Thursday, July 25, 2024
- ማስታወቂያ -
- ማስታወቂያ -

የልማት ባንክ የተከፈለ ካፒታል በሦስት እጥፍ አድጎ 28.5 ቢሊዮን ብር ደረሰ

ተዛማጅ ፅሁፎች

የኢትዮጵያ ልማት ባንክ አቅሙን ለማጎልበትና የአገሪቱን የልማት ዕቅድ ለማስፈጸም ያስችለው ዘንድ፣ የተከፈለ ካፒታሉ በሦስት እጥፍ አድጎ 28.5 ቢሊዮን ብር እንዲሆን ተወሰነ፡፡

የሚኒስትሮች ምክር ቤት ሐሙስ ሚያዝያ 29 ቀን 2012 ዓ.ም. ባስተላለፈው ውሳኔ፣ ባንኩ የተቋቋመበት ደንብ እንዲሻሻል አድርጓል፡፡ በዚህ መሠረት ባንኩ 7.5 ቢሊዮን ብር የነበረው የተከፈለ ካፒታሉ 21 ቢሊዮን ብር ተጨምሮበት፣ 28.5 ቢሊዮን ብር መድረሱን ለማወቅ ተችሏል፡፡

የልማት ባንክ ፕሬዚዳንት አቶ ኃይለየሱስ በቀለ ለሪፖርተር እንደገለጹት፣ እንዲህ ያለው ማሻሻያ ባንኩን የመንግሥት ትልቅ የፖለሲ ባንክ ያደርገዋል፡፡ ባንኩ እያስተዳደረ ካለው ሀብት አንፃር ሊኖረው የሚገባውን አቅም እንዲይዝ ካፒታሉ እንዲያድግ ተወስኗል ብለዋል፡፡ ካፒታሉ እንዲያድግ ሌሎች ምክንያቶች እንዳሉ የጠቆሙት ፕሬዚዳንቱ፣ ባንኩ በብድርና በተለያዩ ድጋፎች የሚመጡ ገንዘቦችን የሚያስተዳድር በመሆኑ፣ ይህንን ለማስፈጸም የተቀመጠውን ዓለም አቀፍ ስታንዳርድ ለማሟላት ይህ ውሳኔ አስፈላጊ ነው ብለዋል፡፡

‹‹ከዓለም አቀፍ ባንኮች ጋር በምንሠራበት ወቅት ይህ ጥያቄ ይቀርብ ነበር፤›› ሲሉ ያስታወሱት አቶ ኃይለየሱስ፣ አሁን የተከፈለ ካፒታሉ እዚህ ደረጃ መድረሱ መሥፈርቱን እንዲያሟላ ከማስቻሉም በላይ ለባንኩ ገጽታ ግንባታም ያግዛል ብለዋል፡፡

ከዚህም በተጨማሪ ባንኩ የአምስት ዓመት ሪፎርም ዕቅድ አዘጋጅቶ እየተገበረ ስለሆነ፣ የካፒታል ዕድገቱ የዚህ ፎርም አካል መሆኑን ጠቁመዋል፡፡

የሚኒስትሮች ምክር ቤት የባንኩን ማቋቋሚያ አዋጅ በማሻሻል የልማት ዕቅድ ለማስፈጸም የሚያስችል አቅም እንዲኖረው የባንኩን የተከፈለ ካፒታል ማሳደግ አስፈላጊ መሆኑን በማመን፣ ማሻሻያው በነጋሪት ጋዜጣ ታትሞ ሥራ ላይ እንዲውል መወሰኑንም ፕሬዚዳንቱ አስታውቀዋል፡፡

ይህ በእንዲህ እንዳለ ከኮሮና ቫይረስ ወረርሽኝ ጋር በተያያዘ ባንኩ የተበዳሪዎችን የብድር ወለድ ክፍያ፣ ለሁለት ወራት ማራዘሙን ለማወቅ ተችሏል፡፡

ችግሩ ጫና የፈጠረባቸውን ዘርፎች በመለየት የሁለት ወራት ብድርና የወለድ ክፍያ ማራዘሚያ ከማድረግ ባለፈ፣ ከዚህ በኋላ ሊኖረው የሚችለውን ተፅዕኖ በማጥናት ተጨማሪ ዕርምጃዎች እንደሚወሰዱም ፕሬዚዳንቱ አስታውቀዋል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች