Wednesday, October 5, 2022
ሌሎች ዓምዶች
    - Advertisment -
    - Advertisment -

    የታላቁ ህዳሴ ግድብ ውኃ ሙሌት በፍጥነት ይጀመር!

    ኢትዮጵያውያን በአንድ ልብ መካሪ በአንድ አፍ ተናጋሪ የሆኑበት የታላቁ ህዳሴ ግድብ ውኃ ሙሌት፣ በተያዘለት ቀጠሮ መሠረት በፍጥነት መጀመር አለበት፡፡ ኢትዮጵያ በዓባይ ውኃ የመጠቀም መብቷ ለድርድር የሚቀርብ ካለመሆኑም በላይ፣ ይህንን ተፈጥሯዊ መብቷን ተግባራዊ ለማድረግ የማንንም ፈቃድ አትጠይቅም፡፡ ስለዚህም በአንድ ድምፅ የግድቡ ሙሌት በሐምሌ ወር መጀመር እንዳለበት ወዳጅም ጠላትም ይወቀው፡፡ ኢትዮጵያዊያን ብሔራዊ ፕሮጀክታቸው የሆነው ታላቁ የህዳሴ ግድብ ግንባታ ተጠናቆ፣ አገራቸው ኢትዮጵያ ወደ ሌሎች የልማት መስኮች በስፋት እንድትሰማራ ከመቼውም ጊዜ በላይ መተባበር አለባቸው፡፡ ኢትዮጵያ የሰላም፣ የዴሞክራሲና የእኩልነት አገር እንድትሆን የጋራ ርብርብ ያስፈልጋል፡፡ ድህነትን ታቅፎ መኖር ያተረፈው ረሃብ፣ ድንቁርና፣ ኋላቀርነትና ተስፋ ቢስነትን ብቻ ነው፡፡ ኢትዮጵያ ለላይኞቹም ሆኑ ለታችኞቹ የዓባይ ተፋሰስ አገሮች በምክንያታዊነትና በፍትሐዊነት የተጠቃሚነት መርህ መሠረት፣ የዓባይን ውኃ በመጠቀም በመተሳሰብ መልማት እንደሚቻል አርዓያ መሆን አለባት፡፡ አንዱ ሌላውን ሳይጎዳ የሚያድግበት መደላድል እንዲፈጠርም የግብፅን ለከት የለሽ ስግብግብነትና የበላይነት ስሜት በመስበር፣ የአካባቢው አገሮች በእኩልነት የመጠቀም መብት እንዳላቸው ፋና ወጊ መሆንም ይጠበቅባታል፡፡ ይህንንም በገቢር ለማሳየት የታላቁ ህዳሴ ግድብ ውኃ ሙሌት በተያዘው ጊዜ ሰሌዳ መሠረት ይጀመር፡፡ ከግብፅ ጋር በመዳረቅ ጊዜ ማጥፋት አያስፈልግም፡፡ ግብፅ ሰሞኑን በተባበሩት መንግሥታት ድርጅት (ተመድ) የፀጥታው ምክር ቤት አቤቱታ ብታቀርብም፣ ወደ ሦስትዮሽ ድርድሩ ተመለሽ መባሏ ለኢትዮጵያ ታላቅ ድል ነው፡፡ ስለዚህ ግድቡን ውኃ እየሞላን ነው ድርድር መቀመጥ ያለብን ተብሎ መወሰን አለበት፡፡ ከአሁን በኋላ ቀልድ የለም፡፡

    ከዚህ ቀደም ግብፅ የተፋሰሱ አገሮችን በመናቅ የውኃው ብቸኛ ባለቤት የሆነች እስኪመስል ድረስ በርካታ ግፎችን ፈጽማለች፡፡ ለዓባይ ውኃ 86 በመቶ የምታመነጨውን ኢትዮጵያን በሐሰት ስሟን በማጥፋት፣ ውስጣዊ ሰላሟን በመንሳት፣ ብድርና ዕርዳታ በማስከልከል፣ የተለያዩ ፕሮጀክቶቿን በማደናቀፍና በሌሎች ርኩሰት በተሞላባቸው ድርጊቶች በኢትዮጵያ ላይ ከፍተኛ በደሎች ፈጽማለች፡፡ በተለያዩ ጊዜያትም በቀጥተኛና በእጅ አዙር ወረራዎችና ጥቃቶች ተፈታትናታለች፡፡ ኢትዮጵያ እነዚህ ሁሉ ግፎች ተፈጽመውባት አንድም ቀን የግብፅን ሕዝብ ለመጉዳት አስባ አታውቅም፡፡ የዓባይን ውኃ ከተለያዩ ገባሮቹ በመጥለፍ የአፀፋ ዕርምጃ ለመውሰድ አልሞከረችም፡፡ ምስኪኑ የግብፅ ሕዝብ ሰይጣናዊ ድርጊቶችን በሚፈጽሙት መንግሥታቶቹ ምክንያት መቀጣት ስለሌለበት፣ የኢትዮጵያ ሕዝብ በርካታ በደሎችን በትዕግሥት አሳልፏል፡፡ አሁን ግን በተለይ የግብፅ መንግሥት ሹማምንት፣ ፖለቲከኞችና ሚዲያዎች ለከት የሌለው ውሸትና ረብ የሌለው ፕሮፓጋንዳ መቆም አለበት፡፡ ኢትዮጵያ በታሪክ ለመጀመርያ ጊዜ በዓባይ ወንዝ ላይ የኤሌክትሪክ ኃይል ማመንጫ ግድብ ስትሠራ ይህ ነው የሚባል ጉዳት እንደማታደርስ እየታወቀ፣ ከግብፅ በኩል የሚሰማው የጦርነት ነጋሪት ጉሰማና ማስፈራሪያ ሊያበቃ ይገባል፡፡ ይህ በአካባቢው ላይ የበላይ ሆኜ እንደፈለግኩ ካልሆንኩ የሚለው ጥጋብ መብረድ አለበት፡፡ መፍትሔውም የግድቡን ሙሌት መጀመር ብቻ ነው፡፡ ይህ ለድርድር የማይቀርብ የኢትዮጵያዊያን የጋራ ውሳኔ እንደሆነ ዓለም ሊያውቀው ይገባል፡፡ ከግብፅ ጋር የተጀመረው ገመድ መጓተት ማብቃት አለበት፡፡ በግብፅ የተለመደ መሰሪነት መበለጥ አያስፈልግም፡፡

    ኢትዮጵያ፣ ሱዳንና ግብፅ የግድቡ ግንባታ ከተጀመረ ጊዜ ጀምሮ ላላፉት ዘጠኝ ዓመታት በርካታ ውይይቶችንና ድርድሮችን አካሂደዋል፡፡ የጋራ የባለሙያዎች የቴክኒክ ቡድን በመመሥረትና አማካሪ ኩባንያዎችን በመቅጠር በርካታ ሥራዎችን አከናውነዋል፡፡ ችግሮች ሲያጋጥሙም እስከ መሪዎች ድረስ የሚፈቱበት አሠራር ዘርግተዋል፡፡ የውኃ የውጭ ጉዳይ ሚኒስትሮቻቸው ብቻ ሳይሆኑ፣ መሪዎች ጭምር በጋራና በተናጠል እየተገናኙ በተደጋጋሚ መክረዋል፡፡ ይህ ሁሉ የሆነው በኢትዮጵያ መልካም ፈቃድና ግልጽነት ነው፡፡ ግብፅ አስዋንን ጨምሮ በርካታ ግድቦችንና ፕሮጀክቶችን ስትገነባም ሆነ ስታካሂድ ማንንም አማክራ አታውቅም፡፡ ለዓባይ ተፋሰስ የተፈጥሮ ሀብት ጥበቃና እንክብካቤ አንዳችም አስተዋፅኦ ስታደርግ አትታወቅም፡፡ ሌላው ቀርቶ ለዓባይ ወንዝ የጀርባ አጥንት የሆነው ታላቁ የጣና ሐይቅ በእንቦጭ አረም ሲወረር እንኳ ዞር ብላ አላየችም፡፡ ለተፈጥሮ ሀብት ጥበቃ ደንታ የላትም፡፡ ለተፋሰሱ ዜሮ ድርሻ ኖሯት ከማንኛቸውም አገሮች በላይ እየተጠቀመች፣ የተፋሰሱ አገሮች ትንሽ ፕሮጀክት ሲጀምሩ ፉከራዋ አይቻልም፡፡ አንድም ቀን ከቅኝ ግዛት ስምምነት ውጪ አንዳችም ነገር እንዳይፈጸም የምትፈልገው ግብፅ፣ ጩኸቷ ግን ከማንም በላይ ተሰሚነት አግኝቶ እንደፈለገች እየፏለለች ነው፡፡ ይህ ደግሞ ኢትዮጵያን ጨምሮ ሌሎች የተፋሰሱ አገሮች ባሳዩት ግዴለሽነትና ለዘብተኝነት ነው፡፡ ከአሁን በኋላ አሳዛኙ የታሪክ ምዕራፍ መዘጋት አለበት፡፡ ኢትዮጵያ ግድቧን ውኃ መሙላት ስትጀምር ግብፅ ልክ ትገባለች፡፡

    እስካሁን በሦስቱ አገሮች መካከል የተደረጉት ድርድሮች ውጤት አልባ ናቸው ማለት ይቻላል፡፡ ምክንያቱም ግብፅ የምትፈልገው የኢትዮጵያን ታላቁን የህዳሴ ግድብ መቆጣጠር ነው፡፡ ለዚህም ማሳያው በተደረጉት ድርድሮች ሁሉ ግብፅ የተለያዩ አጀንዳዎችን ይዛ እየቀረበች ውጤት አልባ ማድረጓ ነው፡፡ ‹‹ለአፍሪካዊ ችግሮች አፍሪካዊ መፍትሔዎች›› የሚለውን መርህ በመጣስ፣ ለመካከለኛው ምሥራቅ ፖሊሲ አስፈጻሚነት ተላላኪነቷ የአሜሪካን ድጋፍ ለማግኘት ደባ ፈጽማለች፡፡ አሜሪካም ዓይኗን ጥሬ ጨው አጥባ የኢትዮጵያን ሉዓላዊነት የሚዳፈር ስምምነት አዘጋጅታ ነበር፡፡ ግብፅን ተከትላ የሄደችው ኢትዮጵያ የተቃጣባትን ጥቃት በመሸሽ እንኳን ስምምነቱን ለመፈረም፣ ለድርድርም ድርሽ አልልም በማለቷ የግብፅ ሙከራ ከሸፈ፡፡ ግብፅ ማጣፊያው ሲያጥራት ከአንዴም ሁለቴ ወደ ተባበሩት መንግሥታት ድርጅት (ተመድ) የፀጥታው ምክር ቤት ብታመራም፣ በሦስትዮሽ ድርድሩ መሠረት ፍቺው ተባለች እንጂ ድጋፍ አላገኘችም፡፡ አሜሪካን የተማመነችው ግብፅ በቅርቡ የተጀመረውን የሦስቱን አገሮች ድርድር አደናጋሪ አጀንዳ ይዛ በመቅረብ ዓላማውን ለማሳት ሞክራለች፡፡ የግብፅ ዓላማ ኢትዮጵያ ግድቧን ውኃ መሙላት ከጀመረች የበላይነቷ ስለሚወሰድ፣ በተቻላት መንገድ ሁሉ በማደናቀፍ አንገት ለማስደፋት ነው፡፡ ኢትዮጵያዊያን ደግሞ አንገታቸውን ቀና በማድረግ ስለሆነ የሚታወቁት ግድቡን መሙላት ይጀምራሉ፡፡ ከአሁን በኋላ በግብፅ ሴራ አይደናቀፍም፡፡ ግብፅ በዓለም አቀፍ ደረጃ እየከሰረች ስለሆነ መዘናጋት አይገባም፡፡

    ኢትዮጵያዊያን እስከ ዛሬ በግብፅ የተፈጸሙባቸውን በደሎች መርሳት የለባቸውም፡፡ ይህ ማለት ግን በበቀል በመነሳሳት የግብፅን ሕዝብ መበደል እንደማይገባ የጋራ ግንዛቤ መያዝ ይገባል፡፡ የኢትዮጵያ ሕዝብ የግብፅን ሕዝብ ለመበደል እንደማይፈልግ ግልጽ ነው፡፡ አስቦትም አያውቅም፡፡ ነገር ግን የግብፅን ፖለቲከኞችና ሚዲያዎቻቸውን አፍ ማዘጋት የግድ ነው፡፡ የእነሱ የሐሰት ፕሮፓጋንዳን ቀድሞ በማጋለጥና ነውረኛ ተግባሮቻቸውን በግልጽ በማሳየት ማዋረድ ያስፈልጋል፡፡ ለምሳሌ በጎረቤት አገሮች የጦር ሠፈር በመመሥረት ኢትዮጵያን ለማጥቃት ያላቸውን ፍላጎት ማጋለጥ፣ በኢትዮጵያ የውስጥ ጉዳይ በመግባት በተላላኪዎቻቸው አማካይነት የሚያደርጉትን ጣልቃ ገብነት ገላልጦ ማሳየት፣ ለጋራ ዕድገት ጠንቅ የሆኑ ድርጊቶቻቸውንና ውስጣዊ ችግሮቻቸውን ውጫዊ ለማድረግ የዓባይ ውኃ የጦርነት መቀስቀሻ እንዲሆን የሚፈጽሙትን ደባ እርቃኑን ማስቀረት የግድ ነው፡፡ ኢትዮጵያን ከሱዳን፣ ከደቡብ ሱዳን፣ ከኬንያ፣ ከጂቡቲ፣ ከሶማሊያና ከኤርትራ ጋር ሳይቀር ለማጋጨት እየተከተሉ ያሉትን የጥፋት መንገድ ቀድሞ ማጋለጥ የግድ ይላል፡፡ ለዚህ ነውረኛ ድርጊታቸውም ግድቡን ውኃ በመሙላት መቅጣት ይገባል፡፡ ከዚህ በኋላ ወደ ድርድሩ የሚመጡት የኢትዮጵያን መብት አክብረው እንጂ፣ እንዳሻቸው ለመቦረቅ እንዳልሆነ በትክክል የሚረዱት ቁርጠኛ ስንሆን ብቻ ነው፡፡ ለዚህ ደግሞ ሰሞኑን የደረሰባቸው የዲፕሎማሲ ሽንፈት አበረታች ነው፡፡

    የኢትዮጵያ መንግሥት፣ ዲፕሎማቶች፣ የውኃና የጂኦ ፖለቲክስ ባለሙያዎች፣ ፖለቲከኞች፣ በተለያዩ መስኮች የተሰማሩ ባለሙያዎችና እያንዳንዱ አገር ወዳድ ዜጋ የአገር ብሔራዊ ደኅንነትና ጥቅም የሚከበረው በአንድነት በመቆም ብቻ እንደሆነ ሊረዱ ይገባል፡፡ አሁን ከአገር ህልውና በፊት የሚቀድም ምንም ነገር እንደሌለ በመረዳት ሙሉ ጊዜያቸውን ለኢትዮጵያ ደኅንነትና ጥቅም ብቻ ሙሉ ጊዜያቸውን መሰዋት ይጠበቅባቸዋል፡፡ ኢትዮጵያ ከድህነት ካልወጣች ማንም አያከብራትም፡፡ በዓለም አደባባይ ተደማጭነት የሚገኘው በተባበረ ክንድ ከድህነት በመውጣት ብቻ ነው፡፡ ውስጣዊ ችግሮችን በሰላማዊና በዴሞክራሲያዊ መንገድ በመፍታት ለታላቁ ህዳሴ ግድብ ግንባታ በስኬት መጠናቀቅ መረባረብ የግድ ነው፡፡ ይህ ግድብ በግብፅ ተንኮል ተደናቀፈ ማለት ለኢትዮጵያዊያን ውርደት ነው፡፡ ግድቡ በተያዘለት መርሐ ግብር የውኃ ሙሌቱ አልተጀመረም ማለት ከሞት የማይተናነስ መርዶ ነው፡፡ ግብፅ ውስጣዊ ሰላማችንን የምትነሳን፣ በጎረቤት አገሮች የጦር ሠፈር ለመመሥረት በማቀድ የምታስፈራራንና አሜሪካን ከጎኗ በማሠለፍ ጫና የምትፈጥረው ግድቡ በተያዘለት ቀጠሮ መሠረት ውኃ እንዳይሞላ ለማድረግ ነው፡፡ የኢትዮጵያን አንገት በማስደፋት በአካባቢው ብቸኛ ኃይል በመሆን ለማንበርከክ ነው፡፡ ኢትዮጵያዊያን ደግሞ እንዲህ ያለውን ውርደት የማንቀበል መሆናችንን ማሳየት የምንችለው፣ ውስጣዊ ችግሮቻችንን በሰላማዊ መንገድ መልክ አስይዘን ስንተባበር ብቻ ነው፡፡ በጠላት ፊት እርስ በርስ የምንበላላበትን አሳፋሪ የታሪክ ምዕራፍ መዝጋት አለብን፡፡ ግብፅ ውስጣዊ ችግሯን በግድባችን መስዋዕትነት በመፍታት በእኛ መበላላት ከመሳቋ በፊት፣ እኛ ቀድመናት ታሪክ በመሥራት እናሳፍራት፡፡ ታላቁ የህዳሴ ግድብን በመሙላት ታሪክ በመሥራት የተፋሰሱን አገሮች እናንቃ፡፡ ግብፅን መከተል ትተን እንቅደማት፡፡ ታሪክ ሠሪ ትውልድ በመሆን ለመጪው ትውልድ ቅርስ እናኑር፡፡ ኢትዮጵያ በዲፕሎማሲውም ሆነ በፖለቲካው መስክ የበላይነት እየያዘች ለመሆኑ፣ ሰሞኑን በተመድ የፀጥታው ምክር ቤት ግብፅ ወደ ድርድሩ እንድትመለስ በአባል አገሮች መወሰኑ አንዱ ማሳያ ነው፡፡ ግብፅ ወደ ድርድሩ ስትመጣም የኢትዮጵያን መብት አክብራ መሆን ስላለበት፣ የታላቁ ህዳሴ ግድብ ውኃ ሙሌት በፍጥነት ይጀመር!

    በብዛት የተነበቡ ፅሁፎች

    አገር የሚገቡ የግል ዕቃዎችን በሚገድበው መመርያ ምክንያት በርካታ ንብረቶች በጉምሩክ መያዛቸው ተገለጸ

    በአየር መንገድ ተጓዦች ወደ አገር የሚገቡትን የግል መገልገያ ዕቃዎች...

    በዕድሳት ምክንያት የተዘጋው የአዲስ አበባ ስታዲየም በቅርቡ ለአገልግሎት ክፍት ይሆናል

    የአደይ አበባ ስታዲየም ግንባታ በሚፈለገው ልክ እየተከናወነ እንዳልሆነ ተገልጿል ከስፖርታዊ...

    የአፍሪካ ሕብረት የሰላም ንግግሩን ለማስጀመር ያቀረበውን ጥሪ መንግስት ተቀበለ

    የአፍሪካ ሕብረት በፌደራል መንግስትና በህወሃት መካከል የሰላም ንግግር እንዲጀመር...

    የንብረት ታክስ ጉዳይ በሁለቱ ምክር ቤቶች የጋራ ጉባዔ ቀዳሚ አጀንዳ ይሆናል ተባለ

    መስከረም 30 ቀን 2015 ዓ.ም. በሚጀምረው የሕዝብ ተወካዮችና የፌዴሬሽን...
    - Advertisment -

    ትኩስ ፅሁፎች