Sunday, November 27, 2022
ሌሎች ዓምዶች
    - ማስታወቂያ -
    - ማስታወቂያ -

    ጎመጁ ኦይል በ700 ሚሊዮን ብር የሞተር ዘይትና ቅባት ማቀናበሪያ ፋብሪካ ሊገነባ ነው

    - ማስታወቂያ -

    ተዛማጅ ፅሁፎች

    የገነባውን ሆቴል ለኮሮና ለይቶ ማቆያነት አበረከተ

    አገር በቀል የነዳጅ ኩባንያ የሆነው ጎመጁ ኦይል ኢትዮጵያ፣ በ700 ሚሊዮን ብር ወጪ የሞተር ዘይትና ቅባት ማቀናበሪያ ፋብሪካ ሊገነባ በዝግጅት ላይ እንደሆነ አስታወቀ፡፡

     ለተለያዩ ተሽከርካሪዎችና የግብርናና የግንባታ ማሽነሪዎች ማለስለሻነት የሚውሉ የሞተር ዘይትና ቅባት ማቀናበሪያ ፋብሪካው የሚገነባው፣ አዲስ አበባ ውስጥ ቱሉ ዲምቱ አካባቢ እንደሆነ ተገልጿል፡፡ ኩባንያው 40,000 ካሬ ሜትር ቦታ ከአዲስ አበባ ከተማ አስተዳደር መረከቡን ገልጿል፡፡

    የጎመጁ ኦይል ኢትዮጵያ መሥራችና ዋና ሥራ አስፈጻሚ አቶ ቴዎድሮስ የሺዋስ ለሪፖርተር እንደተናገሩት፣ የሞተር ዘይትና ቅባት ማቀናበሪያ ፋብሪካው የሚገነባው ፔትሮናስ ከተሰኘው ግዙፍ የሞተር ዘይትና ቅባት አምራች ኩባንያ ጋር በሽርክና ነው፡፡ በአሁኑ ወቅት ፋብሪካው የሚገነባበት መሬት ዝግጅት ሥራ በመከናወን ላይ ይገኛል፡፡

    ጎመጁ ኦይል ተቀማጭነቱ በቱሪን ጣሊያን የሆነው የፔትሮናስ ሉብሪካንትስ ኩባንያ ምርቶችን ኢትዮጵያ ውስጥ በብቸኝነት በማከፋፈል ላይ ይገኛል፡፡ ‹‹ወደዚህ ኢንቨስትመንት ለመግባት የወሰንነው በገበያ ውስጥ ያለውን የሞተር ዘይትና ቅባት እጥረት በመመልከት ነው፤›› ሲሉ አቶ ቴዎድሮስ አስረድተዋል፡፡

    ከሦስት ዓመት በፊት በ24 የነዳጅ ማደያዎች ሥራ የጀመረው ጎመጁ ኦይል ኢትዮጵያ የአቪዬሽን ነዳጅ አቅርቦት ለመጀመር በዝግጅት ላይ እንደሆነ ታውቋል፡፡ ጎመጁ ኦይል በአዲስ አበባ ቦሌ ዓለም አቀፍ ኤርፖርት የአውሮፕላን ነዳጅ ማጠራቀሚያ ዲፖ ለመገንባት የሚያስችለውን ቦታ ከኢትዮጵያ ኤርፖርቶች ድርጅት ተረክቧል፡፡

    ኩባንያው አምስት ሚሊዮን ሊትር የአውሮፕላን ነዳጅ ማጠራቀም የሚችል ዲፖ፣ በ200 ሚሊዮን ብር ወጪ ለመገንባት ማቀዱን አቶ ቴዎድሮስ ተናግረዋል፡፡ በተጨማሪም አራት የአውሮፕላን ነዳጅ መሙያ ተሽከርካሪዎች በ120 ሚሊዮን ብር ወጪ እንደሚገዙ ገልጸዋል፡፡ በአጠቃላይ የፕሮጀክቱ ወጪ ከ320 ሚሊዮን ብር በላይ እንደሚሆን ጠቁመዋል፡፡

    ‹‹የአፍሪካ ኩራት ከሆነው ከኢትዮጵያ አየር መንገድ ጋር ተባብረን መሥራት በመቻላችን ኩራት ይሰማናል፤›› ያሉት አቶ ቴዎድሮስ፣ በአሁኑ ወቅት የአቪዬሽን ነዳጅ ዲፖ የንድፍ ሥራ በመከናወን ላይ እንደሆነ ገልጸው፣ በሁለት ዓመት ጊዜ ውስጥ ግንባታው እንደሚጠናቀቅ ተናግረዋል፡፡

    ጎመጁ ኦይል በቅርቡ ባለአራት ፎቅ ዋና መሥሪያ ቤት ሕንፃ አዲስ አበባ ውስጥ ቦሌ መድኃኔዓለም አካባቢ ገንብቶ አጠናቋል፡፡

    በ2009 ዓ.ም. በ53 ሚሊዮን ብር የተመዘገበ ካፒታልና 24 የነዳጅ ማደያዎች በመያዝ ሥራ የጀመረው ጎመጁ ኦይል ኢትዮጵያ ካፒታሉን ወደ 100 ሚሊዮን ብር፣ የማደያዎቹን ብዛት ወደ 67 አሳድጓል፡፡ ኩባንያው 189 የነዳጅ ማመላለሻ ተሽከርካሪዎች ያሉት ሲሆን፣ በአጠቃላይ ከ2,000 በላይ ዜጎች የሥራ ዕድል እንደፈጠረ ታውቋል፡፡

    በተያያዘ ዜና የኮሮና ቫይረስ ሥርጭትን ለመቆጣጠር መንግሥት የጀመረውን ጥረት ለማገዝ ከውጭ የሚገቡ መንገደኞች ለይቶ ማቆያነት እንዲያገለግል፣ ኢትዮጵያ በቢሾፍቱ ከተማ ለሆቴል አገልግሎት የገነባውን ሕንፃ ለአዲስ አበባ ከተማ አስተዳደር አበርክቷል፡፡ 94 ክፍሎች ያሉት ሕንፃ ከውጭ የሚገቡ መንገደኞችን ለማሳረፍ እንዲጠቀምበት ኩባንያቸው በነፃ መስጠቱን፣ አቶ ቴዎድሮስ ለሪፖርተር ተናግረዋል፡፡

    ‹‹የአዲስ አበባ ምክትል ከንቲባ አቶ ታከለ ኡማ ባስተላለፉት ጥሪ መሠረት፣ ኩባንያችን አስተዳደሩ የኮሮና ችግር እስከሚፈታ ድረስ በነፃ እንዲገለገልበት ሰጥተናል፤›› ብለዋል፡፡

    ቀደም ሲል ጎመጁ ኦይል ኢትዮጵያ በማኅበር ለተደራጁ የአዲስ አበባ ወጣቶች አምስት ተንቀሳቃሽ የነዳጅ ማደያዎች፣ በአዲስ አበባ ከተማ አስተዳደር በኩል ማበርከቱ ይታወሳል፡፡

    spot_img
    - Advertisement -spot_img

    የ ጋዜጠኛው ሌሎች ፅሁፎች

    - ማስታወቂያ -

    በብዛት ከተነበቡ ፅሁፎች