Thursday, December 1, 2022
ሌሎች ዓምዶች
    - Advertisement -
    - Advertisement -

    የተመረጡ ፅሑፎች

    ለህዳሴው ግድብ ድጋፍ መስጠት ለእናት አገር ጥሪ ምላሽ ነው! 

    በናታን ዳዊት

    የኢትዮጵያ ታላቁ ህዳሴ ግድብ ግንባታ ከተጀመረ ዘጠኝ ዓመቱን ሊደፍን አሥራ አምስት ቀናት ይቀሩታል፡፡ ግንባታው ሲጀመር በአምስት ወይም በስድስት ዓመታት ውስጥ ተጠናቆ ለአገልግሎት ይበቃል ተብሎ እንደነበር ይታወሳል፡፡

    ይህ ውጥን በብዙ ምክንያቶች ቢሰነካከልም፣ ግድቡን አጠናቆ ለአገልግሎት ማብቃት የግዴታ ውዴታ የሆነበት ወቅት ላይ እንገኛለን፡፡ ይህን ለማድረግም ከመቼም ጊዜ የበለጠ ጉልበት የምናገኝበት አጋጣሚ የተፈጠረ በመሆኑ፣ የጀመርነውን ለመጨረስ ሁሉም ኢትዮጵያዊ የበኩሉን ማዋጣት ይጠበቅበታል፡፡

    የግድቡ ግንባታ መዘግየት እያስከፈለን ያለው ዋጋ በቀላሉ እንደማይታለፍ ግልጽ ነው፡፡ ለመዘግየቱ ምክንያት የሆኑ አካላት ሁሉ ኃላፊነት አለባቸው፡፡ ታሪክም ይጠይቃቸዋል፡፡ ለዚህ ግን ጊዜው አሁን ላይሆን ይችላል፡፡ አሁን ላይ መቅደም ያለበት፣ ግድቡ በሰበብ በአስባቡ ጊዜ እንዳይወሰድ በመጠንቀቅ ተፋጥኖ እንዲጠናቀቅ ማድረጉ ነው፡፡ ግድቡ ማለቅና ኃይል ማመንጨት አለበት፡፡ በተፈጥሮ ሀብታችን የመጠቀም መብት እንዳለንና ይህንኑ ተፈጥሯዊ መብታችንን ለዓለም ሁሉ በአግባቡ ማሳየት መቻል አለብን፡፡ ዛሬ ላይ የግድቡ ግንባታ መዘግየት ያመጣብንን ጣጣ በሚገባ ለመመከትና ጫናውን ለመቀልበስ የሚቻለው በርብርብ ግንባታውን አጠናቆ ከግድቡ ተገቢውን ኃይል ማመንጨት ስንጀምር ነው፡፡

    በየትኛውም መንገድ ግድቡን ገንብተን በማጠናቀቅ ለሥራ ለማብቃት ከሚያመቹ ክስተቶች አንዱ ከሰሞኑ የታየው የሕዝብ ተነሳሽነት እንዲሁም መንግሥት በግድቡ ላይ ያሳየው ጠንካራ አቋም ሳይናወጥ የዓመታት ህልማችንን ለማሳካት የምንጠቀምበት ጊዜ መሆን አለበት፡፡

    ከገዛ መሬታችንና ጓሯችን ከሚንዠረገገው የዓባይ ሲሳይ እንዳንጠቀም አለያም በእጅ አዙር የግድባችንን ስኬት ለማደናቀፍ የሚደረገውን አደገኛ እንቅስቃሴና ጫና ለማስቆም ከተፈለገ፣ የመጀመርያው ዕርምጃ ኢትዮጵያ ግድቡን ሥራ አፋጥና በያዘችው ፕሮግራም መሠረት የውኃ የመሙላት ሥራዋን በመጀመር ወደሚፈለገው ግብ መድረስ መቻሏ ነው፡፡

    ከቅርብ ጊዜ ወዲህ እንደምናየው ያለውን ሕዝባዊ ወኔና የእኔነት ስሜት በመጠቀም፣ የሕዝብን ደጀንነት ተገን በማድረግ ኢትዮጵያ ላይ ጫና ሊያሳድሩ የሚችሉ ሁኔታዎች እየተፈጠሩ በመሆናቸው መንግሥት ግድቡን ገንብቶ መጨረስ ቀዳሚ ተግባሩ ማድረግ አለበት፡፡ ከዚህ ጎን ለጎን ስለህዳሴ ግድቡ ተገቢነትና ኢትዮጵያ ተፈጥሯዊም ሉዓላዊም መብቷ እስከምን ድረስ እንደሚዘልቅ ለዓለም ለማሳየትና ለማስታወቅ ከመቼው ጊዜ በላይ መነቃነቅ ይጠበቅባታል፡፡

    መንግሥት የግብፅን አጓጉል ድንፋታና ሁለት ድንበር አልፎ የሚመጣውን የፍፁማዊ መብት አለኝ የሚል ቂላቂልና ስግብግብ ጥያቄ ዕርቃን የሚያወጣ ፖለቲካዊና ዲፕሎማሲያዊ አካሄድ በመከተል፣ የግድቡን ግንባታ በተፈለገው መንገድ ማካሄድ መቻል አለበት፡፡ ኢትዮጵያ በዓባይ ወንዝ የመጠቀም ምሉዕ መብቷን የሚነፍግ ስምምነት እንዳትፈጽም በመጠንቀቅና ከዓለም አቀፍ የገንዘብ ተቋማት ቃል የተገቡላት ድጋፎች ወይም መደለያዎች ሳያሳንፏት ውጤታማ ትግል ማካሄድ አለባት፡፡ በእርግጥ ኢትዮጵያ ደካማ ኢኮኖሚዋን ለማራመድ ያስችላል ያለችውን አዲስ ውጥን ለማሳካት ከሚያስፈልጋት ገንዘብ ውስጥ ከዓለም ባንክና ከዓለም የገንዘብ ድርጅት የምታገኘው ፋይናንስ የሚጠበቅ ነው፡፡ ይሁን እንጂ በግድቡና በውኃ አጠቃቀሙ ላይ ኢትዮጵያ ያላትን አቋም ያልተረዱ ወይም ተረድተውም ሆን ብለው ለፖለቲካቸው ሲሉ ተፅዕኖ ለመፍጠር መነሳታቸው እየታየ ስለሆነ አማራጭ መንገድ መቀየሱ ለመንግሥት የሚጠፋው አይመስለኝም፡፡  

    ይሁንና በመንግሥት በኩል ያየነው ስሜትና ጠንካራ አቋም የአገር ህልውናን አሳልፎ ከመስጠት ይልቅ የቀረው ይቅር የሚል ሉዓላዊነትን የሚያስጠብቅና የሚያስቀድም ካለ ዜጎች ደግሞ ይህንን ክፍተት ለመሸፈን የግድ ይላቸዋል፡፡

    እውነታው ይህ ከሆነ አገር ታገኛለች ተብሎ የታሰበው የገንዘብ ድጋፍ ከሌለ የሚፈጠረውን ክፍተት ለማስወገድ ኃላፊነቱ የመንግሥት ብቻ ሳይሆን፣ የመላው ኢትዮጵያዊ ዜጋ ነው፡፡ በመላው ዓለም የሚገኙ ኢትዮጵያውያን ኃላፊነትም ለየት ማለትና መጉላት መቻል አለበት፡፡

    ከዓለም የፋይናንስ ምንጮች የሚገኘው ድጋፍ የውጭ ምንዛሪ ግኝታችንንም ከፍ ያደርገዋል ተብሎ የሚታሰብ ነበርና እንደ አገር በዓባይ ወንዝ ለመጠቀም የሚደረገው ርብርብ ሊያሳድርብን የሚችለውን ተፅዕኖ ለመጋፈጥ ዳያስፖራው ድጋፉን በተለየ መንገድ በተግባር ማሳየት አለበት ሲባል በተለየ መልክ ሊገለጽ የሚችል ነው፡፡ እስካሁንም ያደረጋቸው ድጋፎች ቢኖሩም አሁን ካለው የተወሳሰበ ችግር አንጻር ኢትዮጵያ የገጠማትን ችግር እንድትወጣ የዳያስፖራው ድጋፍ ወሳኝ ነው፡፡

    ለምሳሌ በቀጥታ ለግድቡ ከሚያደርጉት ድጋፍ ባሻገር ወደ አገር ቤት የሚልኩትን ገንዘብ በሕጋዊ መንገድ በመላክ አገራቸውን መታደግ መቻልና አስተዋጽኦ ማድረግ አንዱ የድጋፍ መንገድ ሊሆን ይችላል፡፡ አሜሪካና ግብፅ ተፅዕኖ ለመፍጠር ያደረጉትን እንቅስቃሴ በአደባባይ በመቃወም ያሳዩትን ብርታት ከዚህ በኋላ ወደሚፈለገው ግብ ለመድረስ የሚደረገውን ጥረት በሕጋዊ መንገድ ገንዘብ ወደ አገር ቤት በመላክና ይህንንም የሚያበረታታ ዘመቻ ማድረግ አለባቸው፡፡ የቴክኒክና የዲፕሎማሲ ተፅዕኖ ማሳደር የሚቻልባቸውን ድጋፎች ማድረግም ጊዜው የሚጠይቀው ለአገር የሚደረግ ወሳኝ ዕገዛ ነው፡፡

    በአገር ውስጥ ያለው ሕዝብም እያነሳ ያለውን ተነሳሽነት ትርጉም ባለው መንገድ መወጣት መቻል ይጠበቅበታል፡፡ መተባበርና አንድነቱን ማጥበቅ የወቅቱ አንገብጋቢ ጥያቄ ነው፡፡ ዜጎች ለግድቡ መጠናቀቅ እስካሁን ከከፈሉት መስዋዕትነት የበለጠ ብዙ ማድረግ የሚጠበቅባቸው ወቅት ስለመጣ መንግሥት ለሚያቀርባቸው ጥያቄዎች በእኔነት ስሜት ማበረታታትና ደጀንነታቸውን ማሳየት መቻል አለባቸው፡፡

    መንግሥትም የግድብ ሥራው ከዚህ ቀደም ያጋጠሙትን ችግሮች በሚገባ ነቅሶና ዳግም እንዳይከሰቱ ተቆጣጥሮ ሥራውን ማስጨርስ ይጠበቅበታል፡፡ በግድቡ ዙሪያ ሰሞኑን እንደሚያደርገው ግልጽ መረጃ መስጠትና በዚህም ዙሪያ ዕውቀቱ ያላቸው ባለሙያዎችን ማሳተፍ ብቻም ሳይሆን የዲፕሎማሲውን ሥራ በማቀላጠፍ ጫና ማሳደር መቻል አለበት፡፡

    ከገቢ ማሰባሰብ አንፃር የተለያዩ አማራጮችን መከተል መቻል አለበት፡፡ ሁሉም የድርሻውን እንዲወጣ የሚያስችሉ ሥራዎች መካከል በሞባይል ስልክ የሚደረገው የገቢ ማሰባሰቢያ ተጠናክሮና ተሻሽሎ መካሄድ አለበት፡፡ የእናት አገር ጥሪ ማለት የህዳሴውን ግድብ መደገፍና መገንባት መቻል ነውና አሁን ካለንበት ሁኔታ አንጻር የሚፈለገውን ድጋፍ ከፍ ለማድረግ በአንድ ብር የተወሰነው የድጋፍ አሰጣጥ በተለያየ የገንዘብ መጠን አስተዋጽኦ እንዲደረግበት ይሻሻል፡፡ የሕዝብ ተነሳሽነትና ግድቡ በፋይናንስ እጥረት እንዳይጓተት ለማድረግ፣ አማራጭ የድጋፍ መስጫ ስልቶችን መተግበሩ ይታሰብበት፡፡ የታላቁ ህዳሴ ግድብ ሕዝባዊ ተሳትፎ አስተባባሪ ምክር ቤትና ሌሎችም አካላት ይረባረቡ፡፡ 8100 A አገልግሎትንም በተቀላጠፈ ሁኔታ እንዲሠራ በማድረግ ኢትዮ ቴሌኮም ትልቅ ኃላፊነት አለበት፡፡

    Latest Posts

    - Advertisement -

    ወቅታዊ ፅሑፎች

    ትኩስ ዜናዎች ለማግኘት