Tuesday, July 23, 2024
- ማስታወቂያ -
- ማስታወቂያ -

 ኦሮሚያ ኅብረት ሥራ ባንክ እስከ አምስት በመቶ የሚደርስ የወለድ ቅናሽ አደረገ

ተዛማጅ ፅሁፎች

የኦሮሚያ ኅብረት ሥራ ባንክ በኮሮና ቫይረስ ወረርሽኝ ምክንያት ለተጎዱ የተለያዩ የሥራ ዘርፎች እስከ አምስት በመቶ የሚደርስ የብድር ወለድ ምጣኔ ቅናሽ ማድረጉን አስታወቀ፡፡ ወረርሽኙ የባንኩን የገንዘብ እንቅስቃሴ እንዲቀንስ ጫና ማሳደሩን ገልጿል፡፡

ለኅብረት ሥራ ማኅበራት፣ ለአገር ውስጥ ንግድ፣ ለሆቴል ዘርፍ፣ ለኢንዱስትሪ አምራቾች፣ ለግብርና፣ ለተሽከርካሪ፣ ለሕንፃና ግንባታ፣ ለገቢ ንግድ፣ ለቤትና ለግል ሥራ በተሰጡ ብድሮች ላይ ከ0.5 በመቶ እስከ አምስት በመቶ የሚደርስ የወለድ ቅነሳ በማድረግ እንደ ዘርፉ የሚለያይ ማሻሻያ ማድረጉን ባንኩ አስታውቋል፡፡

ባንኩ ከኮሮና ቫይረስ ወረርሽኝ አኳያ እያከናወናቸው በሚገኙ ተግባራት ላይ ረቡዕ ሚያዝያ 7 ቀን 2012 ዓ.ም. በሰጠው መግለጫ፣ በወረርሽኙ በይበልጥ ተጎጂ ለሆኑ ዘርፎች የብድርና የወለድ ምጣኔ ቅናሽ ማድረጉን ገልጿል፡፡ የባንኩ ፕሬዚዳንት አቶ ደርቤ አስፋው እንደገለጹት፣ ‹‹የእኛ ኢኮኖሚ ብቻ ሳይሆን፣ በዓለም ያለው ሁኔታ በጣም አስቸጋሪ ስለሆነ፣ መንግሥት በዚህ ወረርሽኝ የሚጎዱ ዋና ዋና ዘርፎች ብሎ በለያቸው መሠረት እኛም ይህንኑ ታሳቢ አድርገን የብድር ወለድ ቅናሽ አድርገናል፤›› ብለዋል፡፡

በኢትዮጵያ ብሔራዊ ባንክ በሌሎች የመንግሥት ተቋማት ግምገማ መሠረት በእጅጉ ይጎዳሉ ተብለው የተለዩት የአበባ እርሻዎች፣ ሆቴሎችን የመሳሰሉ የአገልግሎት ተቋማት፣ አስጎብኚ ድርጅቶችና ተያያዥ ዘርፎች ከሌሎች በበለጠ የንግድ ሥራቸው በመቆሙ ልዩ ትኩረት የሚፈልጉ ሆነው እንደተገኙ ፕሬዚዳንቱ ገልጸዋል፡፡ ከነዚህ ዘርፎች ውጪ ያሉትም ቢሆኑ ከዓለም ኢኮኖሚ እንቅስቃሴ መዳከምና በእንቅስቃሴ ክልከላዎች የተነሳ ተፅዕኖ እያረፈባቸው ስለሚገኙ መንግሥት የወሰዳቸው የፖሊሲ ማሻሻያዎችን በመመልከት፣ ባንኩ የብድር ወለድ ምጣኔ ላይ ማሻሻያ እንዳደረገ አስረድተዋል፡፡

ኦሮሚያ ኅብረት ሥራ ባንክ፣ የሚታየውን የቢዝነስ እንቅስቃሴ መዳከም በማጤን በአንዳንድ የአገልግሎት ክፍያዎች ላይ ማሻሻያ ማድረጉንም አስታውቋል፡፡ በተለይ የኤሌክትሮኒክ አገልግሎትን ሙሉ በሙሉ ከክፍያ ነፃ እንዲደረግ የባንኩ ዳይሬክተሮች ቦርድ ውሳኔ ማሳለፉን ፕሬዚዳንቱ ጠቅሰዋል፡፡ ከወጪ ንግድ ጋር በተያያዘ ላኪዎች የሌተር ኦፍ ክሬዲት የአገልግሎት ማራዘሚያ ክፍያ እንዲነሳላቸው ተደርጓል፡፡

ሰፊ ማብራሪያ በተሰጠበት የብድር ወለድ ምጣኔ ቅናሽ ላይ ፕሬዚዳንቱ እንደጠቀሱት፣ የማኅበራት ተበዳሪዎችና ሌሎች ደንበኞች ተብለው በሁለት ጎራ ተከፍሎ የብድር ወለድ ማሻሻያው ታይቷል፡፡ ለተለያዩ ማኅበራትና ዩኒየኖች እንዲሁም ከዚህ ውጭ ላሉ ቢዝነሶች በአጠቃላይ ከ0.5 በመቶ እስከ አምስት በመቶ የብድር ወለድ ቅናሽ ቢደረግም፣ ለማኅበራትና ለዩኒየኖች ግን የተሻለ የብድር ወለድ ቅናሽ ተደርጎላቸዋል፡፡ ማኅበራት ላልሆኑ ደንበኞቹም ከ0.5 በመቶ እስከ አራት በመቶ የወለድ ምጣኔ ቅናሽ አድርጓል፡፡ ከማኅበር ውጭ ሆነው አስመጪ ለሆኑ ደንበኞች ብዙም ቅናሽ አልተደረገም፡፡ የተደረገው ቅናሽም 0.5 በመቶ ብቻ ነው፡፡

ለኮንስትራክሽን ዘርፍ አንድ በመቶ፣ እርሻና ለእርሻ መሣሪያ ተበዳሪዎች ከ1.5 እስከ አራት በመቶ ቅናሽ ተደርጓል፡፡ ለሆቴልና ቱሪዝም ዘርፍ 1.25 እስከ 3.5 በመቶ ቅናሽ ተደርጓል፡፡

የማኅበራት ዘርፍ ተብለው የተለዩ ተበዳሪዎች በርካታ አርሶ አደሮችንና የሸማቾች ማኅበራትን ያቀፉ በመሆናቸውና በተለየ መንገድ ድጋፍ ያስፈልጋቸዋል ተብሎ በመታመኑ፣ በወጪ ንግድ መስክ ለሚንቀሳቀሱ የማኅበር ተበዳሪዎች ከ1.5 እስከ አራት በመቶ፣ ለአገር ውስጥ ንግድ ተበዳሪዎችም የአራት በመቶ የወለድ ቅናሽ ተደርጓል፡፡ ማኅበራት ሆነው ለእርሻና ለእርሻ መሣሪያዎች ተበዳሪዎች ከ3.2 እስከ 4 በመቶ ቅናሽ ተደርጓል፡፡

ከዚህም ሌላ የብድርና ቁጠባ ተቋማት ደግሞ የአራት በመቶ የብድር ወለድ ቅናሽ ሲደረግላቸው፣ የፋብሪካ ተበዳሪዎች ከአራት እስከ አምስት በመቶ የብድር ወለድ ቅናሽ መደረጉንም ገልጿል፡፡ ለትራንስፖርትና ለተሽከርካሪዎች ተበዳሪዎች ከ3.5 እስከ አራት በመቶ ቅናሽ ተደርጓል፡፡ ሌሎችም ዘርፎች እንዲሁ እስከ አምስት በመቶ ቅናሽ ተደርጓል፡፡ ይህ ውሳኔ ባንኩን ከሁለት በመቶ ሚሊዮን ብር በላይ የሚገመት ገቢ ያሳጣዋል ተብሏል፡፡ ይህም ቢሆን ግን አሁን ባለው ችግር ተደጋግፎ ማለፍ ተገቢ በመሆኑ የተወሰደ ዕርምጃ ነው ተብሏል፡፡

የኦሮሚያ ኅብረት ሥራ ባንክ የኮሮና ቫይረስ በአገራችን ከታየበት ጊዜ አንስቶ ሥርጭቱን ለመግታት መንግሥት፣ መንግሥታዊ ያልሆኑ ድርጅቶች፣ የሃይማኖት ተቋማትና ማኅበረሰቡ በየአቅጣጫው በሚደረገው እንቅስቃሴ እየደገፈ መሆኑንም በመግለጽ፣ እስካሁን ያደረጋቸውን ሥራዎች አብራርቷል፡፡

በአሁኑ ጊዜ ዓለምን በማሸበር ላይ የሚገኘው የኮሮና ቫይረስ በኅብረተሰቡ ውስጥ ተሠራጭቶ ሥር ከመስደዱ በፊት ከወዲሁ ለመከላከል በፌዴራል መንግሥት በኩል በመደረግ ላይ የሚገኘውን እንቅስቃሴ በገንዘብ ለመደጎም መጋቢት 24 ቀን 2012 ዓ.ም. በጤና ሚኒስቴር በኩል የአምስት ሚሊዮን ብር የገንዘብ ድጋፍ ማድረጉንም የባንኩ መግለጫ አስታውሷል፡፡

ከዚህ በተጨማሪ ባንኩ በኦሮሚያ ክልል የኮሮና ቫይረስን ለመከላከል  የሚደረገውን ጥረት ለመደጎም ሚያዝያ 1 ቀን 2012 ዓ.ም. የሦስት ሚሊዮን ብር ድጋፍ አበርክቷል፡፡ ወረርሽኙ እየከፋ ከሄደም በነቀምቴ ከተማ የሚገኘውን በ608 ሜትር ላይ ያረፈ 28 ክፍሎች ያሉትና ባለብዙ ድርሻ ጂ+7 ሕንፃ እንዲሁም ኩዩ ከተማ የሚገኘውን 301.5 ሜትር ላይ ያረፈ 28 ክፍሎችና ባለብዙ ድርሻ ጂ+7 ሕንፃ፣ በጊዜያዊነት ለበሽታው መከላከል ያግዝ ዘንድ እንደሚያበረክት አስታውቋል፡፡

ባንኩ ለሠራተኞች ጥንቃቄ በማድረግ በቅርንጫፍ ላይ ለሚገኙ ሠራተኞቹ በሦስት ሚሊዮን ብር 26,000 የፊት መሸፈኛና በአንድ ሚሊዮን ብር ደግሞ ሳኒታይዘር ገዝቶ አከፋፍሏል፡፡ በሥራ ገበታቸው ላይ በፈረቃ እንዲገኙ በማድረግ በተጨማሪ የትራንስፖርት አገልግሎት አመቻችቷል፡፡ ሠራተኞች የዓመት ፈቃድ እንዲመቻችላቸው ብሎም ያለምንም ደመወዝ ክፍያ ፈቃድ እንዲወጡ፣ ፈቃድ ለጨረሱ ከሚቀጥለው ዓመት ፈቃድ ላይ እንዲበደሩ እንዲሁም የተጋላጭነት ፈቃድ በተለይ ለነፍሰ ጡር ሴቶች ተመቻችቶላቸዋል፡፡

በቅርንጫፍ ደረጃ የተደረጉ ዝግጅቶች በ416 ቅርንጫፎች የእጅ መታጠበቂያ ሥፍራና ቁሳቁሶች አዘጋጅቷል፡፡ ወደ ባንኩ ለሚመጡ ደንበኞች ርቀታቸውን ጠብቀው እንዲስተናገዱ ተደርጓል፡፡

ይህ በእንዲህ እንዳለ ወረርሽኙ ከተከሰተ ወዲህ በባንኩ የገንዘብ እንቅስቃሴ ላይ አሉታዊ ተፅዕኖ ማሳደሩንም ገልጸዋል፡፡ በወረርሽኙ ምክንያት በባንኩ ላይ የደረሰውን ጉዳት በተመለከተ አቶ ደርቤ በሰጡት ማብራሪያ፣ እስካሁን ዕለታዊ የገንዘብ እንቅስቃሴና ልውውጥ በእጅጉ ቀንሷል ብለዋል፡፡ ባንኩ ከወረርሽኙ መከሰት በፊት በቀን ከ140 እስከ 160 ሺሕ ልውውጥ እንደነበረው ያስታወሱት አቶ ደርቤ፣ ወረርሽኙ ከተከሰተ ወዲህ ዕለታዊ የገንዘብ እንቅስቃሴው ከ100 ሺሕ በታች ወርዷል ብለዋል፡፡ ይህን መቀዛቀዝ ከገንዘብ አኳያ ሲታይ ከወረርሽኙ መከሰት በፊት በቀን ከ3.2 እስከ 3.6 ቢሊዮን ብር የነበረው እሽክርክሪት አሁን ላይ ከ1.2 እስከ 1.7 ቢሊዮን ብር ዝቅ ማለቱን በመጥቀስ፣ የፋይናንስ እንቅስቃሴው ምን ያህል እንደተጎዳ አመላክተዋል፡፡ ወደፊትም ሊኖር የሚችለው ጉዳት ምን ያህል እንደሚሆን፣ ኢኮኖሚያዊ ጫናውም ወደፊት በአኃዝ ተደግፎ እንደሚቀርብ አመልክተዋል፡፡

ኦሮሚያ የኅብረት ሥራ ባንክ በአሁኑ ወቅት ከግል ባንኮች ከፍተኛ ቁጥር ያላቸውን ደንበኞች በማፍራት በቀዳሚነት ይጠቀሳል፡፡ ስድስት ሚሊዮን የሚጠጉ ደንበኞች ማፍራት የቻለው ይህ ባንክ፣ በብዙ ሺሕ የሚቆጠሩ የኅብረት ሥራ ማኅበራትና ዩኒየኖችም በአብላጫው ባለአክሲዮን የሆኑበት የገንዘብ ተቋም ነው፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች