔ እንኳን ያደረጉት አይቅርብኝ አካሄድ ነው፡፡
  • እንዴት?
  • ከመቼ ጀምሮ ነው ውኃና ዘይት የሚቀላቀለው?
  • እ…
  • ክቡር ሚኒስትር ሩጫው ሁሉ ለአንድ ነገር ሆኗል፡፡
  • ለምን?
  • ነጥብ ለማስቆጠር ነዋ፡፡
  • ቢሆንም ሁሉን ነገር በትኩረት መከታተል አለብን፡፡
  • ስለዚህ ጉዳይ ፈፅሞ ሥጋት አይግባዎት፡፡
  • ለምን አይገባኝም?
  • ከመዋሀዳቸው ተጣሉ የሚል ወሬ መውጣቱ አይቀሬ ነው፡፡
  • ለማንኛውም ጥንቃቄ ማድረጉ አይከፋም፡፡
  • እሱማ ትክክል ነው፡፡
  • ለመሆኑ የሰጠሁህን የቤት ሥራ ሠራህ?
  • የመሬቱን ነው ክቡር ሚኒስትር?
  • ሌላ ምን የቤት ሥራ አለህ?
  • ይመልከቱት ክቡር ሚኒስትር፡፡
  • ምንድነው ይኼ?
  • የመሬቶቹ ዝርዝር ነው፡፡
  • እ…
  • በየክፍለ ከተማው ለይቼ አዘጋጅቼያቸዋለሁ፡፡
  • ሳተና ነህ እኮ አንተ፡፡
  • ከዚህ በላይ ምን አለ ብለው ነው ክቡር ሚኒስትር?
  • ሌላው ሥራ ላይም እንዲህ ንቁ ብትሆን ጥሩ ነው፡፡
  • በመሬት አይቀለድም ብዬ እኮ ነው፡፡
  • እሱማ ልክ ነው፡፡
  • ይኸው እንዳዘዙኝ ኪስና ግንባር ቦታዎቹም ተለይተዋል፡፡
  • አንተ ሥራህን ጨርሰሃል በቃ፡፡
  • ስምን መላክ ያወጣዋል ማስባል አለብን፡፡
  • የማንን ስም?
  • የፓርቲያችንን ነዋ፡፡
  • በመሬት ሽያጩ መበልፀጋችን አይቀርም ብለህ ነው?
  • ምን ጥያቄ አለው ክቡር ሚኒስትር?
  • በቃ ለማንኛውም እሱን ሪፖርት ስጠኝና ያን ደላላ ላግኘው፡፡
  • ከዚህ በኋላ ድምፃችንን አጥፍተን እነዚህን መሬቶች ምን እንደምናደርግ ያውቃሉ?
  • ምንድነው የምናደርጋቸው?
  • እንቸበችባቸዋለን!

[ክቡር ሚኒስትሩ ደላላ ወዳጃቸውን ደውለው ቢሮ ጠሩት]

  • አቤት ክቡር ሚኒስትር?
  • እንቅስቃሴ እንዴት ነው?
  • ሰው ፈርቷል ክቡር ሚኒስትር፡፡
  • ምንድነው የሚያስፈራው?
  • ምርጫው መሰለኝ፡፡
  • ምኑ ያስፈራል ብለህ ነው?
  • ይደረጋል አይደረግም ከሚለው ጀምሮ ማን ይመጣል የሚለው ነዋ?
  • መደረጉማ አይቀሬ ነው፡፡
  • ማን ነው የሚመጣውስ?
  • ምን ጥያቄ አለው?
  • እንዴት ክቡር ሚኒስትር?
  • እኛው ነና፡፡
  • ምርጫው እንደ ድሮው ዓይነት ምርጫ ነው እንዴ?
  • እንደ  ድሮው ዓይነት ስትል?
  • የይስሙላ ምርጫ ነዋ፡፡
  • እንደ እሱ ዓይነትማ በፍፁም አይሆንም፡፡
  • ያው እኛ ነን የምናሸንፈው ሲሉኝ ነዋ፡፡
  • ምን እያልክ ነው?
  • ማለቴ የምርጫ ውጤቱ አስቀድሞ ከታወቀ ብዬ ነው፡፡
  • እሱማ ግልጽ ነው፡፡
  • እንዴት ክቡር ሚኒስትር?
  • እኛ ነን የምናሸንፈው አልኩህ እኮ፡፡
  • ብትሸነፉም ልታጭበረብሩ አስባችኋል እንዴ?
  • አልወጣኝም፡፡
  • ታዲያ ምን እያሉኝ ነው?
  • ከእኛ ውጪ ማን ይመረጣል ብለህ ነው?
  • ክቡር ሚኒስትር አሁን እኮ ነፍስ ያላቸው ተፎካካሪዎች እየመጡ ነው፡፡
  • እ…
  • ይኼ ዴሞክራሲ የምትሉትን ነገር አስቡበት ስል የነበረው እኮ ለዚህ ነው፡፡
  • እንዴት?
  • ሰው ምርጫ ከተሰጠው ሌላ ሊመርጥ  ይችላል፡፡
  • እ…
  • ለእኔና ለእርስዎ ዓይነቱ ደግሞ እንዲህ ዓይነቱ ነገር አደጋ ነው፡፡
  • ማለት?
  • ሰው በጣም ነዋ የሚጠላን፡፡
  • ለምን?
  • ያው ሲጀመር አቅም እንደሌለን ግልጽ ነው፡፡
  • ሲቀጥልስ?
  • ሲቀጥል ደግሞ ሌቦች እንደሆንን የአደባባይ ሚስጥር ነው፡፡
  • እና ምርጫው ቢቀር ይሻላል እያልከኝ ነው?
  • እሱ እንኳን ከባድ ነገር ይመስለኛል፡፡
  • ታዲያ ምን ተሻለ?
  • ባይሆን የመሬቷን ፕሮጀክት ቶሎ እናስፈጽማት፡፡
  • እ…
  • ክፍት ቦታዎችን ከምርጫው በፊት እንቸብችባቸውና እንውሰድ፡፡
  • ምንድነው የምንወስደው?
  • የድርሻችንን!

[ክቡር ሚኒስትሩ ከአንድ ባለሀብት ጋር ቢሯቸው ተገናኝተው እያወሩ ነው]

  • ዛሬ መደወልዎ አስገርሞኛል ክቡር ሚኒስትር፡፡
  • ምኑ አስገረመህ?
  • ያው በጣም ቢዚ ስለሚሆኑ ብዬ ነው፡፡
  • ሕዝቤን ከማገልገል ግን ቢዚ ሆኜ አላውቅም፡፡
  • ክቡር ሚኒስትር እርስዎ ለዘላለም መንገሥ አለብዎት፡፡
  • የአንተ ዕርዳታ ካልተለየኝ መቼ ይቀራል ብለህ ነው?
  • ሁሌም ከጎንዎ ነኝ ክቡር ሚኒስትር፡፡
  • የፓርቲያችን ደጋፊ መሆንህን ሰምቻለሁ፡፡
  • ምን ጥርጥር አለው?
  • ለነገሩ አንተ የገዥው ፓርቲ ደጋፊ ነህ አሉ፡፡
  • እ…
  • ያው እኛም ብንሸነፍ የቀጣዩ ገዥ ፓርቲ ደጋፊ መሆንህ አይቀርም፡፡
  • ኧረ በፍፁም ክቡር ሚኒስትር፡፡
  • ከዚህ ቀደም የበፊቶቹ ቀንደኛ ደጋፊ አልነበርክ እንዴ?
  • ምን መሰለዎት?
  • ችግር የለም አታስረዳኝ ጥቅም አሳዳጅ መሆንህን አውቃለሁ፡፡
  • እኔ እንደዚያ ዓይነት ሰው አይደለሁም ክቡር ሚኒስትር፡፡
  • ዛሬ የጠራሁህ ጥቅመኛ ነህ ብዬ አስቤ ላነጋግርህ ነው እኮ፡፡
  • ማለት?
  • እንድንጠቃቀም አስቤ ነዋ፡፡
  • ምን ችግር አለው ክቡር ሚኒስትር?
  • ስለዚህ ጥቅመኛ ሰው ነህ ማለት ነው?
  • እውነቱን ንገረኝ ካሉማ በእሱ የታወቅኩ ነኝ፡፡
  • ለአሁኑ እኔም የምፈልገው ጥቅመኛ የሆነ ሰው ነው፡፡ 
  • ምን ልታዘዝ ታዲያ?
  • እንደ አንተ ጥቅመኛ የሆኑ ባለሀብቶችን እንድታደራጅልኝ እፈልጋለሁ፡፡
  • ምን ችግር አለው ክቡር ሚኒስትር?
  • እሱን ማድረግ ትችላለህ?
  • በቃኝ እስኪሉ የጥቅመኛ መዓት ማደራጀት እችላለሁ፡፡
  • ምርጫዬ ትክክል ነበር ማለት ነው?
  • ትክክለኛ ሰው ነው ያገኙት ስልዎት?
  • ስማ የቀጣዩ ምርጫ ውጤት አይታወቅም፡፡
  • እኔ አውቀዋለሁ ክቡር ሚኒስትር፡፡
  • እንዴት?
  • እናንተ ነዋ የምታሸንፉት፡፡
  • አንተ ጥቅመኛ ስለሆንክ ለአንተ ብዙ ችግር አይኖረውም፡፡
  • እ…
  • ለማንኛውም ከተማ ውስጥ  ያሉ ዓይን ዓይን ቦታዎች በእጄ ናቸው፡፡
  • እሺ፡፡
  • ስለዚህ ከምርጫው በፊት እነዚህን ቦታዎች ከእጄ ማውጣት እፈልጋለሁ፡፡
  • ምን ልርዳዎት ታዲያ?
  • የሚረከቡኝን ባለሀብቶች አደራጅልኛ?
  • ደስ እያለኝ ክቡር ሚኒስትር፡፡
  • ስም ዝርዝራቸውን ስጠኝና ካርታው ይዘጋጅላቸው፡፡
  • እኔን ጨምሮ በርካታ የተራቡ ሰዎችን አዘጋጃለሁ፡፡
  • ምን የተራቡ?
  • መሬት!

[ክቡር ሚኒስትሩ በሌላ ሚኒስትር እየተገመገሙ ነው]

  • ክቡር ሚኒስትር ሁሉን ነገር ደርሰንበታል፡፡
  • ምን አደረግኩ?
  • እርስዎን እንጠይቅዎት እንጂ?
  • ጠይቁኛ?
  • እኮ ይመልሱዋ?
  • ምኑን ልመልስ?
  • የመሬቱን ጉዳይ?
  • እ…
  • ምነው ተንተባተቡ?
  • ኧረ አልተንተባተብኩም፡፡
  • ይንገሩና?
  • ምን ልንገራችሁ?
  • መሬት በምን አግባብ እየሰጡ እንደሆነ እናውቃለን፡፡
  • እንዲያለሙበት እኮ ነው የሰጠኋቸው፡፡
  • እርስዎ እንዲለሙበት ማለትዎ ነው?
  • እ…
  • መሬት የሕዝብ ሀብት መሆኑን ረሱት እንዴ ክቡር ሚኒስትር?
  • ኧረ በፍፁም፡፡
  • ከአዲሱ ፓርቲያችን አካሄድ ጋር የሚጋጭ ድርጊት በመፈጸምዎ በሕግ ይጠየቃሉ፡፡
  • እ…
  • ያልተገባ ድርጊት ፈጽመዋል፡፡
  • ምን አጠፋሁ?
  • በከፍተኛ ሁኔታ ነዋ የበለፀጉት፡፡
  • ይኼ ታዲያ የፓርቲያችን ፕሮግራም አይደል እንዴ?
  • ምኑን ነው የፓርቲያችን ፕሮግራም?
  • ብልፅግና፡፡
  • የእርስዎ ብልፅግና አይደለማ፡፡
  • ታዲያ ምንድነው?
  • ብልግና!

በብዛት የተነበቡ ፅሁፎች

- Advertisment -

ትኩስ ፅሁፎች

ቪር ጀነራል ትሬዲንግ ኃ/የተ/የግ/ማኀበር የጨረታ ማስታወቂያ

ቪር ጀነራል ትሬዲንግ ኃ/የተ/የግ/ማኀበር በገቢ እና በውጭ ንግድ እንዲሁም...

ያልተቃናው የልጆች የንባብ ክህሎት

አንብቦና አዳምጦ መረዳት፣ የተረዱትን ከሕይወት ጋር አዋህዶ የተቃና ሕይወት...

እንስተካከል!

ሰላም! ሰላም! ውድ ኢትዮጵያውያን ወገኖቼ እንዲሁም የሰው ዘር በሙሉ፣...

የሙዚቃ ምልክቱ ሙሉቀን መለሰ ስንብት

የኢትዮጵያ ዘመናዊ ሙዚቃ በ1950ዎቹ እና በ1960ዎቹ በኪነ ጥበባትም ሆነ...

ስለዘር ፖለቲካ

በሀብታሙ ኃይለ ጊዮርጊስ  ‹‹በቅሎዎች ዝርያችን ከአህያ ነው እያሉ ይመፃደቃሉ›› የጀርመኖች...
spot_img

ተዛማጅ ፅሁፎች

[ክቡር ሚኒስትሩ ከፖለቲካ ፓርቲዎች የጋራ ምክር ቤት አባላት ጋር በአገራዊ ጉዳዮች ላይ እየመከሩ ነው]

ክቡር ሚኒስትር ባለፈው ሊያወያዩን ሲመጡ ለአገራችን የፖለቲካ ችግር መፍትሔው አንድና አንድ እንደሆነ ነግረንዎት ነበር፣ ያስታውሳሉ? አላስታውስም። ባለፈው የተገናኘን ጊዜ ይህችን አገር ከችግር የሚያወጣው መፍትሔ አንድና አንድ...

[ክቡር ሚኒስትሩ በዕረፍት ቀናቸው በመኖሪያ ቤታቸው ሆነው ከባለቤታቸው ጋር ከውጭ እንዳይገቡ ስለተከለከሉ ምርቶች እያወሩ ነው]

እኔ እምልህ ...ኤል ሲ እንዳይከፈት ተከልክሏል ሲባል አልነበረም እንዴ? ኤል ሲ ደግሞ ምንድነው? ሌተር ኦፍ ክሬዲት ነዋ!? አልገባኝም? አስመጪዎች ከውጭ ለሚያስገቡት ዕቃ የሚያስፈልጋቸውን የውጭ ምንዛሪ ከባንኮች አይደል የሚያገኙት? አዎ። ኤል...

[ክቡር ሚኒስትሩ ከሥራ መልስ ወደ መኖሪያ ቤታቸው ሲገቡ ባለቤታቸው በቴሌቪዥን የሚተላለፈውን በተመስጦ እየተከታተሉ አንዳንዴም በመገረም እየሳቁ አገኟቸው]

አንዴ? ምን አገኘሽ? ምን አገኘሽ ማለት? ለብቻሽ የሚያስቅሽ ማለቴ ነው? እ... ምን ላድርግ ብለህ ነው? ወዶ አይስቁ ሆኖብኝ ነው። እንዴት? ምንድነው ነገሩ? በቴሌቪዥን የሚተላለፈውን እያዳመጥኩ ነዋ? አለቃ ከሕዝብ ተወካዮች ጋር...