Tuesday, July 16, 2024
- Advertisement -
- Advertisement -
ማኅበራዊበዓለም የኮሮና ቫይረስ መከሰት ሥርዓተ ምኅዳሩ ባለመጠበቁ ሊሆን ይችላል ተባለ

በዓለም የኮሮና ቫይረስ መከሰት ሥርዓተ ምኅዳሩ ባለመጠበቁ ሊሆን ይችላል ተባለ

ቀን:

በሔለን ተስፋዬ

በዓለም የኮሮና ቫይረስ የመከሰቱ ምክንያት የሥነ ምኅዳር አለመጠበቅ ሊሆን እንደሚችል የኢትዮጵያ ብዝኃ ሕይወት ኢንስቲትዩት አስታወቀ፡፡

የዘንድሮውን የዓለም ብዝኃ ሕይወት ቀን ምክንያት በማድረግ የኢንስቲትዩቱ ከፍተኛ አመራሮች እንደገለጹት የአካባቢ ተፈጥሮ በአግባቡ ባለመጠበቁ ለወረርሽኝ መከሰት አንዱ ምክንያት ይሆናል፡፡

የኢንስቲትዩቱ ዋና ዳይሬክተር መለሰ ማሪዮ (ዶ/ር) በምሳሌነት ያነሱት፣ እ.ኤ.አ. 1990ዎቹ በማሌዥያ ላይ ኒፓህ የሚባል ነርቭን የሚይዝ ቫይረስ የተከሰተው ከሌሊት ወፍ ወደ አሳማ፣ ከዚያ ወደ ሰው ልጅ የተዛመተው ከደን ጭፍጨፋ ጋር ተያይዞ ነው፡፡

ደኑ በመጨፍጨፉ የሌሊት ወፎች ሰዎች በሚኖሩበት አካባቢ በማንጎ ማሳ ላይ መኖር ሲጀምሩ፣ በቦታው የሚረቡ አሳማዎች የእነሱን ትርፍራፊና ዕዳሪ በመመገባቸው ቫይረሱ በቀላሉ ወደ ሰው ልጅ ሊደርስ እንደቻለ መለሰ (ዶ/ር) አብራርተዋል፡፡

የአካባቢ ተፈጥሮ ቢጠበቅ ኖሮ በበሽታው ብዙ ሰዎች ባልተያዙ ነበር የሚሉት ዋና ዳይሬክተሩ፣ ለኮሮና ቫይረስም እስካሁን ይኼ ነው የሚባል መንስዔ ባይታወቅም ሥነ ምኅዳር ያለ መጠበቁ ትልቁን ቦታ ይይዛል ይላሉ፡፡

 የኢንስቲትዩቱ ምክትል ዋና ዳይሬክተር ፈለቀ ወልደየስ (ዶ/ር) በበኩላቸው፣ የሰው ልጅ ሥርዓት ባለው መልኩ ተፈጥሮን መጠቀም ሲያቆም ተፈጥሮ በራሱ ምላሽ የመስጠቱ ማሳያ የኮሮና የቫይረስ መከሰት ሊሆን ይችላል ብለዋል፡፡

በብዙ ዓለም አቀፍ መገናኛ ብዙኃን ከኮሮና ቫይረስ ጋር በተያያዘ የቫይረሱ መከሰት በጎ ጎን ተብሎ ከተዘገበው መካከል፣ የሰው ልጅ ከተፈጥሮ ጋር የሰው ልጅ ያለውን ግንኙነት እንዲፈትሽ አድርጓል የሚለው ሊታሰብበት ይገባል ያሉት ፈለቀ (ዶ/ር) ናቸው፡፡

ሥርዓተ ምኅዳር ማለትም ደን፣ እንስሳት፣ አየር፣ ውኃ እነዚህ ሁሉ ጤናማ ካልሆኑ የሰው ልጅ ሕይወትን አደጋ ላይ ሊጥል እንደሚችል ኮሮና ማስተማሪያ ሊሆን እንደሚችል ገልጸዋል፡፡

ዋና ዳይሬክተሩ በበኩላቸው የበረሃ አንበጣን በምሳሌነት አንስተው ለዚህ ችግር ዋናው መፍትሔው ተፈጥሮን መንከባከብና አለመጋፋት ነው ብለዋል፡፡

ኢንስቲትዩቱ በተለያዩ አካባቢዎች የደን፣ አዝርዕትና ሌሎች የብዝኃ ሕይወት ዓይነቶችን የመጠበቅና የመንከባከብ ሥራ እየሠራ፣ እንደሆነ እንዲሁም በመጥፋት ላይ ያሉ ሰብሎች እንዲያንሰራሩ በማድረግ፣ ዘርን በማሻሻል ባጠቃላይ ከ80’000 በላይ የዘር ናሙናዎች ማስቀመጡን አስታውቋል፡፡

የዓለም የብዝኃ ሕይወት ቀን ከግንቦት 10 እስከ 14 ቀን ‹‹ተፈጥሮ የመፍትሔዎቻችን ምንጭ ናት›› በሚል መሪ ቃል እንደሚከበር ያስታወቀው ኢንስቲትዩቱ፣ ባጋጣሚውም ዝቅተኛ የኑሮ ደረጃ ላይ ለሚገኙ ለ100 አባወራዎች ማዕድ በማጋራት እንዲሁም በአገሪቱ የተከሰተውን የደም አቅርቦት እጥረት ታሳቢ በማድረግ ደም በመለገስ እንደሚከበር ግንቦት 7 በሰጠው ጋዜጣዊ መግለጫው ገልጿል፡፡

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

ሚዲያው በሕዝብ የህሊና ችሎት ከተዳኘ በቂ ነው!

መሰንበቻውን ድንገት ሳይታሰብ ያለ ማስጠንቀቂያ ጠቅላይ ሚኒስትር ዓብይ አህመድ...

የባህር በር ጉዳይ

በታምሩ ወንድም አገኘሁ ድሮ ድሮ ገና ልጅ ሆኜ ፊደል እንደቆጠርኩ...

አገሩ ፖለቲካዊ ስክነትና መደማማጥ ያስፈልገዋል

በንጉሥ ወዳጀነው    ኢትዮጵያ የሁላችንም የጋራ ቤት ነች፡፡ ‹‹ጥያቄዬ ተመለሰልኝ››፣...

የመንግሥት የሰብዓዊ መብት ተቋም ለምን የመንግሥት ሚዲያን ማስተማር አቃተው

በገነት ዓለሙ የአገራችን የ2016 የበጀት ዓመት መሰናበቻና የአዲሱ የ2017 በጀት...