Wednesday, September 28, 2022
ሌሎች ዓምዶች
    - Advertisement -
    - Advertisement -
    ዜናግብፅና ሱዳን የህዳሴ ግድቡን የውኃ ሙሌት ዕቅድ የያዘ ሰነድ እንዲላክላቸው እንደማይፈልጉ ገለጹ

    ግብፅና ሱዳን የህዳሴ ግድቡን የውኃ ሙሌት ዕቅድ የያዘ ሰነድ እንዲላክላቸው እንደማይፈልጉ ገለጹ

    ቀን:

    ኢትዮጵያ የህዳሴ ግድብ የውኃ ሙሌት ዕቅድን የያዘ ሰነድ ለሁለቱ የታችኞቹ የዓባይ ተፋሰስ አገሮች ለመላክ ጥያቄ ብታቀርብም፣ አገሮቹ ሰነዱ እንዲላክላቸው እንደማይፈልጉ አስታወቁ።

    በኢትዮጵያ የውኃ መስኖና ኢነርጂ ሚኒስቴርና በውጭ ጉዳይ ሚኒስቴር አማካይነት የተሰናዳው የታላቁ ህዳሴ ግድብ የውኃ አሞላል ዕቅድና ሥነ ሥርዓት ያካተተ ሰነድ የተዘጋጀ መሆኑን የገለጹት ለጉዳዩ ቅርብ የሆኑ ስማቸው እንዳይገለጽ የጠየቁ የሪፖርተር ምንጭ እንደገለጹት፣ በዚህ የኢትዮጵያ ሰነድ ላይ ድርድር ለማድረግ እንዲረዳቸው ለግብፅና ለሱዳን መንግሥታት ሰነዱን ለመላክ ከጥቂት ሳምንታት በፊት ጥያቄ መቅረቡን ገልጸዋል። ይሁን እንጂ ሁለቱም አገሮች ሰነዱ እንዲላክላቸው እንደማይፈልጉ ምላሽ መስጠታቸውን ጠቁመዋል።

    በሱዳን በኩል የነበረው ምክንያት የግድቡን የውኃ ሙሌት አስመልክቶ የሚደረገው ድርድር እንደ አዲስ መጀመር ሳይሆን፣ በአሜሪካ ሲካሄድ ቆይቶ ከተቋረጠው ሊቀጥል ይገባል የሚል እንደሆነ ምንጩ ገልጸዋል። የሱዳን መንግሥትም ይህንኑ አቋሙን ሰሞኑን በይፋ አስታውቋል።

    ከዚህ በተጨማሪም በህዳሴ ግድቡ ግንባታ ላይ የደኅንነት ሥጋት እንዳላት፣ ይህም ጉዳይ መፍትሔ ሳያገኝ ኢትዮጵያ የግድቡን የውኃ ሙሌት መጀመር እንደሌለባት ሱዳን ሰሞኑን አስታውቃለች።

    በጉዳዩ ላይ ሪፖርተር ያነጋገራቸው እኚሁ ለጉዳዩ ቅርበት ያላቸው ምንጭ ግን ሱዳን ያነሳቸው ይህ ጥያቄ የግድቡ ግንባታ በተጀመረበት የመጀመርያው ዓመት ላይ፣ ዓለም አቀፍ የባለሙያዎች ቡድን የአንድ ዓመት የጥናት ውጤት የለያቸው የማሻሻያ ምክረ ሐሳቦች ላይ ተመሥርቶ የተፈጠረ እንደነበር አስረድተዋል። ዓለም አቀፍ ባለሙያዎቹ ከግድቡ የግንባታ ጥራት ደረጃና በሱዳን ላይ ከሚፈጥረው ሥጋት ጋር አያይዘው፣ በወቅቱ የሰጡት መሠረታዊ ምክረ ሐሳብ የኮርቻ ግድቡን የሚመለከት እንደነበር ገልጸዋል።

    በወቅቱ የተሰጠው ምክረ ሐሳብ የኮሮቻ ግድቡ የአለት ግንባታ በመሆኑ ግድቡ ውኃ በሚይዝበት ወቅት ውኃ ሊያሰርግ እንደሚችል፣ ይህም በሒደት የኮርቻ ግድቡን ሊጎዳ ስለሚችል ከወዲሁ መልስ እንዲሰጠው የሚጠይቅ ነበር ብለዋል።

    በዚሁ መሠረት ኢትዮጵያ ማስተካከያዎችን ማድረጓን ከተወሰዱት የማስተካከያ ዕርምጃዎች መካከል ለውኃው የሚጋለጠው የኮርቻ ግድቡ ክፍል ውኃ የማያሰርግ ማቴሪያል (የግንባታ ቁስ) እንዲሸፈንና ከዚያ በላይ ደግሞ ሙሉ በሙሉ በኮንክሪት እንዲለበጥ ተደርጎ መልስ ማግኘቱን ገልጸዋል።

    በመሆኑም በዚህ ያለቀ ጉዳይ ላይ እንደ አዲስ ነገር ከሱዳን የተሰማው ድምፅ ፖለቲካዊ እንጂ፣ በተወሰደው መፍትሔ ሥጋቱ መቀረፉን ተረድተው ላለፉት ዓመታት አንስታው የማታውቀው እንደሆነ ተናግረዋል።

    ጠቅላይ ሚኒስትር ዓብይ አህመድ (ዶ/ር) ግንቦት 3 ቀን 2012 ዓ.ም. በሰበሰቡት የታላቁ ኢትዮጵያ ህዳሴ ግድብ ብሔራዊ ምክር ቤት፣ የግድቡን የግንባታ ደረጃና ከዚሁ ጋር የተያያዙ አጠቃላይ ፖለታካዊ ጉዳዮችን አስመልክቶ ውይይት ማድረጉ ይታወሳል። በዚህ ውይይት መደምደሚያም ኢትዮጵያ የህዳሴ ግድብ የውኃ አሞላልና አለቃቀን በተመለከተ በአሜሪካ ‹‹አሸማጋይነት›› ሲካሄድ ቆይቶ ያለ ስምምነት ወደ ተቋረጠው መድረክ እንደማትመለስ ስምምነት ተደርሶ አቋሟ ይፋ ተደርጓል።

    የዚህን ውይይት አስመልክቶ የውኃ፣ መስኖና ኢነርጂ ሚኒስትሩ ስለሺ በቀለ (ዶ/ር) በሰጡት አስተያየት፣ በአሜሪካና በዓለም ባንክ ታዛቢነት በግድቡ የውኃ አሞላልና አለቃቀቅ ዙሪያ በኢትዮጵያ፣ በግብፅና በሱዳን መካከል ሲደረግ የቆየው ድርድር ወደ ስምምነት የማያደርስ በመሆኑ እንደተቋረጠ መቅረቱን ገልጸዋል።

    በቀጣይ ሊኖር የሚችለው ድርድር በሚመለከታቸው ሦስቱ አገሮች መካከል ብቻ እንደሚሆን የጠቆሙት ሚኒስትሩ፣ ይህም የሚሆነው ሦስቱም አገሮች ተስማምተው በሚቀበሉት አሸማጋይ ብቻ እንደሆነ ጠቁመዋል። አሸማጋይ የማስገባት ጉዳይ አስፈላጊ ከሆነ ኢትዮጵያ እንደ ከዚህ ቀደሙ ወደ አሜሪካ የመሄድ ፍላጎትን እንደማትቀበል አስረድተዋል። እንደ እሳቸው ገለጻ የተሻለ አሸማጋይ ከአፍሪካ ሊመረጥ ይችላል፡፡ የኢትዮጵያ መንግሥት ፍላጎትም ወደ አፍሪካ መመለስ እንደሆነ አመላክተዋል።

    በኢትዮጵያ በኩል ለድርድር የተያዘው ቀዳሚ አማራጭ በቀጣዮቹ ሁለት ዓመታት የሚካሄደውን የመጀመርያ ዙር የውኃ ሙሌት ሥነ ሥርዓት አስመልክቶ መወያየት ሲሆን፣ ለዚህም የሚረዳ ሰነድ በኢትዮጵያ በኩል ተሰናድቷል።

    አጠቃላይ የግድቡን የውኃ ሙሌትና አለቃቀቅ በተመለከተ የመጀመርያው ሙሌት ከተጠናቀቀ በኋላ፣ በሒደት ድርድር እንዲደረግበት በቀዳሚ አማራጭነት መያዙን መዘገባችን ይታወሳል።

    - Advertisement -

    ይመዝገቡ

    spot_img
    spot_img

    ተዛማጅ ጽሑፎች
    ተዛማጅ

    ‹‹ለሰላምና ለዕርቅ መሸነፍ የለብንም›› ብፁዕ ወቅዱስ ፓትርያርክ አቡነ ማትያስ ቀዳማዊ

    የሰው ልጅ ጠብን በዕርቅ፣ በደልን በይቅርታ፣ ድህነትን በልማት፣ ክህደትን...

    መፍትሔ አልባ ጉዞ የትም አያደርስም!

    ኢትዮጵያ ችግሮቿን የሚቀርፉ አገር በቀል መፍትሔዎች ላይ ማተኮር ይኖርባታል፡፡...

    ጦርነቱና ውስጣዊ ችግሮች

    መስከረም 14 ቀን 2015 ዓ.ም. የመንግሥት ኮሙዩኒኬሽን አገልግሎት ባወጣው...