Tuesday, July 23, 2024
- ማስታወቂያ -
- ማስታወቂያ -

ዳሸን ባንክ የኮሮና ቫይረስን ጫና ለማርገብ የዋጋ ለውጥ አደረገ

ተዛማጅ ፅሁፎች

ዳሸን ባንክ የኮሮና ቫይረስ ተፅዕኖን መነሻ በማድረግ በተለያዩ አምስት አገልግሎቶቹ ላይ ለደንበኞች የክፍያ ቅናሽና ማሻሻያ ማድረጉን አስታወቀ፡፡

‹‹የኅብረተሰብ ጤና የአገር ደኅንነትና ዕድገት መሠረት ነው፤›› በሚል ርዕስ ባንኩ ባወጣው መግለጫ፣ ለ60 ቀናት በሚወስዳቸው የማኅበራዊ ኃላፊነትን የመወጣት ግዴታዎችን ይፋ አድርጓል፡፡ የደንበኞችን ንክኪ ወይም የተጠጋጋ ግንኙነት ለመቀነስ የሚያስችሉ ዕርምጃዎች ካላቸው መካከል፣ የገንዘብ ወጪያዎችን በባንክ ቅርንጫፎች ከመፈጸም ይልቅ ኤቲኤም ማሽኖችን ተጠቅመው ክፍያ በሚፈጽሙ ደንበኞች ላይ ይተገበር የነበረውን የኮሚሽን ክፍያ በሙሉ በማንሳት በነፃ ክፍያዎች እንዲከናወኑ ወስኗል፡፡

ከዚህ ባሻገር ምርቶችን ከውጭ የሚያስገቡ ደንበኞች ከወረርሽኙ ጋር በተያያዘ ምክንያት የሚያጋጥማቸውን የንግድ እንቅስቃሴ መስተጓጎል ከግምት ውስጥ በማስገባትከዚህ በፊት ለባንክ መተማመኛ ሰነድ ብድር ወይምኤልሲ ማራዘሚያ ይከፍሉ የነበረውን ኮሚሽን በማንሳት አገልግሎቱ ነፃ እንደሚሰጥ አስታውቋል፡፡

 በቀጥታ ገንዘብ ክፍያ አማካይነት ከውጭ ምርት በሚያስገቡ ደንበኞቹ አማካይነት ለጊዜ ማራዘሚያ ይከፈል የነበረው ኮሚሽን 50 በመቶ እንዲቀንስ ማድረጉንም ባንኩ አስታውቋል፡፡ የተበዳሪ ደንበኞች የንግድ እንቅስቃሴ ወረርሽኙ በሚፈጥረው ተፅዕኖ ምክንያት እንደሚቀዛቀዝ ስለሚገመትየተመላሽ ብድሮች የመክፈያ ጊዜ እንዲራዘምላቸው ደንበኞች ጥያቄ በሚያቀርቡበት ወቅት ይከፈል የነበረውን ኮሚሽን በማንሳት በነፃ ጥያቄያቸውን እንደሚያስተናግድ ባንኩ ይፋ አድርጓል፡፡ ደንበኞች ወደ ባንኩ ቅርንጫፍ ሳይሔዱ በቪዛና በወለድ አልባ አገልግሎት የክፍያ ካርዶች በመጠቀም ከኤቲኤም ማሽኖች በየቀኑ ወጪ ማድረግ የሚችሉበት የገንዘብ መጠን ገደብ ላይ ማሻሻያ በማድረግ ወደ አሥር ሺሕ ብር ከፍ ማድረጉም ሌላው የባንኩ ዕርምጃ ነው፡፡ በኤቲኤም አማካይነት በአንድ ጊዜ ማውጣት የሚቻለው የገንዘብ መጠን እስካሁን በአራት ሺሕ ብር ተወስኖ መቆየቱ ይታወቃል፡፡

ዳሸን ባንክ እንዲህ ያለውን የማሻሻያ አሠራር የተገበረው በወረርሽኙ ሳቢያ በሚደርሰው ተፅዕኖ ኢትዮጵያውያን ያላቸውን የመተሳሰብና የመረዳዳት ዕሴት በተግባር በማሳየት አርዓነቱን ከማሳየት ባሻገር፣ ወቅቱ በአንድነት በመቆም ችግሮችን ለመጋፈጥ የሚያስገድድ ወሳኝ ጊዜ እንደሆነ ገልጿል፡፡

ባንኩ የሚጠበቅበትን ግዴታ ለመወጣት ከወሰደው ዕርምጃ በተጨማሪ ዜጎች እርስ በርሳቸው በመተሳሰብና የአገር ፍቅራቸውን ብሎም ሕዝባዊ አለኝታነታቸውን በማረጋገጥ የድርሻቸውን የሚወጡበት ወሳኝ ወቅት ከመሆኑ አኳያ፣ ሠራተኞችም አገልግሎታቸውን በከፍተኛ ሞራል በማከናወን የሙያና የንግድ ሥነ ምግባራትን ጠብቀው በታማኝነት እንዲያገለግሉ ለማነሳሳት ጭምር ታስቦ የተወሰደ ዕርምጃ ስለመሆኑ ባንኩ አስታውቋል፡፡ ከሕዝብና ከመንግሥት ጎን ለቆሙ ነጋዴዎችና የጤና ተቋማትም ባንኩ ይበልጥ ተደራሽነቱን በማስፈን የማገልገል ግዴታውን እንደሚወጣ ጠቅሷል፡፡ ይህ አገልግሎት ከመጋቢት 14 ቀን 2012 ዓ.ም. የሚጀምር ነው፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች