Tuesday, July 23, 2024
- ማስታወቂያ -
- ማስታወቂያ -

ወጋገን ባንክ ከ1.3 ቢሊዮን ብር በላይ የወለድ አልባ ተቀማጭ አሰባሰበ

ተዛማጅ ፅሁፎች

ወጋገን ባንክ ወለድ አልባ የባንክ አገልግሎት መስጠት ከጀመረበት ጊዜ ጀምሮ የዚህ አገልግሎቱ ተጠቃሚዎች ቁጥር ከ123 ሺሕ በላይ እንደደረሰና ከዚሁ አገልግሎትም ከ1.3 ቢሊዮን ብር በላይ ተቀማጭ ማሰባሰብ እንደቻለ አስታውቋል፡፡

ባንኩ ወለድ አልባ አገልግሎትን ለይቶ የሚያቀርብበት ራሱን የቻለ ቅርንጫፍ በከፈተበት ወቅት እንደተገለጸው፣ ከወለድ ነፃ የባንክ አገልግሎት ተጠቃሚዎች ቁጥር በየጊዜው እየጨመረ ነው፡፡

አልነጃሺ የሚል ስያሜ የተሰጠውና በአዲስ አበባ ቦሌ ሚካኤል አካባቢ አገልግሎት መስጠት የጀመረው የባንኩ ወለድ ወለድ አልባ ቅርንጫፍ ያስመረቁት የባንኩ የኮርፖሬት ሰርቪስ ምክትል ፕሬዚዳንት አቶ ክንዴ አበበ እንዳሉት፣ ወለድ አልባ የባንክ ቅርንጫፍ መክፈት ያስፈለገው ባንኩ ሼሪዓን መሠረት ያደረገ ወለድ አልባ አገልግሎትን አስፋፍቶ ማቅረብ በመፈለጉ ነው፡፡ አያይዘውም በሁሉም ቅርንጫፎች በተለየ መስኮት ሲሰጥ የቆየውን ወጋገን አማና የተሰኘ ከወለድ ነፃ አገልግሎት፣ የደንበኞቹን ሃይማኖታዊና ማኅበራዊ ፍላጎት ባማከለና ከዚህ በፊት ያልነበሩ አገልግሎቶችን በማካተት ተፈላጊ አገልግሎቶችን ለመስጠት በማሰብ ራሱን የቻለ የወለድ አልባ ቅርንጫፍ መክፈት እንዳስፈለገ ገልጸዋል፡፡

ይህም ባንኩ ለሁሉም ማኅበረሰብ ተደራሽና አካታች የባንክ አገልግሎት ለማቅረብ ያስቀመጠው ዕቅድ አካል እንደሆነም አመልክተዋል፡፡ የባንኩ ወለድ አልባ አገልግሎት ተጠባባቂ ዳይሬክተር አቶ ከድር አባስ በበኩላቸው፣ የአልነጃሺ ቅርንጫፍ መከፈት በቦሌ ሚካኤልና አካባቢው ለሚኖሩ የንግዱ ማኅበረሰብ አባላት የፋይናንስ ምንጭ በመሆን ሥራቸውን ለማስፋፋትና ለሥራ ፈጠራ ትልቅ ዕገዛ እንደሚያደርግላቸው ተናግረዋል፡፡ ባንኩ በሸሪዓ በተፈቀዱ ሥራዎች ላይ ለተሰማሩ ደንበኞች 350 ሚሊዮን ብር ፈሰስ ማድረጉን አቶ ከድር ጨምረው ገልጸዋል፡፡

አልነጃሺ ቅርንጫፍ ባንኩ በቅርቡ በሶማሌ ክልል ዋና ከተማ ጅግጅጋ ከከፈተው አልበረካ ቅርንጫፍ በመቀጠል የከፈተው ሁለተኛው ከወለድ ነፃ የባንክ አገልግሎት ብቻ የሚሰጥ ቅርንጫፍ እንደሆነም ተገልጿል፡፡

ወጋገን ባንክ በቀጣይም የማኅበረሰቡን ከወለድ ነፃ የባንክ አገልግሎት ፍላጎት ተመርኩዞና ከኢኮኖሚያዊ ፋይዳቸው አንፃር አዋጪ በሆኑ ቦታዎች ተጨማሪ ከወለድ ነፃ የባንክ አገልግሎት ብቻ የሚሰጡ ቅርንጫፎችን እንደሚከፍት አቶ ከድር ተናግረዋል፡፡

ወጋገን ባንክ ከሚሰጣቸው ከወለድ ነፃ የባንክ አገልግሎቶች ወስጥ ምንም ወለድ የማይከፈልበት የወጪ ንግድ ብድር (ቀርድ)፣ ትርፍን በማስላት የሚሰጥ የሽያጭ ብድር (ሙራባሃ) እና በውጭ አገር ለሚኖሩ ኢትዮጵያውያን የሚሰጥ ሸሪዓን መሠረት ያደረገ የቤት መግዣ ብድር ዋናዎቹ ናቸው፡፡ በተጨማሪም ደንበኞች አማነማ የክፍያ ካርድን በመጠቀም በባንኩ ኤቲኤምና ፖስ ማሽኖች ሒሳባቸውን ማንቀሳቀስ የሚችሉ ስለመሆኑ ከባንኩ የተገኘው መረጃ ያስረዳል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች