Tuesday, July 23, 2024
- ማስታወቂያ -
- ማስታወቂያ -

ምርት ገበያ ከ30 ቢሊዮን ብር በላይ ዋጋ ያስመዘገቡ ምርቶች አገበያየ

ተዛማጅ ፅሁፎች

የኢትዮጵያ ምርት ገበያ ባለፉት ዘጠኝ ወራት 602,823 ቶን ምርት በ30.4 ቢሊዮን ብር በማገበያየት ካቀደው 97 በመቶ ማሳካቱን አስታወቀ፡፡

ምርት ገበያው በዚህ ዓመት በዘጠኝ ወራት ውስጥ 231,855 ቶን ቡና፣ 211,777 ቶን ሰሊጥ፣ 69,760 ቶን አኩሪ አተር፣ 46,914 ቶን አረንጓዴ ማሾ፣ 39,286 ቶን ነጭ ቦሎቄና 3,201 ቀይ ቦሎቄ ማገበያየቱንና ይህ ክንውን ካለፈው ዓመት ተመሳሳይ ጊዜ ጋር ሲነፃፀር በመቶ ሺሕ ቶን ወይም በ20 በመቶ ብልጫ አለው፡፡

ከምርት ስብጥር አኳያ፣ የቡና ግብይት የዕቅዱን 99 በመቶ አሳክቷል ያለው የምርት ገበያ መረጃ፣ በሰሊጥ ምርትም የዕቅዱን 75 በመቶ እንዳገበያየ አስታውቋል፡፡ ከ2011 ዓ.ም. ተመሳሳይ ወቅት አንፃር የአራት በመቶ ጭማሪ እንዳለው አመላክቷል፡፡

የምርቶቹ አጠቃላይ የግብይት ዋጋም 30.4 ቢሊዮን ብር ሆኗል፡፡ ከዕቅዱ የስድስት በመቶ ጭማሪ ሲኖረው፣ ከ2011 ዓ.ም. አኳያ በ21 በመቶ ጭማሩ እንዳሳየ  ይጠቅሳል፡፡

ከዚህ ግብይት ውስጥ በሐዋሳና በሁመራ በተቋቋሙ የኤሌክትሮኒክ የግብይት ማዕከላት አማካይነት 987 ቶን ቡና፣ 6,665 ቶን ሰሊጥ ተገበያይቷል፡፡ የምርት ገበያው 23ቱም ቅርንጫፎች ምርት የመረከብና ናሙና ወስዶ በላቦራቶሪ በመፈተሽ ደረጃ የመስጠት ሥራቸውን አጠናክረው ቀጥለዋል፡፡ በዚህ መሠረት በዘጠኝ ወራት ውስጥ 64,033 ናሙና ተወስዶ የምርት ቅበላና ርክብብር ደኅንነቱን ይበልጥ ለማረጋገጥም 36 የደኅንነት ካሜራዎች በሦስት ቅርንጫፎች ተተክለዋል፡፡ የገበያ መረጃን በተሻለ መንገድ ማሠራጨት የሚችሉ 66 የመረጃ ኪዎስኮች በተለያዩ የአገራችን አካባቢዎች እንዲቀመጡ መደረጉንም የዘጠኝ ወሩ የምርት ገበያው መረጃ ያመለክታል፡፡

እንዲሁም በስምንት የቡና መቀበያ ቅርንጫፎች እየተካሄደ ያለው ዘመናዊ የናሙና መውሰጃ ቦታ ግንባታ 97 በመቶ ተጠናቋል፡፡ የአዳዲስ መጋዘኖች ግንባታ በቡሌ ሆራ 98 በመቶ፣ በመቱ 74 በመቶ፣ በቴፒ 80 በመቶ ደርሷል፡፡ በጎንደርና በሁመራ አዲስ ለሚገነቡት መጋዘኖችም ሥራ ተቋራጮች ተመርጠው ወደ ሥራ በመግባት ላይ ይገኛሉ፡፡ በ2012 ዓ.ም. ግንባታቸውን ለማጠናቀቅ የታቀዱት ተጨማሪ ሦስት የኤሌክትሮኒክ የግብይት ማዕከላት የፊዚካል ግንባታቸው የአዳማ የተጠናቀቀ ሲሆን፣ የጎንደር 99 በመቶ፣ የጅማ 98.5 በመቶ መድረሱንም ገልጿል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች