Tuesday, July 23, 2024

ክቡር ሚኒስትሩ ከሾፌራቸው ጋር እያወሩ ወደ ቢሮ እየሄዱ ነው

[ክቡር ሚኒስትሩ ከሾፌራቸው ጋር እያወሩ ወደ ቢሮ እየሄዱ ነው]

  • ምን ተሻለ ክቡር ሚኒስትር?
  • ምን?
  • በሽታው ነዋ፡፡
  • እንዴት?
  • እየጨመረ እኮ ነው፡፡
  • መፀለይ ነው የሚያዋጣው፡፡
  • እርስዎ ይፀልያሉ እንዴ?
  • ለምን አልፀልይም?
  • ያው በሥልጣንዎት ነው የሚያምኑት ብዬ ነዋ፡፡
  • የሥልጣናችን ገደብማ ታየ፡፡
  • እንዴት ክቡር ሚኒስትር?
  • ይኸው የዓለም ታዋቂ ግለሰቦች ሳይቀር በበሽታው እየተጠቁ እኮ ናቸው፡፡
  • እኔም ዜናውን ሰምቻለሁ፡፡
  • የእንግሊዙ ጠቅላይ ሚኒስትር ራሱ ከፍተኛ ሕክምና እየተደረገለት እኮ ነው፡፡
  • በአንድ በኩል ግን በሽታው ደስ ይላል፡፡
  • ምን እያልክ ነው?
  • ሁላችንም እኩል መሆናችንን አሳየና፡፡
  • እ. . .
  • ክቡር ሚኒስትር በሽታው ጥቁር አይል ነጭ፣ ደሃ አይል ሀብታም ሁሉንም ነዋ የሚይዘው፡፡
  • ተነፈስን እኮ አሁን፡፡
  • እንዴት ክቡር ሚኒስትር?
  • በቃ ሥልጣናችንም ገደብ እንዳለው ተረዳና፡፡
  • ምን ያደርጋል ታዲያ?
  • እንዴት?
  • ክቡር ሚኒስትር ለሥልጣን ስትሉ አልነበር እንዴ ሕዝቡን ስትፈጁት የነበረው?
  • መስሎን ነዋ፡፡
  • አሁን ግን አንድ ነገር እየፈራሁ ነው፡፡
  • ምን?
  • ከኮሮናው በላይ ያስፈራኝ እሱ ነው፡፡
  • ምንድነው?
  • ኢኮኖሚው ነዋ፡፡
  • እስኪ እሱን ተወው፡፡
  • ክቡር ሚኒስትር በርካታ ሰዎች እኮ እየተቸገሩ ነው፡፡
  • ገና ካሁኑ?
  • አብዛኛው ሰው የዕለት ጉርስ ፈላጊ መሆኑን አይርሱት፡፡
  • መቼ ጠፋኝ?
  • ጣሊያን ውስጥ የማኅበራዊ ቀውስ ተፈጥሯል አሉ፡፡
  • ለምን?
  • ሕዝቡ የሚበላው አጥቶ ነዋ፡፡
  • ወይ ጣጣ?
  • ክቡር ሚኒስትር እዚህም አገር እንዲህ ዓይነት ቀውስ እንዳይፈጠር መጠንቀቅ ያስፈልጋል፡፡
  • ምን ይደረጋል ብለህ ነው?
  • ከአሁኑ መዘጋጀት ነዋ፡፡
  • የምን ዝግጅት ነው?
  • ባለፀጋዎች መዘጋጀት አለባቸው፡፡
  • በምንድነው የሚዘጋጁት?
  • ሀብታቸውን ለማካፈል ነዋ፡፡
  • ይሆናል ብለህ ነው?
  • ካልሆነማ የሚጠብቃቸውን ያዩታል፡፡
  • ምንድነው የሚጠብቃቸው?
  • ሙሉውን ያጡታል!

[ክቡር ሚኒስትሩ አማካሪያቸውን ቢሮ አስጠሩት]

  • አቤት ክቡር ሚኒስትር፡፡
  • ይቅርታ አድርግልኝ፡፡
  • ለምኑ ክቡር ሚኒስትር?
  • ታውጇል አይደል እንዴ?
  • የአስቸኳይ ጊዜ አዋጅ ታወጀ እንዴ?
  • ኧረ የፀሎትና የምልጃ አዋጅ ነው እንጂ፡፡
  • ታዲያ የምን ይቅርታ ነው?
  • በቃ ፈርቻለሁ፡፡
  • ምንድነው የሚያስፈራዎት?
  • ኮሮና ነዋ፡፡
  • ለእሱ እኮ መጠንቀቅ ነው የሚያስፈልገው፡፡
  • እኔ ግን ውስጤ ፍርኃት ፍርኃት እያለኝ ነው፡፡
  • ለምን?
  • ብዙ ወንጀል የሠራሁ ሰው ነኝ እኮ፡፡
  • እንዴት ክቡር ሚኒስትር?
  • እዚህ ቦታ ለመድረስ ያላደረግኩት ነገር የለም፡፡
  • ምን አደረጉ?
  • ያደረግኩትን ለማውራት ብጀምር ወራት አይበቁኝም፡፡
  • ይኼን ያህል?
  • አሁን ያስጠራሁህ እኮ ለዚያ ነው፡፡
  • ኑዛዜ ሊያጽፉኝ?
  • ኧረ ይቅርታ ለመጠየቅ፡፡
  • ለምኑ?
  • አንተን ምን ያልሠራሁህ ነገር አለ፡፡
  • ኧረ ምንም አላደረጉኝም፡፡
  • በየቀኑ እኮ ነው የማሴርብህ፡፡
  • እኔ ላይ?
  • እህሳ፡፡
  • ለምን?
  • ብዙ ሚስጥር ስለምታውቅ ነዋ፡፡
  • ቢሆንም እኔም እኮ እርስዎን ለማንም አሳልፌ አልሰጥዎትም፡፡
  • አሁን ግን ኮሮና አሳልፎ ሊሰጠኝ ነው፡፡
  • ለምን ፈሩ ክቡር ሚኒስትር?
  • መተኛት አልቻልኩም፡፡
  • ለምን?
  • በህልሜ ሁሉ ተይዤ ሲያበቃልኝ ነው የማየው፡፡
  • ሞት ይፈራሉ እንዴ?
  • ቆጭቶኝ ነው፡፡
  • ምኑ ነው የቆጨዎት?
  • ለዚችው ነው እንዲያ በሴራ ሕይወቴን የጨረስኩት ብዬ ነዋ፡፡
  • እ. . .
  • ቀን ተሌት ሳሴር ነበር እኮ የማድረው፡፡
  • ይኼን ያህል?
  • እና ይኼን ሁሉ ሀብት ያከማቸሁትስ በዕውቀቴ ይመስልሃል?
  • እሱማ በሥልጣንዎት ነው፡፡
  • እዚህ ለመድረስ የብዙ ሰዎችን ሕይወት አበላሽቻለሁ፡፡
  • አሁን መንቃትዎትም ጥሩ ነው፡፡
  • ስለዚህ ይቅርታ አድርግልኝ፡፡
  • ክቡር ሚኒስትር ከእኔ በላይ ይቅርታ መጠየቅ ያለብዎት አካል አለ፡፡
  • ማንን ይቅርታ ልጠይቅ?
  • ሕዝቡን!

[ለክቡር ሚኒስትሩ አንድ ባለሀብት ስልክ ደወለላቸው]

  • ሰላም ክቡር ሚኒስትር፡፡
  • ምን ሰላም አለ ብለህ ነው?
  • ቁጥሩ እኮ እያሻቀበ ነው፡፡
  • ምን ይደረግ?
  • ሁሉም ነገር ተዘጋግቷል፡፡
  • ሌላ አማራጭ አጥተን እኮ ነው፡፡
  • ገና ከጅምሩ እንዲህ ከሆነ ወደፊት እንዴት ሊኮን ነው?
  • እኔም ራሱ ጨንቆኛል፡፡
  • ሥራ ለለመደ ሰው ቤት ውስጥ መታሸግ ከባድ ነው፡፡
  • ሥራ ለለመደ አልክ?
  • ምነው ክቡር ሚኒስትር?
  • አንተ ስርቆት እንጂ የምን ሥራ ታውቃለህ?
  • እኔ እኮ ስርቆትን እንደ ሥራ ነው የማየው፡፡
  • እንዲያ ከሆነ እንኳን ልክ ነህ፡፡
  • እርስዎም ግን ከእኔ ብዙም አይለዩም፡፡
  • እንዴት ማለት?
  • ያው እዚህ ቦታ የደረሱት ብዙ ግፍ ፈጽመው ነዋ፡፡
  • ለማንኛውም እኔ ያስቀየምኳቸውን ሰዎች እየደወልኩ ይቅርታ እየጠየቅኩ ነው፡፡
  • ፈርተዋል ማለት ነው?
  • ስማ እንደኛ ዓይነቱን እኮ በሽታው ክፉኛ ነው የሚያጠቃው፡፡
  • ለነገሩ እኔም ኑዛዜዬን እየጻፍኩ ነው፡፡
  • ለማን ነው የምትናዘዘው?
  • ለልጆቼ ነዋ፡፡
  • ቀልደኛ ነህ እባክህ፡፡
  • ምነው ክቡር ሚኒስትር?
  • የአንተ ሀብት የማን እንደሆነ አታውቅም?
  • የማን ነው?
  • የሕዝቡ ነዋ፡፡
  • መቼም ቀልደኛ ነዎት፡፡
  • የምን ቀልድ ነው?
  • አንድ ነገር ግን ልንገርዎት፡፡
  • ምን?
  • ለካ ሱስ ነው፡፡
  • ምኑ?
  • መስረቅ፡፡
  • እ. . .
  • ይኸው አሁን እየተሰቃየሁ ነው፡፡
  • ማለት?
  • ምን ልስረቅ?
  • እ. . .
  • ቤት ውስጥ ታሽጌ ማለቴ ነው፡፡
  • እኔን እንኳን ያስቸገረኝ ሌላ ሱስ ነው፡፡
  • ምን?
  • እንዲህ ያለ እሱ መኖር እንደማልችል አላውቅም ነበር፡፡
  • የምን ሱስ ነው ያለብዎት?
  • የስብሰባ!

[ለክቡር ሚኒስትሩ አንድ አክቲቪስት ስልክ ደወለላቸው]

  • እስከ መቼ ነው ክቡር ሚኒስትር?
  • ምኑ?
  • አገራችን የምትዘጋው፡፡
  • አልገባኝም?
  • ምርጫውንም አስተላለፋችሁት፡፡
  • ሕዝብ ይለቃ ታዲያ?
  • እኛም እኮ ሥራችንን ተቀማን፡፡
  • ማን ነው የቀማችሁ?
  • መንግሥት ነዋ፡፡
  • እንዴት?
  • ሁሉን ነገር ማዘጋት የሚያምረው በእኛ ነበራ፡፡
  • እ. . .
  • ይኸው አሁን መንግሥት ሁሉን ነገር ቆላልፎት ቤት ተቀመጥን፡፡
  • ለነገሩ ሌላ ሥራ ተፈጥሮላችኋል እኮ፡፡
  • የምን ሥራ?
  • ሕዝቡን አካላዊ መራራቅ ላይ ትክክለኛ ግንዛቤ ማስጨበጡ አስቸግሮናል፡፡
  • ምን እያሉኝ ነው?
  • በሽታውን ከሚከላከሉ ተግባራት መካከል አካላዊ ርቀትን መጠበቅ ዋነኛው ነዋ፡፡
  • ስለዚህ?
  • እናንተ ዕርዱን፡፡
  • ምን በማድረግ?
  • ሕዝቡን በማራራቅ!

በብዛት የተነበቡ ፅሁፎች

- Advertisment -

ትኩስ ፅሁፎች

‹‹በየቦታው ምርት እየገዙ የሚያከማቹ ከበርቴ ገበሬዎች ተፈጥረዋል››

አቶ ኡስማን ስሩር፣ የማዕከላዊ ኢትዮጵያ ክልል በምክትል ርዕሰ መስተዳድር...

ኢትዮጵያዊ ማን ነው/ናት? ለምክክሩስ መግባባት አለን?

በደምስ ጫንያለው (ዶ/ር) የጽሑፉ መነሻ ዛሬ በአገራችን ውስጥ በተለያዩ አካባቢዎች ግጭቶችና...

ዴሞክራሲ ጫካ ውስጥ አይደገስም

በገነት ዓለሙ የዛሬ ሳምንት ባነሳሁት የኢሰመኮ ሪፖርት መነሻነትና በዚያም ምክንያት...

ኢትዮጵያ በምግብ ራሷን የምትችለው መቼ ነው?

መድረኩ ጠንከር ያሉ የፖሊሲ ጉዳዮች የተነሱበት ነበር፡፡ ስለረሃብ፣ ስለምግብ፣...

ደረጃውን የጠበቀ ስታዲየም በሌላት አገር ዘመናዊ ስታዲየም እየገነቡ ያሉ ክልሎች

አዲሱ የማዕከላዊ ኢትዮጵያ ክልል ዘመናዊ ስታዲየም ለማስገንባት ከ500 ሚሊዮን...
spot_img

ተዛማጅ ፅሁፎች

[ክቡር ሚኒስትሩ የቅርብ ወዳጃቸው ከሆነች አንድ ባለሀብት የተደወለላቸውን ስልክ አንስተው በኮሪደር ልማቱ ላይ የምታቀርበውን ቅሬታ እየሰሙ ነው]

ክቡር ሚኒስትር እኔ የኮሪደር ልማቱ ላይ ተቃውሞም ሆነ ጥላቻ እንደሌለኝ የሚያውቁ ይመስለኛል? በዚህ እንኳን አትታሚም።  የእውነቴን ነው ክቡር ሚኒስትር። አውቃለሁ ስልሽ? ለኮሪደር ልማቱ አዋጡ ሲባልም ያለማመንታት አምስት ሚሊዮን...

[ክቡር ሚኒስትሩ በችግኝ ተከላ ፕሮግራም ላይ ሳይገኝ ከቀረው አንድ የተቋማቸው ባልደረባ የሆነ የተቃዋሚ ፓርቲ አባልን አስጠርተው እያናገሩ ነው]

ለምንድነው በዚህ አገራዊ ፋይዳ ባለው ፕሮግራም ላይ ያልተገኘኸው? ክቡር ሚኒስትር ህሊናዬ አልፈቀደልኝም። መቃወምና መተቸት ብቻ ውጤት የሚያመጣ መስልዎህ ከሆነ ተሳስተሃል። አልተሳሳትኩም ክቡር ሚኒስትር? ቆይ የመጀመሪያ ዓመት የችግኝ ተከላ...

[ክቡር ሚኒስትሩ ከሚያከብሯቸው አንድ የቀድሞ ጉምቱ ፖለቲከኛ ስልክ ተደውሎላቸው እያወሩ ነው]

አንዳንድ ነገሮች ቢያሳስቡኝ ነው ቀጠሮ ሳልይዝ ላነጋግርህ የፈለኩት ክቡር ሚኒስትር፡፡ እርስዎማ ቀጠሮ መያዝ አያስፈልግዎትም፣ ምን ገጠመዎት? እኔማ ምን ይገጥመኛል አንተኑ ልጠይቅህ እንጂ? ምን? እውነት ለመናገር የማየው ነገር አሳስቦኛል፡፡ ይንገሩኝ...