Monday, April 15, 2024
- Advertisement -
- Advertisement -

የተመረጡ ፅሑፎች

የማይሽር ቁስል!

ከሰሞኑ በአዲስ አበባና በኦሮሚያ ከተሞች የተከሰተው አሳዛኝ ተግባር አገራችን በተደጋጋሚ ካስተናገደቻቸው አስከፊ ክስተቶች በጥቁር ጠባሳነት ልንገልጸው የምንችለው ነው፡፡

መነሻውን የድምፃዊ ሃጫሉ ሁንዴሳን ግድያ መነሻ በማድረግ የተከሰው ሁከትና ብጥብጥ ያስከተለው ጥፋት፣ በቶሎ ባይገታ ኖሮ ሊደርስ የሚችለው አደጋ ምን ያህል ሰፊ እንደነበር የታየተበት ነው፡፡ የሟቾችና የቆሰሉ ዜጎች ብዛት በጣም አሳሳቢ ነው፡፡ ነገሩ በቁጥጥር ሥር ባይውል ኖሮ ከሚገለጸው በላይ ሕይወት ሊጠፋና ጉዳትም ሊስተናገድ ይችል ነበር፡፡ በንብረት ላይ የደረሰው ውድመትም ይህንኑ የሚያመላክት ነበር፡፡

አደጋው የቱንም ያህል የከፋ እንዲሆን ቢቀነባበርም በመንግሥትና በሕዝቡ ጥረትና ርብርብ ከደረሰው በላይ ሳይደርስ አልፏል፡፡ የተረጋጋ ሁኔታ እየታየ ቢመጣም በርካቶችን አሁንም ከሥጋት እንዳይወጡ ተፅዕኖ ያሳደረ በመሆኑ፣ ከምንጊዜውም ይልቅ እርግጠኛ መሆን ትልቅ ፈተና የሆነበት ጊዜ ነው፡፡

አገር ለማውደም ሕዝብን ከሕዝብ ለማጋጨት ብዙ ታስቦበት እንደተፈጸመ የሚያመላክተው የሰሞኑ የሽብር ድርጊት፣ በየትኛውም መንገድ ቢታይ ተቃውሞን ለመግለጽ ከተደረገ እንቅስቃሴ አኳያ ለማየት አዳጋች ይሆናል፡፡ ይልቁንም አገር በማሸበር፣ ወንድም በገዛ ወንድሙ ላይ ጎረቤት በአጎራባቹ ላይ እንዲነሳና አንዱ ሌላውን ያለ ርህራሔ እየገደለ፣ ንብረት እያወደመ የተፈጸመው ተግባር የንፁኃን ሰው ግድያ ከመቃወምና ከማውገዝ አኳያ የሚገለጽ አይደለም፡፡ ፖለቲካዊ ቅሬታም በዚህ መንገድ አይገለጽም፡፡ ሕግና መንግሥት ባለበት አገር የንፁኃንን ደም እያፈሰሱ ፖለቲካዊ ትርፍ ማግኘት የኋላ ቀር ተራማጆች ሴራ ነው፡፡

ጥያቄ ያለው አካል ጥያቄውን ሕግና ሥርዓት በሚፈቅድለት መንገድና በሚያመቸው አካሄድ መጠየቅ ሲችል፣ ዱላ፣ ድንጋይ፣ ቦንብና ክላሽ ታጥቆ ያውም የማይመለከታቸውን ሰዎች በመግደል ፖለቲካዊ ጫና ለማሳደር የተኬደበት አኬልዳማዊ መንገድ ሆድ ከማሻቀር በቀር ምንም ዓይነት ምድራዊ ጥቅም ለየትኛውም አካል አያስገኝም፡፡ በመከራና በድህነት ጫንቃ የተገኘ ሀብትና ንብረት እሳት አይለኮስበትም፡፡ ሰዎች በማንነታቸው ብቻ እየተመረጡ፣ ከያሉበት ተወስደው አይገደሉም፡፡ ይህ ከነውረኝነትም በላይ አረመኔያዊነት ነው፡፡ የዚህ ዓይነቱ ፖለቲካዊ ሴራ መርገም ካልሆነ በቀር ምንም አይገልጸውም፡፡

ከሰሞኑ በኢትዮጵያ የሆነው በምንም መመዘኛ ይቅር ሊባል የማይችል ፀያፍነት ነው፡፡ ለዘመናት አብሮ የኖረን ሕዝብ ለማናከስ የተደረገው ሙከራም፣ እስካሁንም ሲሔድ ሲመጣ የታየ የደካሞች ተንኮል ነው፡፡ የታሰበው ቢሳካ ኖሮ ይህች አገር ምን ዓይነት ማጥ ውስጥ ትወድቅ እንደነበር ለመገመት ምሁርነት አያሻውም፡፡

የአገር ሀብትና ንብረት እሳት ሲለቀቅበት ማየት ያሳምማል፡፡ በምንም ምክንያትና ሰበብ ቢሆን፣ የአገር ንብረት ላይ ክብሪት እየጫሩ ማውደም ከጤነኛ ሰዎች የሚመነጭ ተግባር አይሆንም፡፡ አገርን የሚያስብ ይህን ያደርጋል ተብሎ አይጠበቅም፡፡ ጥያቄዬ መልስ ያግኝ ለማለት ሕዝብን እንዲህ ባለው መንገድ እንዲነሳ፣ ዘለው ያልጠገቡ ለግላጋ ታዳጊዎችን ለጥፋት መገፋፋትና ማሰለፍ የጤነኞች ፖለቲካ አይደለም፡፡

በደካማ ኢኮኖሚ ሕዝቧን የምታስታምም አገርና ሕዝብ እንዲህ ያለ ጥፋት አይገባቸውም፡፡ በመከራና በትግል ያውም በስንት ዕርዳታና ልመና እዚህም እዚያም የተገነባውን ሀብትና ንብረት ማውደም ዞሮ ዞሮ የሚጎዳው አጥፊውንም ጭምር ነው፡፡ ትምህርት ቤቶችን ማቃጠል ከጅልነትም በላይ ነው፡፡ እንዲህ ያለ አመለካከት ይዞ ዜጎች ወደ አደባባይ እንዲወጡ መገፋፋት፣ አደገኛ ከመሆን አልፎ ፍላጎትን በዚህ መንገድ ለማሳካት የሚደረግ ጥረት ውጤቱ አጥፊንም ያጠፋዋል፡፡ አሳዛኙና የምን ጊዜም ቁስል የሚሆነው ግን በራስ ወገን በራስ ዜጋ የሚቀጠፈው ሕይወት ዛሬም አለመቆሙ ነው፡፡ በተጋመደና በተዛመደ ሕዝብ መካከል እንዲህ ያሉ፣ ብሔርን ተገን ያደረጉ አደገኛ አካሄዶችን አንግቶ መንቀሳቀስ ልክፍት ነው፡፡ አክራሪ ብሔርተኝነትን በማቀንቀን ሕዝብን በሕዝብ ላይ ለማስነሳት የሚደረግ ትንኮሳ በግልጽ የታየና የብሔር ፖለቲካ ምን ያህል አደገኛ እንደሆነ ያመላከተ፣ ምን ያህል ልጓም እንደሚያሻው ያሳየ አስከፊ ክስተት ሆኗል፡፡

በየመንደሩ የሚፈጠሩ የቡድንተኝነት ፀባዮች በነፃነት ስም በየአደባባዩ እንዲቀነቀኑ ሲደረግ፣ ዘር ተኮር ሚዲያዎች የሚነዙት መርዝ በነፃነት ስም ቸል ሲባልና ተመልካች ሲያጣ፣ ዛሬ ያየነው ጥፋት ላይ አድርሶናል፡፡ ይህንን አደገኛ አካሄድ መስመር ማስያዝ ያስፈልጋል፡፡

በሰሞኑ ሁከት የወደሙ ንብረት ብዙዎች ጥሪታቸውን ከማሳጣት በላይ ቀጥረው ሲያስተዳድሯቸው የነበሩትን ሠራተኞች ከነቤተሰቦቻቸው ለረሃብ አጋልጧል፡፡ በማንነታቸው ብቻ ከመኖሪያቸው የተፈናቀሉ ሰዎችም ከነሥጋታቸው እስከመደበቅ ደርሰዋል፡፡ በገዛ አገራቸው ውስጥ አገር እንደሌላቸው ባይተዋር ሲሆኑ ማየት ያሳምማል፡፡ ደም ያስነባል፡፡

ይህንን አሳዛኝ ቁስል ማከም ያስፈልጋል፡፡ ኢትዮጵያ የሁላችንም መኖሪያ መሆኗን በተግባር ለማሳየትም እነዚህን ወገኖች መደገፍ፣ ማበረታታትና ማቋቋም የግድ ይላል፡፡ የድርጊቱ ፈጻሚዎችን ተጠያቂ ማድረግም የዚሁ አካል ሊሆን ይገባል፡፡ ይህ ብቻ ሳይሆን እንዲህ ያለው ድርጊት እንዳይደገም ማድረግም ሌላው ብርቱ ሥራ ተደርጎ መወሰድ አለበት፡፡

በእርግጥ ከሰሞኑ እንደሰማነው በመንግሥትም ለበጎ ያሉ ባለሀብቶች በሰሞኑ የተጎዱ ወገኖችን ለማቋቋም ጥረቶች እየተደረጉ ነው፡፡ አዎ ይህ አስፈላጊ ዕርምጃ ቢሆንም ከዚህ ጎን ለጎን ዜጎች በየትኛውም የአገሪቱ ክፍል ተንቀሳቅሰው የመሥራት መብታቸው የተጠበቀ እንዲሆን የመንግሥት ዕርምጃ ወሳኝ ነው፡፡

እንዲህ ወጣ ያሉና ከኢትዮጵያዊነት ያፈነገጡ አደገኛ አካሄዶችን ለማረም ብሎም ተንቀሳቅሶ የመሥራት በየትኛውም ቦታ ሀብት አፍርቶ የመኖር መብትን ለመታደግ፣ ከሰሞኑ በደረሰው ጥፋት ለተጎዱ ወገኖች የሚደረገው ድጋፍ ትልቅ ትርጉም የሚሰጠው ጠባሳንም መሻር ተደርጎ ይወሰዳል፡፡

ሕገወጦችን ጉልበት አለን ባዮችን በሕግ አግባብና በሌሎች መንገዶች መወሰድ ያለባቸው ዕርምጃዎች ወሳኝ ናቸው የሚባሉት ነገም ወደተፈለገው አካባቢ ሄዶ ለመሥራት ያበረታል፡፡ አንዳንዴ ንብረት በማውደም ውጤት የሚገኝ የሚመስላቸው አካላት ቆም ብለው ማሰብ ያለባቸው እንዲህ ባለ  አመለካከት አገርን ማሳደግ የማይችል መሆኑ ነው፡፡

ኢንቨስትመንትን ለማስፋት ባለ ሥራ ለመሆን ጭምር ከታሰበ አጠገብ የመጣን ሀብት ማውደም የነገው ትውልድ ላይ ጭምር መፍረድ ነው፡፡ አገር በድህነት እንድትቀጥል መሻማት ጭምር ነው፡፡ ሀብትና ንብረት በማውደም እሳት የሚጫርበት አካባቢ ኢንቨስትመንት ማሰብ አካባቢውን ማጎልበት የማይቻል መሆኑንም ለመገንዘብ ሰው ሆኖ መፈጠርን ብቻ የሚጠይቅ ነው፡፡

አገርን እያጠፉ መብት እንዴት እንደሚጠየቅም ግራ ይገባል፡፡ በመሆኑም የሰሞኑ ድርጊት ብዙ ሊያስተምረን የሚችሉ ነገሮች ያለበት ነው፡፡ በምንም መነሻ ይሁን የአገር ሀብትን እያጠፉ መጓዝ ፖለቲካ አለመሆኑን ማስተማርና በየትኛውም መንገድ በቀጥታም ሆነ በተዘዋዋሪ የዚህ ድርጊት ፈጻሚዎች በሕግ መጠየቅ የግድ ነው፡፡ ለሰሞኑ ችግር በግልጽ ጠንክሮ በቁጥጥር ሥር ካዋላቸው ሰዎች ባሻገር ለችግሩ መባባስ በመንግሥት ውስጥ ያሉ አካላትም አስተዋጽኦ አለው እየተባለ ነውና መንግሥት እነዚህን የውስጥ ሰዎችን ፈትሾ ማፅዳት ይኖርበታል፡፡ ዜጎች በገዛ አገራቸው መሳቀቅ የለባቸውምና ይህንን ሊያረጋግጥ የሚችል ዕርምጃ ከመንግሥት ይጠበቃል፡፡

Latest Posts

- Advertisement -

ወቅታዊ ፅሑፎች

ትኩስ ዜናዎች ለማግኘት