Monday, March 27, 2023
- Advertisement -
- Advertisement -
ስፖርት​​​​​​​ሲኤምሲ የሚገኘው የካፍ አካዴሚ የባለቤትነት ጉዳይ እምን ላይ ደርሷል?

​​​​​​​ሲኤምሲ የሚገኘው የካፍ አካዴሚ የባለቤትነት ጉዳይ እምን ላይ ደርሷል?

ቀን:

ለኢትዮጵያና ለምሥራቅ አፍሪካ አገሮች የእግር ኳስ ዕድገት አስተዋዕኦ እንዲያበረክት በማሰብ ከ15 ዓመታት በፊት ግንባታው በአፍሪካ እግር ኳስ ኮንፌዴሬሽን (ካፍ) ሙሉ ወጪ የተጀመረው፣ የምሥራቅ አፍሪካ ታዳጊ ወጣቶች የእግር ኳስ አካዴሚ ከሰሞኑ በስፖርቱ አካባቢ የመነጋገሪያ አጀንዳ ሆኗል፡፡ የኢትዮጵያ እግር ኳስ ፌዴሬሽን አካዴሚውን ማስተዳደር ይችል ዘንድ ኃላፊነት እንዲሰጠው ካለፈው መስከረም 2012 ዓ.ም. ጀምሮ ጥያቄ ሲያቀርብ መቆየቱ ይነገራል፡፡

ይህ አካዴሚ ከተመሠረተበት ጊዜ አንስቶ የሚገባውን ያህል አስተዋዕኦ አላበረከተም፣ እንዲህም ደግሞ የሚጠበቅበትን ያህል ግንባታዎችን አላከናወነም በሚል ምክንያት ለተጨማሪ የማዘውተሪያ ግንባታ የሚውለው ክፍት ቦታ ካርታው እንዲመክንና መሬቱ ወደ መሬት ባንክ እንዲመለስ ለማድረግ መጀመሪያ የክፍት ቦታው አጥር “ባልታወቁ አካሎች” ተብሎ እንዲፈርስ የተደረገበትን አጋጣሚ መዘገባችን ይታወሳል፡፡

ካፍ  ለኢትዮጵያ እግር ኳስ ብሎም ለክፍለ አኅጉሩ ዕድገት ትልቅ ድርሻ እንዲኖረው በማሰብ በአዲስ አበባ ሲኤምሲ አካባቢ ያስገነባው ይህ አካዴሚ፣ ምንም እንኳን ግንባታው በታሰበው ልክ ተጠናቆ አገልግሎት ለመስጠት ባይታደልም ከዓመታት በኋላ ካርታው እንዲመክንና መሬቱ ወደ መሬት ባንክ እንዲመለስ የሆነበት ምክንያት፣ ባለፉት ዓመታት የሚገባውን ያህል ግንባታና ተያያዥ ሥራዎች አልተከናውኑበትም በሚል እንደሆነ ምንጮች ያስረዳሉ፡፡

ለጉዳዩ ቅርበት ያላቸው እንደሚገልጹት ከሆነ፣ አካዴሚው ለዕለት ዕለት ሥራዎች ማከናወኛ የሚያገለግሉና የሚያስፈልጉ የተወሰኑ ቢሮዎች ካልሆነ በስተቀር አብዛኛው መሬቱ ለእግር ኳስ ማዘውተሪያ አገልግሎት የሚውሉ ሜዳዎችን የሚይዝ ነው፡፡ ምክንያቱም አሁን ላይ መሬቱ አለማም በሚል ወደ መሬት ባንክ እንዲመለስና ካርታውን ለማምከን እየተደረገ ያለው እንቅስቃሴ የአካዴሚን ትርጉም ካለመረዳት የመነጨ ለመሆኑ ማረጋገጫው “ግንባታ የለውም” የሚለው ውኃ የማይቋጥር ውሳኔ መሆኑን በመግለጽ ይሞግታሉ፡፡

“አካዴሚው በካፍ ሙሉ ወጪ የተገነባ ከመሆኑ ባሻገር ካርታ ያለው ቦታ እንዴት መከነ ማለት ይቻላል?” በማለት ማንነታቸው እንዲገለጽ ያልፈለጉ የስፖርቱ ከፍተኛ አመራር፣ የኢትዮጵያ እግር ኳስ ፌዴሬሽን ምንም እንኳን አካዴሚውን በባለቤትነት የማስተዳደር ሙሉ ኃላፊነት ባይሰጠውም ካለፈው መስከረም ጀምሮ የአካዴሚውን የዕለት ዕለት እንቅስቃሴ የሚቆጣጠሩና የሚከታተሉ ሙያተኞችን መድቧል፡፡ የፌዴራል ስፖርት ኮሚሽን በበኩሉ ከሁለት ሚሊዮን ብር በላይ ወጪ በማድረግ አካዴሚው አንዳንድ የተጓደሉ መሠረተ ልማቶች እንዲሟሉለትና ለአገልግሎት ክፍት እንዲሆን ጥረት ሲያደርግ መቆየቱ ይታወቃል፡፡

የቀድሞው የስፖርት ኮሚሽነር አቶ ርስቱ ይርዳው፣ የአካዴሚው ኃላፊነት ለኢትዮጵያ እግር ኳስ ፌዴሬሽን እንዲሆን በመንግሥት በኩል ትዕዛዝ እንዲተላለፍ ለሚመለከተው አካል የጻፉት ደብዳቤ ግልባጭ በአሁኑ ወቅት በኢትዮጵያ እግር ኳስ ፈዴሬሽን እንደሚገኝ እነዚሁ ምንጮች ለሪፖርተር ገልጸዋል፡፡

የብሔራዊ ፌዴሬሽኑ አመራሮች አካዴሚውን በሚመለከት በወቅቱ ከካፍና ከስፖርት ኮሚሽን ከፍተኛ ኃላፊዎች ጋር የተስማሙባቸው ስምምነቶች ቢኖሩም፣ ስምምነቶቹ ግን ፌዴሬሽኑ አካዴሚውን ሙሉ በሙሉ በባለቤትነት እንዲያስተዳድር የሚያስችሉ ባለመሆናቸው አሁን ለተፈጠረው ችግር ምክንያት እንደሆነ የሚናገሩም አልጠፉም፡፡

ብሔራዊ ፌዴሬሽኑ ባለፉት ዓመታት የሴቶችን ጨምሮ በየደረጃው በመያዝ ሲያዘጋጃቸው ለነበሩ ብሔራዊ ቡድኖች፣ ለሆቴልና መሰል አገልግሎቶች የተጠቀመባቸው ወጪዎችን በፋይናንስ ችግር ክፍያ ያልፈጸመላቸው ተቋማት በርካታ መሆናቸው ይታወቃል፡፡ አንዳንዶቹ ወደ ክስ የሄዱበት አግባብ እንዳለ የሚገልጹት ምንጮች፣ ፌዴሬሽኑ አካዴሚውን ለብሔራዊ ቡድን ዝግጅት አገልግሎት በመጠቀም ከሆቴልና ተያያዥ ዕዳ በዳነ ነበር ሲሉ በስፖርቱ የሚታየውን የቢሮክራሲ ውጣ ውረድ ይተቻሉ፡፡

ግንባታው በመጓተቱ ምክንያት እስካሁን ለአገልግሎት ክፍት እንዳልሆነ የሚነገርለት ይህ አካዴሚ፣ እንዲህም ሆኖ አሁን ላይ አካዴሚው አንድ ዘመናዊ አካዴሚ በውስጡ ሊያሟላቸው የሚገቡ መሠረተ ልማቶችን አሟልቶ የያዘ መሆኑ የአካዴሚው ዳይሬክተር ተድላ ዳኛቸው (ዶ/ር) በተደጋጋሚ ሲናገሩ ይደመጣል፡፡

የአካዴሚው አጥር “ባልታወቁ ሰዎች” ተብሎ መፍረሱ በተነገረ ማግስት የባህልና ቱሪዝም ሚኒስቴር፣ የስፖርት ኮሚሽንና የኢትዮጵያ እግር ኳስ ፌዴሬሽን አመራሮች ተቋሙ በምን ሁኔታ ላይ እንዳለ ባለፈው ሳምንት የመስክ ምልክታ በማድረግ በቅጥር ግቢው የችግኝ ተከላ ፕሮግራም ማከናወናቸው ይታወሳል፡፡

ከሰሞኑ በሚኒስቴሩም ሆነ በኮሚሽኑ ታምኖባቸው ሲነገሩ የሚደመጡ አስተያየቶች፣ የአካዴሚውን ባለቤትነት በሕግ አግባብ ለመጨረስ የሚያስችል እንቅስቃሴ ስለመጀመሩ ነው፡፡ የስፖርት ኮሚሽነር አቶ ኤልያስ ሽኩር የፌዴሬሽኑን ውክልና ወስደው ከካፍ ፕሬዚዳንት አህመድ አህመድ ጋር የቪዲዮ ኮንፈረንስ በማድረግ ጉዳዩን እልባት ለማስያዝ ከስምምነት ይደርሳሉ ተብሎ የሚጠበቀው ጉዳይ ከአስተያየቶቹ በዋናነት እየተጠቀሰ ይገኛል፡፡

የቪዲዮ ውይይቱ በኮቪድ-19 ወረርሽኝ ምክንያት በግብፅ የኢትዮጵያ ኤምባሲ በኩል እንዲሆን የኢትዮጵያ እግር ኳስ ፌዴሬሽን ለካፍ ደብዳቤ መጻፉ ሲታወቅ፣ ከውይይቱ በኋላ አካዴሚውን በሚመለከትም ሁለቱ ኃላፊዎች የሚደርሱበት ማስረጃ ተያይዞ ለውልና ማስረጃ ቀርቦ የአካዴሚው ባለቤትነት የኢትዮጵያ እግር ኳስ ፌዴሬሽን የማስተዳደር መብቱ የሚረጋገጥለት እንደሚሆን ይጠበቃል፡፡

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

ለፋይናንስ ዘርፉ ብቃት ያለው የሰው ኃይል የማፍራት የቤት ሥራን የማቃለል ጅማሮ

የአገሪቱ የፋይናንስ ዘርፍ እያደገ ለመሆኑ ከሚቀርቡ ማስረጃዎች ውስጥ  የግል...

የምድር ባቡርን የሚያነቃቃው የመንግሥት ውሳኔ

በኢትዮጵያ ወደብ አልባነት ላይ የተደመረውን የሎጀስቲክስ ችግር ለመፍታት ግዙፍ...

የፓርላማ አባላት ስለሰላም ስምምነቱ አፈጻጸም ግልጽ መረጃ የለንም አሉ

‹‹ሕወሓትን ለፍረጃ አብቅተውት የነበሩ ጉዳዮች በአብዛኛው መልክ ይዘዋል›› ሬድዋን...