Wednesday, February 1, 2023
- ማስታወቂያ -
- ማስታወቂያ -

ሆቴሎችና ሬስቶራንቶች ለኮሮና መቋቋሚያና ሥራ ማስኬጃ የተፈቀደላቸውን ብድር ማግኘት እንዳልቻሉ ገለጹ

- ማስታወቂያ -

ተዛማጅ ፅሁፎች

የኮሮና ወረርሽኝ በፈጠረው የገበያ መቀዛቀዝ ሳቢያ በተለይ የቱሪስት አገልግሎት ሰጪ የሆኑ ሆቴሎችና ሬስቶራንቶች መንግሥት ለሥራ ማስኬጃ እንዲሰጣቸውን የፈቀደውን ብድር ባንኮች በተገቢው መንገድ ሊያቀርቡላቸው ባለመቻላቸው ለመዝጋትና  ሠራተኞቻቸው ለመበተን የሚያስገድድ ሥጋት ውስጥ እንደወደቁ ተገለጸ፡፡

 የኢትዮጵያ ሆቴልና መሰል አገልግሎት ሰጪ አሠራሮች ፌደሬሽን እንዳስታወቀው፣ ባንኮች በተፈቀደው ልክ ብድር እየሰጡ ባለመሆናቸው ከየክልሎች ችግሩ በቶሎ እንዲቀረፍላቸው ለፌደሬሽኑ ጥያቄ እየቀረበለት ይገኛል፡፡

የኢትዮጵያ ሆቴል መሰል አገልግሎት ሰጪ አሠሪዎች ፌዴሬሽን ፕሬዚዳንት ፍትሕ ወልደ ሰንበት (ዶ/ር)፣ ችግሩ ከፍተኛ ሥጋት እንደፈጠረ ገልጸው፣ የኮሮና ቫይረስ በኢኮኖሚው ላይ በተለይም በሆቴሎችና ቱሪዝም ዘርፍ ላይ ያስከተለውን ጫና ለመቀነስ እንዲሁም ዘርፉን ለማነቃቃት የኢትዮጵያ ብሔራዊ ባንክ ዝቅተኛ ወለድ የሚታሰብበት የሥራ ማስኬጃ ብድር ለሆቴሎች እንዲሰጥ የኢትዮጵያ ንግድ ባንክን ጨምሮ ሁሉም የግል ባንኮች ለደንበኞቻቸው ብድሩን እንዲያቀርቡ በዚህ ዓመት ግንቦት ወር መጀመርያ ላይ በጻፈው ደብዳቤ አስታውቋቸው እንደነበር ፍትሕ (ዶ/ር) አስታውሰዋል፡፡ በብሔራዊ ባንክ መመርያ መሠረት የበሽታው ተፅዕኖ ለስድስት ወራት እንደሚዘልቅ ታሳቢ በተወሰደው ግምት መነሻነት የአምስት በመቶ ወለድ የሚከፈልበት ብድር ከፍተኛ ገዳት ለደረሰባቸው ሆቴሎችና ሬስቶራንቶች እንዲሰጣቸው ተፈቅዶ ነበር፡፡ ይሁን እንጂ አንዳንድ ባንኮች ግን ‹‹የደረሰን ዝርዝር መመርያ የለም፡፡ ይህን ልንተገብር አንችልም፤›› በማለት ብድሩን ለማቅረብ ፈቃደኛ እንዳልሆኑ የሆቴል ባለንብረቶች ይገልጻሉ፡፡

በዚህ የሚስማሙት ፍትሕም (ዶ/ር) ችግሩ ግን በብድሩ አሰጣጥ ላይ በተፈጠረ ክፍተት ምክንያት እንደሚሆንም ግምታቸውን ሰንዝረዋል፡፡ ብሔራዊ ባንክ አምስት በመቶ ወለድ ብቻ ተቀብለው ብድሩን እንዲሰጡ በማለቱ፣ ባንኮቹም ይህንን ለማስተናገድ ፍላጎት ባለማሳየታቸው የተፈጠረ ችግር እንደሆነ ገልጸው፣ ቶሎ ካልተፈታ ግን የሥራ አጥ ቁጥር እንዲበራከት ሰበብ ሊሆን እንደሚችል ሥጋታቸውን ለሪፖርተር ገልጸዋል፡፡

ፌደሬሽኑ ከስድስት ቢሊዮን ብር በላይ የማገገሚያ ብድር ቢጠይቅም፣ ብሔራዊ ባንክ 3.5 ቢሊዮን ብር እንዲሰጣቸው መፍቀዱ አይዘነጋም፡፡ ይህንንም ገንዘብ በአግባቡ ማግኘት አልቻሉም ተብሏል፡፡

አቶ ጌታቸው ሙኑር በሐዋሳ ከተማ የሚገኘው የኬርውድ ሆቴል ሥራ አስኪያጅ ናቸው፡፡ ችግሩ እየከፋ በመምጣቱ ሠራተኞች ሊበተኑ እንደሚችሉ ጠቁመው፣ በዋቢነት ያነሱት ድርጅታቸው ከአንድ ዓመት በፊት በ15 ሚሊዮን ብር ወጪ ኬርውድ ባህላዊ የምግብ አዳራሽ የተሰኘ ሬስቶራንት አስገንብቶና 50 ሠራተኞች ቀጥሮ መንቀሳቀስ በጀመረ በጥቂት ጊዜ ውስጥ ሥራ ለማቆም መገደደቡን ገልጸዋል፡፡ በደቡብ ክልል በተከሰተው ረብሻና ግጭት ወዲያውኑ ለመዘጋት ተገዷል፡፡

ጥቂት ቆይቶ እንደ አዲስ ሥራ ሲጀምርም ኮሮና በመከሰቱ ይህ ነው የሚባል እንቅስቃሴ ማድረግ ሳይችል ዳግመኛ ለመዘጋት መገደዱን ሥራ አስኪያጁ ይገልጻሉ፡፡ ባንኮች የተጠየቁትንና እንዲሰጡ በተላለፈላቸው መመርያ መሠረት ብድር በአግባቡ ሳይሰጡ በቀሩበት ወቅትም፣ ይህንን ሬስቶራንት ጨምሮ በርካታ አገልግሎት ሰጪዎቹ ተቋማት አሁንም ከሌላ ችግር ጋር ለመፋጠጥ ተገደዋል፡፡

አቶ ጌታቸው እንደሚገልጹት፣ በቅርቡ በሻሸመኔ ከተማ በተከሰተው ሁከት ከ100 ሚሊዮን ብር በላይ የወጣበትና 20 የመኝታ ክፍሎች ያሉትን ሆቴል ጨምሮ፣ መጋዘኖችና የጭነት መኪኖች ሙሉ በሙሉ በመጋየታቸው ድርጅቱ ያለአንዳች ገቢ ከ100 በላይ ለሚቆጠሩ ሠራተኞቹ በወር ከ700 መቶ ሺሕ ብር በላይ ደመወዝ እየከፈለ ለመቆየት ሞክሯል፡፡ ይሁን እንጂ በዚህ መንገድ መዝለቁ እንደሚያሳስባቸውና ያደረባቸውንም ሥጋት ለሪፖርተር ገልጸዋል፡፡

እንደ አቶ ጌታቸው ሁሉ አስተያየታቸውን የሰጡት የሐዋሳ ሴንትራል ሆቴል የኮርፖሬት ዘርፍ ማኔጅንግ ዳይሬክተር አቶ ፀጋዬ ወልደ ሰንበት ናቸው፡፡ ከ300 በላይ ለሚሆኑ ሠራተኞች በወር ከአንድ ሚሊዮን ብር በላይ ወጪ በማድረግ ደመወዝና ምግብ በማቅረብ ችግሩን ለማለፍ እየተፍጨረጨረ የሚገኘው ሴንትራል ሆቴል፣  እስከ መጨረሻው ድረስም ሠራተኞቹን ላለመበተን ጥረት እንደሚያደርግ ገልጸዋል፡፡

መንግሥት በተገቢው መንገድ ብድር እንዲለቀቅ ካላደረገ ከፍተኛ አደጋ ሊመጣ  ይችላል ያሉት አቶ ፀጋዬ፣ ‹‹ሆቴል አልጋው ብቻ ሳይሆን፣ በርካታ ስብሰባዎችና፣ ሠርግን የመሳሰሉ በርካታ አገልግሎቶች በማቅረብ የሚሳተፉበት በመሆኑ፣ አንድ ሆቴል ተዘጋ ማለት የሠራተኞች ኑሮ ተዘጋ ማለት ነው፡፡ በዙሪያቸው ያሉ ሰዎች ሁሉ ሥራ ፈት ሆኑ ማለት ነው፤›› በማለት ሥጋታቸውን አስታውቀዋል፡፡

ለኢትዮጵያ ሆቴልና መሰል አገልግሎት ሰጪ አሠሪዎች ፌዴሬሽን መንግሥት ፈቀደው ብድር የት ገባ የሚሉ ጥያቄዎች እየቀረቡለት እንደሚገኝ የገለጹት ፍትሕ (ዶ/ር)፣ በአማራ ክልል የሚገኙ ሆቴሎችም በርካታ ጥያቄዎች እያቀረቡ እንደሚገኙና ብድር ሊለቀቅላቸው እንዳልቻለ በማኅበራቸው በኩል ለፌደሬሽኑ በላኩት ደብዳቤ ማስታወቃቸውን ገልጸዋል፡፡ ‹‹መንግሥት ሠራተኞችን እንዳንበትን በሰጠው አቅጣጫ ለደመወዝ የሚውል ሥራ ማስኬጃ በአምስት በመቶ የወለድ ምጣኔ የብድር አቅርቦት ማመቻቸቱ ይታወቃል፡፡ እኛም የተባለውን መሥፈርት አሟልተን ወደ የባንኮች ቅርንጫፍ ብንመላለስም ሰሚ አላገኘንም፡፡ ገበያ በጠፋበት በአሁኑ ወቅት የሠራተኛ ደመወዝና ሌሎችም ወጪዎች ከቀን ወደ ቀን አቅማችንን እየተፈታተኑት ይገኛሉ›› የሚሉ የማስጠንቀቂያ ደብዳቤዎች እየደረሱት ስለመሆኑ ፌደሬሽኑ አስታውቋል፡፡  

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች