Tuesday, July 23, 2024

ፖሊስ ባደረገው ድንገተኛ ፍተሻ ተሰባስበው መጠጥ ሲጠጡና ሺሻ ሲያጨሱ የነበሩ 124 ግለሰቦችን ያዝኩኝ አለ

- Advertisement -spot_img

በብዛት የተነበቡ

በቅርቡ ታውጆ በሥራ ላይ በዋለው የአስቸኳይ ጊዜ አዋጅ ድንጋጌዎች ክልከላ የተደረገባቸውን ድርጊቶች በመተላለፍ፣ ተሰባስበው መጠጥ ሲጠጡና ሺሻ ሲያጨሱ የነበሩ 124 ግለሰቦችን ድንገት ባደረገው ፍተሻ በቁጥጥር ሥር እንዳዋላቸው ፖሊስ አስታወቀ፡፡

የአዲስ አበባ ፖሊስ ኮሚሽን ለመገናኛ ብዙኃን እንደገለጸው፣ ከኅብረተሰቡ በደረሰው ጥቆማ በአራዳ ክፍለ ከተማ ሰሜን ማዘጋጃ አካባቢ ሰኞ ሚያዝያ 19 ቀን 2012 ዓ.ም. ድንገት ባደረገው ፍተሻ በሁለት ሆቴሎች ውስጥ በአጠቃላይ 116 ግለሰቦች መጠጥ ሲጠጡ፣ ስምንቱ ደግሞ ሺሻ ሲያጨሱና ጫት ሲቅሙ እጅ ከፍንጅ ይዟቸዋል፡፡

የኮሮና ቫይረስ ወረርሽኝን ለመከላከልና ለመቆጣጠር ወይም ጉዳቱን ለመቀነስ በአስቸኳይ ጊዜ አዋጁ ከተከለከሉ ድርጊቶች አንዱ ሺሻ ማጨስና ጫት መቃም ሆኖ ሳለ፣ ግለሰቦቹ ግን የሕጉን ድንጋጌ በመተላለፍ በቡድን ሆነው ሲያጨሱና ሲቅሙ መያዛቸውን የአራዳ ክፍለ ከተማ ፖሊስ መምርያ የወንጀልና የትራፊክ አደጋ ምርመራ ዲቪዚዮን ኃላፊ ኮማንደር ጃፋር ኸሊል ተናግረዋል፡፡

እንደ ኃላፊው ገለጻ፣ ፖሊስ ከነዋሪዎች በደረሰው ጥቆማ መሠረት ባደረገው አሰሳ ራሔት ሆቴል ውስጥ 35 ግለሰቦች፣ እንዲሁም ቲሊሊ ሆቴል ውስጥ ደግሞ 81 ግለሰቦች መጠጥ ሲጠጡ እጅ ከፍንጅ መያዛቸውን አስረድተዋል፡፡ በክፍለ ከተማው ወረዳ 10 ውስጥ ደግሞ አንድ ግለሰብ ጠባብ ክፍል ውስጥ ጫት ሲያስቅም መያዙን ለማወቅ ተችሏል፡፡

በጤና ባለሙያዎችና በመንግሥት ኃላፊዎች ስለወረርሽኙ የሚነገረውን ለምን አንዳንድ የኅብረተሰብ ክፍሎች እንደማይሰሙ ግራ እንደገባቸው የተናገሩት ኃላፊው፣ በተመሳሳይ ሁኔታ በአንዲት ጠባብ ክፍል ውስጥም አሥር ግለሰቦች ጫት እየቃሙ መያዛቸውን አስረድተዋል፡፡ መንግሥት ኅብረተሰቡ የወረርሽኙን አስከፊ ሁኔታ ተገንዝቦ ራሱንና አገሩንም ከጉዳት ያድናል በሚል ትዕግሥት ማድረጉን ተናግረው፣ ከዚህ በኋላ የአዋጁን ድንጋጌ በሚጥሱ ማናቸውም የኅብረተሰብ ክፍሎች ላይ ዕርምጃ እንደሚወሰድ አስታውቀዋል፡፡

በቁጥጥር ሥር በዋሉት ግለሰቦች ላይ በሕጉ አግባብ አስፈላጊ መረጃዎችን አደራጅተው፣ ለዓቃቤ ሕግ በማቅረብ ክስ እንደተመሠረተባቸውም ጠቁመዋል፡፡

የአዲስ አበባ ከተማ ፖሊስ ኮሚሽን ከዚህ ቀደም በተለያዩ ክፍላተ ከተሞች ውስጥ ሕጉን በመተላለፍ ተሰብስበው መጠጥ ሲሰጡ፣ ጫት ሲቅሙና ሺሻ ሲያጨሱ የያዛቸውን ግለሰቦች ለሕግ እንደሚያቀርብ መግለጹ ይታወሳል፡፡  

spot_img
- Advertisement -

ትኩስ ጽሑፎች

ተዛማጅ ጽሑፎች

- Advertisement -
- Advertisement -