Thursday, June 13, 2024
- ማስታወቂያ -
- ማስታወቂያ -

ሉና ኤክስፖርት ቄራ የአሜሪካ የምግብ ጥራት ሽልማትን አገኘ

spot_img

ተዛማጅ ፅሁፎች

በአሜሪካ ሲያትል በተካሄደ ሥነ ሥርዓት፣ ሉና ኤክስፖርት ቄራ ኃላፊነቱ የተወሰነ የግል ማኅበር፣ ለምግብ ጥራት የሚሰጠውን ሽልማት በማግኘት በኢትዮጵያ ቀዳሚው ለመሆን እንደበቃ አስታወቀ፡፡

ኩባንያው ለሪፖርተር በላከው መግለጫ መሠረት፣ በዓለም ባንክ ሥር የግሉ ዘርፍ ድጋፍ ሰጪ በሆነው ዓለም አቀፉ የፋይናንስ ኮርፖሬሽን (አይፍሲ)፣ እንዲሁም ‹‹ግሎባል አግሪካልቸር ኤንድ ፉድ ሴፍቲ›› ፕሮግራም ባደረጉለት ድጋፍ አማካይነት፣ ኩባንያው የሚያቀርበውን የሥጋ ጥራት ደረጃና የሚረከባቸውን እንስሳት የጤናና ደኅንነት የማረጋገጥ ሥርዓት በማስፈን የምግብ ጥራትን የማስጠበቅ ሒደትን በመተግበር ዕውቅና ለማግኘት እንደበቃ አስታውቋል፡፡

የሉና ኤክስፖርት ቄራ ኩባንያ መሥራችና ዋና ሥራ አስኪያጅ አቶ ተስፋልደት ሐጎስ እንደገለጹት፣ ኩባንያው የሥጋ ጥራትና የምግብ ደኅንነትን ለማረጋገጥ በርካታ ሥራዎች መከናወናቸውን፣ ከዚህም ባሻገር በአቅርቦት ሰንሰለቱ፣ በሥራ ዕድል ፈጠራውና በዘላቂ ገቢ ማስገኘት ረገድ ኩባንያው፣ ከ2000 ዓ.ም. ጀምሮ ውጤታማ ሥራ ሲያከናውን መቆየቱን ገልጸዋል፡፡

የጥራት ሽልማቱን በአሜሪካ ሲቀበሉ እንደተናገሩት፣ ኢትዮጵያ በሥጋ ምርቷ በአፍሪካ፣ በመካከለኛው ምሥራቅና በእስያ ታዋቂና ተወዳጅ እንድትሆን የማድረግ ህልም አላቸው፡፡ ለዚህ ህልማቸው መሳካትም የጥራት ሽልማት ማግኘታቸው ትልቅ አስተዋጽኦ እንደሚኖረው ጠቅሰዋል፡፡ ሉና ኤክስፖርት ቄራ፣ የአትክልትና ፍራፍሬ ማምረቻ እርሻ፣ ፍሬሽ ኮርነር የተሰኙ የአትክልትና ፍራፍሬ መሸጫ መደብሮችን ጨምሮ፣ ኬተርኮማት የተሰኘ የአውቶሞቢል መለዋወጫ ድርጅት በሥሩ ያስተዳድራል፡፡

የኢትዮጵያ የሥጋ ወጪ ንግድ በተቀባይ አገሮች ዘንድ ፈተና ሲገጥመው መቆየቱ ይታወቃል፡፡ በተለይም ወደ መካከለኛው ምሥራቅ አገሮች የሚላከው የሥጋ ምርት ከምግብ ደኅንነት አኳያ የጥራት ችግር በተደጋጋሚ እያጋጠመው ውድቅ ሲደረግ መቆየቱም የሚታወስ ነው፡፡ የምግብ ጥራትና ደኅንነት ችግሮች የሚፈታተኑት ይህ ዘርፍ፣ በገበያ ከሚደርስበት ጫና ባሻገር በቁም ከብት አቅርቦት ዕጦት ሳቢያም ከአቅሙ በታች ለማምረት መገደዱ በተደጋጋሚ ሲገለጽ ቆይቷል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች