Tuesday, July 23, 2024
- ማስታወቂያ -
- ማስታወቂያ -

ንግድ ባንክ ከግማሽ ቢሊዮን ብር በላይ ለሚጠበቅባቸው የኮንዶሚኒየም ተበዳሪዎች የሦስት ወራት ክፍያ አራዘመ

ተዛማጅ ፅሁፎች

የኢትዮጵያ ንግድ ባንክ ከኮሮና ወረርሽኝ ጋር በተያያዘ ወርኃዊ ክፍያ ለሚፈጽሙ የኮንዶሚኒየም ዕድለኞች የሦስት ወራት የብድር ክፍያ ዕፎይታ ጊዜ መስጠቱን አስታወቀ፡፡

ባንኩ፣ ሐሙስ ሚያዝያ 8 ቀን 2012 ዓ.ም. በሰጠው መግለጫ፣ ከሚያዝያ እስከ ሰኔ 2012 ዓ.ም. ድረስ ለሦስት ወራት የሚቆይ የዕዳ ክፍያ ማራዘሚያ ድጋፍ አድርጎላቸዋል፡፡ እነዚህ ደንበኞች በየወሩ መክፈል የሚጠበቅባቸው ከ542 ሚሊዮን ብር በላይ ገንዘብ እንደሆነ የባንኩ ፕሬዚዳንት አቶ አቤ ሳኖ ገልጸዋል፡፡ ባንኩ ባሳለፈው ውሳኔ መሠረት ተጠቃሚ የሚሆኑ ተበዳሪዎች ለሦስት ወራት በተሰጠው የዕፎይታ ጊዜ ውስጥ ወደ ባንኩ በመቅረብ ምንም ዓይነት ተጨማሪ ውል መፈጸም እንደማይጠበቅባቸው አስታውቋል ብሏል፡፡

ኮሮና ቫይረስ የዓለማችንና የአገራችን የጤና ሥጋት ከሆነ መሰነባበቱን የሚገልጸው ይኸው መግለጫ፣ በአገራችን ኢትዮጵያም በሽታው እያመጣ ባለው የጤና፣ ማኅበራዊና ኢኮኖሚያ ጉዳት ምክንያት የጋራ መኖሪያ ቤት ብድር ተጠቃሚዎች የዕለት ገቢ ላይ አሉታዊ ተፅዕኖ እያሳደረ መሆኑን አስታውሷል፡፡ በመሆኑም የኮንዶሚኒየም ቤት ተበዳሪዎች በተከሰተው ወቅታዊ የኮሮና ቫይረስ ወረርሽኝ ምክንያት ብድራቸውን በተቀመጠላቸው የመክፈያ ጊዜ መሠረት መክፈል እንደሚቸገሩ ግምት በመውሰድ ለደንበኞቹ ተገቢውን የብድር መክፈያ የዕፎይታ ጊዜ መስጠት በማስፈለጉ የሦስት ወራት የክፍያ ዕፎይታ ጊዜ ወጥቷል፡፡

ደንበኞች በእነዚህ ወራት መክፈል የሚጠበቅባቸው ክፍያ በቀሪ የብድር መክፈያ ዓመታት ተካፍሎ የሚከፈል ይሆናል፡፡ ይሁንና በተጠቀሱት ወራት ዕዳቻውን በአግባቡ መክፈል የሚችሉ ደንበኞች ወርኃዊ ክፍያቸውን በተቀመጠው የክፍያ ሥርዓት መሠረት እንዲፈጽሙ እንደሚበረታቱም የባንኩ ፕሬዚዳንት አቶ አቤ ገልጸዋል፡፡

የኮንዶሚኒየም የብድር መመለሻ ጣሪያ የመክፈያ ጊዜ ከተቀመጠው ዘመን በላይ አይራዘምም፡፡ የኮንዶሚኒየም ብድር ወስደው መክፈል ያልቻሉና ንብረታቸው በጨረታ ሒደት ላይ ያሉ ደንበኞች ይህ ወረርሽኝ እልባት እስኪያገኝ ድረስ የጨረታ ሒደቱ እንዲቋረጥ ተወስኗል፡፡ ለብድር ማራዘሚያ የሚከፈለው የአገልግሎት ክፍያ በእነዚህ ብድሮች ላይ ተፈጻሚ አይሆንም፡፡

በዚህም መንግሥት እንደ አገር የበሽታውን ሥርጭት ለመከላከልና ኢኮኖሚያዊ ጫናውን ለመቋቋም እያደረገ ያለውን ጥረት መደገፍ ያስቻለን ሲሆን፣ በሌላ መልኩ ባንኩ እንደ ትልቅ አገራዊ ተቋምነቱ በዚህ አስቸጋሪ ወቅት ትክክለኛ ምላሽ በመስጠት ማኅበራዊ ኃላፊነቱን እንዲወጣ እንዳስቻለው ገልጿል፡፡

የኢትዮጵያ ንግድ ባንክ ባለፉት ዓመታት አነስተኛና መካከለኛ ገቢ ያላቸው የአዲስ አበባና የክልል ከተሞች ነዋሪዎችን የቤት ችግር ለመቅረፍ መንግሥት ባወጣው ፖሊሲ መሠረት የከተማ አስተዳደሮቹ ለሚገነቧቸው የጋራ መኖሪያ ቤቶች ብድር ሲሰጥ መቆየቱንና ለዚሁ ፕሮግራም 74.6 ቢሊዮን ብር ብድር መስጠቱን ገልጿል፡፡

ከዚህም ሌላ ከባንኩ ጋር በመቆጠብ የቤት ዕድለኛ በሚሆኑበት ጊዜ እስከ 80 በመቶ የሚደርስ የቤት ማስተላለፊያ ዋጋ በረዥም ዓመታት የሚመለስ ብድር በማቅረብ ኅብረተሰቡን የቤት ባለቤት እንዲሆኑ በማድረግ ላይ ነው፡፡ በዚህም እ.ኤ.አ. እስከ ማርች 31 ቀን 2020 ድረስ ለ107,594 የቤት ዕድለኛ 15,41 ቢሊዮን ብር በረዥም ጊዜ የሚከፈል ብድር በማቅረብ፣ የአዲስ አበባና የክልል ከተሞች ነዋሪዎችን የቤት ባለቤት ለማድረግ እንደቻለም በዚሁ መግለጫው አስታውሷል፡፡

በአሁኑ ወቅት 779,932 የአዲስ አበባ ከተማ ነዋሪዎች በ40/60፣ 20/80 እና 10/90 የቤት ልማት ፕሮግራም 31 ቢሊዮን ብር በመቆጠብ የቤት ባለቤት ለመሆን በመጠባበቅ ላይ ይገኛሉም ብሏል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች