Saturday, January 28, 2023

ሕፃናትን አስገድዶ በመድፈር ወንጀል የተከሰሱ እስከ 25 ዓመት ጽኑ እስራት እንዲቀጡ ተፈረደባቸው

- Advertisement -spot_img

በብዛት የተነበቡ

ባለፉት ሦስት ወራት ከኮሮና ቫይረስ ወረርሽኝ ጋር በተያያዘ ሕፃናትን አስገድዶ በመድፈር ወንጀል በተጠረጠሩ ግለሰቦች ላይ ከተከፈቱ 40 የክስ መዝገቦች ውስጥ፣ በስምንቱ ላይ ከ11 እስከ 25 ዓመት ከዘጠኝ ወራት የሚደርስ የጽኑ እስራት ቅጣት ተወሰነ፡፡

በአቃቂ ቃሊቲ ክፍለ ከተማ ወረዳ አሥር ክልል ውስጥ ተከራይቶ በሚኖርበት ቤት ውስጥ የስምንትና የዘጠኝ ዓመት ሁለት ሕፃናትን አስገድዶ መድፈሩ በማስረጃ ተረጋግጦበታል የተባለ ግለሰብ፣ በ25 ዓመታት እስራት እንዲቀጣ የቅጣት ውሳኔ ተሰጥቷል፡፡

የፌዴራል ጠቅላይ ዓቃቤ ሕግ በግለሰቡ ላይ አራት ክሶችን መሥርቶ በሁሉም ጥፋተኛ መባሉን፣ የፌዴራል የመጀመርያ ደረጃ ፍርድ ቤት አቃቂ ቃሊቲ ምድብ ችሎት ሰኔ 16 ቀን 2012 ዓ.ም. የሰጠው ውሳኔ ያስረዳል፡፡ ግለሰቡ በሕፃናቱ ላይ የፈጸመው የአስገድዶ መድፈር ድርጊት የወንጀል ሕግ አንቀጽ 627(1)ን ተላልፎ መሆኑ በመረጋገጡ፣ የቅጣቱ የመጨረሻው ጣሪያ እንደተወሰነበትም የውሳኔ ሰነዱ ያስረዳል፡፡

ግለሰቡ በተከሰሰባቸው አራት ክሶች ጥፋተኛ ሆኖ በመገኘቱ በድምሩ 60 ዓመታት እንዲታሰር የተፈረደበት ቢሆንም በኢትዮጵያ ሕግ የወንጀል ቅጣት ጥግ 25 ዓመታት፣ ዕድሜ ልክና ሞት በመሆኑ፣ የመጨረሻውን 25 ዓመታት ጽኑ እስራት እንዲቀጣ ተወስኖበታል፡፡

ሌሎች ግለሰቦችም እስከ 11 ዓመት ከዘጠኝ ወራት በሚደርስ ጽኑ እስራት እንዲቀጡ ውሳኔ መስጠቱን፣ ጠቅላይ ዓቃቤ ሕግ አዳነች አቤቤ በትዊተር ገጻቸው አረጋግጠዋል፡፡  

በሌላ በኩል በኮሮና ቫይረስ ምክንያት ሕፃናት ትምህርት አቁመው በቤት ውስጥ በነበሩበት ከመጋቢት ወር 2012 ዓ.ም. ጀምሮ፣ ከመቶ በላይ ሴትና ወንድ ሕፃናት በዘመዶቻቸውና በአባቶቻቸው መደፈራቸው መገለጹ ይታወሳል፡፡ በአቃቂ ቃሊቲም 19 የምርመራ መዝገቦች ለዓቃቤ ሕግ ቀርበው፣ በስምንት መዝገቦች ላይ ክስ ተመሥርቶ በሒደት ላይ መሆኑ ተጠቁሟል፡፡

spot_img
- Advertisement -

ትኩስ ጽሑፎች

ተዛማጅ ጽሑፎች

- Advertisement -
- Advertisement -